Po jědnaće lětach njezarjaduja scha­dźowanku wjace w Budyskej „Krónje“. Nowa městnosć zetkanja serbskich studowacych, šulerjow a studentow budźe lětsa wulki dom NSLDź.

Budyšin (SN/bn). 144. schadźowanka nje­wotměje so kaž w minjenych jědnaće lětach w Budyskej „Krónje“, ale we wulkim domje Němsko-Serbskeho ludoweho dźiwadła. Hłowna přičina toho je tuchwilu njejasny status dotalneho zarjadowanišća, kotrež zakonskim předpisam nastupajo wohnjoškit a nuzowe wuchody njewotpowěduje. Zašłe lěta přewje­dowachu zetkanje serbskich gymnaziastow, studentow a absolwentow na zakładźe wuwzaćneje dowolnosće. Wot lěta 2000 njewuhotowachu schadźowanku jenož trójce nic w tradicionalnym zetkanišću wosrjedź sprjewi­neho města. Po towaršnostnym přewróće 1989 dźě bě schadźowanka z hosćom we Wětrowje, Kamjencu a Chrósćicach.

Za Roberta Kujana kónči so 15lětne skutkowanje jako rejwar Serbskeho ludoweho ansambla. „Mam zawěsće hišće dwě, tři dobre lěta we sebi. Tola w mojej starobje w tym powołanju žane přistajenje wjace njedóstanješ“, 38lětny Słowak trochu melancholisce powěda. Zdobom pak wuzběhnje, zo „nima to ničo z ansamblom činić. Je to prosće dóńt kóždehožkuli baletnika w Němskej.“

Budyšin (SN). Budyski krajnoradny zarjad zajimcow namołwja, so za lětuše myto „Chěža ze stołom 2018“ požadać. Załožba samsneho mjena spožča myta w hódnoće 7 000 eurow. Budyska wo­krjesna lutowarnja a lutowarnja Hornja Łužica-Delnja Šleska přewostajitej za to pjenjezy. Lětsa je tomu dwanaty króć, zo su­ wobsedźerjo, kotřiž su z wjele prócu swoje domske wotpowědnje pomnikoškitnym žadanjam saněrowali, namołwjeni so wo myto prócować. Tež wosoby abo towarstwa, kotrež so wosebje wo zachowanje tutych architektoniskich žadnostkow prócuja, njech so wobdźěla. Pře­pro­šeni su dale wobsedźerjo chěže ze stołom a towarstwa ze susodneje Pólskeje a Čěskeje, hdźež wšak wulka ličba tajkich domow steji. Hač do 25. julija hišće móža so zajimcy přizjewić. Trěbne kri­terije za požadanja steja na internetnej stronje www.stiftung-umgebindehaus.de.

Po formalnym a wobsahowym přepruwowanju ze stron fachoweje jury facho­wa přirada załožby potom doby­ćerjow wobkrući. 7. septembra chcedźa myta w muzeju „Alte Mangel“ w Habrachćicach (Ebersbach) přepodać.

Budyšin (SN/bn). „Nowowotkrywane fo­to­grafije“ je hesło tuchwilu w Galeriji Budissin na Budyskej Hrodowej přistupneje wustajeńcy twórbow Evelyn Richter. Wuměłstwowe towarstwo Budyšin a Drježdźanske nakładnistwo Hesperus Print pokazujetej z přehladku wobrazy, kotrež bě wuměłča wot lěta 2002 do 2012 w Jendźelskej, Ruskej, USA, Italskej a Rumunskej ze swojej kameru zapopadnyła. Ćežišća čornoběłych fotografijow su portrety na najwšelakorišich městnach čitacych wosobow, rituale pasažěrow Moskow­skeje metro a skrjeslene samoportrety. Spočatk lěta pola Hesperus Print wušła kniha „Wo latency wobrazow“ je zdobom katalog ekspozicije.