Teror w Iranje?
Etat powyša
Podstupim (dpa/SN). Čerwjeno-čorno-zelena koalicija w Braniborskej chce planowany dodatny etat něhdźe 371 milionow eurow wo něhdźe 225 milionow eurow powyšić. Frakciscy šefojo SPD, CDU a Zelenych wčera připowědźichu, zo chcychu změny w zwisku ze zwyšenjom tarifow za zastojnikow a druhe institucije, za nowe městna we wustawoškiće, w strowotniskim wobłuku a krajnym zličbowanskim zarjedźe kaž tež druhe stejnišćo krajneje wohnjowoborneje šule přesadźić.
Twarsku přestrjeń hižo přihotuja
To a tamne (14.02.24)
Njeznaty je we Weimarje dźěl płota pokradnył a so z cedlku zamołwił. Kaž policajska inspekcija zawčerawšim rozprawješe, je so pozdatny skućićel w nocy na njedźelu na ležownosć dóstał a při tym wobhrodźenje wobškodźił. Po tym je dźěl płota pokradnył. Wočiwidnje nic bjez hubjeneho swědomja.
Štyri metrow dołheho mortweho pytona je pasant w Berlinskim parku Hasenheide namakał. Pasant je sobudźěłaćerjow zamołwiteho zarjada za zelenišća informował, kotřiž su hada zawčerawšim pod štomom namakali. Nětko chce zarjad pad wuslědźić a prosy ludnosć wo pomoc.
Mjezy dale kontrolować
Podstupim (dpa/SN). Braniborski nutřkowny minister Michael Stübgen (CDU) je so za to wuprajił, zapućowarjow na mjezach do Němskeje dale kontrolować. „Bohužel njeje we wokomiku žaneje druheje móžnosće a tohodla dyrbimy so na to zwučić“, wón wuzběhny. Stübgen z toho wuchadźa, zo zwjazkowa nutřkowna ministerka Nancy Faeser (SPD) loni w oktobru zahajene nutřkokrajne kontrole wo dalšich šěsć měsacow podlěši.
Potrjechenych lěpje škitać
Berlin (dpa/SN). Zwjazkowa ministerka za swójby Lisa Paus (Zeleni) je za to, zo ma so prewencija hidy w syći polěpšić. W „rańšim magacinje“ sćelaka ARD wona zwurazni, zo dyrbja so prawa za potrjechenych dodźeržeć a pomoc poskićić. Zhromadnje z „kompetencnej syću přećiwo hidźe w syći“ je Paus dźensa dopołdnja w Berlinje wuslědki studije wo hidźe w socialnych medijach předstajiła. Namóc, diskriminacija, rasizm a antisemitizm su w syćach wšědnje tema.
Naprawy přećiwo ekstremizmej
Tysacy ludźi w pisanych kostimach a na wupyšenych wozach rejuja k ...
Knježerstwo chce ratarjow podpěrać
Podstupim (dpa/SN). Braniborski ministerski prezident Dietmar Woidke (SPD) chce hladajo na trajace protesty ratarjow dale za rozrisanjemi pytać, kak móhło knježerstwo agrarnu branšu wolóžić. Po wčerawšim zetkanju z ratarjemi w Podstupimskej statnej kencliji wón přilubi, zo dyrbi so běrokratija w tymle wobłuku wottwarić. Nimo toho chce wón za pućemi pytać, kak móhli so ratarske zawody ze špatnymi pódami financielnje podpěrać. Woidke ma wčerawšu rozmołwu za prěnju wažnu kročel. Dźensa měješe so hižo kabinet z tym zaběrać. Braniborske knježerstwo zdobom připowědźi, zo chce so za šěsć do wosom tydźenjow znowa z krajnym burskim zwjazkom wo namjetach k wottwarej běrokratije wuradźować. Zdobom dyrbi so dźěłowa skupina zarjadować.
Znowa wčera burja při namjeznym přechodźe w Frankfurće nad Wódru přećiwo planowanym skrótšenjam zwjazkoweho knježerstwa protestowachu.
Wojerske nadpady zakónčić
Gaza/Tel Aviv (dpa/SN). Israelske wójsko na juhu Gazaskeho pasma dale wojuje a dźensa zdźěli, zo su „wjace hač 30 teroristow“ morili. Wójsko chce kónčinu ze „zaměrnymi nadpadami na infrastrukturu teroristow“ kontrolować.
Pomocne organizacije skedźbnjeja na katastrofalne wobstejnosće na juhu Gazaskeho pasma, hdźež so hižo tydźenje sylnje wojuje.
China je Israel namołwjała, wojowanja na juhu Gazaskeho pasma zakónčić. China so wuwića w regionje Rafah dla starosći a wotpokazuje kóždu akciju, kotraž ciwilistam škodźi, zdźěli dźensa wonkowne ministerstwo w Pekingu. Israel měł swoje „wojerske operacije tak spěšnje kaž móžno zastajić“ a wšitko za to činić, wjetšej humanitarnej katastrofje zadźěwać. We wójnje přećiwo islamistiskej Hamas hotuje so Israel tuchwilu na wojersku ofensiwu na Rafah, blisko mjezy do Egyptowskeje. Plany israelskeho knježerstwa město z wjele palestinskimi ćěkancami nadpadnyć, mjezynarodnje wulku kritiku zbudźi.
„Prawo je na stronje přirody ...“
Někotre hłosy hladajo na róčnicu „rumowanja“ campa „Heibo-aktiwistow“
Ottendorf-Okrilla (dpa/SN). Gmejna Ottendorf-Okrilla bu nadregionalnje znata, jako zaćahny policija loni 15. februara do wobłuka lěsa Łužničanskeje hole z mjenom „Heidebogen“ (Heibo), zo by wobswětowych aktiwistow ze swojich štomowych domow „wuhnała“ a tak areal za zdobywanje šćerka „wuprózdniła“. Nětko, lěto po tym, su štomy wšitke porubane, rjećazowe piły su womjelknyli – přirodoškitarjo a aktiwisća pak to njejsu.
Komunikacija bytostna
Zwjazkowe knježerstwo chce dale subwencije za ćěriwa ratarjam krok po kroku přikrótšić. Tež protesty potrjechenych ničo na tym njezměnichu. Wčera zetka so braniborski ministerski prezident Dietmar Woidke (SPD) z ratarjemi a je z nimi rěčał. Skónčnje!!! Ze stron zwjazkoweho knježerstwa drje běchu spočatk procesa reakcije. Tola mjeztym wšitcy zaso mjelča. Porno tomu wěnuje so zwjazkowy ratarski minister Cem Özdemir (Zeleni) nowemu dawkej za mjaso. Město toho pak měł wo tym rozmyslować, kak móhł ratarjow podpěrać. Postupowanje Woidki mam za mudre. Hdyž-li z potrjechenymi rěčiš, hodźa so situacije rozrisać. A tole potrjechi wšitke žiwjenske wobłuki. Podarmo wšak njerěka, zo zmóžnja komunikacija transparencu a dowěru. Runje dowěra blišemu je tola zakład za wuspěšnu politiku. Jelizo wolerjo politikarjam dowěrja, budu woni jich tež wolić. Městno swójsku ideologiju zwoprawdźić, hižo žanoho njeje.
Bianka Šeferowa
