Budyšin (SN/bn). Prěnjej lětušej koncertaj Serbskeho ludoweho ansambla w rjedźe „Mišterske twórby chóroweje hudźby“ wuhotuja spěwarki a spěwarjo pod nawodom Andreasa Pabsta kónc tydźenja we Wětošowje a Budyšinje. Program wopřijima znowa serbske, němske a mjezynarodne kompozicije z dobow baroka, romantiki a moderny. Łužicu zastupujetej mjez druhim moteta „Strowa sy, Marija“ Feliksa Brojera a „Struga“ Jana Bulanka na tekst Kita Lorenca. Nimo toho zaklinča „Njebjesa rěča wo sławje Božej“, klučowa twórba zažneho baroka z pjera Heinricha Schütza, a dwójce „Swjaty, swjaty“ – raz jako wujimk „Němskeje mšě“ Franza Schuberta a raz jako sadźba Felixa Mendelssohna-Bartholdyja.

Budyšin (SN/bn). Cyłkownje 16 pólskich, čěskich, němskich a serbskich młodostnych – wšitcy su šulerjo w Budyšinje, Liberecu resp. Bolesławiecu – je so minjeny kónc tydźenja na třidnjowskej dźěłarničce kulturje wopominanja wěnowało. We wobłuku projekta „Memory walk“, wuwiteho wot nižozemskeho towarstwa Dom Anny Frank, organizowaneho wot čěskeho zwjazka Antikomplex a spěchowaneho wot załožby Visegrad Fund, diskutowachu woni w Budyskim Kamjentnym domje wo tym, kajku wažnosć a hódnotu wopomnišća, pomniki a historiske objekty dźensa maja a kak měli towaršnosće ze stawiznow wuknyć. ­Konkretny zaměr zetkanja bě, zo šulerjo po skupinach wěste materielne swědki 20. lětstotka w Budyšinje přepytuja a so pasantow prašeja, što k jednotliwym pomnikam wědźa a za kak relewantne je maja. Rozmołwy natočichu młodostni z kameru a zhotowichu z materiala krótke widejofilmy. Wudźěłki chcedźa na internetnej stronje Doma Anny Frank zjawnosći spřistupnić.

Budyšin (SN/bn). Na zhromadnej nowinskej konferency Němsko-Serbskeho ludoweho dźiwadła a štyrjoch hornjołu­žiskich nakładnistwow wčera w foyeru wulkeho domu Budyskeho NSLDź předstaji intendant Lutz Hillmann staw planowanja k 19. swětowemu dnjej šulerskeho dźiwadła. Nawodojo nakładnistwow prezentowachu nowostki, kotrež chcedźa na Lipšćanskich knižnych wikach mjez druhim wustajeć. Najwažniše zarjadowanje toho razu we wuchodnej Němskej zahaji so zajutřišim, štwórtk.

Dobry wothłós na jutrowne wiki

wutora, 13. měrca 2018 spisane wot:

Wojerecy (JoS/SN). Přijomne miłe wjedro je minjeny kónc tydźenja 24. jutrownym wikam we Wojerowskej Łužiskej hali wulku ličbu wopytowarjow wobradźiło. K tomu přinošował je po wšěm zdaću tež nakupowanski kónc tydźenja we Łužiskim centeru w susodstwje.

70 wustajerjow z Łužicy, Drježdźanskeho a Berlinskeho regiona prezentowaše debjene jutrowne jejka a jutrowne rjemjeslniske wuměłstwo. Woblubowanu měšeńcu wudospołnichu wjacore kulturne ćělesa ze swojim programom. Sobotu zawjeselištej hosći mjez druhim Brětnjanska serbska rejwanska skupina a Delnjoserbski dźěćacy a młodźinski ansambl. Njedźelu pokaza Smjerdźečanska rejwanska skupina wurězki ze swojeho repertoira, a spěwytwórc Bernd Pittkunings předstaji program z dźěćimi.

Stajnje wjele ludźi tłóčeše so wokoło debjerjow serbskich jutrownych jejkow. Najmłódša z nich bě dwanaćelětna Lisa-Marie Stephan, najstarši pak 83lětny Werner Zaroba, wobaj z Wojerec. Dalši běchu z Choćebuza, Grodka, Běłeje Wody, Złeho Komorowa a wot druhdźe do Wojerec přijěli.

Wobrazliwy wječor hudźby a literatury

póndźela, 12. měrca 2018 spisane wot:

Budyšin (SN/bn). Hudźbnicy Serbskeho ludoweho ansambla Trio con moto a dźiwadźelnik Němsko-Serbskeho ludoweho dźiwadła Měrko Brankačk su pjatk swój program „Moja archa Horni Hajnk“ prěni raz wuspěšnje hornjoserbsce předstajili. Na z přestawku nimale połdrahodźinskim hudźbno-literarnym wječoru hrajachu instrumentalisća wjacore twórby wšelakich dobow. Měrko Brankačk čitaše k tomu wujimki z knihi Jurja Brězana, kotraž je zarjadowanju mjeno spožčiła.

