Wuměnjeja so hižo dlěje hač połsta lět

štwórtk, 13. julija 2017 spisane wot:

Tež delanscy Sokoljo su lětsa zaso swoju­ sportowu wuměnu z wukraj­nymi sportowčemi a sportowcami přewjedli­. Bě to mjeztym 52. serb­sko-čěska wuměna mjez Sokołom Ralbi­cy/Hórki a TJ Sokolom Spálené Poříčí.

Nimale połsta hosći móžachu w Ralbicach witać. Čěscy a serbscy sportowcy wobhladachu sej nazajtra zhromadnje Budyšin, hdźež mějachu hosćo wodźenje w čěskej rěči, štož so jara lubješe.

Obligatoriska kopańca wězo tež zaso bě, a to na wulkim polu, byrnjež hosćićelske mustwo ćeže ze zestawu měło. Samo Enrico Krawc (něhdyši hrajer Sokoła Ralbicy/Hórki a Budissy Budyšin) z Eisenberga dyrbješe kopački šnórować, zo by dźesać Ralbičanow přećiwo jědnaće koparjam ze Spáleneho Poříčí nastupić móhło. Prěnje a druhe mustwo Sokoła dyrbještej mjenujcy hišće winowatostnej hrě přewjesć. Hosćo, kotřiž běchu wo klasu lěpši, partiju z 1:0 dobychu.

Wosebje rjenje lětsa bě, zo móžachu so słowjanscy susodźa prěni raz na folklornym festiwalu w Chrósćicach wobdźělić. Tam zetkachu tež zastupjerjow čěskeje narodneje mjeńšiny z Chorwatskeje.

Budissa ma dalšeho škitarja

štwórtk, 13. julija 2017 spisane wot:
Regionalny koparski ligist Budissa Budyšin je so z dalšim hrajerjom zesylnił. Za nutřkowny škit angažowachu w Budyšinje Johanna Weißa (nalěwo). 20lětny kopar nawróći so wot VfV Borussije 06 Hildesheim. Hač do kónca hrajneje doby 2015/2016 bě wón w dorostowych mustwach Dynama Drježdźany hrał. Trenar Torsten Gütschow (naprawo) je noweho koparja hižo w testowych partijach zasadźił, naposledk přećiwo Čerwjeno-běłym Erfurt. Budissa Budyšin a Johann Weiß staj zrěčenje na dwě lěće wujednałoj. Foto: Torsten Zettl

Horcy bój so skónčnje wudanił

srjeda, 12. julija 2017 spisane wot:

LSV Hory – Sokoł Ralbicy/Hórki (stari knježa) 0:1 (0:0)

Zestawa hosći: Mjetaš-Wowčer – Šołta (41. Pilc), Zynda, Krawc, Brězan, Statnik, Strelow, Bjeńš, Šwejda, Jakubaš, Brückner (65. Obst)

K zazběhej druheje połserije wjedźeše puć stareje koparskeje gardy Sokoła Ralbicy/Hórki k nowačkej na Hory. Prěnju hru doma bě wona z 5:1 jasnje dobyła. Přiwšěm bě warnowana, dokelž su Horjenjo minjene pjeć hrow dobyli. Nimo toho stejachu w tabulce před Sokołom. Při tužnym wjedrje wukonjachu woni tež wot spočatka mócny ćišć. Hosćo z Ralbic dyrbjachu najprjedy defensiwu skrućić, zo njeby k zažnemu zastatkej dóšło. Prěnju šansu za nich měješe Maik Brězan po wólnym kopje Heika Zyndy. Wrotar pak słabu třělwu wotpopadny. Na tamnym boku wuchowa žerdź Romana Mjetaša-Wowčerja. Druhi raz měješe wón zbožo, jako njezamó bul kruće dźeržeć a jón runje tak z linije škrabny. Po rjanym konteru móhł Daniel Brückner nawjedowanje docpěć, trjechi pak jeno žerdź. W poslednich mjeńšinach prěnjeho połčasa přećiwnik z Horow ofensiwnje a spěšnje wustupowaše. Sokoljo wšak jim ze wšej rutinu znapřećiwichu.

