Ruska šwika rozprawu

pjatk, 03. julija 2015 spisane wot:
Moskwa (dpa/SN/K). Nimale lěto po tym, zo bu nad wuchodnej Ukrainu malajziske pasažěrske lětadło MH17 wottřělene, wozjewichu nižozemscy přepytowarjo doskónčnu rozprawu, kotruž ma Ruska za dwělomnu. Přisłušna instanca Rosawiazija šwika, zo wobsahuje wjace prašenjow hač wotmołwow. „Naši specialisća maja na njej tójšto wustajeć“, praji jeje zastupnik. Ruske komentary a wudospołnjenja měli so do finalneje rozprawy zapřijeć. Prezident Wladimir Putin bě dpa njedawno rjekł, zo předleži jemu rozprawa, po kotrejž bu mašina wot rakety lětadła wotwobaraceho systema BUK trjechena, kotryž steješe na teritoriju, wot ukrainskeho wójska kontrolowanym.

To a tamne (03.07.15)

pjatk, 03. julija 2015 spisane wot:

Sam přeradźił je so plahowar marihuany w Hamburgu, jako po třěše běhaše. Starosćiwa susodka wołaše policiju, jako 26lětneho na dwuposchodowym domje w měšćanskim dźěle Billstedt wuhlada. Zastojnicy tukachu na planowane sebjemor­darstwo a přijědźechu ze šěsć awtami k by­dlenju muža. Tam namakachu ko­nopjowe rostliny a plahowanske nastronje. Što bě muž na třěše pytał, njewědźa.

Dosć bolostny kónc měješe wulět Kaliforničanki k skupinje delfinow před pobrjohom njedaloko Dana Point Harbora. Nadobo jedyn z delfinow na čołm skoči, runje na noze žony, při čimž sej wona wobě kulce złama. Delfin na čołmje panisce reagowaše. Mandźelski a dźěsć­i so na tamnym dźělu čołma chowachu. Přiwołana policija móžeše zwěrjo zaso do morja sćahnyć. Wšitcy běchu trawmatizowani, swójbni a delfin.

Łužica (03.07.15)

pjatk, 03. julija 2015 spisane wot:

Młodych designerow wabić

Zhorjelc (dpa/SN/ch). Město Zhorjelc dóstanje nowe europske modowe wurisanje. Kóžde lěto, prěni raz 23. apryla 2016, ma so Euro Fashion Award přewjesć. Městno zarjadowanja budźe wot lěta 2009 zawrjena Zhorjelska kupnica w młodźinskim stilu, hdźež su wšelke sceny za Hollywoodski film „Grand Budapest Hotel“ nahrawali. Nětko smědźa so tam młodźi profesionelni mjezynarodni designerojo wubědźować, kaž organiza­torojo wčera zdźělichu. Prěnje tři myta su ze 60 000 eurami dotěrowane. Jury je mjezynarodnje­ wobsadźena z modowymi profesorami a z Alexanderom Krennom, šefdesignerom Vivienny Westwood.

Dalši ABIchallenge přewjedli

Zbožownje pokazuje tale młoda žona zastupne lisćiki za 50. mjezynarodny filmowy festiwal Karlovych Varach, kotrež je wona dźensa w jednym z hotelow města kupić móhła. Na najwjetšim filmowym festiwalu Čěskeje republiki předstaja kónc tydźenja­ wjace hač dwěsćě nowoprodukcijow ze wšeho swěta. Foto: dpa/Pavel Němeček

Tsipras napominany

štwórtk, 02. julija 2015 spisane wot:
Brüssel (dpa/SN/K). Šef euroskupiny Jeroen Dijsselbloem je grjekskeho ministerskeho prezidenta Alexisa Tsiprasa napominał, wróćić wěrićelam płaćomne požčonki. Grjekske knježerstwo je to składnostnje podlěšenja tehdomnišeho pomocneho programa 20. februara přilubiło. Athen njeje Mjezynarodnemu měnowemu fondsej wutoru k terminej ratu 1,6 miliardow eurow přepokazał. Nimo­ toho Dijesselbloem Tsiprasej zdźěli, zo wobdźěła so próstwa grjekskeho knježerstwa wo 29 miliardow eurow pomocnych srědkow z wuchowneho krywa hakle po referendumje, kotryž ma so kónc tydźenja w Grjekskej wotměć. Hakle po tym chcedźa wo dalšim postu­powanju rozsudźić.

