Sakski ministerski prezident Michael Kretschmer (CDU, za blidom napr.) je so minjeny pjatk wo stawje zakładneho ponowjenja a modernizowanja Zhorjelskeje měšćanskeje hale informował. Jeho přewodźeše Zhorjelski wyši měšćanosta Octavian Ursu ­(za blidom nal.). Kretschmer Zhorjelčanow namołwi, strukturnu změnu jako šansu wobhladować. Foto: Matthias Wehnert

Wjeršk NATO z Bidenom

póndźela, 14. junija 2021 spisane wot:
Brüssel (dpa/SN). Statni a knježerstwowi šefojo wšitkich 30 čłonskich statow ­NATO schadźuja so dźensa na swojim wjeršku w belgiskim Brüsselu. Centralna tema ma być, kak chcył zapadny zakitowanski zwjazk z nowej wojerskej wulkomocu Chinu wobchadźeć. Nimo toho matej wohroženje ze stron Ruskeje a reformowa iniciatiwa „NATO 2030“ wusahowacu rólu hrać. Wjeršk ma wosebity wuznam, dokelž je prěni króć tež nowy prezident USA Joe Biden wobdźěleny. Tón bě přilubił, zo chcył pod swojim předchadnikom Donaldom Trumpom chětro napjate poćahi mjez NATO a Zjednoćenymi statami Ameriki zaso normalizować. Trump bě stajnje zaso zjawnje dwěle budźił, hač chcyli USA w padźe wójny swojim winowatosćam hladajo na škit zwjazkarjow wotpowědować. W najhóršim padźe chcył Trump samo z NATO wustupić

Strašna tendenca

póndźela, 14. junija 2021 spisane wot:
Stockholm (dpa/SN). Měrowy slědźenski institut Sipri zwěsća znjeměrnjowacu tendencu nastupajo wuwiće atomarnych bróni. Cyłkownje drje ličba atomarnych rozbuchadłow dale woteběra, w Stockholmje zaměstnjeny institut dźensa w swojej kóždolětnej rozprawje zwěsća. Aktualnje pak je wjace jadrowych rozbuchadłow zasadźomnych hač hišće před lětom. Po wšěm swěće bě po trochowanju Sipri spočatk lěta 2021 přeco hišće něhdźe 13 080 atomowych bróni zasadźomnych. Starosće wobradźa slědźerjam ličba tych rozbuchadłow, kotrež su hižo w raketach zatwarjene, abo su na aktiwnych zepěranišćach stajnje a hnydom k dispoziciji.

Wonka bórze bjez nahubnika?

póndźela, 14. junija 2021 spisane wot:

Berlin (dpa/SN). Zwjazkowy minister za strowotnistwo Jens Spahn (CDU) ma hladajo na woteběracu ličbu infekcijow z koronawirusom za předstajomne, winowatosć wužiwanja škitneho nahubnika poněčim zaso zběhnyć. Tak měła wona pod hołym njebjom zasadnje wotpadnyć. W kónčinach z niskej incidencnej hódnotu a wysokej kwotu šćěpjenja tež nutřka. „Jako poručenje pak wostanje: W dwělomnych padach nahubnik wužiwać, wosebje na pućowanjach abo zetkawanjach w nutřkownych rumnosćach. Wjace wěstoty hakle změjemy, su-li wšitcy přitomni pak šćěpjeni abo prawidłownje testowani.“

Zběhnyć winowatosć wužiwanja škitneho nahubnika w Danskej wot dźensnišeho tež debatu w Němskej pohonja. FDP a AfD žadatej sej kompletne zběhnjenje winowatosće. Strowotniski fachowc SPD Karl Lauterbach a šef krajneje skupiny CSU w zwjazkowym sejmje Alexander Dobrindt mataj za móžne zběhnyć wužiwanje na­hubnika pod hołym njebjom, nic pak nutřka.

To a tamne (14.06.21)

póndźela, 14. junija 2021 spisane wot:

Mylnje wopačnu pincu wurumowało je předewzaće za přećahowanje we wjaceswójbnym domje w Plauenje. Wobydlerka domu so njemało stróži, jako wuhlada po wjacorych dnjach dospołnje wuprózdnjenu a wumjećenu pincu. Jewješe so podhlad, zo jedna so wo zaměnjenje. Rešerša policije wunjese, zo je předewzaće mylnje wobsydstwo 50lětneje sobu wzało, po tym zo bě bydlenje zemrěteje wobydlerki wurumowało.

Swojeho psa přećiwo paducham zakitowała je zmužita žona w Berlinje. Po informacijach policije běchu třo paduši spytali, žonje jeje staffordshire bullterriera w měšćanskim dźělu Tempelhofje wutorhnyć. Jedyn z paduchow bě psa majkał a sej žadał, zo žona powjaz pušći. Jako so wona spjećowaše, biješe ju do mjezwoča. Najebać to žona powjaz kruće dźeržeše, doniž so trójka njezminy.

