Hru jasnje dominowali
SJ Njebjelčicy
– FSV Łuty 2:0 (1:0)
Zestawa domjacych: Ričel – Čornak, Hanuza, Deleńk, Hoelzel, Kral, Pawlik, Lejnart, Tatzel (55. Dubaw), Hommel, Korjeńk (89. Šram)
Koparski trenar Njebjelčanskeje SJ Handrij Krawčik ma dale wulke starosće ze zestawu mustwa. Tak bě wón nuzowany njedźelu w partiji přećiwo Łutam tak mjenowanu „poslednju gardu“ na hrajnišćo pósłać. Aktualnje pobrachuje jemu chorosće, zranjenja abo dowola dla wosom aktiwnych: Su to Nico Hahn, Pawl Hrjehor, Sandro Schulze, Jurij Haška, Florian Ričel, Daniel Kral, Jakub Šołta a Florian Domš. Ći, kotřiž stejachu nětko na trawniku, pak su swój nadawk porjadnje spjelnili. Tak bě wrotar Daniel Ričel w prěnim połčasu jeničce jónu połnje wužadany a wotwobara wótru třělwu k róžkej (14.). Po wjacorych pospytach přez Roberta Lejnarta, Stefana Krala a Handrija Korjeńka docpě Korjeńk we 28. min. z niskej třělwu nawjedowanje. Nětko paleše so wjacore razy před klětku Łutowčanow, do přestawki pak wosta při snadnym nawjedowanju domjacych.
Zestawa Budissy za nowu sezonu
Wuslědki (07.09.17)
Wokrjesna koparska liga, stafla II
Wojerecy II – Němske Pazlicy 0:4 (0:4)
Nowe Město II – Mar. hwězda 0:3 (0:2)
Chrósćicy II – Lubuš1:3 (1:1)
Njebjelčicy – Łuty2:0 (1:0)
1. HZ Łaz/Běły Chołmc 4 16 : 6 10
2. SV Haselbachtal 4 19 : 6 9
3. Natwar Němske Pazlicy 4 15 : 3 9
4. ST Lubuš 3 9 : 3 9
5. HZ Wulke Ždźary 3 5 : 1 7
6. SJ Njebjelčicy 4 7 : 7 7
7. ST Marijina hwězda 4 9 : 5 6
Para-olympiada dźensa zahajena
Wojerecy (SN). Para-olympiadu Budyskeho wokrjesneho sportoweho zwjazka su dźensa we Wojerowskim spěchowanskim centrumje „Dr. Friedrich Wolf“ zahajili. Hač do 14. septembra wubědźuje so wjace hač 350 wobdźělnikow z Kamjenca, Budyšina a Wojerec w bowlingu, lochkoatletice, kopańcy, płuwanju, sedźenskim bulu a nordic-walkingu. Nimo toho nastupichu tam dźensa tež zbrašeni sportowcy ze spěchowanskeju šulow Bolesławiec a Złotoryja. Jich start złožuje so na partnerske styki Budyskeho wokrjesa z pólskimaj wokrjesomaj Bolesławiec a Złotoryja.
Šulerjo a šulerki křesćanskeho gymnazija Johanneum kaž tež wukubłanišća za medicinalne a socialne powołanja wotběh wubědźowanjow podpěruja. Zhromadne dźěło z kubłanišćomaj organizatoram sportoweho swjedźenja nade wšo pomha. W běhu dnja zwěsćichu najlěpšich šulerjow kaž tež dorosćenych w lochkoatletiskim třiboju, w staflach a w sedźenskim bulu. Dorosćeni měrjachu mocy w nordic-walkingu.
