Přećiwo wotprawjenjam

póndźela, 31. awgusta 2015 spisane wot:
Islamabad (dpa/SN). Wonkowny minister Frank-Walter Steinmeier (SPD) je Pakistan namołwjał so dalšich wotprawjenjow wzdać. Na wopyće w stolicy Islamabadźe mjenowaše Steinmeier wotprawjenja „nječłowjeske wašnje chłostanja“. Nimo toho njeje tole efektiwna forma wottrašenja. Pakistan bě po terorowym nadpadźe na wojersku šulu z wjace hač 140 mortwymi loni w decembru zaso započał zasudźenych wotprawjeć. Wot toho časa su něhdźe 200 smjertnych wu­sudow zwoprawdźili. Do toho płaćeše moratorij, z kotrymž bě so Pakistan wotprawjenjow­ dobrowólnje wzdał.

Wažna protokolowa notica

póndźela, 31. awgusta 2015 spisane wot:

Runje dźensa před 25 lětami, 31. awgusta 1990, staj tehdyši zwjazkowy nutřkowny minister Wolfgang Schäuble a tehdyši statny sekretar NDR Günther Krause (wobaj CDU) we wuchodnym Berlinje zjednoćenske zrěčenje podpisałoj. „Zrěčenje mjez Zwjazkowej republiku Němskej a Němskej demokratiskej republiku wo zjednoćenju“ je w 45 artiklach a tójšto přiwiskach ze zjednoćenjom Němskeje zwjazane prašenja zdźěla jara na­drobnje rjadowało. Za to trjebachu 900 stron. Jednanja běchu so 6. julija zahajili, trajachu potajkim runje wosom tydźenjow. Ze zrěčenjom so płaćiwosć Zakładneho zakonja ZRN na teritorij NDR roz­šěri. Ze 14 wobwodow NDR wu­two­richu pjeć nowych zwjazkowych krajow Braniborsku, Mecklenburgsko-Předpomorsku, Saksku, Saksko-Anhaltsku a Durinsku. W zrěčenju zakótwichu, zo přewozmje zwjazkowa republika zamóženje NDR runje tak kaž jeje dołh. Nimo toho rjadowachu zarjadnistwo krajow. Zwjazkowy sejm a ludowa komora stej zrěčenje 20. septembra z wjetšinu schwaliłoj.

Zakładny kamjeń połožili

póndźela, 31. awgusta 2015 spisane wot:

W holi mjez Grodkom a Sprjewinym Dołom bě so 31. awgusta 1955 něhdźe 7 500 ludźi k zazběhej natwara Płunokombi­nata Čorna Pumpa zešło. Minister za ćežkoindustriju Fritz Selbmann postara so z planěrowanskej rawpu wo prěni zaryw wulkotwarnišća industrijoweho hobra, kotryž nasta na dwanaće kwadratnych kilometrach jako najwažniši producent energije NDR. Po dotwarje lěta 1966 dźěłaše 15 000 ludźi w płunokombinaće, kiž dodawaše­ 90 procentow wšěho mě­šćanskeho płuna, wjetšinu koksa z brunicy a 60 procentow wšěch briketow NDR. Na zahajenskej swjatočnosći je jako jenički dźěłaćer Pětr Leniš z Kulowa serbsce porěčał. Wot ministra Selbmanna wuprajena nadźija, zo změja w nowym wulkozawodźe­ we wjetšinje serbskich dźěławych, wosta són. Jenož něhdźe kóždy dwacety kolega w Čornej Pumpje bě Serb. Natwar płunokombinata je hoberske hospodarske, socialne a narodnostne změny na wsach srjedźneje Łužicy zawinił a přeněmčenje kónčiny spěchował. Mnozy tohodla rjeknychu: „Čorna Pumpa je row Serbstwa.

