W mjenje Choćebuza so dźakowałoj

srjeda, 25. nowembera 2020 spisane wot:
Z plakatowej akciju pod hesłom „Choćebuz so dźakuje“ staj so Daniel Scholz (nalěwo) a Andreas Rothe w mjenje wobydlerjow sobudźěłaćerjam Choćebuskeho Carla Thiemoweho klinikuma minjenu njedźelu za jich njesprócniwe dźěło za čas koronapandemije dźakowałoj. Samsnu akciju přewjedźeštaj wonaj před hłownej stražu wohnjoweje wobory na Drježdźanskej a před Christopha Kolumbusowej šulu. Organizowała bě akciju iniciatiwa „Wobydlerjo za Choćebuz“ jako přećiwnu reakciju k ćichemu pochodej přećiwnikow wobmjezowanjow koronapandemije dla, kotraž wotmě so samsny dźeń wosrjedź města. Foto: Michael Helbig

To a tamne (25.11.20)

srjeda, 25. nowembera 2020 spisane wot:

Hajnikej třělbu wotewzał je jeleń w Čěskej. Skupina hajnikow bě w lěsu po puću, jako so jeleń psa nastróži. Na to so zwěrjo na jednoho z hajnikow měrješe. Z rohami šmórny so jeleń kabata muža a roztorha jemu rukawu. Při tym wosta třělba na rohach zwěrja wisajo. Hišće dwaj kilometraj dale wobrónjeneho ­jelenja wobkedźbowachu. Ludźo su namołwjeni, třělbu policiji wotedać, dyrbjał-li jón něchtó namakać.

Telewizijny wobraz kaminoweho wohenja je w sewjerorynsko-westfalskim Schwelmje wulkozasadźenje wohnjoweje wobory zawinował. Žona bě wobornikow wołała, po tym zo bě w bydlenju susoda woheń widźała. Jako wjace hač 40 wobornikow k městnu wohenja dojědźe, so wěc spěšnje jako wopačny alarm wukopa. Wobydler telewizor hasny a wobornicy zaso wotjědźechu.

Wjac za kubłanski dorost činić

wutora, 24. nowembera 2020 spisane wot:

Statne zrěčenje wo financowanju Załožby za serbski lud, zakoń wo sylnjenju struktury we Łužicy a kubłanske naležnosć we Łužicy běchu ćežišća wčera­wšeho wuradźowanje parlamentariskeje přirady załožby.

Budyšin (JaW/SN). Nowe statne zrěčenje wo financowanje Załožby za serbski lud měli Zwjazk a krajej Sakska a Braniborska tak spěšnje kaž móžno podpisać. To žadaja sej čłonojo parlamentariskeje přirady Załožby za serbski lud, kotřiž su wčera wo naležnosći online wuradźowali. Kaž zdźěli předsyda přirady Marko Šiman (CDU) na naprašowanje, je zrěčenje „zakład za dźěło załožby a tak tež za zachowanje a dalewuwiwanje rěče a kultury serbskeho ludu, nimo dalšich nadawkow, kotrež mamy sami spjelnić“. Swoje žadanje „zrěčenje hišće lětsa podpisać“ su čłonojo gremija na „tak spěšnje kaž móžno podpisać“ změnili. „Wšako buchu mnohe naležnosće koronakrizy dla přestorčene abo su so změnili. Dyrbimy dale ćišć wukonjeć, ale njepřehnawać“, zapósłanc Sakskeho krajneho sejma rozłoži.

Trump chce kooperować

wutora, 24. nowembera 2020 spisane wot:

Washington (dpa/SN). Amtěrowacy prezident USA Donald Trump je zwjazkowym zarjadam přikazał, z mustwom wokoło Joewa Bidena hromadźe dźěłać a tak přepodaće mocy přihotować. Přičina je drje zwěsćenje zamołwiteho zarjadnistwa za powšitkowne słužby GSA, kotraž wobhladuje Bidena jako „prawdźepodobneho dobyćerja wólbow“. Přiwšem so Trump dale spjećuje swoju poražku přiznać, kaž na platformje Twitter zdźěli.

Maas za mjezynarodnu pomoc

Berlin (dpa/SN). Zwjazkowy wonkowny minister Heiko Maas (SPD) namołwja z financnej podpěru Afghanistanej pokročować. „Miliony wobydlerjow su dale wot humanitarneje pomocy wotwisni. Mjezynarodne zhromadźenstwo njesmě so wotwobroćić“, rjekny Maas krótko ­do zahajenja UN-konferency darićelow w Genfje. Zaměr měł być, zo Afghanistan w běhu štyrjoch lět zaso na swójskimaj nohomaj steji.

Hospodarski rozmach

Francoska policija je wčera wječor w stolicy Parisu stanowe lěhwo zdźěla namócnje wotstroniła, kotrež běchu migranća z po­mocu domoródnych wosrjedź města natwarili. Z akciju chcychu ćěkancy na to skedźbnić, zo su mnozy z nich bjezdomni. Při ­policajskej akciji dóńdźe tež k rozestajenjam mjez podpěraćelemi migrantow a policiju. Foto: dpa/Jerome Gilles

Wobchodyw adwentnym času wotewrěć

wutora, 24. nowembera 2020 spisane wot:

Waršawa (dpa/SN). Pólska chce w adwentnym času wobmjezowanja koronawirusa dla we wikowanju zběhnyć. Wobkedźbujo krute hygienowe naprawy smědźa wobchody w nakupowanskich centrumach wot 28. nowembra zaso wotewrjene měć, kaž je ministerski prezident Mateusz Morawiecki we Waršawje připowědźił. Njedźelu, 6. a 13. decembra, smědźa wobchody tohorunja předawać. Při tym dźe knježerstwu wo to, miliony dźěłowych městnow w drobnowikowanju zachować.

