Trenuje koparskich sudnikow
Knut Kircher, něhdyši profijowy sudnik swětoweho a němskeho koparskeho zwjazka, bě njedawno z hosćom Zapadołužiskeho koparskeho zwjazka. Hanspeter Benad je so z Knutom Kircherom za Serbske Nowiny rozmołwjał.
Knježe Kirchero, sće prěni króć w Hornjej Łužicy?
K. Kircher: Běch hižo raz w Hórce pola Niskeje z nanom na němskich mišterstwach woranja z konjemi. Mój nan je so tam sobu wubědźował. Njejsym pak sej wěsty, hač słuša Hórka do Hornjeje Łužicy. W Budyšinje běch nětko prěni króć.
Karjeru jako sudnik sće zakónčił. Maće pak w tej branši hišće nadawki?
K. Kircher: Trenuju koparskich sudnikow a wobkedźbuju sudnikow w zwjazkowej koparskej lize. Refereejam swoje nazhonjenja dale dawam.
Koho byšće raz dźeń přewodźał?
K. Kircher: Najskerje prezidenta zwjazkoweho sejma Wolfganga Schäublu. Pódla njeho na posedźenju sedźeć by zawěsće zajimawe było.
Kotre rady a pokiwy dawaće młodym koparskim sudnikam sobu na puć?
K. Kircher: Woni dyrbja do sebje wěrić a zmužitosć měć. Njeje hnydom wšitko rjenje, jako sudnik pak móžeš tež wjele wjesela měć.
Bjez dypka so nawróćili
Motor Kumwałd
– ST Radwor 2:1 (1:1)
Zestawa hosći: Ch. Šěrak – Zähr, Henke, F. Šěrak, Wjeńka, Bejmak, Zimmermann, Nuk, Omran (89. Bauer), Schulze, Winar
Druhe wonkowne dobyće
FSV Luckenwalde
– Budissa Budyšin 0:2 (0:2)
Zestawa hosći: Ebersbach – Barnickel (64. Müller), Patka, Hoßmang, Kunze, Weiß, Pfanne, Krawčik, Milde (67. Mack), Schmidt, Bönisch (89. Gehrmann)
Dobyće 3:0 w pokalnym kole pola Lokomotiwy Lipsk je mustwu Torstena Gütschowa wulke sebjewědomje spožčiło. Tak chcychu sej koparjo Budissy Budyšin z połnej koncentraciju pola poslednjeho tabulki druhe wonkowne dobyće zawěsćić. FSV Luckenwalde bě po špatnych wuslědkach trenarja změnił. Wot wšeho spočatka pak přewzachu hosćo iniciatiwu a starachu so wosebje wo nadběhi. Wólny kop Martina Hoßmanga zhłójčkowa Franz Pfanne do k 0:1 (22.) do wrotow. Najwjetšu składnosć měješe Luckenwalde před 300 přihladowarjemi w 36. min. Róžk Daniela Beckera skoči wot hłowy Jonasa Schmidta do łaty Budyskich wrotow. Budissa nadźěła sej dale wjacore dobre móžnosće a docpě hišće do přestawki swoje druhe wrota. Zmylk w škiće domjacych wuži Tony Schmidt k 0:2 (42.).
Na kóncu so wjeselić móhli
FC Energija Choćebuz
– FSV Luckenwalde 2:0 (1:0)
Zestawa domjacych: Spahić – Starcew, Stein, Matuwila (46. Karbstein), Schlüter, Kruse, Weidlich (84. Papadimitru), Viteritti, Zimmer (79. Gehrmann), Marcelo, Boakye
Do hry diskutowaše přiwisk FC Energije wo tym, kak wysoko delnjołužiscy koparjo doma dobudu. Na kóncu partije přećiwo poslednjemu tabulki móžachu so wjeselić, zo bě zaměnjeny Malte Karbstein ze swojimi wrotami we 78. min. dobyće 2:0 doskónčnje zawěsćił. W prěnim połčasu bě Gabriel Boakye 1:0 (14.) docpěł. Hač do Karbsteinowych wrotow su hosćo prima sobu hrali a načolnika regionalneje ligi-sewjerowuchod w hrajnym natwarje mylili.