To a tamne (31.08.15)

póndźela, 31. awgusta 2015 spisane wot:

Nowy swětowy mišter na powětrowej gitarje pochadźa z Ruskeje. Kereel Bljumenkranc je so kónc tydźenja w finskim Oulu přećiwo 15 konkurentam přesadźił, kaž jury wozjewi. Z furioznej interpretaciju spěwa „Electric Butt“ finskeje skupiny Wedding Crashers móžeše 24lětny mjezynarodnu konkurencu – tež z Němskeje – za sobu wostajić.

12 000 eurow, kotrež bě 87lětny zběrar prózdnych blešow namakał, słušeja Wuppertalskemu hosćencarjej, je policija wuslědźiła. Předewzaćel bě dochody hosćenca­ do listowych wobalkow tyknył a je zhromadnje z wotpadkami mylnje preč ćisnył. Zběrar blešow pjenjezy nańdźe, jako wotpadkowy kontejner přepyta. Nětko ma wón prawo na myto. Nimo­ toho­ staj so anonymnaj darićelej přizjewiłoj, kotrajž chcetaj sprawneho muža pjenježnje wotrunać.

Łužica (31.08.15)

póndźela, 31. awgusta 2015 spisane wot:

Mjenje wody z rěkow

Zły Komorow (dpa/SN/ch). Horcoty a suchoty dla hodźi so lětsa mjenje rěčneje wody za zapławjenje bywšich brunicowych jamow we wuchodnej Němskej wužiwać. Dołhodobny časowy plan za přichodne jězory pak móža přiwšěm někak­ dodźeržeć, podšmórny předsyda jednaćelstwa­ hórniskeho saněrarja LMBV Klaus Zschiedrich. Wjetšina jězorow ma přichodne lěta dospołnje z wodu pjel­njena być. Jězory w bywšich wuhlowych jamach nastawaja přez zapławjenje z rěčnej wodu. Tež stupaca dnowna woda, kotraž bu za čas wudobywanja brunicy stajnje wotklumpana, zbywace dźěry pjelni. LMBV, załožena 1. septembra 1995 w Złym Komorowje, swjeći tam přichodny pjatk 20lětne wobstaće.

Pyramida restawrowana

Nowe wonkowne wobhrodźenje za tigry su w Choćebuskim zwěrjencu přepodali. Na zarjadowanje z tójšto přihladowarjemi přichwata tež wyši měšćanosta Holger Kelch (CDU) kotremuž zamołwići zwěrjenca tigricu Situ­ předstajichu. Ta budźe zhromadnje­ z dalšej tigricu w nowej připrawje bydlić. Nowy­ objekt běchu w běhu jednoho lěta natwarili. Foto: Michael Helbig

Ukrainje dołh spušćili

pjatk, 28. awgusta 2015 spisane wot:
Kijew/Brüssel (dpa/SN). Mjezynarodni pjenjezydawarjo su Ukrainje wjace hač tři miliardy eurow dołha spušćili a ju tak před hrožacej statnej plajtu wuchowali. Tole je ministerski prezident Arsenij Jacenjuk­ w Kijewje medijam zdźělił. Zastupnicy knježerstwa běchu bjezposrědnje do toho po pjeć měsacow trajacych wobćežnych jednanjach wotpowědne zrěčenje mjez druhim z ameriskimi fondsami Franklin Templeton, PIMCO a Blackrock podpisali. W krizy tčacemu krajej so tak 20 procentow wšeho stat­neho dołha spušći. Zbytny dołh 15 miliardow dolarow ma Kijew w lětach 2019 do 2027 wróćić. Tón wšak chcyše docpěć, zo jemu 40 proc. spušća. Ukraina dyrbi financy­ přerjadować, zo by dalše mjezynarodne pomocne kredity dóstała.

