Ratarjo Habecka blokowali

pjatk, 05. januara 2024 spisane wot:

Ockholm/Berlin (dpa/SN). Roznjemdrjeni ratarjo su tomu zadźěwali, zo móže wicekancler Robert Habeck (Zeleni) na pobrjohu Sewjerneho morja přewoznu łódź wopušćić. Burja běchu wčera w přistawje w Schlüttsielu městno blokowali, hdźež měješe přewoz dojěć. Habeck dyrbješe so tuž na haligu Hooge wróćić. Po informacijach policije jednaše so wo sto demonstrantow. Něhdźe 30 policistow bě zasadźenych, kotřiž wužiwachu tež popjerjowy spray. Burja protestuja přećiwo skrótšenjam ratarskich subwencijow.

Zwjazkowe knježerstwo mjenowaše blokadu wohańbjacu. Rěčnik knježerstwa Steffen Hebestreit rěčeše wo „přiběracych hrubosćach politiskich formow“. Blokada přećiwo Habeckej rani prawidła demokratiskeho mjezsobneho wobchadźenja, wón internetnje piše.

Hladajo na masiwne protesty ratarjow přećiwo planowanym skrótšenjam ratarskich subwencijow je zwjazkowe knježerstwo reagowało. Dawkowe poćežowanja jězdźidłow dla chcedźa zběhnyć a dawk na diesel časowje rozdźělić.

Proces přetorhnjeny

pjatk, 05. januara 2024 spisane wot:
Drježdźany (dpa/SN). Dalši proces rubjenych juwelow z pokładnje Drježdźanskeho Zeleneho wjelba dla su dźensa před krajnym sudnistwom po zahajenju přetorhnyli. Wo dalšim postupowanju chce nawjedowaca sudnica Eva Stief přichodnu srjedu informować. Wosom měsacow po prěnim procesu dyrbi so 24lětny muž zamołwić. Jemu wumjetuja, zo je při rubježnistwje w nowembru 2019 jedne z awtow skućićelow wodźił. Muž přisłuša Berlinskemu clanej swójby Remmo.

To a tamne (05.01.24)

pjatk, 05. januara 2024 spisane wot:

Hodowne štomy picuja tež lětsa zaso w Berlinskim zwěrjencu a coologiskej zahrodźe zwěrjatam. Jehlinowcy su elefantam wosebita chłóšćenka, zwěrjency zdźěleja. Tołstokóžniki wužiwaja rostliny, zo bychu sej tež chribjet drapali, zuby rjedźili a sej masažu popřeli – runja druhim zwěrjatam. Zamołwići picuja jenož hodowne štomy, kotrež njejsu we wobchodach předawali. „Priwatne dary štomow njemóžemy bohužel přijimować.“

W hodownym dowolu so zminyło je so 255 jatych w Brazilskej. Jatych běchu k hodam nachwilnje z jastwow pušćili. Woni pak njejsu so, kaž bě předpisane, zaso wróćili. Elektroniske puta jeći njemějachu, dokelž by za to sudniski wukaz trěbny był. Nachwilne pušćenje k hodam chłostanski zakonik kraja předwidźi. Wuwzate su strašni złóstnicy. Cyłkownje su 1 785 jatych do dowola pósłali.

Trump na najwyšim sudnistwje

štwórtk, 04. januara 2024 spisane wot:

Washington (dpa/SN). Bywši prezident USA Donald Trump chce juristisku zwadu nastupajo swoje wobdźělenje na předwólbach wot najwyšeho sudnistwa kraja rozsudźić dać. Trump je so wčera na Supreme Court we Washingtonje wobroćił. Wón chce po tutym puću rozsud sudnistwa w Colorado zběhnyć dać. Tam běchu jeho z wólbow wuzamknyli, dokelž je so swojeho zadźerženja při nadběhu na Kapitol 2021 dla diskwalifikował.

Köpping za zakaz AfD

Berlin (dpa/SN). Sakska socialna ministerka a načolna kandidatka SPD za wólby krajneho sejma Petra Köpping so za to wupraja, móžny zakaz AfD pruwować. „Dyrbjeli šansy zakaza AfD prawidłownje pruwować“, rjekny Köpping nowinarjam. Wona stupi so z tym na stronu zwjazkoweje předsydki SPD Saskije Esken. Ta bě so za prawidłowe pruwowanje zakaza AfD wuprajiła. Jeje stronski kolega Carsten Schneider, społnomócnjeny za wuchod, tole wotpokazuje.

Socialnym medijam njewěrja

Ministerski prezident Južneje Koreje Han Duck-Soo (2. wotlěwa) je so dźensa wo poslednich přihotach na bližace so Olympiske młodźinske hry 2024 w Pyeongchangu, 130 kilometrow wuchodnje stolicy Seoula, wobhonił. Mjez druhim wopyta wón ­sněhakowarske skakanišćo. Sportowe wubědźowanja we wjacorych městach prowincy Gangwon wotměja so wot 19. januara hač do 1. februara. Na wjeršk wočakuja 2 900 sportowcow ze 70 krajow swěta. Foto: pa/Yonhap

Ministerstwo: Libanon wopušćić

štwórtk, 04. januara 2024 spisane wot:

Berlin (dpa/SN). Přiwótřeneho połoženja podłu israelsko-libanonskeje mjezy dla je wonkowne ministerstwo wšitkich němskich staćanow namołwjało, Libanon tak spěšnje kaž móžno wopušćić. Ludźo měli so na krizowej lisćinje wonkowneho ministerstwa zapisać a „po najspěšnišim puću“ wupućować, piše wonkowne ministerstwo. „Dalšu eskalaciju na mjezy mjez Israelom a Libanonom njemóžemy wuzamknyć“ rěka w zdźělence ministerstwa po posedźenju krizoweho staba zwjazkoweho knježerstwa.

