Abonenća dóstanu přichodny tydźeń zaso nowy Rozhlad do swojeho chěžineho abo elektroniskeho listoweho kašćika. Wšěch tamnych njech wabi přehlad wo jeho wobsahu, čitać přichodne wudaće.

Starodawne wašnje na wulkim dnju

štwórtk, 26. meje 2016 spisane wot:
Ze swjedźenskimi kemšemi a swjatočnymi procesionami k wonkownym wołtarkam su wěriwi w serbskich katolskich wosadach dźensa swjaty dźeń Božeho ćěła swjećili. Po starodawnym wašnju kročachu na čole procesionow kaž tule w Kulowje družki. Tójšto žonow a młodych holcow bě so katolsku swjedźensku drastu woblekło. Chwalobne, zo je wjele hotowarničow zwólniwych, družki na tymle dnju woblěkać a tak swjedźenjej wosebity raz spočžić. (Hlej tež 4. stronu.) Foto: SN/Maćij Bulank

Serbska reja nětko towarstwo

štwórtk, 26. meje 2016 spisane wot:
Lipsk (SN/CoR). Nazymu 2014 běchu so někotři hudźbnicy a rejwarjo prěni raz w Lipsku projekta Serbska reja dla zetkali. Minjenu njedźelu, 22. meje, su nětko towarstwo ze samsnym mjenom załožili. Za předsydu wuzwolichu Gregora Kliema, za městopředsydku dr. Theresu Jacobsowu. „Tak stej Hornja a Delnja Łužica derje zastupjenej“, praji Gregor Kliem. K čłonam słušeja wuměłča Marion Kwicojc, rejwanski mišter a bywši čłon SLA Georgij Marinow, něhdyši hudźbnik skupiny Die Folksamen Clemens Isensee, wědomostny sobudźěłaćer Serbskeho instituta dr. Fabian Jacobs a dalši. „Projekt Serbska reja je so minjeny čas tak derje wuwiwał, zo bě krok, strukturu w formje towarstwa zesylnić, logiska konsekwenca. To nam tež nowe móžnosće wotwěra“, podšmórny dr. Jacobsowa. „Chcemy rejwanske wječorki zarjadować, stare noty a spěwy wuhrjebać, je spřistupnić a za dźensnišu potrjebu wobdźěłać. Dźěłarnički organizować je dalše předewzaće.“ Na Choćebuskim měšćanskim swjedźenju 18. junija přeproša k sobuskutkowanju.

Bohumil Modrý

štwórtk, 26. meje 2016 spisane wot:
Serbam, kotřiž po wójnje w Čěskej pře­bywachu, drje je mjeno Bohumil Modrý znate. W lěće 1916 rodźeny pozdźiši inženjer bě rjek narodneho mustwa Čěskosłowakskeje na lodohokejowych swětowych mišterstwach 1949. „Bóža“ Modrý steješe we wrotach a měješe wosebje w finalnej hrě w Stockholmje přećiwo Kanadźe wu­znamny podźěl na dobyću 3:2. Samo Jurij Koch w swojej knize „Zabych ći něšto rjec“ pisa, kak serbscy gymnaziasća we Warnoćicach hry při radiju sćěhowachu („a Modrý zaso raz nadběh wotwobara“). Ale jenož lěto pozdźišo su Modreho a dalšich jědnaće lodohokejistow narodneje wubranki w Praze zajeli. Bě to do wotlěta na swětowe mišterstwa w Londonje. Čěska stasi jim wumjetowaše, zo chcychu w Jendźelskej wostać. Modreho zasudźichu k 15 lětam jastwa. W uranowych podkopkach rudnohorinskeho Jáchymova dyrbješe ćežko dźěłać. 1955 bu pušćeny. Hakle 46lětny wón 1963 na sćěhi jatby zemrě. Wo dóńće lodoho­kejoweje legendy zhoniće w knize „Jáchymov“ awtora Josefa Haslingera (nakładnistwo S. Fischer 2011). Mikławš Krawc

Wažnej projektaj přihotowanej

srjeda, 25. meje 2016 spisane wot:

Předsyda Zwjazka serbskich wuměłcow István Kobjela da swoje zastojnstwo nachwilnje­ wotpočować.

Budyšin (AW/SN). Předsyda Zwjazka serbskich wuměłcow (ZSW) István Kobjela da zastojnstwo hač do kónca awgusta priwatnych přičin dla wotpočować. Wo to je wón předsydstwo towarstwa wčera prosył. Gremij próstwu jednohłósnje přiwza. Za čas njepřitomnosće Kobjele přewozmje naměstnik Alfons Wićaz juristisku zamołwitosć.

Předsydstwo ZSW dojedna so wčera tež na termin hłowneje a wólbneje zhromadźizny, kotruž přewjedu 6. oktobra w Budyšinje. Čas chce předsydstwo wužiwać a młodych čłonow a kandidatow za nowe předsydstwo zdobyć.