Koalicija so dojednała

štwórtk, 02. julija 2015 spisane wot:

Łužiscy hórnicy wodychnu – škitarjo wobswěta wobzamknjenja kritizuja

Berlin (dpa/SN/K). Kontrowersnych prašenjow w naležnosći změny energije hižo njeje. Na nócnym zeńdźenju su so němska zwjazkowa kanclerka Angela Merkel (CDU), hospodarski minister Sigmar Gabriel (SPD) a bayerski ministerski prezident Horst Seehofer (CSU) na rozrisanje w pakeće dojednali. Po nim je předwidźane, zawrěć hač do lěta 2020 brunicowe milinarnje z kapacitu 2,7 gigawattow, zo bychu so zaměry klimoweho škita docpěli. Kotre bloki to nastupa, pak njeje hišće wučinjene. Při wutwarje milinowodow ze sewjera na juh maja so w prěnim rjedźe kable pod zemju zasadźeć. Zo so nětko tola alternatiwny namjet zwoprawdźi, je wuspěch wobšěrneje prowuhloweje lobby w industriji, dźěłarnistwach a brunicowych krajach kaž Sakskej a Braniborskej.

NSA knježerstwo wobčušliła

štwórtk, 02. julija 2015 spisane wot:
Berlin (dpa/SN). Předsyda přepytowanskeho wuběrka k čušlenju ameriskeje tajneje słužby NSA w Němskej Patrick Sensburg (CDU) z tym liči, zo nimo NSA tež druhe tajne słužby zwjazkowe knježerstwo wobčušleja. Tole rjekny Sensburg dźensa w rańšim magacinje ARD. Po informacijach wotkrywanskeje internetneje słužby Wikileaks je NSA nimo kanclerki Angele Merkel (CDU) tež wulke dźěle zwjazkoweho knježerstwa a druhich politikarjow wotposkała. Po najnowšich dokumentach zajimowachu so Američenjo za němsku měnowu a hospodarsku politiku. Wosebje potrjechene bě zwjazkowe hospodarske ministerstwo.

Kritizuje protesty

štwórtk, 02. julija 2015 spisane wot:
Drježdźany (dpa/SN). Sakski nutřkowny minister Markus Ulbig (CDU) kritizuje antiazylowe protesty kaž te w Freitalu jako „njepřistojne a njepřiměrjene“. Přiwšěm njeje kóždy, kiž přećiwo požadarjam azyla na dróhu dźe, zdobom prawicarski ekstremist, praji Ulbig w Drježdźanskim wudaću Sächsische Zeitung. „Wočakuju, zo so demonstranća jasnje wot prawicarjow wotmjezuja. To so často nječini.“

Pofalla skazany

štwórtk, 02. julija 2015 spisane wot:
Berlin (dpa/SN). Přepytowanski wuběrk w naležnosći ameriskeje tajneje słužby NSA je sej dźensa něhdyšeho nawodu kanclerskeho zarjada Ronalda Pofallu skazał. Něhdyši wodźacy politikar CDU bě wot lěta 2009 do 2013 jako nawoda zarjada tež za zwjazkowu tajnu słužbu (BND) a za jeje styki k NSA zamołwity. Po dotalnych dopóznaćach je BND swoje zezběrane daty NSA dale dawała.

Wjele mortwych

štwórtk, 02. julija 2015 spisane wot:
Kairo (dpa/SN). Nimale 120 ludźi je wče­ra­ při nadpadach islamistiskich ekstremistow na połkupje Sinai zahinyło. Islamisća běchu 15 kontrolnišćow egyptowskeje armeje nadpadnyli. Při tym mo­richu 17 egyptowskich wojakow. Sto militantnych nadběhowarjow egyptowscy wojacy zatřělichu. Teroristiska milica Islamski stat je nadpady přiznała, při­powědźejo dalše atentaty.

nawěšk

nowostki LND