W libanonskej stolicy Beiruće běchu wutoru wječor nawodu Hamas Saleha el-Arurija z bombu morili. Z Hamas zwjazana libanonska milica šiitow Hisbollah dawa Israelej winu na smjerći zastupowaceho nawodu organizacije. Jeje nawodnistwo hrozy Israelej mjeztym z wójnu „bjez kóždych prawidłow a mjezow“.

Mjenje škódnych płunow

štwórtk, 04. januara 2024 spisane wot:
Berlin (dpa/SN). Němska je loni po zwěsćenju fachowcow na polu energijoweje změny tak mało klimje škodźacych płunow do atmosfery pušćiła kaž něhdy w 1950tych lětach. Po je tym je wustork wuhlikoweho dioksyda porno 2022 wo 73 milionow tonow na 773 milionow tonow woteběrał, 46 procentow mjenje hač 1990. Tole su dźensa w Berlinje wozjewili. Skutkowny škit klimy wšak rekordne lěto dawno hišće njeje, fachowcy zwěsća. Jenož 15 procentow zniženja su sćěh woprawdźitych zalutowanjow. Niska emisija je předewšěm sćěh wosłabjaceho so hospodarstwa a chabłaceje industrije.

Wójnskich jatych wuměnili

štwórtk, 04. januara 2024 spisane wot:

Kijew (dpa/SN). Po wjacore měsacy trajacej přestawce stej Ukraina a Ruska zaso jatych wuměniłoj. „Naši su zaso doma“, piše prezident Wolodymyr Zelenskyj w socialnych syćach. Při tym jedna so wo wojakow a ciwilistow. Zamołwići rěča wo najwjetšej wuměnje jatych po zahajenju ruskeje ofensiwy přećiwo Ukrainje před 22 měsacami. Po tym su 230 muži a žonow pušćili. Mjez wojakami su tež zakitowarjo přistawneho města Mariupola. Po informacijach Moskwy je so 248 Rusow z ukrainskeje wójnskeje jatby wróćiło.

„Myslimy na wšitkich Ukrainjanow, kotřiž su hišće w ruskej jatbje“, rjekny Zelenskyj w swojim wšědnym wječornym widejowym poselstwje.

Wuměnu jatych běchu Zjednoćene arabske emiraty a Mjezynarodny čer­wjeny křiž organizatorisce přihotowali. Naposledk běchu loni w juliju jatych ­wuměnili. Ukraina je za čas wójny hižo 2 828 swojich staćanow z ruskeje jatby do domizny přiwjezła, Kijewske knježerstwo zdźěla. Pječa je hišće wjace hač 4 000 Ukrainjanow w ruskej jatbje.

Bjezdźěłnosć drje dale přiběra

štwórtk, 04. januara 2024 spisane wot:

Nawoda sakskeje agentury za dźěło njewočakuje 2024 žane polěpšenje

Drježdźany (dpa/SN). Zamołwići dźěłoweho zarjada w Sakskej liča lětsa z dalšim rozrostom bjezdźěłnosće. Wuwiće saha drje skerje so směra na „sydom koma“ město „pjeć koma“, rjekny Klaus-Peter Hansen, nawoda dźěłoweje agentury swobodneho stata wčera w Drježdźanach. W decembru wučinješe kwota bjezdźěłnosće 6,2 procentaj a bě tak 0,1 procent wyša hač w nowembru. Po wšej Němskeje steji Sakska z tutej kwotu w srjedźnym wobłuku. Loni njebě kwota w žanym měsacu wyša hač šěsć procentow.

„Hladajo na hospodarske połoženje, wobstejace rizika a wobłukowe wuměnjenja su sakske dźěłowe wiki w lěće 2023 hišće derje wobstali“, tak Hansen. Za lěto 2024 liči pak wón dale wobstejacych njewěstosćow dla z mjenje dobrymi powěsćemi na dźěłowych wikach. Na tym so drje srjedźodobnje bohužel wjele změnić njebudźe, je sej wón wěsty.

impresum

štwórtk, 04. januara 2024 spisane wot:

Serbske Nowiny wudawaja so w Domowina-Verlag GmbH Ludowym nakładnistwje Domowina 

Jednaćel: Syman Pětr Cyž

Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.

Šefredaktor a zamołwity redaktor w zmysle

nowinarskeho zakonja: Marcel Brauman 577 232/233 Naměstnik šefredaktora: Axel Arlt 577 238

tel.: 03591 / 577 232 faks: 03591 / 577 202 e-mail:  www.serbske-nowiny.de

Adresa redakcije a nakładnistwa: Sukelnska 27, 02625 Budyšin

Adresse der Redaktion und des Verlages: Tuchmacherstraße 27, 02625 Bautzen

Zamołwita za rozšěrjenje a marketing:

Patricia Róblowa 577 273

Předań nawěškow: Janka Rögnerowa 577 220 e-mail:

Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory

Vertriebskennzeichen: 2 B 2560 B

Serbska debata

nowostki LND