„Baseń dyrbi klinčeć“

póndźela, 02. měrca 2020 spisane wot:

Budyšin (SN/CoR). Na sedmym zarjadowanju rjadu Zwjazka serbskich wuměłcow tracTare minjenu srjedu w Budyskim hosćencu „Tirolske stwy“ tworješe loni nazymu w LND wušła zběrka basnjow Róže Domašcyneje „W času zeza časa“ srjedźišćo. Jěwa-Marja Čornakec witaše dwanaće přitomnych w mjenje předsydstwa ZSW a přepoda słowo Měranje Cušcynej za „ćežki nadawk“ zawoda do knihi – kotraž je wona z wočiwidnym lóštom zmištrowała. Jeje wobšěrnej analyzy w štyrjoch kapitlach strukturowaneje knihi a zdobom charakterizowanju specifiskeho wašnja literarneho tworjenja basnicy přizamkny so čiła rozmołwa, kotraž je po­date nitki dale pletła – faible spisowaćelki za paradoksy a za to, so „Pře wšě płoty“ (1994) pohibować, kaž tež typisku „swobodu basnicy, kotrejež rěčnu maćiznu njemóžeš přeco w słownikowym korseće namakać“. „Dźiwam so, što jej wšo dowoleš“, wobroći so basnica-kolegina Měrana Cušcyna lektorce Marce Maćijowej, kotraž Róžu Domašcynu hižo wot jeje prěnjeje zběrki „Wróćo ja doprědka du“ (1990) w LND přewodźa.

Wóskowanje jejkow předstajili

póndźela, 02. měrca 2020 spisane wot:
Kaž kóžde lěto přeprošeja sobudźěłaćerjo Bórkowskeje domizniskeje stwy tež lětsa do jutrow zajimcow, zo bychu so wo debjenju jutrownych jejkow wobhonili a wšelake techniki doma sami wuspytać móhli. Minjeny kónc tydźenja rozłožowaše nawodnica Bärbel Schubert wopytowarjam wóskowanje jejkow. Wona činješe to jara nadrobnje a njelutowaše z pokiwami, na přikład za třihanje husacych pjerjow. Tajke informaciske zarjadowanja su wotnětka kóždy kónc tydźenja. Samo ćichu sobotu a jutry njedźelu móža ludźo při debjenju jejkow přihladować. Foto: Michael Helbig

Nowy dyrdomdej

pjatk, 28. februara 2020 spisane wot:

Budyšin (SN). Wroblik Frido je zaso po puću – a to w nowej stawiznje Jěwy-Marje Čornakec, kotraž swój wuspěšny rjad dale wjedźe. „Kak su wroblik Frido a jeho přećeljo jutry zaječki překwapili“ rěka najnowša kniha z Ludoweho nakładnistwa Domowina, kiž so wuběrnje do jutrowneho hněžka hodźi.

Jutrońčku chwataja wšitcy wćipni na zelenu łuku. Hnydom so wulke pytanje za jutrownymi jejemi započnje. Po dołhej chwili so skónčnje nawróća. Ale što dźerži kóždy zaječk w packomaj?

Tež za tute wudaće je Günter Wongel zabawne barbne rysowanki zhotowił.

Budyšin (CS/SN). Wobrazowy zwjazk „Dorf.Leben – Na jsy“ je šesta wot Jürgena Maćija wudata publikacija rjadu Ludoweho nakładnistwa, předstajaceho Łužicu portretowacych fotografow.

Thomas Kläber, narodźeny 1955 a by­dlacy w Gołkojcach, bě sej něhdy žiwjenje na wsy jako temu za swój diplom wuzwolił. Hač do dźensnišeho so dale z njej zaběra. Najmłódše fota wobrazoweho zwjazka su minjene lěta nastali. Kaž wudawaćel Jürgen Maćij na knižnej premjerje wčera w Budyskej Smolerjec kniharni rjekny, je „za zběrku sto z wjace hač tysac fotografijow wupytał. Po mojim měnjenju změja wone tež přichodnje dale wulku hódnotu.“

Składnostnje 200. róčnicy załoženja prěnich serbskich misionskich towarstwow je dr. Lubina Malinkowa wčera we wobłuku Maćičneje akademije w Budyskim „Wjelbiku“ wo misionskim hibanju w Serbach přednošowała.

Budyšin (SN/CoR). Něhdźe 20 zajimcow móžeše dr. Edmund Pjech na Maćičnu akademiju witać. Dr. Annett Brězanowa wuži składnosć, do přednoška jeje dźowki Trudli Malinkowej, kotraž swjećeše 21. februara pjećašěsćdźesaćiny, dźakować so za angažement nic naposledk jako předsydka stawizniskeje sekcije Maćicy.

Fotografija je dobra syć

štwórtk, 27. februara 2020 spisane wot:

Drježdźanka Yvonne Most pyta z wobrazami za identitu

Fotowe wustajeńcy su druhdy trochu kaž rjadowniske zetkanje. Přińdu ći, kotřiž su na někajkežkuli wašnje mjez sobu zwjazani. Wćipnota, respekt a wjeselo nad dźěłom druhich je přičina toho, zo so mjeztym hižo pjeć lět fotografki a fotografojo z cyłeho swěta we wobłuku wubědźowanja „Hellerau Portraits“ zetkawaja. Wurisanje wšak so dawno wjace na je­nož jednym wustajenišću njewotměwa – jedne z nich je wuměłski dom Raskolnikow w Drježdźanach-Nowym měsće. Tuchwilu wustajeja tam wobrazy Yvonny Most. Pod hesłom „Heimat – Domizna – Domovina“ pokazuje wona portrety, nastate we Łužicy a w Sudetach. Christine Ruby je so z wuměłču rozmołwjała.