Budyšin (SN/CoR). „Často bě Jurij Brězan z hosćom tu, a přeco běchu to wusahowace wokomiki. Wulkotnje, zo móžemy jeho nětko česćić“, praji sobudźěłaćerka měšćanskeje biblioteki Gabriele Ankele wčera wječor na Budyskej knižnej premjerje biografije wo najwuznamnišim serbskim spisowaćelu 20. lětstotka. Połna bě žurla, jako předstaji awtor prof. dr. Dietrich Šołta něhdźe 60 zajimcam knihu, nastatu składnostnje 100. posmjertnych narodnin Brězana 9. junija. Mjez hosćimi bě Christian Stottele, kiž je w Ravensburgskim nakładnistwje Otto Maier Brězanowe knihi wudawał.

Radšo pozdźe hač ženje

srjeda, 25. meje 2016 spisane wot:
Budyšenjo sej swojeho Jurja Brězana jara česća – tónle zaćišć znajmjeńša zawostaji wčerawša Budyska knižna premjera jeho biografije. Awtor prof. dr. Dietrich Šołta pak wuži składnosć a skedźbni zwjetša němskich přitomnych hišće raz na to, zo „smy my Budyšenjo zaprajili“. Lubosć njebě před dźesać lětami tajka wulka, zo bychu Brězanej dostojnosć čestneho wobydlerja spožčili. Biograf wčera k tomu namołwi, sej wuznam Brězana tež jako jednoho z wulkich němskich a zdobom Budyskich spisowaćelow wuwědomić. Swjedźenske zarjadowanja składnostnje 100. posmjert­nych narodnin literata so za to derje hodźa. A snano jenož při tym njewostanje. Wšako su móžnosće, wosobinu z wusahowacym wuznamom tež dźensa hišće česćić. Móžeš na přikład dróhu po Jurju Brězanu pomjenować. Šansu město Budyšin ma, njech ju tónraz wužiwa – radšo pozdźe hač ženje. Cordula Ratajczakowa

Cyłk spěwarskich towarstwow 25 lět

srjeda, 25. meje 2016 spisane wot:

24. meje 1991 zeńdźechu so zastupnicy serbskich chórow w Budyskim Serbskim domje a wutworichu po čiłej diskusiji Zwjazk serbskich spěwarskich towarstwow (ZSST). Za jeho předsydu wuzwolichu Achima Brankačka, za městopřed­sydu Křesćana Baumgärtela. Za hłowneho dirigenta powołachu hudźbneho direktora Jana Bulanka. Zwjazk koordinuje prócowanja wo pěstowanje serbskeho spěwa, ma organizować spěwne swjedźenje a předstajenja oratorijow kaž tež hajić zwiski z druhimi ćělesami w słowjanskim wukraju, w Němskej a z tymi narodnych mjeńšin. Na załoženju ZSST před 25 lětami zastupjene běchu chóry Meja, Delany, Lipa, Budyšin, 1. serbska kulturna bri­gada, Šule Ćišinskeho z Pančic-Kukowa a Serbskeje wyšeje šule Budyšin. Chóry Delnjeje a srjedźneje Łužicy přistupichu něšto dnjow po tym. Slěborny jubilej woswjeći­ ZSST z koncertomaj 4. junija w Choćebuzu a dźeń po tym w Budyskim Němsko-Serbskim ludowym dźiwadle.

Manfred Laduš

Wuwaženy a wotměnjawy

póndźela, 23. meje 2016 spisane wot:

Tradicionalny koncert rozžohnowanja z nalěćom a witanjom lěća w krasy klóšterskeje­ zahrody, wuhotowany wot chóra Lipa zhromadnje z Křesćansko-socialnym kubłanskim skutkom, přiwabi­ wčera syły wopytowarjow.

Z wozjewjenjom měritko stajili

póndźela, 23. meje 2016 spisane wot:

Budyšin (SN/CoR). Po pjeć dnjach je so wčera 9. zetkanje sakskich dźiwadłow w Budyšinje wuspěšnje skónčiło. Dohromady 3 800 wopytowarjow dožiwi 17 předstajenjow jědnaće sakskich měšćanskich, krajnych a statnych jewišćow. Městna běchu po 90 procentach wućežene. „Wjeselimy so, zo bě Budyski publikum tak zajimowany na akutalnych inscenacijach sakskich dźiwadłowych ansamblow. Woni dóstachu jónkrótny dohlad do mnohotnosće a wukonitosće tudyšich jewišćow“, rjekny intendant Němskeho-Serbskeho ludoweho dźiwa­dła Budyšin Lutz Hillmann.

Po poslednim předstajenju wčera wječor na hłownym jewišću přepoda fachowa jury (Andrea Czesienski z nakład­nistwa henschel SCHAUSPIEL Theaterverlag, dźiwadłowy awtor Lutz Hübner, nawoda nakładnistwa Theater der Zeit Harald Müller) myto zetkanja sakskich dźiwadłow Lipšćanskemu ansamblej Theater der Jungen Welt za produkciju „Crystal – Variationen über Rausch“. Myto je dźiwadłowa maska rězbarja Ma­tthiasa Jackischa z Bannewitza. W lawdaciji rěkaše, zo je inscenacija inspirowaca a předstaja temu ze wšěmi konsekwencami.

nawěšk

  • Sernjany su swoju róčnicu prěnjeho naspomnjenja wsy před 600 lětami z wosebitym wjesnym swjedźenjom wuspěšnje woswjećili. Tule nańdźeće někotre fotowe impresije wo tym:
Zerna feierte unlängst die Ersterwähnung des Ortes vor 600 Jahren mit einem beson

nowostki LND