6. meje přihotowachu so jednotki lěweho křidła 1. ukrainskeje fronty w Hornjej Łužicy na za přichodny dźeń přikazanu ofensiwu přećiwo wójsku Schörnera. Sowjetska 14. gardowa diwizija pěškow bě swoje stejnišća w Delanach wopušćiła a do zapadneho směra postupowała. Na jich městnje běchu pólscy wojacy 5. a 9. diwizije frontowu liniju mjez Rakecami, Jitkom, Nowoslicami, Ralbicami, Smjerdźacej a Čornowom přewzali. 7. a 8. pólska diwizija steještej mjez Zdźěrju, Minakałom, Drobami a Kaponicu hač před Njeswačidłom. Wottam měještej zwisk k pěškam 5. diwizije pola Jitka. Nalěwo wot 7. pólskeje diwizije bě 6. meje sowjetska 28. armeja pod komandom generalneho leutnanta Lučinskeho rum mjez Lěskej přez Dołhu Boršć hač ke Kwětanecam (Quitzdorf) a Wódrjeńcy (Ödernitz) wobsadźiła. Tale armeja bě do toho pola Gubina, hłownje pak přećiwo w kotole pola Halbe wobkruženym jednotkam Wehrmachty wojowała. Wot Wódrjeńcy hač do Lubanja běchu nětko sowjetscy wojacy 52. armeje koncentrowani.