Budyšin (SN). Dale a wjac wobydlerjow Budyskeho wokrjesa w starobje hižo dosć pjenjez k dispoziciji nima. Ličba wuměnkarjow, kotřiž přidatnje k renće hišće Hartz IV trjebaja, přiběra. W běhu minjenych dźesać lět bě jich samo jědnaće procentow wjace. Bě-li w lěće 2008 hišće 1 761 rentnarjow Hartz IV poćahowało, je ličba loni na 1 954 rorostła. To zdźěli minjeny tydźeń dźěłarnistwo Cyrobizny, požiwadła a hosćency (NGG) a poćahuje so na wozjewjenja statistiskeho krajneho zarjada. Po cyłej Sakskej dóstawa něhdźe 30 000 wuměnkarjow přidatne zakładne zawěsćenje, štož wotpowěduje 25 procentam wjace hač před lětami.
Chětro agresiwna kruwa je w delnjofrankskej gmejnje Sand nad Mohanom policiju štyri hodźiny dołho zaběrała. Ćěkajo před policiju bě howjado rostlinarnju skóncowało a policajske awto wobškodźiło. Hakle narkozowe kłoki skótneho lěkarja móžachu njemdre skoćo zadźeržeć. Přesćěhali běchu je wjacore policajske jězdźidła a helikopter.
Zhubjena luksusowa jachta je kónc tydźenja w Mecklenburgsko-Předpomorskej při Müritzskim jězoru rozhorjenosć zbudźiła. Muž bě policiji zdźělił, zo je jeho dwanaće metrow dołha a sydom tonow ćežka łódź w hódnoće 120 000 eurow pokradnjena, byrnjež w přistawje porjadnje přiwjazana była. Hodźiny po tym wuhlada čołmikar wosamoćenu łódź na tamnym boku hoberskeho jězora. Policija nětko pruwuje, hač je něchtó klubu činił a powjazy snano rozwjazał.
Drježdźany/Budyšin (SN/at). Přichod sakskeho krajneho biskopa Carstena Rentzinga je njejasny. Nawodnistwo Ewangelsko-lutherskeje krajneje cyrkwje Sakskeje póndźelu wo tym wuradźuje, kak dale póńdźe, a hač poskićeny wotstup Rentzinga přiwozmje. „Rozsud je formelnje wotewrjeny“, rjekny prezident krajneho cyrkwinskeho zarjada Hans-Peter Vollbach powěsćerni dpa.
Předsyda Serbskeho ewangelskeho towarstwa Mato Krygaŕ rjekny w rozmołwje z našim wječornikom, zo „ma so jeho swójski rozsud, zastojnstwo krajneho biskopa k dispoziciji stajić, respektować“.
Minjene dny žada sej wjace hač 10 000 podpisarjow online-rezolucije w interneće, zo ma wón dale biskop wostać.
Carsten Rentzing je po tym, zo buštej jeho sobustawstwo w bijacym bóršistwje ze studentskeho časa a zjawna kritika znatej, minjeny pjatk wozjewił swoje zastojnstwo złožić, zo by „škodu wot swojeje cyrkwje wotwobroćił“. 52lětny přebywa tuchwilu w dowolu a je tak dale w zastojnstwje. Te złožić pak móže wón jenož, hdyž je cyrkwinske nawodnistwo z tym přezjedne.
Ankara (dpa/SN). Njewočakowano stej so USA a Turkowska na přiměr bróni w sewjernej Syriskej dojednałoj. Turkowska chce swoju ofensiwu přećiwo kurdiskim milicam YPG pjeć dnjow přetorhnyć, rjekny wiceprezident USA Mike Pence w Ankarje. Zaměr je, zo maja wojowarjo YPG składnosć, potrjechenu kónčinu wopušćić. Mjeztym je EU zdźeržliwje na připowědźeny přiměr reagowała. W zhromadnej deklaraciji statni a knježerstwowi šefojo EU Turkowsku namołwjeja, wojersku ofensiwu hnydom zakónčić.