W druhim kole wuspěšni
SJ Chrósćicy
– Germania Mittweida 4:1
po podlěšenju (1:1)
Zestawa domjacych: Králíček – Zahrodnik, Cyž, Hrdlitschka, Pöpel, Sentivan, Henčl, Młynk (52. Domaška), Teichmann (70. Žur), Věchet, Němec (114. Bogusz)
Njedźelu wočakowaše prěnje koparske mustwo Chróšćanskeje SJ w druhim kole sakskeho pokala Germaniju Mittweida. Hižo w prěnim kole dyrbjachu Chróšćenjo 120 mjeńšin wo dobyće wojować a hru z pomocu třělenja jědnatkow rozsudźić. Tež w druhim kole čakaše na serbskich přiwisnikow zaso woprawdźity krimi. Spočatnje běše partija wurunana. Wobě mustwje prócowaštej so wosebje wo stabilnu defensiwu. Tak njeměještaj wobě w prěnim połčasu tež žane wulke móžnosće, a tak wosta 0:0.
Worklečanscy volleyballisća w kónčnym kole wo wobwodny pokal
Viktoria Worklecy
– SV Oberoderwitz 2:0
(25:17, 25:20)
Viktoria Worklecy
– OSSV Kamjenc 2:1
(25:12, 21:25, 15:11)
Zestawa Viktorije Worklecy: Marko Brězan, Jan Bětnar, Ludwig Eckert, Stefan Gedik, Jurij Lipič, Marcel Rjelka a Stephan Wjeńka; poradźowar: Mato Eckert
Prjedy hač so nowa hrajna doba we wobwodnej volleyballowej lize započnje, wotmě so předkoło we wobwodnym pokalu. Za wšitke teamy běše to dobra składnosć, hišće raz testować a so na dypkowe hry přihotować.
Tradiciske mustwo SV Oberoderwitz bě hosćićel cyłkej OSSV Kamjenc, kotryž bu w prěnjej hrě dnja z 2:1 přewinjeny, a zastupnistwu Viktoria Worklecy. Za serbski team běštej to rozrisajomnej nadawkaj přećiwo mustwomaj z wobwodneje klasy. Faworizowani Worklečenjo pak njeběchu w prěnjej sadźbje přećiwo hosćićelej hišće porjadnje wuspani. Při stawje 7:12 dyrbješe jich přetorhnjenje wubudźić. Hakle serija sydom skočnych nadaćow kapitana Ludwiga Eckerta hru zwjertny. W druhej sadźbje Viktoria stajnje z pjeć abo šěsć dypkami nawjedowaše. 2:0 bě zdobom kónčny staw, přetož w pokalu wuhrawaja mustwa přeco jenož dwě dobyćerskej sadźbje.
Wonka suwerenje dobyli
LSV Nowe Město
– ST Marijina hwězda 0:3 (0:2)
Zestawa hosći: O. Schmidt – Wróbl, Škoda, K. Pakoßnick, Hawš, Peschmann, Kuring (72. Winkler), Rab, P. Schmidt (81. Čornak), Eldor (89. Hübner), J. Pakoßnick
Štwórty hrajny dźeń podachu so chowancy Pančičanskeho koparskeho trenarja Erwina Kleinmanna do Noweho Města. A wubědźichu sej tam tři dypki.
W 6. min. přesadźi so Paul Schmidt sylnje na lěwej stronje a posłuži srjedźa sobu běžaceho Jeffreyja Raba. Tón wotpołoži bul Falkej Peschmannej, kiž ze zdalenosće dźesać metrow přetwori. Pólski wrotar domjacych Stepan Andruszczyszyn njeměješe žanu šansu třělwu wotwobarać. Dźesać mjeńšin pozdźišo ležeše hrajny nastroj znowa we wrotach hosćićela. Jakobus Kuring bě startowaceho Schmidta posłužił a tón Jakoba Pakoßnicka, kiž dyrbješe bul jenož hišće k 0:2 (16.) do klětki sunyć.