Dwójce třeće městno wobsadźili

srjeda, 12. julija 2017 spisane wot:

Mixvolleyballisća Budyskeje FSG su 27. mišterstwo na hobbyjowej runinje z bronzu skónčili. Tež w pokalnym wurisanju wobsadźichu woni třeće městno mjez šěsć startowacymi cyłkami.

Dokelž njebě aktualny mišter SZ Chróstawa w Budyskim wokrjesnym pokalnym kole w mixvolleyballu nastupiło, wuži wicemišter jim poskićanu šansu na dobyće. Hrajerki a hrajerjo z Wjazońcy přesadźichu so přećiwo dalšim pjeć měšanym cyłkam před VZ Biskopicy. Sćěhowaše Budyska FSG ze swětłom a sćinom. Wosebje w přijimanju nadaćow a w pólnym škiće mějachu hrajerjo swoje ćeže. Tež wupad hłowneho nadběhowarja Joh­na Petrika njemóžachu narunać. Zwjeselace bě, zo zapřimnychu do boja při wysokim saku nowačkaj kaž tež zaso žony a mužojo z Biskopic.

Budyska FSG je hižo 23 lět pódla a wostanje z jědnaće wokrjesnymi titulemi dale najwuspěšniše měšane mustwo Budyskeho wokrjesa. K tomu přińdu dźewjeć druhich a tři třeće městna. Kak dołho budu strašne nadaća a wjelelětna rutina­ najstaršemu cyłkej wšěch měšanych mustwow hišće pomhać, pokaza so w dalšich sezonach.

W juniju je Chróšćan Křesćan Zahrodnik ze swojej pjećlětnej kobłu z mjenom Ria Rocca w Moritzburgu 3. městno w klasy L w přezpólnym jěchanju za młode konje wobsadźił. Konjej, kotrehož je Florian Zahrodnik plahował, pobrachuje tuž jenož hišće jenička kwalifikacija za zwjazkowy championat we Warendorfje w septembrje. Foto: Křesćan Zahrodnik

Nowy kwartet při zazběhu treninga

wutora, 11. julija 2017 spisane wot:

Po někotrych terminach na medicinskim a atletiskim polu měješe regionalny koparski ligist FC Energija Choćebuz (FCE) njedawno swój treningowy zazběh za hrajnu dobu 2017/2018. Před něhdźe sto wćipnymi fanami su koparjo FCE prěnju treningowu jednotku absolwowali. Wosebitu kedźbnosć dóstachu při tym nowe mjezwoča.

Tola tež w funkciskim teamje FCE maja w Choćebuzu změnu. Krystian Kalinowski, dotal zamołwity za wrotarjow, dźěła nětko we wukonowym centrumje RB Lipska. Jeho naslěduje 22lětny Anton Wittmann, najmłódši trenar wrotarjow we wšěch štyrjoch najwyšich koparskich klasach Němskeje. Wón je naposledk w samsnej funkciji pola BFC Dynama dźěłał, ma pak tež hižo nazhonjenja w Choćebuzu. Wot 2011 bě wón tři lěta wrotar FCE. W młodźinje A bě 18 razow w zwjazkowej lize zasadźeny a dwanaće króć we wyšej lize w druhim mustwje Energije.

Georg Zielonkowski

Na nowu sezonu přihotowani

wutora, 11. julija 2017 spisane wot:

Zapadołužiski koparski zwjazk (WFV), kotryž zamołwja tež serbske koparske mustwa, přihotuje so na sezonu 2017/ 2018. Werner Müller je so z Ingolfom Hornom, 1. wiceprezidentom WFV a předsydu hrajneho wuběrka, rozmołwjał.

Kak sće z minjenej hrajnej dobu 2016/ 2017 spokojom?

I. Horn: We wokrjesnej wyšej lize bě staflowy dobyćer ST Ćisk hižo chětro zahe jasny. Hinak bě to w staflach wokrjesnych ligow a klasow. Hač do poslednjeho hrajneho dnja knježeše napjatosć. Doskónčny rozsud mějachmy hakle po poslednjej dypkowej hrě, tak na přikład tež w Radworju.

Maće snano někajke wosebitosće, kotrež móhli tu mjenować?