Wólbny program w srjedźišću

pjatk, 11. junija 2021 spisane wot:

Berlin (dpa/SN). „Wšitko je móžno“, přilubjeja Zeleni w swojim wólbnym programje, kotryž chcedźa na swojim kónctydźenskim online-zjězdźe wobzamknyć. Zeleni so nadźijeja, ze swojej jadrowej temu klimoweje změny skónčnje relewantne dźěle wolerstwa kónc septembra mobilizować móc. Kopředsyda strony Robert Habeck je na­je­bać naposledk woteběrace hódnoty w naprašowanjach ambicije ­Zelenych na kanclerski zarjad dźensa w „Rańšim magacinje“ ARD zakitował.

Rozsud znowa přestorčeny

Berlin (dpa/SN). Hinak hač planowane zwjazkowy sejm wosebje mjez ratarjemi dwělomny naćisk zakonja wo škiće překasancow tež tónle tydźeń njerozjima, kaž z aktualneho dnjoweho porjada němskeho parlamenta wuchadźa. Wo změnje zwjazkoweho přirodoškitneho zakonja, znateho tež jako zakonja wo škiće překasancow, mějachu zapósłancy prěnjotnje dźensa w druhim a třećim wuradźowanju rozsudźić.

Lětsa wo stopjeń ćoplišo?

Miliarda dozow šćěpiwa njedosaha

pjatk, 11. junija 2021 spisane wot:
Carbis Bay (dpa/SN). Wuwićowe organizacije su plany skupiny G7 zapadnych hospodarskich mocow, chudšim statam w boju přećiwo koronapandemiji z miliardu dozow šćěpiwa pomhać chcyć, jako njedosahace kritizowali. Žadaja sej, škit patentow zběhnyć. Britiske knježerstwo jako hosćićel je minjenu nóc wo wotpohledźe informowało. Staty G7 chcedźa z rozdźělenjom kaž tež z financowanjom šćěpiwa podpěru zmóžnić. Statni a knježerstwowi šefojo, kotřiž so wot dźensnišeho hač do njedźele w Cornwallu prěni raz po dwěmaj lětomaj zaso wosobinsce schadźuja, chcyli tež plan zdźěłać, zo by so produkcija šćěpiwow rozšěriła.

Mnichow/Rom (dpa/SN). Bamž Franciskus je wotstup arcybiskopa Mnichowa a Freisinga, kardinala Reinharda Marxa, wotpokazał. A to dosć spěšnje, w mjenje hač jednym tydźenju po wozjewjenju próstwy wo wotstup. „Runje to je moja wotmołwa, luby bratře. Čiń dale tak, kaž to namjetuješ, ale jako Mnichowsko-Freisingski arcybiskop“, piše hłowa katolskeje cyrkwje w lisće kardinalej Marxej, kotryž je swjaty stoł wčera wozjewił. Marx bě 4. junija spis wozjewił, w kotrymž rěče­še wo „mortwym dypku“ w katolskej cyrkwi. „Přihłosuju Tebi, zo mamy z katastrofu činić: ze zrudnej stawiznu seksualneho znjewužiwanja a z wašnjom, kak je cyrkej hač do njedawna z tym wobchadźała“, w lisće bamža dale rěka.

Prioritu prawa EU připóznać

pjatk, 11. junija 2021 spisane wot:

Brüssel (dpa/SN). Justicny komisar EU Didier Reynders Pólsku namołwja, zo by prioritu prawa Europskeje unije porno narodnemu prawu připóznała. W lisće Reynders na pólskeho ministra za europske naležnosće Konrada Szymanskeho apeluje, předłohu knježerstwa pola pólskeho wustawoweho sudnistwa z 29. měrca nastupajo přepruwowanje tohole principa cofnyć. List je powěsćerni dpa wčera předležał.

Hakle srjedu bě komisija jednanje přećiwo Němskej zahajiła, dokelž njeje jeje wustawowe sudnistwo we wusudźe k Europskej centralnej bance rozsud Europskeho sudnistwa wobkedźbowało.

Polacy měli so nawróćić

pjatk, 11. junija 2021 spisane wot:

W susodnym kraju nimaja hižo dosć dźěłowych mocow

Waršawa (dpa/SN). Pólska wabi pobrachowacych dźěłowych mocow dla wo to, zo so do wukraja wotpućowani staćenjo do swojeje domizny wróća. „To, wo čimž njejsmy před dźesać abo 15 lětami ani sonili, je so nadobo zwoprawdźiło: Docpěli smy wokomik, na kotrymž nam dźěłowe mocy pobrachuja“, rjekny knježerstwowy šef Mateusz Morawiecki předwčerawšim na wirtuelnym lětnym posedźenju wuchodneho wuběrka Němskeho hospodarstwa.

Pólska ma najebać pandemiju najnišu kwotu bjezdźěłnosće w Europskej uniji, Mateusz Morawiecki doda. Po statistiskej agenturje Eurostat wučinješe tam bjezdźěłnosć w aprylu 3,1 procent, w pře­rězku EU ­běchu to 7,3 procenty. Loni bě w susodnym kraju tež recesija z dwěmaj procentomaj w přirunanju niska, knježerstwowy šef wu­zběhny.

Serbska debata

nowostki LND