Spočatk nowembra bě pólske knježerstwo wukazało, wšitke wobchody we wulkich nakupowanišćach zawrěć. Wu­wzaća płaća za wobchody žiwidłow, apoteki a drogerije. Hosćency, bary, fitnesowe studija a kulturne zarjadnišća wostanu hač do časa po hodźoch zawrjene. Po cyłym kraju płaćiwa internetna šulska wučba je hač do hód podlěšena. Zymske prózdniny, kotrež běchu podobnje kaž w Němskej dotal regionalnje wšelako rozdźělene, budu tam klětu jednotnje w času wot 4. do 17. januara.

Wobmjezowanja hač do hód?

wutora, 24. nowembera 2020 spisane wot:

Berlin (dpa/SN). K dalšemu redukowanju koronainfekcijow chcedźa tuchwilne wobmjezowanja zjawneho žiwjenja hač do hód podlěšić. Ministerscy prezidenća zwjazkowych krajow su so wčera wječor na to dojednali, hač do kónc nowembra wobstejace naprawy najprjedy raz hač do 20. decembra podlěšić. Doskónčnje rozsudźić chcedźa na jutřišim wuradźowanju ze zwjazkowej kanclerku Angelu Merkel (CDU).

By-li k podlěšenju wobmjezowanjow dóšło, bychu hosćency kaž tež wólnočasne a kulturne institucije, kotrež njesmědźa wot spočatka nowembra wjace dźěłać, dale zawrjene wostać dyrbjeli.

Ministerscy prezidenća ludźi namołwjeja, so do hodownych swjatych dnjow do wjace dnjow trajaceje izolacije podać. Silwesterski wohnjostroj měli na naměstach zakazać, zo njebychu so wjetše skupiny ludźi wutworili. Na šuli, předewšěm w rizikowych kónčinach, měli šulerjo tež we wučbje nahubnik nosyć. Dźěłodawarjo měli hodowne prózdniny podlěšić a ludźom dźěło doma zmóžnić.

Ptača gripa w Braniborskej

wutora, 24. nowembera 2020 spisane wot:

Wjacore zwjazkowe kraje mjeztym potrjechene – plahowarnje wohrožene

Podstupim/Berlin (dpa/SN). Třeći pad ptačeje gripy su w Braniborskej wobkrućili. Kaž ministerstwo za škit přetrjebarjow wčera zdźěli, su we wokrjesu Prignitz zahinjene pólne huso pozitiwnje na wirus H5N8 testowali. Friedricha Löfflerowy institut je podhlad po informacijach ministerstwa mjeztym wobkrućił. Huso běchu spočatnje při haće widźeli a wobkedźbowali, zo so chětro spodźiwnje zadźerži, krajnoradny zarjad informowaše. Něšto po tym běchu je zahinjene na kromje hata namakali. Mějićeljo wokolnych kormjernjow pjerizny su namołwjeni, swój wobstatk wobkedźbować a kóždužkuli njenormalnosć zamołwitym zarjadam hnydom přizjewić.

Dwě miliardźe dozow chudym

wutora, 24. nowembera 2020 spisane wot:

New York (dpa/SN). W boju přećiwo koronapandemiji chce UNICEF, dźěćacy pomocny skutk organizacije UNO, dwě miliardźe dozow šćěpjenskeho seruma do cyłkownje 92 chudych krajow pósłać. ­Logistiske přihoty su hižo zahajene, kaž UNICEF wčera zdźěli. Tež miliardu sykawow chcedźa tam pósłać.

„Samsny čas, w kotrymž dale na tym dźěłaja šćěpiwo přećiwo koronawirusej wuwiwać, zesylnja UNICEF swoje napinanja, zhromadnje z lětanskimi předewzaćemi, transportnymi firmami, łódźnistwowymi linijemi a dalšimi logistiskimi zjednoćenstwami tutón žiwjenje wuchowacy srědk tak spěšnje kaž móžno dodawać, rjekny direktorka zastaranskeje wotnožki UNICEF Etleva Kadilli. Tak chcedźa sej dosć transportnych móžnosćow za „historiski mamutowy nadawk“ zawěsćić. „Wobstarać, dodawać a rozdźělić serum přećiwo koronawirusej drje budźe najwjetša hdy zahajena operacija.“

Wot januara je UNICEF w boju přećiwo pandemiji po wšěm swěće srědki kaž škitne nahubniki, kitle, dychanske nastroje a srědki za testy w hódnoće 160 milionow eurow rozesłała.

To a tamne (24.11.20)

wutora, 24. nowembera 2020 spisane wot:

Noze za konopejom stej pytaneho skućićela w hornjofrankskim Kulmbachu přeradźiłoj. Policiju běchu rozestajenja dla do bydlenja wołali. Zwada wukopa so jako łahodna. Při tym pak wuhladachu policisća noze. 32lětny, kotrehož z wukazom zajeća pytachu, bě na wopyće w bydlenju a bě sej pjany za konopejom wusnył. Zastojnicy jeho spóznachu a jemu ruce sputachu. Potom jeho hakle wubudźichu.

Swojorazny foto transportera, kiž dalši transporter transportowaše, na kotrymž steješe wosobowe awto, je Krefeldska policija w interneće wozjewiła. Policija bě awto wažiła a zwěsćiła, zo je wozydło wo 30 procentow přećežke. Bychu-li zamołwići za awto předpisanu maksimalnu wahu dodźerželi, bychu z nim tež w tutej kurioznej formje dale jěć móhli, policija na naprašowanje zajimcow zdźěli.

Serbska debata

nowostki LND