Sport (08.01.16)

pjatk, 08. januara 2016 spisane wot:

Wubranka hraje w Ústíju

Serbska koparska wubranka muži testuje zajutřišim, njedźelu, w čěskim měsće­ Ústíju nad Labem přećiwo zastupjerjej druheje čěskeje ligi FK Ústí nad Labem. Zakop w stadionje na Masarykowej 228 budźe w 13 hodź.

Lodohokejowy derby

Jutře wuhraje so w lodohokejowej lize DEL 2 zymski derby mjez Drježdźan­skimi lodowymi lawami a Łužiskimi liškami­ z Běłeje Wody. Hrać budu pod hołym njebjom w Drježdźanskim stadionje Dynama, a to wot 16.15 hodź. Zastup do areny je wot 13 hodź. móžny.

Gymnastika dale dźe

Viktoria Worklecy poskići wot 13. januara zaso kóždu srjedu wot 20 do 21 hodź. gymnastiku. Wšitke zajimče su do­ Worklečanskeje ćěłozwučowarnje přeprošene. Nowa wjednica kursa je serbska fyzioterapeutka Sylwija Šołćina.

Prěnja mountainbike-tura

Kamjenski bikehouse přeproša wšitkich zajimcow na prěnju mountainbiketuru, a to njedźelu, 10. januara. Tempo a niwow budźetej zaso skupinje přiměrjenej. Tura započnje so při bikehousu a ma dwě do tři hodźiny trać.

Viktoria chce zaso na čoło

Chce do Južneho Tirola

štwórtk, 07. januara 2016 spisane wot:

Wo tuchwilnym stawje prěnjeho zastupnistwa koparjow Sokoła Ralbicy/Hórki, wo dotalnej bilancy hrajneje doby a wo někotrych dalšich temach je so Maik Brězan z kapitanom mustwa Pětrom Domašku rozmołwjał.

Pětrje, tuchwilu widźimy koparjow Sokoła Ralbicy/Hórki časćišo na halowym parkeće hrać. Wo prěnjej połseriji z Delan hišće bilancu nimamy.

P. Domaška: Stejimy na štwórtym městnje tabulki. Njemóžemy pak z pokazanymi wukonami spokojom być. Hrajachmy chětro njestajnje. Zhubichmy wosebje přećiwo po zdaću słabšim kontrahentam wažne dypki. Stajnje hrajachmy njerozsudnje. Jeničce w pokalnym kole smy nadawk spjelnili.

Zymska přestawka je lětsa jara krótka. Kak wupada waš přihotowanski plan?

Prěni raz na smykačach

štwórtk, 07. januara 2016 spisane wot:
Lubosćiwje jeju mać Dana Rohrbach přewodźa a nazwučowar Andreas Heinrich nawjeduje: Třilětnaj Tristan a Henrik z Běłeje Wody staj minjenu sobotu prěni raz na smykačach stałoj, štož bě za wobeju dospołnje nowe začuće a wulke wjeselo. Něhdźe 80 holcow a hólcow je so w lodowej arenje w Běłej Wodźe při pytanju za talentami wobdźěliło. Za tójšto dźěći w starobje třoch do wosom lět běchu to prěnje kročele na lodźe. Jenož tak ma ESW Běła Woda šansu přežiwić. Organizowany bu tónle wosebity dźeń wot nazwučowarjow dorosta LS Běła Woda, a podpěrali su jón Łužiske lodohokejowe liški. Foto: Joachim Rjela

Za celuloidowym bulikom honili

srjeda, 06. januara 2016 spisane wot:
Worklečanski blidotenisowy dorost je lěto 2015 z turněrom zakónčił. Po triumfje Tonija Nuka, kiž přewiny w finalnej hrě Adrienne Matkec, dósta mustwo trenarja Marcela Rjelki wot Wuchodosakskeje lutowarnje Drježdźany nowe trikoty. Wotlěwa su to Jurij Čornak, Julian Hrjehor, Dawid Mark, Roberto Koch, Toni Nuk, Benjamin Grutka, Fabian Matka, Adrienne Matkec a trenar Marcel Rjelka. Foto: Marcel Rjelka

„Mexičenjo“ so přesadźili

srjeda, 06. januara 2016 spisane wot:

Sportowe towarstwo Marijina hwězda bě sej za minjenu sobotu na jubilejny nowolětny turněr ludosportowe volleyballowe cyłki přeprosyło. 14 mustwow hraješe tam wo dobyće. Běchu to zastupnistwa z blišeje wokoliny. Worklečanske Dźiwje micki a Zmjetane črije, za kotrymiž chowachu so hrajerki 1. mustwa Marijinych hwězdźičkow, běštej jeničkej ryzy žonjacej cyłkaj.

W předkole nastupi w třoch staflach kóždy přećiwo kóždemu. Dalše koło hrajachu přez křiž, tak zo wobchowachu sej tež w předkole ći na druhim městnje šansu na dobyće. Mjeztym zo na započatku cyłki ze zdźěla jara rozdźělnymi zamóžnosćemi na so trjechichu, běše niwow w druhim kole jara wurunany. Horco wojowachu wo kóždy bul. Wulke stróžele wubudźi situacija, jako so Gerald Bachmann z mustwa Kopańca starych knjezow po nadběhu zwjeze a ležo wosta. Noha bě w njestrowym kuće zhibnjena. Ze spěšnej medicinskej pomocu dowjezechu sportowca do Kamjenskeje chorownje. Pozdźišo wón zawoła a zdźěli, zo bě noha w zhibadle wukulena. Po krótkim přetorhnjenju móžeše turněr dale hić, nic pak za njeho.