Generalny stawk
Barcelona (dpa/SN). Z generalnym stawkom a demonstracijemi chcedźa separatisća w Kataloniskej dale přećiwo zasudźenju nawodow hibanja njewotwisnosće protestować. Wčera wječor bě tam znowa k demonstracijam a namócnosćam dóšło. Dźensa wočakuja w Barcelonje demonstrantow z wjacorych městow. Najwyše španiske sudnistwo bě nawodow minjenu póndźelu k wjelelětnemu jastwu zasudźiło. Na to běchu so přiwisnicy njewotwisnosće k zdźěla namócnym demonstracijam zhromadźili.
Reforma dawka schwalena
Drježdźany (dpa/SN). Politikar sakskich Zelenych, Gerd Lippold, je připowědźenje Braniborskeje witał, so nowych brunicowych jamow a rozšěrjenja wobstejacych wzdać. Zdobom wón Saksku namołwja, přikładej Braniborskeje sćěhować. „Kóžde pomjeńšenje wudobywanskeje płoniny zniža kóšty za pozdźišu rekultiwaciju a saněrowanje, kotrež dyrbi předewzaće zapłaćić“, rjekny zapósłanc krajneho sejma powěsćerni dpa.
Brüssel (dpa/SN). Britiski premierminister Boris Johnson je optimistiski, zo delnja komora parlamenta w Londonje stronske mjezy přesahujo wujednanemu zrěčenju z Brüsselom wo wustupje Wulkeje Britaniskeje z Europskeje unije přihłosuje. „To je jara dobry deal“, rjekny wón wčera w Brüsselu. Hodźiny do toho běchu so zastupnicy Londona a Brüssela na zrěčenje wo brexiće dojednali. Tež 27 statow EU je zrěčenje schwaliło.
Wonkowny minister Luxemburga Jean Asselborn so nadźija, zo britiski parlament zrěčenje wotžohnuje. Wón na to pokaza, zo je nadawk EU, tež małe čłonske kraje škitać. K tomu słuša, měr na irskej kupje zachować. „Nowy brexitowy deal móže tole zdokonjeć.“
Mjeztym jewi so hižo nětko w Londonje razne spjećowanje přećiwo zrěčenju. Opoziciska strona Labour nochce na žadyn pad přihłosować. Tež parlamentariski partner Johnsona, sewjeroirska protestantiska strona DUP, chce zrěčenje wotpokazać. Hač do jutřišeho wothłosowanja chce Johnson zapósłancow přeswědčić.
Frankfurt n. W./Słubice (RD/SN). Narodnokonserwatiwna strona Prawo a sprawnosć (PiS), kotraž je dotal na wuchodźe a juhu Pólskeje hižo wjele lět z hač do 60 procentami hłosow wolerjow dominowała, je nětko tež w zapadźe kraja swoju postajowacu poziciju wutwarić móhła. Opoziciji su so dźělne wuspěchi poradźili. Takle drje hodźi so wuslědk wólbow Pólskeho sejma minjenu njedźelu w třoch susodnych wojewódstwach při mjezy Němskeje wopisować.
Tak je PiS w delnjošleskim wojewódstwje, kotrež leži při juhowuchodnej mjezy Sakskeje, z 42,4 procentami (2015: 32,63 %) hłosow přemóžace wólbne dobyće swjećiła. Opozicionelna Wobydlerska koalicija KO leži z 25,02 procentomaj poražena na druhim městnje. Lěta 2015 bě sej wona hišće 37,95 procentow zdobyła. Lěwica dósta 16,43 procenty po 8,05 % před štyrjomi lětami. Ratarska strona PSL ma 7,17 procentow (2015: 3,14 %). Tak móže wosom zapósłancow PiS, třo za KO, dwaj za Lěwicu a jedyn za PSL z Delnjeje Šleskeje do noweho sejma we Waršawje zaćahnyć.