FSV Luckenwalde drje njeměješe cyły čas žanu porjadnu šansu, ale tež za Energiju runjewon wjele tajkich njebě. Najstrašniši hrajer domjacych bě Maximilian Zimmer, a to, jako nastupi k wólnym kopam na kromje šěsnatki. Z wjele lubjacymi ofensiwnymi akcijemi pokaza něhdyši kopar FC Hornjeje Łužicy Neugersdorf Marcelo de Freitas (foto) swoju klasu. Kolegojo w ofensiwje pak njemóžachu z jeho přihrawkami wjele započeć.
Hra wot spočatka hač do kónca bojowniska była
LSV Hory
– Sokoł Ralbicy/Hórki 3:1 (1:0)
Zestawa hosći: Gloxyn – Rawš, Zynda, Korjeńk, Matka, Šewc, S. Bjeńš (64. Krohmer), Šołta, Młynk (46. Materna), Kurjat, Domaška
Hry přećiwo Horam běchu za koparjow Sokoła Ralbicy/Hórki w zańdźenosći stajnje napjata a wurunana naležnosć – tež zawčerawšim, njedźelu, na jara mjechkim a hładkim trawniku. Horjenjo startowachu lěpje a hrajachu lěpšu kopańcu. Třělwy z distancy pak dźěchu wšitke wyše wrotow, abo Chrystof Gloxyn je dźeržeše. Sokoljo běchu jeno přez kontery strašni, ale je přešpatnje wuhrachu. Zas a zaso dyrbjachu woni domjacych foulować, zo njebychu so hač k jich wrotam dóstali. Krótko do połčasa dósta přećiwnik před šěsnatku wólny kop, dokelž bě Gabriel Kurjat njetrjebawši foulował. Flanku zamó Gloxyn hišće wotwobarać, z mjerwjeńcy pak docpě hosćićelski škitar nawjedowanje. Jara mjerzace to přećiwniske wrota.
Na ataki domjacych ze štworymi wrotami wotmołwili
Nowe Město II
– SJ Njebjelčicy 1:4 (1:3)
Zestawa hosći: Hahn – Hoelzel, Hanuza, Deleńk, Hrjehor, Domš, Kral, Ričel (73. Lejnart), Schulze, Haška, Korjeńk (90. Pawlik)
Nic tak łahodnje a z wjetšej zasadźitosću hač přećiwo Chróšćanskej rezerwje wubědźichu sej chowancy Njebjelčanskeho koparskeho trenarja Handrija Krawčika jasne dobyće w Nowym Měsće. Škit sportoweje jednotki bě wot wšeho spočatka na wšě ataki domjacych derje nastajeny a je bul derje dale sposrědkował. Tak přesadźi so Jurij Haška na prawej stronje, wótrje před wrota třěleny bul pak Handrij Korjeńk snadnje misny. Nawjedowanje padny w 25. min. po róžku. Najspěšnišo reagowaše Florian Domš a kopny kulowatu kožu do syće. Samsny hrajer startowaše spěšny nadběh, trjechi pak jeno žerdź. Wotskočeny bul zaměstni Haška k 0:2 we wrotach hosćićela (40.). Hnydom po tym poradźi so domjacym přez tak mjenowany njedźelski kop do hornjeho třiróžka skrótšić. Mjeńšinu do přestawki postaji sudnik jědnatku, kotraž bu přećiwo Hašce zawinjena. Stefan Kral ju wěsće k 1:3 (44.) přetwori.
