Won do swěta běch sej za lěto 2014 předewzała. Podach so tuž ze studijnej přećelku do Marokka. Prěnja nóc w cuzbje wšak njebě tajka, kaž běchmoj sej ju předstajiłoj. Přiwšěm smój na swojim přebytku na sewjerozapadźe Afriki tójšto dožiwiłoj.
Z hotela w měsće Ouarzazate dźěše přez Atlasowe horiny z busom dale do metropole Marrakesha na juhu kraja. Pisany labyrint to najwšelakorišich wikowanišćow, torhošćo Djemaa el Fna z powědarjemi stawiznow, zapřahi, wěšćerjo, hady, wopicy w pjeluškach, předawarjo zwěrjećich stawow za hojenje a dołhe rynki kuchnjow pod hołym njebjom. Z tak mjenowaneje „parle juha“ podachmoj so k morju. Měrne, mórske městačko Essaouira ma cyle hinaši dnjowy wotběh hač Marrakesh: wodnjo surfować, k wječeri sej čerstwu rybu popřeć a live-hudźbu z rejwacymi wuměłcami dožiwić, kotřiž woheń pluwaja.
