Španiska pomha Palestinjanam

wutora, 06. februara 2024 spisane wot:

Madrid (dpa/SN). Španiska chce naposledk wjele kritizowany pomocny skutk UNO na dobro Palestinjanow na Bliskim wuchodźe (UNRWA) z wurjadnym popłatkom 3,5 milionow eurow podpěrować. Po tutym puću chcedźa zaručić, zo móže tuta „njeparujomna organizacija“ swoje aktiwity krótkodobnje zachować, rjekny wonkowny minister José Manuel Albares wčera před wuběrkom za mjezynarodnu kooperaciju w delnjej komorje parlamenta. Wón je nawodu UNRWA Philippa Lazzarinija hižo minjeny pjatk wo tym informował. Połoženje ciwilneje ludnosće w Gazaskim pasmje je „zadwělowane“, Albares rjekny.

UNRWA bě minjene dny warnowała, zo dyrbi swoje dźěło snano hižo za štyri tydźenje skónčić, hdyž připrajene pomocne srědki njedóstanje. Wjace hač dźesać krajow, mjez nimi najwjetši darićeljo USA a Němska, běchu wjace hač 400 milionow eurow připłatkow za ­UNRWA blokowali. Pozadk su wumjetowanja, zo běchu sobudźěłaćerjo organizacije na nadpadźe Hamas na Israel 7. oktobra 2023 wobdźěleni. Israelska tajna słužba bě tole pječa wuslědźiła.

To a tamne (06.02.24)

wutora, 06. februara 2024 spisane wot:

Na žeńtwu hotuje so 70lětny Dieter ­Bohlen ze swojej přećelku Carinu, z kotrejž je mjeztym 18 lět hromadźe žiwy. Tole je Bohlen nowinje Bild přeradźił. Pječa je datum hižo postajeny. 30 lět młódša Carina pak sej žada, zo Bohlen ju porjadnje wo mandźelstwo prosy. Bohlen sam je kedźbliwy: „To by třeće mandźelstwo było, te ma hač do kónca žiwjenja dźeržeć.“ Pola swojeje přećelki pak je sej Bohlen tónkróć dospołnje wěsty.

Dwanaće metrow do hłubiny padnył je štyrilětny hólc w sewjerorynsko-westfalskim Lünenje – a je přežiwił. Hólc bě wčera popołdnju w štwórtym poschodźe wjaceswójbneho domu zawrjene wokno wočinił, z woknom zalězł a do hłubiny zrazył. Helikopter dowjeze hólca do chorownje, hdźež jeho operowachu. Policija wuchadźa z „tragiskeho njezboža“. Pokazki na njeskutk nimaja.

Syć muslimskich dušepastyrjow

póndźela, 05. februara 2024 spisane wot:

Halle (B/SN). Krajna syć migraciskich organizacijow Saksko-Anhaltskeje (Lamsa) čestnohamtskich muslimskich dušepastyrjow wukubłuje. W aprylu započnje so kurs z projektom „Amussa“, kiž ma syć dušepastyrjow wutworić a w statnych zarjadnišćach etablěrować.

Rozdźělny póstny čas

Berlin (B/SN). Pola ewangelskich a katolskich wěriwych započnje so póstny čas lětsa 14. februara a skónči so jutry, 31. měrca. Pola muslimow započnje so tón spočatk ramadana 11. měrca a skónči so 10. apryla ze swjedźenjom cokora. Ortodoksni křesćenjo maja w běhu lěta štyri razy čas posćenja, 46 dnjow do jutrow, po swjatkach, w awgusće a w adwenće stajnje tydźeń.

Tydźeń za žiwjenje

Hannover/Bonn (B/SN). 13. do 20. apryla zahajitej ewangelska a katolska cyrkej 30. raz wosebity tydźeń pod hesłom „Generacija přichoda: Zhromadnje, rozdźělnje a derje“ za młodźinu a młodych dorosćenych, předewšěm zbrašenych. Ewangelska cyrkej w Němskej wšak je připowědźiła, zo so klětu wjace njewobdźěli. Tuž cyrkwi wo přichodnej strukturje wuradźujetej.