Knjeni Most, často maja Was za Serbowku, dokelž so ze swojim wuměłstwom na tak nutrne wašnje Łužicy wěnujeće. Sama wšak to trochu hinak posudźujeće, abo?

Z Tubu a bjez njeje do Texasa

štwórtk, 27. februara 2020 spisane wot:

Frank Wobst přebywa zas a zaso na slědach Serbow w Americe

Swjatok. Frank Wobst połoži šrubowak nabok a zawrěje durje swojeje awtoweje dźěłarnje w Rakecach. Po tym zo je so 46lětny rjemjeslniski mišter swój dźě­łanski kitl slekł, pokazuje so jeho wulka rozpalitosć. „Texas“ steji na shirće, kotryž je sej z jedneje ze swojich 35 jězbow do Ame­riki sobu wzał. Derje so hišće dopomina, jako bě tam prěni raz w lěće 2003. Tehdy bě ze Serbskej ludowej rejwanskej skupinu Ćisk a Rakečanskim dujer­­skim orchestrom, w kotrymž na tubje hraje, po puću. Běchu na swjedźeń Wendish Fest towarstwa Texas Wendish Heritage Society přeprošeni. W lětadle su kóž­demu hóstnu swójbu přidźělili, jemu a mandźelskej Jurkec swójbu. „To bě­ wulke zbožo“, wón měni. Swójba jich tak­ wutrobnje witaše, zo su hač do dźens­nišeho zwjazani. Samo w Rakecach wopytali jeho su.

Jakub Korjeńk

štwórtk, 27. februara 2020 spisane wot:
27. februara 1945, jenož tydźenje do kónca Druheje swětoweje wójny, zemrě w koncentraciskim lěhwje Neumünster Ralbičan Jakub Korjeńk. Dokładne wobstejnosće jeho smjerće njejsu znate. Zajeli běchu jeho w septembrje 1944. Přičina bě, zo bě jako dźěłaćer kaolinownje w Kamjenej pola Rakec sowjetskim wójnskim jatym pomhał. Jich běchu po nadpadźe nacijow na Sowjetski zwjazk (w juniju 1941) zajeli a do Rakečanskeje Muny tyknyli. (Muna bě nowy zawod za produkciju brónjow a municije). Skupina wojakow dyrbješe w kaolinowni ćežko roboćić. Korjeńk spyta k nim kontakt nawjazać a jim na někajke wašnje pomhać. Najprjedy přisuwaše jatym skradźu maličkosće k jědźi, pozdźišo tež dźěle wottrjebaneje drasty. Tak dopomha dwěmaj wojakomaj ćeknyć. Jakub Korjeńk bě w młodych lětach aktiwny zwučowar w jednoće Serbskeho Sokoła a swěrny spěwar chóra Lilija. Njeby dźens za njeho w Ralbicach forma wopominanja (tež za wjesnjana Jurja Brězana) trěbna była? Mikławš Krawc

Z 22. čisłom rjadu Nowe Wojerowske stawizniske zešiwki wěnuja so 60lětnemu wobstaću zwěrjenca w měsće.

Wot lěta 1998 wuchadźa wón prawidłownje lěto wob lěto. Rjad „Nowe Wojerowske stawizniske zešiwki“ słuša k najhódnišim přinoškam dalšeho wobdźěłanja a zachowanja měšćanskich stawiznow. Tole podšmórny Wojerowski wyši měšćanosta Stefan Skora (CDU) na předstajenju Stawizniskeho zešiwka čo. 22. Wón ma nadpismo „Jako na bywšej hrodowej zahrodźe zwěrjenc nastawaše“. Z nim wěnuja so w zamołwitosći stawizniskeho rjadu nadrobnje historiskemu jubilejej „60lětne wobstaće Wojerowskeho coowa“.

Spis je Wojerowski zawod Zwěrjenc, kultura, kubłanje w zhromadnym dźěle z městom wudał. Aktualny 62stronski zešiwk ma nakład 300 eksemplarow, płaći štyri eura a je při pokładni měšćanskeho muzeja kaž tež při kasy Wojerowskeho coowa na předań.

Směrnica za małe projekty

wutora, 25. februara 2020 spisane wot:

Kulturny konwent kulturneho ruma Hornja Łužica-Delnja Šleska je so wčera w Markersdorfskim hotelu „Marshall Duroc“ lětsa prěni raz schadźował. Wjele njemějachu wobzamknyć, za to pak su bóle w njezjawnym dźělu posedźenja wo přichodnym spěchowanju wu­radźowali.

Markersdorf (SN/CoR). Wot minjeneho posedźenja přestorčene prašenje, kak spěchować projekt towarstwa Wulkeho Wojerowskeho chóra „The armed man – a mass for peace“ waliziskeho komponista Karla Jenkinsa, je nětko rozrisane. Wudawki za techniku su zapodawarjo próstwy mjeztym tak wujasnili, zo je konwent zwyšenje spěchowanja wo 5 000 na 9 057 eurow wobzamknył. Hakle 20. februara bě swětowy chór, mjez nimi 41 spěwarjow z Wojerec, Jenkinsowu „měrowu mšu“ w New Yorku předstajił.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND