W Japanskej su dźensa 70. róčnicu prěnjeho zasadźenja atomoweje bomby w Hiroshimje wopominali, kaž tule we wopomnišću města. USA běchu 6. awgusta 1945 nad městom prěnju jadrowu bombu scyła wotćisnyli, 9. awgusta dalšu nad městom Naga­saki. Něhdźe 200 000 ludźi na to zahiny. Hišće dźensa ludźo radioaktiwity dla mrěja. (Hlej rubriku Róčnica.) Foto: dpa/Ma Ping

Francoska pjenjezy wróći

štwórtk, 06. awgusta 2015 spisane wot:
Paris (dpa/SN/K). Francoska a Ruska stej swoju měsacy trajacu wadźeńcu wudaća dweju nošakow helikopterow klasy Mistral skónčiłoj. Francoska sej wójnskej łódźi­ wobchowa a zapłaćene pjenjezy Moskwje wróći. To stej Krjeml a Élysée-palast po rozmołwje francoskeho prezidenta Françoisa Hollandea z ruskim prezidentom Wladimirom Putinom zdźěliłoj. Brónjenski deal w hódnoće 1,2 miliardow eurow bu lěta 2011 wujednany. Po sankcijach napřećo Ruskej jeje­ postupowanja w ukrainskej krizy wšak bě Francoska wot njeho wot­stupiła. Wójnske łódźe klasy Mistral hodźa­ so tež jako płuwace komandowe centrale abo za transport wjetšich wo­jerskich jednotkow a techniki.

Zaso drama na morju

štwórtk, 06. awgusta 2015 spisane wot:

Sakscy Zeleni kritizuja ministerskeho prezidenta Tilicha wuprajenjow dla

Rom/Drježdźany (dpa/SN/K). Njezbožo z powróćenej łódźu wčera před libyskimi přibrjohami je sej prawdźepodobnje wjele stow mortwych žadało. Łódźe italskeje přibrjóžneje straže a dalše wuchowanske jednotki pytaja wot wčerawšeho popołdnja za zhubjenymi ludźimi. Ně­hdźe 400 migrantow móžachu dotal wuchować. Kelko ćěkancow na znje­zboženej łódźi woprawdźe bě, njejsu wšak hač donětka zwěsćić móhli. Pomocne organi­zacije tukaja na to, zo je jich znajmjeńša 600 było.

Žada sej dalše konsekwency

štwórtk, 06. awgusta 2015 spisane wot:
Berlin (dpa/SN). Předsyda Lěwicy Bernd Riexinger je sej w aferje wokoło internetneho žurnalistiskeho bloga a po pušćenju generalneho statneho rěčnika Haralda Rangi dalše personelne konsekwency žadał. W tym zwisku měł tež prezident zwjazkoweho zarjada za wustawoškit Hans-Georg Maaßen zastojnstwo złožić, wšako je tón ze swojej skóržbu krajneje přerady dla aferu hakle nastorčił, žadaše sej Riexinger w nowinje Handelsblatt. Raznje kritizował je politikar Lěwicy tež zwjazkoweho nutřkowneho ministra Thomasa de Maizièra (CDU). Wón dźě njebě slědźenjam přećiwo žurnalistam krajneje přerady dla zadźěwał.

Kanal poswjećili

štwórtk, 06. awgusta 2015 spisane wot:
Kairo (dpa/SN). Z wulkim swjedźenjom su wutwarjeny Suezkanal dźensa poswjećili. Za swětowe wikowanje přewšo wu­znamnu wododróhu běchu w běhu jeničkeho lěta wutwarili. Nětko móža łódźe po nim do wobeju směrow jězdźić, štož dotal móžno njebě. Egyptowska lubi sej z toho přidatne dochody. Suezkanal, zwjazowacy Srjedźne a Čerwjene morjo­, běchu w lěće 1869 wotewrěli.

Tube stawkuje

štwórtk, 06. awgusta 2015 spisane wot:
London (dpa/SN). Stawk přistajenych Londonskeje podzemskeje železnicy (tube)­ je dźensa zjawny wobchad britiskeje metropole haćił. Wot wčera wječora su wšitke jeje 270 stacijow zawrjene. Hižo popołdnju čakachu ludźo w dołhich rynkach před stacijemi podzemskeje, zo bychu domoj přišli, prjedy hač so stawk započa. Tón měri so přećiwo planam, ćahi přichodnje tež w nocy zasadźić.