Wuslědki (06.09.17)
Wokrjesna koparska liga, stafla I
Germania Budyšin II – Załom 2:2 (2:1)
Huska – Porchow1:2 (0:2)
Großharthau – Połčnica 2:3 (1:2)
Malešecy – Frankenthal 4:1 (2:0)
Ottendorf-Okrilla – Budyšink 4:0 (2:0)
Bretnig-Hauswalde – Arnsdorf 1:2 (1:2)
1. Traktor Malešecy 4 21 : 4 12
2. TSV Wachau 4 11 : 0 12
3. ST Porchow 4 9 : 4 8
4. TSV Połčnica 3 7 : 3 7
5. TSV Wjernarjecy 4 11 : 8 7
6. SC Großröhrsdorf II 4 5 : 2 7
7. Arnsdorfske KT 4 9 : 8 7
8. SV Frankenthal 4 8 : 7 6
9. FV Ottendorf-Okrilla 4 6 : 6 6
10. Concordia Załom 3 6 : 5 4
11. Germania Budyšin II 4 7 : 11 3
12. Horni kraj Sprjewja II 3 4 : 10 1
13. SV Großharthau 4 3 : 9 1
14. Bretnig-Hauswalde 4 3 : 10 1
38. Wopačanski Běłobóski běh
Při přijomnym wjedrje je so 272 sportowcow a jědnaće lubowarjow walkinga na 38. Wopačanskim Běłobóskim běhu po tamnišej hórskej krajinje dračowało, mjez nimi tež dźewjeć serbskich. Jednotliwe distancy běchu 1,5/4,9/12 a 20 km. Wone wjedźechu po pólnych pućach a přez wjeršk 500 metrow wysokeho Běłoboha.
Najdlěšu čaru přewinyštaj jako cyłkownaj dobyćerjej Philipp Winkler w 01:16:03 hodź a Franziska Kranich w 01:31:33 hodź. Tu startowaše tež najwjace serbskich atletow. To běštaj na přikład Christoph Mehnert, kiž doby w sk 45 w 01:26:50 hodź a Jakub Čórlich bu třeći w sk 20 z 01:27:59 hodź. Tež Katrin Mehnertowa wubědźi sej cyłkownje 4. městno w 01:56:08 hodź. Cyłkownaj dobyćerjej na 12 km běštaj Uwe Hänsch w 51:39 min a wurjadna serbska běharka Marija Škodźina, kotraž doběža w 01:03:05 hodź do cila. Ju su tež za dobyće w sk 35-39 počesćili. Wurjadnje wojowałoj staj tohorunja Roman Měrćink w 58:05 min (3. městno) a Leo Čórlich w 01:15:11 hodź (4. městno). We wurisanju na 4,9 km rěkaštaj cyłkownaj dobyćerjej Marek Pompe z časom 20:19 min a Anna Böhme z 21:34 min. Jurij Nuk wobsadźi w sk 80-84 třeće městno. Jurij Nuk
Čórlich Blackbird-run dobył
Njedźelu wotmě so w Hózku pola Kulowa třeći raz tak mjenowany Blackbird-run, běh přez zadźěwki. 308 běharkow a běharjow, dwójce telko kaž na premjerje před lětomaj, poda so na naročnu čaru. Zdźěla směšny kostim zdrasćeni dračowachu so sportowče a sportowcy přez błóto a krosnowachu přez dohromady 15 zadźěwkow. Mjez nimi běchu připrawy, kaž na přikład pyramida ze synowych walčkow, najwšelakoriše tunle, eskaladěrowanske sćěny abo tež konstrukcije, kotrež so při dótknjenju z milinowymi storkom pochłostachu. Šěsć kilometrow dołha čara, kotraž dyrbješe so dwójce absolwować, seklowaše so přez łuki a lěsy kołowokoło wsy nad Čornym Halštrowom. Najstarši wobdźělnik běše 59lětny Kurt Schnabel z Kulowa. Po dwanaćekilometrowskej dračinje doběža 27lětny Jakub Čórlich z Němcow jako prěni do cila. Wón porazy zakitowarja titula Jonasa Čornaka z Koćiny wo nimale pjeć mjeńšin. Najspěšniša žona bě Theresa Lützendorf, najspěšniša Serbowka Kulowčanka Thea Čórlichec.
