Berlin (dpa/SN). Kompromis koalicije CDU/CSU a SPD k reformje zwjazkoweho wólbneho prawa wčera je wulka překwapjenka. Po słowach šefa CSU Markusa Södera pak je to najebać trajace diskusije a wšelake stejišća „fairny kompromis“, wšako je wukonliwy zwjazkowy sejm trěbny. Reforma zadźěwa tomu, zo městna w sejmje dale přiběraja. Za wólby klětu pak su jenož mjeńše korektury předwidźane. Hakle w lěće 2025 chcedźa reforma zeskutkownić.
Na paket naprawow so dojednali
Berlin (dpa/SN). Nawodnistwa CDU/CSU a SPD su so wčera na podlěšenje paketa naprawow korony dla dojednali. Ćežišćo je podlěšenje pjenjeza za krótkodźěło. Tohorunja chcedźa srjedźny staw dlěje financnje podpěrać. Starši dóstanu hladajo na chorobne dny swojich dźěći pomoc. Tam maja w padźe schorjeneho dźěsća město dźesać cyłkownje 15 zapłaćenych dnjow dóstać. Po słowach předsydki CDU Annegret Kramp-Karrenbauer koalicija z paketom pokaza, zo je hač do wólbow klětu nazymu jednanjakmana.
Wupokaz měł wjace płaćić
Minsk (dpa/SN). Nowa koordinowaca rada za měrniwe přepodaće mocy w Běłoruskej je wumjetowanja statneho prezidenta Aleksandera Lukašenka wotpokazała, zo chcył gremij móc w kraju přewzać. „Smy sej zaměr stajili, dialog k přewinjenju politiskeje krizy w kraju zahajić“, rjekny něhdyši minister za kulturu Pawel Latuško powěsćowemu portalej Tut.by wčera w stolicy Minsku. Jeho běchu so dopołdnja we wobłuku přepytowanjow přećiwo radźe jako swědka woprašeli. Wšitke namjety gremija wotpowěduja wustawje, wón rjekny.
Přepytowanja statnych institucijow přećiwo koordinowacej radźe wuskutkuja so po posudku Latuška moralisce na čłonow. „Tutón ćišć ze stron stata ma ludźi pohnuć, radu wopušćić.“ Generalne statne rěčnistwo bě minjeny tydźeń chłostanske jednanje zahajiło. Rada měri so na přewzaće mocy a wohrožuje narodnu wěstotu, rěka w zdźělence. Prezident Lukašenko bě wospjet připowědźił, zo chcył koordinowacu radu rozbić, dokelž ma ju za ilegalnu.
Praha (dpa/SN). Čěska skrótša čas karanteny w podhladnych padach koronawirusa dla wot 14 na dźesać dnjow. Změna płaći wot 1. septembra, kaž z noweho wukaza strowotniskeho ministerstwa w Praze wuchadźa. Karantenu móža strowotniske zarjady přikazać, hdyž je něchtó kontakt k z koronawirusom natyknjenej wosobje měł. Rjadowanje płaći tež za tych, kotřiž nawróća so z rizikowych kónčin, kaž ze Španiskeje, dołhož njepředleži negatiwny test na koronawirus.
Ze skrótšenjom karanteny slěduje Čěska přikładej Awstriskeje. Nowe k tomu je, zo móža z koronawirusom natyknjeni po najzašo dźesać dnjach domjacu karantenu zaso wopušćić, bjeztoho zo předleži negatiwny koronatest. Wuměnjenje je, zo běchu minjene tři dny bjez symptomow. Wčera bu znate, zo su w frakciji knježaceje strony ANO čěskeho parlamenta pad koronawirusa zwěsćili. W Čěskej je 5 400 natyknjenych. Dotal je 415 ludźi w zwisku z wirusom zemrěło.
Sonderburg (SN/JaW). Schleswigsko-Holsteinski ministerski prezident Daniel Günther (CDU) je na swojej lětnjej jězbje minjeny pjatk Němcow w Danskej wopytał. Kaž rozprawja němski mjeńšinowy dźenik Der Nordschleswiger – nowina je runja Serbskim Nowinam čłon Europskeho zjednoćenstwa dźenikow w mjeńšinowych a regionalnych rěčach (MIDAS) – je Günther w Sonderburgu Němski muzej wopytał. Jeho přewodźeštaj prezident Schleswigsko-Holsteinskeho krajneho sejma Klaus Schlie a społnomócnjeny zwjazkoweho kraja za mjeńšiny Johannes Callsen.
Dokelž bě tank awta prózdny, je so 66lětny w Hessenskej na awtodróze A 5 na strašne pućowanje podał. Z bowom połny kwětkow w ruce zadźeržowaše wón awta, zo by k 20 kilometrow zdalenej tankowni přišoł. Tam kwětki předa a kupi sej z pjenjezami kanister bencina. Na wróćopuću k awtu pak so Durinčan zaběža. Policisća jeho skónčnje namakachu. 66lětny dóstanje chłostanje parkowanja na awtodróze dla, dokelž dyrbjał sam na to dźiwać, zo tank njewuprózdni.
Z awtom dźěda njezbožo zawinił je dwanaćelětny w Delnjej Sakskej. Kaž policija zdźěli, je hólc w emslandskim Haselünne do štoma zrazył. Jeho dowjezechu do chorownje. Wón pak bě jenož snadne zranjenja poćerpjeł. Po prěnich dopóznaćach bě so pachoł ze swojim dźědom zwadźił. Na to wza sej klučik a wotjědźe. Škoda: Wjacore dźesaćitysacy eurow.
Wiesbaden (dpa/SN). Koronakriza je do němskich statnych financow wulku dźěru torhnyła. Zwjazk, kraje, gmejny a socialne zawěsćernje su prěnje połlěto 51,6 miliardow eurow wjace wudawkow hač dochodow měli, zdźěli Zwjazkowy statistiski zarjad we Wiesbadenje. Nutřkokrajny bruttoprodukt je druhi kwartal wo 9,7 procentow přirunujo z prěnim kwartalom woteběrał. Fachowcy běchu samo wjace hač dźesać procentow wočakowali. Koronapandemije dla bě hospodarstwo Němskeje w měrcu a aprylu faktisce kompletnje zlemjene.
Trump jednohłósnje woleny
Washington (dpa/SN). Delegaća zjězda Republikanow su prezidenta USA Donalda Trumpa jednohłósnje za kandidata k wólbam prezidenta nominowali. Trump dósta na zjězdźe w Charlotte w zwjazkowym staće North Carolina hłosy wšěch 2 550 delegatow ze wšitkich zwjazkowych statow, předsydka strony Ronna McDaniel zdźěli. Trump njeměješe w předwólbnym boju žanoho woprawdźiteho nutřkostronskeho přećiwnika.
Protesty po policajskej akciji
Podstupim (dpa/SN). Hosćencarjo w Braniborskej su koronakrizy dla prěnje połlěto 2020 razne straty wobrota poćerpili. Mjez januarom a junijom wučinješe minus w přirunowanju z lětom do toho na wšě 36 procentow, krajny statistiski zarjad zdźěla. Ličba přistajenych je samsny čas wo 11,7 procentow woteběrała. W juniju mějachu předewzaća gastronomije přirunujo z lońšim junijom 35,5 procentow mjenje wobrota.
Porno tomu su wobchody drobneho wikowanja wot januara hač do junija 6,6 procentow wjace wobrota nadźěłali hač prěnje połlěto 2019. Ličba přistajenych je w tutym wobłuku wo 1,6 procentow rozrostła, zarjad zdźěla.