Dźěl identifikowany

štwórtk, 06. awgusta 2015 spisane wot:
Kuala Lumpur (dpa/SN). W Indiskim oceanje namakany dźěl křidła lětadła słuša woprawdźe k zhubjenej pasažěrskej mašinje MH 370 předewzaća Malaysia-Airlines. Tole je přepytowanje dźěla wunjesło, kaž malajziski premierminister Najib Razak medijam zdźěli. Fachowcy běchu dźěl do toho analyzowali. Nětko so nadźijeja, cyłe lětadło namakać, kotrež je wot měrca 2014 zhubjene.

Bamž: Dźělenych zaso přiwzać

štwórtk, 06. awgusta 2015 spisane wot:
Rom (dpa/SN). Bamž Franciskus je so za to­ wuprajił, ze znowazmandźelenymi rozwjedźenymi wotewrjenje wobchadźeć. „Tući ludźo njejsu ekskomunikowani, tuž z nimi tež tak njewobchadźamy. Woni słušeja dale k cyrkwi“, potwjerdźi bamž na wčerawšej generalnej awdiency po lětnjej přestawce, „cyrkej je namołwjena, stajnje wotewrjeny dom Knjeza być. Nochcemy zawrjene durje.“ Wob­chadźenje z rozwjedźenymi, kotřiž so po tym zaso zmandźela, je w cyrkwi přeco hišće łoskoćiwa tema. Po katolskej wučbje njesmědźa woni swjate woprawjenje přijimować. Mjeztym pak so tomu tež cyrkej přiběrajcy spjećuje. Temu chcedźa mjez druhim na swójbnej synodźe Vatikana w oktobrje rozjimać. Bamž w tym zwisku wuzběhny, zo ma so rozeznawać, mjez tym, kiž je rozwod poćerpjeł, a tym, kotryž je jón zawinił. Zhromadnosć cyrkwje měła potrjechenych přiwzać, město toho zo jim dalše ćeže napołoži. Cyrkej njeje nastupajo tutu naležnosć „ani njesensibelna ani lěnja była. Dyrbimy ludźi bratrowsce zapřijeć.“

To a tamne (06.08.15)

štwórtk, 06. awgusta 2015 spisane wot:

W drastowym kamorje před policiju schował je so pozdatny paduch w braniborskim Nauenje. Policisća chcychu 28lětneho do jastwa dowjezć, zo by njezapłaćenu pjenježnu pokutu wotsedźał. Tón pak schowa so w kamorje a kazaše sobuwobydlerjej, zastojnikam durje wotewrěć. Woni nańdźechu w bydlenju cyły rjad pokradnjenych wěcow, kolesa, grat a samo brónje. Skónčnje wuhladachu 28lětneho w kamorje. Jemu a kumpanej hrozy nětko krute sudniske jednanje.

Ze sekeru je pilot lětadła pjaneho pasažěra w šwedskim lětadle nuzował nuznik wopušćić. Muž bě so tam zamknył a so spjećował ju zaso wopušćić. Dokelž je za čas přizemjenja zakazane, wustup wužiwać, so pilot rozsudźi durje kabiny ze sekeru rozbić a pasažěra wućahnyć. Muža nachwilnje zajachu a na lětanišću čakacej mandźelskej přepodachu.

Łužica (06.08.15)

štwórtk, 06. awgusta 2015 spisane wot:

Jědź wina njebyła

Lubin (dpa/SN). Jědź w prózdninskim lěhwje w Błótach njeje wina na schorjenju dźesatkow dźěći a dohladowarjow. Zwisk mjez zastaranjom a schorjenjemi je wuzamknjeny, kaž krajnoradny zarjad wo­krjesa Dubja-Błóta zdźěla. Labor bě jědź na wiry a bakterije přepytował, zo by přičiny schorjenjow zwěsćił, při tym pak ničo njenamaka. Minjeny pjatk bě 38 dźěći a šěsć pomocnikow w prózdninskim lěhwje w Prierosu skoržiło, zo je jim špatnje. Někotři dyrbjachu bluwać abo mějachu židlawu. Přiwołany lěkar jich zastara. Do chorownje­ nichtó njetrjebaše. Strowotniski zarjad nětko wobkedźbuje, hač maja potrjecheni tež po prózdninskim lěhwje hišće strowotniske problemy.

Přemało kislika w hatach

nawěšk

  • 21. jolka-swjedźeń w Nuknicy je nimo. Štož zwostanje su dopomnjenki na rjany žortny a zabawny wječor w Nukničanskej Brězanec bróžni. Někotre impresije serbskeho wječora w Nuknicy, kotrež je naša fotografowka-wolontarka Hanka Šěnec zhotowiła, wam tule
  • Serbske Nowiny-LND-Tuchmacherstr. 27 02625 Bautzen: Jolka 12.01.2019
  • Serbske Nowiny-LND-Tuchmacherstr. 27 02625 Bautzen: Jolka 12.01.2019

nowostki LND