Budyšin (CRM/SN). Lětuše pišćelowe lěćo je z 15 koncertami kóždu srjedu wječor napoł wosmich w ewangelskim dźělu cyrkwje swj. Pětra hač do kónca awgusta planowane. Wobdźěleni su nimo wu­znamnych pišćelerjow z cyłeje Němskeje tež hudźbnicy z Italskeje, Jendźelskeje, Danskeje a Japanskeje.

Minjenu srjedu zahaji so pišćelowy swjatk z kantorom ewangelskeje wosady Michaelom Vetterom a katolskeje wosady Friedemannom Böhme, kotrajž hraještaj na wobojich hłownych pišćelach.

Hižo při durjach witaše iniciator Michael­ Vetter swój stajny publikum. Tachant­ski farar Wito Sćapan je připo­słucharstwo, kotrež wobsadźi wězo z poru­čenym wěstotnym wotstawkom městna wotprědka hač dozady, němsce kaž tež serbsce postrowił. Wón skedźbni na to, zo ma Budyšin z mjenowanymaj inter­pretomaj wirtuozneju organistow. Nimo toho staj runje wonaj z dalewjedźenjom koncertowanja na wotpowědnje disponowanymaj instrumentomaj žadnostku simultaneho Božeho domu jara wuspěšnje přez wjele lět dale hajiłoj.

Budyšin (SN/CoR). Hornjoserbska rěčna komisija (HRK) je hornjoserbske Braillowe pismo na swojej internetnej stronje k downloadej wozjewiła. Pismo bazuje na prěnjotnym naćisku studenta linguistiki Harrisa Mowbrayja z Kaliforniskeje (SN rozprawjachu) a je po wuměnje myslow ze sobudźěłaćerjemi Serbskeho instituta a po diskusiji ze serbskorěčnymi wužiwarjemi Brailloweho pisma, wosebje z Robertom Lombinom, złaha modifikowane. W běhu tohole procesa su tež nětko wuformulowane prawidła nastali.

„Hornjoserbska rěčna komisija wita wuwiće serbskeho Brailloweho pisma a doporuča, jeho wužiwanje w praksy wupruwować“, rěka we wozjewjenju. Zdobom HRK na to skedźbnja, zo njewidźi so „za postajenje a wobzamknjenje woprawnjena. To čini so za druhe rěče wot wotpowědnych zwjazkow slepych/njewidźacych resp. specielnych komisijow za Braillowe pismo.“

Hač jeho namjet tež za delnjoserbske Braillowe pismo akceptuja, njeje hišće jasne, kaž Harris Mowbray zdźěli. Mjeztym je wón hornjo-a delnjoserbski alfabet za gestikulacisku rěč namjetował.

Wiziju Měrka Šenka za serbski digitalny swět w lěće 2025 móžu rozumić. Tak samozrozumliwe, kaž to dźensa je, na ličaku a šmóratku serbsce pisać, tak normalnje ma so naša rěč we wšitkich medijowych a žiwjenskich wobłukach jewić. Tež předstawu, zo samo njeserbske zarjady a zarjadnišća rěč mjeńšiny nałožuja, mam za wažnu. Jeli to digitalna technika zmóžni, žada sej to samo rěčna politika. A čim wjace ludźi so na serbšćinu zwuči, ćim bóle ju jako runohódnu akceptuja. Cyła digitalizacija pak serbskorěčnej normaliće njepomha, hdyž zamołwići Serbja zjawnje serbsce njerěča – kaž wčera na wirtuelnej medijowej prezentaciji digitalizaciskeho koncepta. Wěmy, zo je dwurěčne zarjadowanje technisce móžne. Hdyž pak němscy žurnalisća na nowinarskich konferencach wot Załožby za serbski lud a Serbskeho instituta našu rěč njesłyša, kak móža ju za normalnu měć? Serbja sami ju wočiwidnje za samozrozumliwu nimaja. Cordula Ratajczakowa

W Drježdźanskim wobchadnym muzeju su dźensa nowu wustajeńcu „K hwězdam – Dyrdomdej swětnišćowe łódźnistwo“ wotewrěli. Hižo wčera móžeše sej naš fotograf wjac hač 70 zdźěla originalnych eksponatow kaž tež napodobnjenja jězdźidłow w swětnišću wobhladać. Mjez nimi napadny jemu podobizna łódźe Sojuz. Přehladka je hač do 7. nowembra we wotewrjenskich časach muzeja přistupna. Dalše informacije pod Foto: Jürgen Männel/ddbd