To a tamne (09.11.18)

pjatk, 09. nowembera 2018 spisane wot:

Swoju wowku z awta wuzamknył je dźesać měsacow stary hólc w Mnichowje. Po wulěće do bayerskeje krajneje stolicy chcyše so wona z wnučkom zaso na dompuć podać. Hólčk sedźeše hižo připasany w swojim dźěćacym sydle – a měješe klučik awta z dalokoposłužowakom w ruce. Jako chcyše žona do jězdźi­dła zalězć, pak běchu durje zamknjene. Wohnjowi wobornicy dyrbjachu wokno awta rozbić. Po sporjedźenju wokna móžeštaj skónčnje wotjěć.

Mučnota bě za paducha w badensko-württembergskim Crailshaimje zahubna. 20lětny bě wčera hižo nabóčny fašk awta wurumował, jako jeho spar přemó. Rano 28lětnej žonje napadny, zo awto jeje sotry hinak steji hač hewak, a dźěše pohladać. Při tym wuhlada cuzeho, kiž w awće sedźo spaše. Policija muža, kiž steješe pod wliwom alkohola a drogow, na to wubudźi a zaja.

Elektrifikacija nuznje trěbna

štwórtk, 08. nowembera 2018 spisane wot:

Projekt Trans-Borders (přez mjezy) zaběra so wot 2017 do 2020 we wobłuku programa EU Interreg za centralnu Europu z tematiku, mjezy překročacy zjawny wobchad mjez hłownymi wobchadnymi koridorami polěpšić. Wobdźělenych je dźewjeć partnerow z Korutanskeje, Słowjenskeje, Čěskeje, Pólskeje a Sakskeje. Swoju połčasowu konferencu wotměchu wčera w Budyšinje.

Budyšin (SN/at). Najebać rozsud zwjazkoweho ministerstwa za wobchad a infrastrukturu, elektrifikaciji železniskeje čary Drježdźany–Zhorjelc wjetšu prioritu njepřicpěwać, hraješe zwisk mjez Drježdźanami a delnjošleskej stolicu Wrócławjom runje pod aspektom projekta Trans-Border wčera bytostnu rólu.

Z awtotwarcami so zetkał

štwórtk, 08. nowembera 2018 spisane wot:

Berlin (dpa/SN). W krizy dieselowych awtow dla je so zwjazkowy minister za wobchad Andreas Scheuer (CSU) dźensa w Berlinje z wodźacymi zastupnikami němskeje awtoindustrije zetkał. Hłownje dźěše wo to, štó měł planowany přetwar staršich dieselowych awtow na dobro lěpšeho powětra zapłaćić. Šefojo awtobranše nochcychu so do posedźenja wo tym wuprajić. Dotal so awtotwarcy spjećuja, kóšty přetwara přewzać.

Wo antisemitizmje rěčeli

Drježdźany (dpa/SN). Sakski krajny sejm je dźensa składnostnje jutřišeje 80. róčnicy pogromoweje nocy wo antisemitizmje w towaršnosći debatował. Parlamentnicy mějachu za to aktualny nastork: W zwisku z namócnosćemi w Kamjenicy kónc awgusta běchu tež ži­dow- ski hosćenc nadpadnyli. Po statistice nutřkowneho ministerstwa je ličba antisemitiskich njeskutkow w Sakskej loni wo nimale třećinu přiběrała. Cyłkownje zličichu 118 deliktow, lěto do toho 90.

Trump so do reportera dał

Sakski sejm za nowy wjelči management

štwórtk, 08. nowembera 2018 spisane wot:

Drježdźany (dpa/SN). Sakska chce wjelči management w swojich lěsach přerjadować. Sakski krajny sejm je wčera wotpowědnemu naćiskej CDU a SPD přihłosował, kotryž předwidźi mjez druhim wjelči zakoń w swobodnym staće. Noworjadowanje ma konflikty mjez škitom zwěriny a zajimami plahowarjow skotu pomjeńšić. Po woli koaliciskeju frakcijow ma zakoń třělenje problematiskich wjelkow zmóžnić.

Zeleni a Lěwica warnowachu před tym, ludźi zatrašić. „Wjelk čłowjeka njewohroža“, rjekny frakciski šef Zelenych Wolfram Günther. Katrin Kagelmann (Lěwica) čorno-čerwjenej koaliciji wumjetowaše, wšitko činić, „zo móhli ludźo skónčnje třěleć směć“.

Zwjazkowy sejm rentowy paket schwalił

štwórtk, 08. nowembera 2018 spisane wot:
Berlin (dpa/SN). Zwjazkowy sejm je dźensa z hłosami wulkeje koalicije CDU a SPD tak mjenowany rentowy paket zwjazkoweho knježerstwa schwalił. Niwow renty, potajkim poměr mjez rentu a mzdu, ma so stabilizować. Přinošk k rentowej kasy, tuchwilu 18,6 procentow, njesmě­ přichodnje hranicu 20 procentow překročić. Zwjazk dawkipłaćerjow je w prěnim stejišću rentowy paket raznje kritizował. Prezident zwjazka Reiner Holznagel předewšěm šwika, zo dyrbi stat kóžde lěto wjacore miliardy dawkowych srědkow rentowej kasy přepokazać.

Jenož kuluch při noze?

