Iniciatiwa šulerskeje rady wokrjesa Sprjewja-Nysa za dwurěčne šulske wuswědčenje je wotkryła, zo posrědkowana wěda wo našim ludźe njespokoja.
Podstupim (SN/at). „Wšitke šule w serbskim sydlenskim rumje měli dwurěčne wuswědčenja wudźěleć. To je mała forma, zo byštej serbska rěč a kultura žiwej wostałoj“, rjekny Justin Pigol z Bórkowskeje šule „Mina Witkojc“ minjeny pjatk na posedźenju braniborskeje Rady za naležnosće Serbow. Běchu jeho přeprosyli, iniciatiwu šulerskeje rady wokrjesa Sprjewja-Nysa (SPN) předstajić.
Běłohród (dpa/SN). Jenož mało wobydlerjow Serbiskeje je so wčera na wólbach noweho parlamenta wobdźěliło. Kaž wólbni wobkedźbowarjo wozjewichu, bě jich jenož něhdźe 48 do 49 procentow wólbokmanych. Najwažniše strony opozicije chcychu wólby bojkotować a njejsu nastupili. Kaž wočakowane, je prawicarskonarodna strona SNS z prezidentom Aleksandarom Vučićom 63 procentow hłosow wolerjow nažnjała.
Stuttgart po wukročenjach
Stuttgart (dpa/SN). Zwjazkowy nutřkowny minister Horst Seehofer (CSU) chce sej po wukročenjach w Stuttgarće wobraz wo połoženju sčinić, kaž dźensa badensko-württembergske nutřkowne ministerstwo zdźěli. Připołdnju jeho tam wočakowachu. W nocy na njedźelu bě so po informacijach 400 do 500 ludźi w stolicy zwjazkoweho kraja na namócnych rozestajenjach wobdźěliło. Znajmjeńša 19 zastojnikow so zrani. Cyłkownje 24 ludźi je policija nachwilnje zajała.
Maja noweho kandidata
Drježdźany (dpa/SN). Gastronomiska a hotelowa branša w Sakskej je tež po wotewrjenju mnohich zawodow w meji dale pod wulkim ćišćom. „Kriza hišće nimo njeje“, rjekny Axel Klein, hłowny jednaćel zwjazka hosćencarjow a hotelownikow Dehoga, minjeny pjatk w Drježdźanach. Wón pokaza na wuslědk naprašowanja mjez nimale 600 gastronomiskimi zawodami Sakskeje, při čimž bě 80 procentow woprašanych rjekło, zo njemóža pod aktualnymi wobstejnosćemi hospodarsce dźěłać. Liča tuž lětsa z jenož połojcu hewak nadźěłaneho wobrota. Nadźiju čerpa branša z nachwilnje zniženeho nadhódnotoweho dawka a z konjunkturneho paketa zwjazkoweho knježerstwa.
Wot 15. meje smědźa hosćency, hotele a dowolowe bydlenja pod hygienowymi postajenjemi zaso hosći witać. Tři štwórćiny woprašanych pak skorža, zo njebudu nadźije na dobry wobrot napołoženych wobmjezowanjow dla dotal spjelnjene. Dochody su wo wjele snadniše hač loni w tym času.
Gütersloh (dpa/SN). Połoženje w mjasowej fabrice Tönnies we wokrjesu Gütersloh je dale napjate. Hač do wčerawšeho zwěsćichu tam 1 300 na koronawirus inficěrowanych. Dźensa chcychu z mobilnymi teamami dalše testy mjez přiwuznymi sobudźěłaćerjow předewzaća přewjesć. Šule a pěstowarnje w sewjerorynsko-westfalskim wokrjesu su hižo zawrjene. Kaž tamniši ministerski prezident Armin Laschet (CDU) měni, su dalše wobmjezowanja zjawneho žiwjenja, tak mjenowany lockdown, móžne. Dalše postupowanje chcedźa zamołwite instancy w přichodnych dnjach pruwować.
