Hódać „to go“, wjeselo měć a při tym něšto nowe wuknyć – wabjenje to, kotrež tež Michała Cyža přeswědča. Kahoot! je platforma, na kotrejž móža zajimcy ­sami kwisy zestajeć a je dale dawać.

Budyšin (jak/SN). „Rano w štyrjoch mějach ideju, w běhu dweju hodźin swójski kwis zestajeć a jón online stajić“, powěda nawoda Budyskeho studija Sakskeho wukubłanskeho a wupruwowanskeho kanala Michał Cyž. Wažne jemu při wuzwolenju platformy Kahoot! předewšěm bě, zo móža wužiwarjo w app a na webstronje serbsce čitać. Temy kwisa su katolska nabožina, jeje nałožki a pozadki. Te wón na zajimawe a žortne wašnje prezentuje. Jeho zaměr je zaběra z nabožinu. Hrajer ma na přikład na prašeni wotmołwić, kelko serbskich katolskich wosadow je, abo kotru wulkosć čriji Jězus ma.

Dźensa by Gerat Libš 85ćiny swjećił. Rodźeny we Wěteńcy do swójby mulerja a domjaceje studowaše wón po maturje slawistiku w Lipsku. Tehdy a dalše lěta bě aktiwny kopar w Njebjelčicach a tak znaty a woblubowany pola młodźiny wokolnych wsow. Po studiju dźěłaše w lektoraće za wučbnicy w Budyšinje, wot lěta 1959 do 1981 bě redaktor dźěćaceho časopisa „Płomjo“. Po tym skutkowaše znowa někotre lěta jako lektor a jako redaktor ­Noweje doby. 1. awgusta 2012 wón doma w Pančicach-Kukowje zemrě.

Basniske spočatki Libša sahaja do jeho studentskich lět. Pozdźišo wozjewješe prawidłownje, zwjetša pod pseudonymom „Lindaš“. Za swoje młode čitarstwo pisaše basnje wo přirodźe a zwěrjatach. Prěnja zběrka „Z połnej karu“ wuńdźe 1970, tři lěta po njej powědka w hrónčkach „Čepjela a Prynka“. We wjazanej rěči předstaji dźěćom mjez druhim „Kózlika Pryzlika“ a „Jěžika-Wšitkowědźika“. Dalšej zběrce wuńdźeštej 1981 a 1989: „Swinjemišter Dunč“ a „To swět koči čini woči“.

Budyšin (SN). Tež lětsa so najebać coronawirus wubědźowanje wo najrjeńše serbske jutrowne jejko za dźěći a młodostnych do 24 lět dale přewjeduje. To zdźěli Weronika Suchowa, zamołwita za projekty Spěchowanskeho kruha za serbsku ludowu kulturu. Na zwučene wašnje maja kolekcije hač do srjedy po jutrach zapodate być, potajkim 15. apryla. Tónraz je jenički puć wotedaća póstowy. Zarjad Domowiny w nadawku jeje čłonskeho towarstwa přiwzaće kolekcijow přewozmje, pod tutej adresu: Domowina – Zwjazk Łužiskich Serbow z.t., hesło: jutrowne jejka, PF 16 28, 02606 Budyšin / Bautzen. Štóž so wobdźěli, njech njezabudźe podać mjeno, adresu, starobu zapósłarja a techniku. Wotedać maja wobdźělnicy kolekcije z dwěmaj wudutymaj kokošacymaj jejkomaj (swójske kreacije, swójbne a regionalne tradicije). Preměrowane budu tradicionalne serbske techniki wóskowanje, bosěrowanje, škrabanje.