Ekumena z bibliju

Faeser: Demokratow skrućić

póndźela, 05. februara 2024 spisane wot:

Berlin (dpa/SN). Zwjazkowa nutřkowna ministerka Nancy Faeser chcyła hladajo na bój přećiwo prawicarskemu ekstremizmej wot knježerstwa planowany zakoń za spěchowanje demokratije spěšnje schwalić. Politikarka SPD rjekny nowinje Rheinische Post, zo dyrbjało so nětko wšěm tym rjap skrućić, kotřiž chcedźa demokratiju sylnić a ju wožiwić. Ze zakonjom chcedźa towarstwa a organizacije w boju přećiwo prawicarstwu přichodnje pjenježnje lěpje podpěrować.

Nalěty USA tema w UNO

New York (dpa/SN). Wojerske nadběhi USA přećiwo Iranej přichilenym milicam w Syriskej a w Iraku su tema na nuzowym posedźenju Bjezstrašnostneje rady UNO. Ruska bě zeńdźenje zwołała a wumjetuje USA, zo z nalětami konflikt na Bliskim wuchodźe zaměrnje přiwótři. USA porno tomu chcyli so z nalětami za nadpad milicow na zepěranišćo wjećić, při kotrymž běchu třo wojacy USA žiwjenje přisadźili. Nalěty USA su sej pječa tež wjacore ciwilne wopory žadali.

Nowe sankcije přećiwo Ruskej

Pod hesłom #B96zrunać je wčera dopołdnja wjace hač połsta ludźi, mjez kotrymiž bě wulka ličba Serbow, za wšelakorosć, ­wotewrjenosć a demokratiju we wokrjesu Budyšin wustupowało. Z tutej akciju chcedźa wobydlerjo a wobydlerki Budyšina a wokolnych wsow mócne znamjo přećiwo intolerancy a diskriminaciji podłu B 96 sadźić, wosebje přećiwo prawidłownje so jewjacym chorhojam, z kotrymiž druzy ludźo demokratiju a prawa čłowjeka zacpěwaja. Foto: Jürgen Maćij

Kretschmer staja wuměnjenja

póndźela, 05. februara 2024 spisane wot:
Berlin (dpa/SN). Sakski ministerski prezident Michael Kretschmer (CDU) zwjazuje přihłosowanje wot unije nawjedowanych zwjazkowych krajow k planowanemu paketej rozrosta amploweje koalicije na změny nastupajo šmórnjenja ratarskich subwencijow. „Jako wot unije nawjedowane kraje mamy změny pola agrarneho diesela za wuměnjenje swojeho přihłosowanja k zakonjej rozrosta šansow. Po­srědkowanski wuběrk chce so 21. februara zetkać“, rjekny Kretschmer bayerskim nowinarjam. Zdobom chcył wón ze zwjazkowymi krajemi rěčeć, kotrež SPD nawjeduje. Kretschmer kritizuje tež wobsahowanje, zo nowy zakoń swojemu mjenu njewotpowěduje. „Tutón zakoń žadyn rozrost njewunjese“, Kretschmer rjekny. Zwjazkowy sejm bě minjeny pjatk zakoń wobzamknył.

Tójšto mortwych wohenjow dla

póndźela, 05. februara 2024 spisane wot:
Valparaíso (dpa/SN). Při zahubnych lěsnych wohenjach w Chile je po najnowšich informacijach zamołwitych dotal znajmjeńša 112 ludźi žiwjenje přisadźiło. 32 woporow su mjeztym identifikowali, nutřkowne ministerstwo južnoameriskeho kraja zdźěla. „Je to najhórša tragedija, kotruž naš kraj po zemjerženju lěta 2010 dožiwja“, rjekny prezident Gabriel Boric po wopyće w katastrofowej kónčinje w regionje Valparaíso na pacifiskim po­brjoze. Tehdy bě 520 ludźi pod rozwalinami zahinyło. W Chile so tuchwilu na 188 městnach lěsy pala. Płomjenja zachadźeja mjeztym na 29 000 hektarach. Tež stolica Santiago je chětro potrjechena.