štwórtk, 08. nowembera 2018 spisane wot:
Zastojnstwo społnomócnjeneho zwjazkoweho knježerstwa za prašenja wusydlencow a narodne mjeńšiny w Němskej wobsteji 30 lět. Hakle wot lěta 2002 je wobłuk narodnych mjeńšin w Němskej zastojnstwu přirjadowany. Minjene 16 lěta pak zamóchu zastupnicy mjeńšin zhromadnje ze społnomócnjenymi tójšto na dobro Frizow,­ Danow, Serbow kaž tež Sintow a Romow wuskutkować. Předewšěm pod Hartmutom Koschykom w lětach 2014 do 2017 bě wulki rozmach pytnyć. Přiwšěm je so mi na wčerawšim swjedźenskim akće w Berlinje zaćišć nanuzował, zo su narodne mjeńšiny tomule zastojnstwu skerje kuluch při noze. Wšako stejachu němske mjeńšiny we wukraju stajnje zaso w srjedźišću, z mjeńšinami w kraju pak so zamołwići jenož pyša. Rjana gesta připó­znaća by była, bychu-li zamołwići na zarjadowanjach kaž wčera w Berlinje nimo němskeje tež chorhoje tudyšich narodnych mjeńšin stajili. Janek Wowčer

Minister šoł

štwórtk, 08. nowembera 2018 spisane wot:
Washington (dpa/SN). Jenož dźeń po wólbach kongresa w USA je prezident USA Donald Trump justicneho ministra kraja Jeffa Sessionsa ze zastojnstwa wu­tłóčił. Sessions je wčera wječor wotstupił. W lisće wón na to skedźbni, zo bě jeho Trump k tomu nuzował. Bě dźě so hižo dlěši čas z nim nasadźował. Trump Sessionsej­ wumjetowaše, zo prezidenta w tuchwilnych přepytowanjach móžneho wobwliwowanja prezidentskich wólbow lěta 2016 přez Rusku dosć nješkita. Wosebity přepytowar Robert Mueller to pruwuje, štož Trump raznje šwika.

To a tamne (08.11.18)

štwórtk, 08. nowembera 2018 spisane wot:

Rubježnik je wobchod napojow we Werderu pola Podstupima nadpadnył – chcyše pak jenož dźěl pjenjez měć. Wón žadaše sej wot sobudźěłaćerja pjenjezy z kasy, wohrožejo jeho z pistolu. Jako chcyše muž při kasy něhdźe 50lětnemu skući­ćelej pjenjezy přepodać, tón jemu znapřećiwi, zo ani telko njetrjeba, a so z dźělom pjenjez zminy. Najebać jeho skromnosć policija nětko za rubježnikom pyta.

Přewjele dowěry do nawigaciskeho nastroja móže strašne być: Šofer nakład­neho awta je w jednym z narodnych parkow Awstriskeje na wuskim lěsnym pućiku tčacy wostał a by ze swojim Lkw-jom bjezmała 30 metrow do hłubiny padnył. Při wróćostorkanju šmórny so wón skały a wisaše ze zadnim dźělom 38 tonow ćežkeho woza hižo nad hłubinu. Pućik wu­žiwa hewak jenož hajnik. Policiji muž rjekny, zo „nawijej“ zasadnje dowěrja.

Samsne poměry za wšěch

srjeda, 07. nowembera 2018 spisane wot:

Berlin (dpa/SN). Zwjazkowy sejm zaběraše so na swojim dźensnišim posedźenju z předewzaćom, kotrež zdawa so nje­docpějomne: wutworić samsne žiwjenske wuměnjenja po wšej Němskej. Zwjazkowy minister za nutřkowne naležnosće Horst Seehofer (CSU) předstaji plenumej swoje plany za nowu strukturnu politiku w Němskej. W srjedźišću steja lěpša infrastruktura, zastaranje ludźi ze zapłaćomnymi bydlenjemi a zasydlenje zawodow we wjesnych kónčinach.

Žadaja sej swójski fonds

Magdeburg (dpa/SN). Wuchodoněmske brunicowe kraje trjebaja swójski fonds, zo móhli kónc zmilinjenja brunicy zmištrować. To žadaja sej ministerscy pre­zidenća potrjechenych krajow, kaž saksko-anhaltski knježerstwowy šef Reiner Haseloff (CDU) w Magdeburgu zdźěli. Namjet su pječa hižo póndźelu ze zwjazkowej kanclerku Angelu Merkel a z hospodarskim ministrom Peterom Altmaierom (wobaj CDU) w Berlinje dorě­čeli. Zwjazk měł fonds přez lěta pjelnić, zo móhli naprawy zwoprawdźić.

Krajny sejm wuradźował

Trump přěhrał, ale tež dobył

srjeda, 07. nowembera 2018 spisane wot:

Washington (dpa/SN). Prezident USA Donald Trump je při wólbach kongresa USA wjetšinu mandatow přisadźił. Runočasnje móžachu jeho republikanojo swoje sydła w senaće dale dźeržeć. W Domje reprezentantow pak změja přichodnje demokraća wjetšinu, prěni króć po wosom lětach. Trumpej budźe tuž wo wjele ćešo nowe zakonje přesadźić. Najebać to wón wólby pozitiwnje bilancuje, twitterujo: „Wulkotny wuspěch dźensa wječor.“

Wólbny bój do wčerawšeho dnja bě jara­ intensiwny a hibaše so častodosć na mjezy­ fairnosće. Donald Trump, kiž sam k wólbam njesteješe, bě na połsta wólbnobojowych zarjadowanjach rěčał, třiceći bě jich jenož w minjenymaj ty­dźenjomaj. Při tym kritizowaše wón stajnje zaso migraciju a rysowaše najhórše scenarije přichoda za USA.

nawěšk

nowostki LND