Grjekojo njerozsudźeni

pjatk, 28. awgusta 2015 spisane wot:
Athen (dpa/SN). Tři tydźenje do dočasnych wólbow parlamenta w Grjekskej dobra štwórćina ludźi (25,5 procentow) njewě, koho měła wolić. Lěwicarska strona Syriza z Alexisom Tsiprasom na čole by 23 procentow hłosow dóstała, kon­serwatiwni 19,5 proc. Tole je lěwicarska nowina Efmerída ton Syntaktón při woprašowanju zwěsćiła. Wólby maja so 20. septembra wotměć. Jako třeća najsylniša by prawicarskoekstremna strona Złote zerja 6,5 proc. nažnjała. Slěduja komunisća z pjeć a socialisća (Pasok) ze 4,5 procentami. Najpopularniši politikar wostawa­ po woprašowanju dotalny ministerski prezident Alexis Tsipras z 41 procentami. Šef konserwatiwneje strony Nea Dimokratia, Evangelos Meimarakis, dósta 43 procentow hłosow.

Tójšto ćěkancow zahinyło

pjatk, 28. awgusta 2015 spisane wot:

Eisenstadt/Tripolis/Drježdźany (dpa/SN/K). Drama ćěkancow na jednej z awstriskich awtodróhow ma hišće hrózbniše rozměry, hač bě so spočatnje zdało. W nocy zwućahachu wěstotne mocy wjac hač 70 ćěłow ze 7,5 tonow ćežkeho nakładneho awta, kotrež běchu pašowarjo stejo wostajili. Do toho bě rěč wo 50 mortwych. Tole zdźěli rěčnik nutřkowneho ministerstwa Alexander Marakovits medijam. Po sudźenju­ wěcywustojnych su ćěkancy hižo połdra do dwaj dnjej mortwi byli. Prawdźepodobnje běchu so w nakład­nym awće zadusyli. Sudniscy medicinarjo zwě­sćeja­ tuchwilu dokładnu přičinu jich smjer­će. Pytajo za pašowarjemi je policija mjeztym wjacore wosoby zajała.

Před libyskim přibrjohom powróći so łódź połna ćěkancow, štož je sej po bri­tiskej telewiziji BBC sta smjertnych wo­porow žadało. Na znjezboženej łódźi bě ně­hdźe 400 ludźi było.

To a tamne (28.08.15)

pjatk, 28. awgusta 2015 spisane wot:

Na wšě 130 kilogramow wotbył je pony Idefix w Freibergskim zwěrjencu minjene 20 měsacow. Ze 190 kilogramami ma wón nětko idealnu wahu, kaž nawodnistwo zwěrjenca pisa. Mjez wopytowarjemi woblubowany Idefix bě zas a zaso chłóšćenki ludźi brał, byrnjež picowanje zakazane było. Tak wažeše spočatk lěta 2014 wjace hač 320 kilogramow. Wot toho časa ma kruty dietny plan a ponyjowu damu Palomu poboku.

Prěnje hodowne pječwo ma hižo přichodne dny we wobchodach ležeć, štyri měsacy do hód. Tak je sezona poprjancow, spekulaciusa a cymtowych hwěžkow zaha­jena. Pječa so ludźo hižo nětko za tajkimi wudźěłkami naprašuja, kaž nawoda něm­skeje wotnožki předewzaća Bahlsen, Michael Hähnel, medijam w Berlinskim zawodźe firmy rjekny.

nawěšk

  • 21. jolka-swjedźeń w Nuknicy je nimo. Štož zwostanje su dopomnjenki na rjany žortny a zabawny wječor w Nukničanskej Brězanec bróžni. Někotre impresije serbskeho wječora w Nuknicy, kotrež je naša fotografowka-wolontarka Hanka Šěnec zhotowiła, wam tule
  • Serbske Nowiny-LND-Tuchmacherstr. 27 02625 Bautzen: Jolka 12.01.2019
  • Serbske Nowiny-LND-Tuchmacherstr. 27 02625 Bautzen: Jolka 12.01.2019

nowostki LND