I. Horn: Ně, w minjenej sezonje so na hrajnym wotběhu ničo změniło njeje. Normalne wšak bě, zo někotre mustwa wokrjesneje klasy w druhej połseriji hižo nastupili njejsu. Nětko w nowej hrajnej dobje budźe to wot Sakskeho koparskeho zwjazka (SFV) hinak rjadowane. Sportowe towarstwa, kotrež swoje mustwa srjedź sezony wotzjewja, dyrbja ze stron SFV z wyšimi chłostanjemi ličić.

Hdy so přichodna sezona započnje?

Dwójna nula dwójce wuspěšna

wutora, 11. julija 2017 spisane wot:
Prěni raz bě Radijo Satkula ze swojej beachvolleyballowej turu wčera w Jaseńcy. Tam běchu njedawno nowe beachvolleyballnišćo nasypali. Wčera hraješe tam 14 mustwow. Prěnje městno wudoby sej cyłk Dwójna nula II. Mustwo dwójna nula wšak je na beachturje hižo znate, w Jaseńcy nastupi wone samo z dwěmaj zastupnistwomaj, kotrejž stej sej w finalu njewočakowano napřećo stałoj. Přichodny tydźeń hraja w Kulowcu. Foto: Gloria Žurec

Po zakónčenju winowatostnych hrow powita Sportowa jednotka Njebjelčicy swěrnych přećelow z čěskich Roztok u Jilemnice, a to mjeztym 49. raz. Tak zarjadowa sobotu, 1. julija, mały sportowy swjedźeń ze zaběru za dźěći, dopołdnja z dorostowej kopańcu a popołdnju z kopańcu muskich mustwow. Njebjelčenjo wutworichu dwě mustwje, jedne w starobje pod a druhe nad 30 lětami. Hosćo běchu z 3:2 a po tym z 2:1 wuspěšni. Wječor zhromadźichu so sportowcy a dalši hosćo w stanje ke grilowanju a zabawje při hudźbje.

Njedźelu zetkachu so wšitcy k zhromadnemu wobjedej w sportowym domje. Po tym dojědźechu sej Njebjelčenjo z přećelemi na koparski golf do Ottendorfa-Okrille. Jako so nawróćichu, bě za wšitkich hižo słódny kofej z přikuskom přihotowany. Prjed hač podachu so hosćo na dompuć, přilubichu sej sportowcy wobeju cyłkow, zo chcedźa potom klětu w Roztokach rjany pjećdźesaty jubilej hódnje woswjećić.

23. julija přewjedźe Njebjelčanska SJ koparski turněr štyrjoch serbskich cyłkow, a to pod mjenom „serbski supercup“. Wjeselimy so hižo nětko na bohate přihladowarstwo. Bjarnat Deleńk

Energija a wola dale trěbnej

póndźela, 10. julija 2017 spisane wot:

Volleyballisća Pančičansko-Kukowskeho Sportoweho towarstwa Marijina hwězda maja chětro přerosćenu sezonu 2016/ 2017 za sobu. Spočatnje mějachu wjele elana a tuž bě wjeselo nad dobyćomaj čim wjetše. Tež poražka přećiwo nowačkej wokrjesneje klasy z Chróstawy na tym ničo njezměni. Tola počasu zhubichu nitku a worachu zaso stare zmylki. Wěčny problem njedokładneho přiwzaća so znowa pokazowaše a tak sćěhowachu dalše přěhrate hry, hačrunjež njebě wukon mustwa hubjeny. Tež njekoncentrowanosć při nadaćach, pobrachowaca kreatiwita w nadběhu a zdźěla dwělomne rozsudy při wuměnach zjednorichu přećiwnikam, blokować a nadběhi wotwobarać. Pytnyć často tež bě, zo faluje mustwu „hłowa“, kaž bě to njeboh Pětr Bart. Wosoba potajkim, kotraž ma poslednje słowo, na kotrež ma so poskać. Tučasnje pak nimaja Pančičanscy volleyballisća žanoho praweho kapitana, čehoždla wojuja druhdy ze wšelakimi měnjenjemi a bjez trěbneho koncepta.

Serbska debata

nowostki LND