Mjeztym žadaja sej politikarjo konsekwency za mějićela mjasoweje fabriki Clemensa Tönniesa, kiž měł zamołwitosć přewzać. Zwjazkowy minister za dźěło Hubertus Heil (SPD) je firmu raznje kritizował a zwuraznił, zo jej hižo njedowěrja. Dale wón wuzběhny, zo ma so w branši nuznje něšto změnić. Šef frakcije Zelenych w zwjazkowym sejmje Anton Hofreiter namołwja, hižo žane w předewzaću produkowane mjaso njekupować.
Drježdźany (dpa/SN). Mnozy wuměłstwowi rjemjeslnicy swoje wudźěłki přewažnje na wosebitych wikach abo wustajeńcach předawaja. Dokelž je jich nětko w času koronapandemije jara mało, nimaja tuchwilu dosć dochodow, a tak dyrbja so na druhu połojcu lěta nadźijeć.
Tež rjemjeslnicy w Rudnych horinach, kotřiž kurjaki a dalše drjewjane figury zhotowjeja, tučasnje dosć produktow njewotbywaja. Kelko wikow je šmórnjenych abo přestorčenych, dotal nichtó dokładnje njewě. Po informacijach sakskeho socialneho ministerstwa pak smědźa hornčerjo a rjemjeslnicy swoje wiki zaso wotměć.
Mužakow (AK/SN). Ze sensaciju su prěnju wosebitu wustajeńcu po znowawotewrjenju němsko-pólskeje mjezy na Mužakowskim hrodźe w Parku wjercha Pücklera minjeny pjatk zahajili. „Nam je to najrjeńša a najwažniša přehladka dotal scyła“, podšmórny direktor parka Cord Panning w přitomnosći sakskeho ministerskeho prezidenta Michaela Kretschmera (CDU) a někotrych čestnych hosći z Němskeje a Pólskeje. Pod titulom „Něžna lochkosć barbow“ je widźeć 74 akwarelow Berlinskeho molerja Carla Graeba (1816–1884), kotrež pokazuja Pücklerowy park a wokolinu wokoło lěta 1860.
Lubosćinskeje tyšnosće dla je młodostna w Awstriskej wulku ličbu picow na wopačnu adresu skazała. 19lětna chcyše tak swojeho bywšeho přećela wobkedźbować, kak wón picy rozwožuje, a je to tajnje činiła. Wot 20. februara do 12. měrca je cyłkownje 50 picow na wopačne adresy skazała, kotrež pak ludźo njepřiwzachu. Policija je skućićelku skónčnje wuslědźiła. Hač drje měješe bywši přećel akciju 19lětneje za dobru?
Zajimawa kniha je 31lětnu žonu w Tübingenskej bibliotece tak jimała, zo je na wšo zabyła. Jako chcyše dom wopušćić, bě hižo zawrjeny, a tak wona policiju zawoła. Zastojnicy informowachu na to stražnika, kiž žonu wuswobodźi. Hač je wona čas zabyła abo njeje namołwy z wótřerěčaka słyšała, njeje cyle jasne. Titul zajimaweje knihi pak nochcyše policiji přeradźić.
Berlin (dpa/SN). Financny minister Olaf Scholz (SPD) zakitowaše dźensa w zwjazkowym sejmje rekordne zadołženje Němskeje za planowany konjunkturny paket, kotryž ma wikowanje a hospodarstwo wožiwić. „218 miliardow eurow, to njeje mało“, rjekny wicekancler hladajo na tych, kotřiž so hoberskeje sumy dołha dla starosća. Zwjazkowa republika je pak solidnje hospodariła, štož tež přichodnje čini, Scholz potwjerdźi. Wón je sej wěsty, zo planowane naprawy „sylny konjunkturny impuls“ nastorča.
Wučba zaso bjez wotstawka
Berlin (dpa/SN). Kultusowi ministrojo chcedźa po lětnich prózdninach šule zaso dospołnje wotewrěć a při tym dotal płaćiwy wukaz dodźerženja wěstotneho wotstawka we wučbje zběhnyć. To wuchadźa z wobzamknjenja konferency kultusowych ministrow, kotrež powěsćerni dpa předleži. „Kraje su sej přezjedne, zo ma so prawidło wo wotstawku zběhnyć, hdyž to infekciske połoženje dowoli“, rěka we wobzamknjenju.
Pompeo nadběhuje Boltona