Wuslědki (07.11.17)
Regionalna koparska liga
Altglienicke – Neugersdorf 2:0 (1:0)
Nordhausen – Choćebuz 1:1 (1:1)
Luckenwalde – Budissa Budyšin 0:2 (0:2)
1. Energija Choćebuz 14 38 : 4 38
2. BFC Dynamo 14 34 : 18 26
3. Fürstenwalde 14 31 : 21 26
4. Nordhausen 14 16 : 7 24
5. Lok Lipsk 13 17 : 8 23
6. Berlinski AK 14 24 : 22 22
7. FC Viktoria 14 28 : 25 21
8. Meuselwitz 13 20 : 15 19
9. Halberstadt 14 24 : 25 18
10. Babelsberg 14 14 : 16 18
11. Altglienicke 14 12 : 14 18
12. Neugersdorf 14 24 : 26 17
13. Budissa Budyšin 14 11 : 19 17
14. Hertha BSC II 14 14 : 22 15
15. Chemija Lipsk 14 8 : 25 12
16. Auerbach 14 16 : 24 11
17. Neustrelitz 14 12 : 31 7
18. Luckenwalde 14 14 : 35 5
krajna klasa
Oderwitz – Drježdźany-Strěžin 1:1 (1:1)
Nowosólc-Hródk – Mužakow 3:2 (1:0)
Chrósćicy – Ćisk1:1 (1:1)
1. LSV Nowe Město 11 35 : 24 22
2. FSV Oderwitz 11 28 : 18 22
3. FSV Nowosólc-Hródk 10 27 : 16 17
4. Čerwj.-běli Mužakow 11 30 : 21 17
5. ST Horni kraj-Sprjewja 11 26 : 18 17
6. FC Neugersdorf II 10 23 : 13 16
7. SZ Drježdźany-Strěžin 11 27 : 14 14
8. Laubegast 10 24 : 24 14
9. SG Weixdorf 11 19 : 20 14
10. ST Ćisk 11 15 : 24 14
11. SJ Chrósćicy 11 16 : 26 14
12. ST Trjebin 11 13 : 32 12
13. SC Borea Drježdźany 10 19 : 39 8
W pokalnym krimiju wuspěšni
Motor Kumwałd
– Sokoł Ralbicy/Hórki 3:4
po podlěšenju (1:2/2:2)
Zestawa hosći: Gloxyn – Rawš, Zynda, Korjeńk, Čórlich (86. Krohmer), Matka, Šołta, Šewc, Janca (76. J. Bjeńš), Kurjat, S. Bjeńš
Zakitowar wokrjesneho koparskeho pokala Sokoł Ralbicy/Hórki je minjeny čas dosć spektakularnych partijow dožiwił – tež bój wo přichodne pokalne koło njedawno w Kumwałdźe wšěm akteram zawěsće hišće dołho w pomjatku wostanje.
Pozdźe wurunali
FC Wojerecy
– SJ Njebjelčicy 1:1 (0:0)
Zestawa hosći: Hahn – Čornak (46. Ričel), Hanuza, Deleńk, Hrjehor, Pawlik, Tatzel, Lejnart, Domš, Haška, Korjeńk
We wonkownej partiji mějachu koparjo Sportoweje jednotki Njebjelčicy znowa jenož minimalnu wobsadku k dispoziciji. Tak bu samo Florian Ričel po dlěje hač lětnej přestawce zranjenja na kolenu dla po połčasu za Gabriela Čornaka na trawnik pósłany.
Prěni połčas bě wurunany a skónči so 0:0. Hnydom po znowazahwizdanju – to njeběchu chowancy trenarja Handrija Krawčika hišće tak prawje při bulu – padny 1:0 za domjacych. To Njebjelčanskich hrajerjow wubudźi a woni nadźěłachu sej někotre dobre šansy. Tola Robert Lejnart trjechi jenož do žerdźe, Rony Hanuza a po nim tež Chrystof Pawlik zhłójčkowaštaj přez łatu. Wurunali su hakle w 92. min. Po preciznej přihrawce Lejnarta suny Handrij Korjeńk bul do lěweho kuta wrotow.
Bjarnat Deleńk
Widźał,słyšał, napisał (06.11.17)
Awtor dźensa
Tadej Cyž
Z wulkimi kročelemi bliži so čas zymskich sportowych družin a wubědźowanjow. Na zymu 2017/2018 su so atleća kaž tež trenarjo přez cyłe lěćo jara dokładnje a akribisce přihotowali. Treningowe lěhwa, optiměrować techniku a wupruwować nowe treningowe metody su jenož někotre móžnosće, so hišće dokładnišo na jednotliwu disciplinu přihotować a so polěpšić.
Wot 9. do 25. februara 2018 wotměja so w Pyeongchangu Olympiske zymske hry. Po lěće 1988 w Seoulu su to druhe olympiske hry w Južnej Koreji. Po poměrnje špatnym wotrěznjenju w Sočiju 2014 z 8 złotymi, 6 slěbornymi a 5 bronzowymi medaljemi chce němske mustwo zaso na podest, štož pak njebudźe lochko. Wšako su wuměnjenja za profijowych sportowcow w druhich krajach wo wjele lěpše a profesionalniše hač tu.