Zawodam skutkownišo pomhać

póndźela, 05. februara 2024 spisane wot:

Berlin (dpa/SN). Zwjazkowy financny minister Christian Lindner (FDP) chce zhromadnje z hospodarskim ministrom Robertom Habeckom (Zeleni) na tym dźěłać, němske předewzaća do mjezynarodneho wubědźowanja wukmanić. Lindner při wšěm namjet Habecka wotpokazuje, wurjadne zamóženje wjacorych miliardow eurow na dobro firmow zarjadować. Zasadnje pak je wón za to, wo namjeće Habecka rěčeć a z toho „něšto konstruktiwneho“ sčinić, rjekny Lindner wčera wječor w sćelaku ARD.

Habeck bě na debaće zwjazkoweho sejma minjeny štwórtk namjetował, wurjadne zamóženje zarjadować, z kotrymž móhli so strukturne problemy rozrisać. Wón chcył zawodam wosebje na polu dawkow pod pažu přimnyć. Lindner wurjadne zamóženje wotpokazuje, dokelž by to jenož dalše zadołženje wunjesło.

Habeck swój posudk potwjerdźi, po kotrymž njemóže němske hospodarstwo dosć inwestować. Nimo toho je dawkowe poćeženje mnohim firmam wo wjele wyše hač w druhich krajach.

Warnuja před sćěhami za dźěći

póndźela, 05. februara 2024 spisane wot:

Planowane legalizowanje cannabisa starosća staršich a lěkarjow

Hannover (dpa/SN). Tójšto starši starosća so po přepytowanju chorobnych kasow planowaneho legalizowanja cannabisa dla, hladajo wosebje na swoje dźěći. 63 procentow wšěch woprašanych staršich z dźěćimi pod 18 lětami z tym liči, zo mjeza zdźeržliwosće mjez njepołnolětnymi woteběra, hdyž smědźa dorosćeni konop legalnje brać. Tole zwěsća woprašowanje instituta Forsa w nadawku chorobneje kasy KKH. 73 procentow ludźi boji so strowotniskich sćěhow na přikład w mozach, 70 procentow starosća so strachoćiwosće a chabłaceje nalady. Slědźer na polu mozow Martin Korte z Braunschweigskeje techniskeje uniwersity radźi, legalnu předań cannabisa hakle wot 25 lět dowolić. „Wuwiće mozow je hakle srjedź 20tych lět wotzamknjene. Młodostni, kiž prawidłownje konop bjeru, maja zniženu kmanosć, swoje skutki planować, problemy rozrisać a impulsy kontrolować. Nimo toho zawinuje cannabis halucinacije a psychotiske symptomy.

Akcija z přikładom

póndźela, 05. februara 2024 spisane wot:

Jelizo chcu něšto změnić abo njejsym ­spokojom z něčim, dyrbju to zwuraznić. Předewšěm su to hladajo na protestnu akciju rjemjeslnikow, předewzaćelow, ratarjow a wobydlerjow minjeny pjatk w Radworju palace temy wjesneje ludnosće a zawodow we wjesnych kónčinach. Ze stron zwjazkoweho knježerstwa dóstawaja jednu plistu po druhej, štož njemóža dale znjesć. Derje tuž, zo swój protest tež tam pokazaja, hdźež so temy pala, mjenujcy na wsach.

Přitomny krajny rada Budyskeho wo­krjesa Udo Wićaz (CDU) ma nadawk starosće ludnosće do Drježdźan a Berlina transportować. Zwjazkowe knježerstwo wšak njebudźe na 170 wobdźělnikow w Radworju reagować. Ale zarjadowanje móhło přikład być za hibanja po wšěch wjesnych kónčinach. Dale pak měło so na to dźiwać, zo so hibanje wot dwělomnych stronow njeinstrumentalizuje! Zarjadowanja měli dale měnjenja wjesnjanow wotbłyšćować! Bianka Šeferowa

Serbska debata

nowostki LND