Wo wuměłstwje fotografowanja wuradźowali

póndźela, 12. měrca 2018 spisane wot:

Zhorjelc (BC/SN). Fachowcy fotografije a dalši zajimcy su so wot minjeneho štwórtka hač do soboty w Zhorjelskim kulturnohistoriskim muzeju na Nysowej na schadźowanju wobdźělili, kotrež steješe pod hesłom „We wokomiku – Nowe slědźenja k fotografiji ze Sakskeje a Łu­žicy“. Na zarjadowanje přeprosyli běchu Zhorjelski kulturnohistoriski muzej, Statne zběrki Drježdźany a Hornjołužiska towaršnosć wědomosćow.

Na zeńdźenju zaběrachu so z najnowšim slědźenjom k wuměłstwowej fotografiji ze Sakskeje a Łužicy a diskutowachu wo prašenju přistupa k wuměłskej fotografiji.

Knižna premjera kriminalneho romana „Módre buny“ Lubiny Hajduk-Veljkovićoweje wčera w Budyskej Smolerjec kniharni bě wulki wuspěch. Wjace hač 60 zajimcow chcyše wo nowym padźe serbskeje komisarki zhonić.

Budyšin (SN/bn). Ze zynkami titulneje melodije rjada „Tatort“ je Lubina Hajduk-Veljkovićowa wčera knižnu premjeru swojeje w Ludowym nakładnistwje Domowina wušłeje kriminalki „Módre buny“ w kopatej połnej Smolerjec kniharni zahajiła. Na napjate a z městnami žortne wašnje předčita awtorka dwaj kapitlej knihi, při čimž na to dźiwaše přewjele njepřeradźić a wosebje zajimawe pasaže z tak mjenowanym cliffhangerom zakónčić. K tomu zatwari dramaturgiske přestawki, w kotrych přidatnu hudźbu – sławnu temu z filmow wo Jamesu Bondźe – zahra abo připosłucharjow takrjec direktnje narěča. „Nětko do publikuma hladać“, wona na přikład připowědźi a runje to tež činješe.

Łužiske archiwy spokojom

štwórtk, 08. měrca 2018 spisane wot:

Wulki zajim na dźěle a skutkowanju institucijow na 9. dnju archiwow

Budyšin (JK/SN/bn). Archiwy po cyłej Němskej su zajimcam swoje durje minjeny kónc tydźenja wotewrěli, a to mjeztym 9. raz. Z dwulětnje zarjadowanej akciju­ chce Zwjazk archiwarkow a archiwarow wopytowarjam dohlad do dźěła swojich institucijow zmóžnić a na jich mnohostronske towaršnostne funkcije skedźbnić. Tež łužiske archiwy so na wosebitym dnju wobdźělichu.

Přiwěrki w Serbskim muzeju

štwórtk, 08. měrca 2018 spisane wot:

We wobłuku rjada „Kofej w třoch“ wěnowaše so kuratorka Budyskeho Serbskeho muzeja wčera prašenju, zwotkel tradicije a nałožki pochadźeja a w kotrej měrje su z přiwěrkami zwjazane.

Budyšin (SN/bn). Dźesać zajimcow je na wosebite zarjadowanje „Kofej w třoch“ w Budyskim Serbskim muzeju přišło. ­Titul přednoška kuratorki za kulturne stawi­zny a literaturu Andreje Pawlikoweje bě „Mjez škitnym listom a swjećatkom – žohnowančka a přiwěrki“. Na přikładźe eksponatow hišće hač do kónca apryla přistupneje wustajeńcy „Krabat – Muž – Mytos – Marka“ rozjima wona stawizniske pozadki nastaća přiwěrkow a towaršnostny wobchad z nimi.

Doprědkarske dopomnjenki

štwórtk, 08. měrca 2018 spisane wot:

Antologija „Mlóče“ bě tema prěnjeho zetkanja tracTare, z kotrymž chce Zwjazk serbskich wuměłcow rjad wuměł­skich rozmołwow wožiwić. 15 zajimcow je nětko čile diskutowało.

Budyšin (SN/bn). Z nowym rjadom tracTare chce Zwjazk serbskich wuměłcow na staru tradiciju rozmołwnych kołow nawjazać. Na zetkanjach „chcemy wo nowych, markantnych, spomnjećahódnych a wusahowacych twórbach serbskeho wuměłstwa rěčeć“, zjima předsyda ZSW Jan Bělk k zazběhej prěnjeho tajkeho zarja­dowanja, na kotrymž steješe anto­logija „Mlóče“ w srjedźišću.

Wjetšina 15 přitomnych tydźenja w Budyskim Serbskim domje běchu awtor­ki loni w Ludowym nakładnistwje Domowina wušłeje knihi. Wudawaćelka Ingrid Juršikowa do diskusije rozłoži, kak je antologija nastała. Na to podaštaj redak­torka Serbskeho rozhłosa Monika Gerdesowa a prof. dr. Dietrich Šołta swoje mysle ke krótkopowědančkam.

nawěšk

nowostki LND