Chróšćenjo trójce dobyli

wutora, 05. januara 2016 spisane wot:

Halowy koparski turněr za dorostowe mustwa

Je hižo z tradiciju, zo wuhotuje Sokoł Ralbicy/Hórki mjez hodami a Nowym lětom halowe koparske turněry za serbske dorostowe mustwa. Tež tónkróć dóstachu znowa SJ Chrósćicy, ST Radwor, SJ Njebjelčicy a ST Marijina hwězda přeprošenje za wubědźowanja młodźiny F, E a D.

28. decembra zetkachu so w dźewjećich najprjedy najmłódši koparjo. Bambinije Sokoła a SJ Njebjelčicy přewjedźechu w hali přećelsku hru, kotraž skónči so 0:0. Po tym zahwizda sudnik Kilian Hrjehor z Róžanta prěnju partiju F-juniorow. Tam nastupichu dwě Njebjelčanskej, dwě Ralbičanskej a jedne Chróšćanske mustwo, kotrež prěni turněr zhromadnje z Ralbičanskim cyłkom doby, wšako měještej wobaj dźesać dypkow a wrotowy poměr 8:2. Kaž je w Ralbicach z wašnjom, njedósta dobyćer pokal, ale słódkosć. Štóž so prócowaše, wulce njehóršeše a fairnje wojowaše, dósta porno tomu medalju. A dokelž serbscy koparjo tele hódnoty wobkedźbowachu, dźěše na kóncu kóždy z medalju domoj – tež wšitcy koparjo młodźiny E a D.

49. silwesterski běh w Budyšinje

wutora, 05. januara 2016 spisane wot:

Serbscy sportowcy so přeco zaso sobu wobdźěleja

Staremu lětu božemje prajili su minjeny štwórtk – silwester – dopołdnja lubowarjo běhanja na swojim mjeztym hižo 49. tradicionalnym běhu w Budyšinje. Pod jara přijomnymi wjedrowymi wuměnjenjemi­ podachu so entuziasća běhanja, wot třilětneho dźěsća hač k 81lětnemu wuměnkarjej, ze stadiona Młynkec łuka po pućach podłu Sprjewje do Humboldtoweho haja na 2,5 km, 5,3 km a 10,6 km a zaso wróćo do stadiona.

Najmłódši hrajer dwoje wrota třělił

wutora, 05. januara 2016 spisane wot:

57. Budyska hodowna kopańca

Při wurjadnych wjedrowych poměrach zetka so 26. decembra 25 dźensa hišće aktiwnych a njeaktiwnych sportowcow k 57. hodownej kopańcy, kotraž bě na sportowym arealu Budissy Budyšin­ w Humboldtowym haju. Prěni króć hrajachu na kumštnym trawniku.

Klaus Cisak a Jurij Nuk běštaj 1959 hižo­ sobu hrałoj a staj dźensa přihla­dowarjej. Nuk bě jako je­nički na wšit­kich 57 zarjadowanjach pódla, 35 króć je sobu­ hrał. W běhu lět wobdźěleše so tež tójšto dalšich serbskich sportowčow a sportowcow. Z cyłkownje 26 Serbow je Michał­ Paška­ 17 króć sobu hrał, Achim Paška 16 króć, Klawdija Hejdušcyna dźesać­, Křesćan Paška a Maćij Buk wosom­, bratraj­ Jakub a Hubertus Čórlich sydom a Bernadet Paškec a Fabian Hejduška šěsć króć.

Třeće městno w Husce sej zawěsćili

wutora, 05. januara 2016 spisane wot:

Za ST Marijinu hwězdu zasadźeni: O. Schmidt, C. Sbjeznie, M. Łušćanski, T. Jurš, R. Hawš, L. Langer, J. Pakoßnick, D. Jurš, A. Winkler

Z prominentnym hosćom

póndźela, 04. januara 2016 spisane wot:

25. króć halowy koparski turněr CDU we Worklecach přewjedli

Nětko hižo 25. króć zetkachu so koparske cyłki wokolnych wsow dźeń do silwestra we Worklečanskej ćěłozwučowarni, zo bychu tam wo pokal CDU wojowali. Hłowny organizator turněra Alojs Mikławšk je krótko do 13 hodź. zhromadnje z Matejom Dźisławkom, komentatorom turněra, wšitke mustwa powitał. Runočasnje wón naspomni, zo čaka hišće ta abo tamna překwapjenka na jubilejnym turněrje. Kaž přeco wojowaše stajnje pjeć mustwow w dwěmaj staflomaj wo połfinalne městna. Hnydom w prěnich hrach so pokaza, zo bě turněr jara wurunany a po niwowje jedyn z najlěpšich scyła. Nimale­ wšitke mustwa wobstejachu z mnohich nětčišich abo bywšich aktiwnych hrajerjow. W stafli A přesadźichu so Pěskecy a Nowa Wjeska před dwěmaj Worklečanskimaj mustwomaj a starymi knjezami Zeleno-běłych Hórkow.

nawěšk

  • Spěchowanski kruh za serbsku ludowu kulturu je 16. a 17. měrca mjeztym 28. serbske jutrowne wiki w Budyskim Serbskim domje wuhotował. Wiki běchu jara wuspěšne, tež nastupajo ličbu wopytowarstwa. Tule smy wam někotre fotowe impresije z wikow zestajeli

nowostki LND