Na wopyće w Finskej

pjatk, 18. nowembera 2022 spisane wot:

Štóž w Finskej do šule chodźi, wuknje znajmjeńša dwě rěči: finšćinu a šwedšćinu. Byrnjež jenož mało Finow šwedšćinu jako maćeršćinu podawało, je za wšitkich wobydlerjow zawjazowace, wobě krajnej rěči wuknyć. To so někotrym Finam derje lubi, druzy maja to za njetrjebawše nućenje. Mustwo redakcije telewizijneho magacina Łužyca wokoło Britty Wulf je skandinawiski kraj wopytało a nazhoniło, kak so zakonsce postajena dwurěčnosć Finskeje wšědny dźeń praktikuje.

Telewizija RBB wusyła nowembersku Łužycu jutře, sobotu, wuwzaćnje w 12.30 hodź. Wospjetowanje na samsnym sćelaku slěduje srjedu, 23. nowembra, w 3.35 hodź. W mediatece RBB je magacin wot jutřišeje soboty cyłe lěto kóždy čas přistupny.

Musical, wjelki a wideja

pjatk, 04. nowembera 2022 spisane wot:

Ćežišćo nowemberskeho telewizijneho magacina Wuhladko je prapremjera spěwohry „Z Tobu – Bohu swjećene lěto“. Dalšej přinoškaj wěnujetej so bioloze ­Pawołej Lipičej, kiž we Łužicy wjelki wuslědźi, a serbskim skupinam, kaž na přikład Holaski a Nowa Doba, a jich hudźbnym widejam.

Telewizija MDR wusyła Wuhladko sobotu, 5. nowembra, w 11.45 hodź. Wo­spjetowanje w samsnym sćelaku slěduje póndźelu, 7. nowembra, w 6.40 hodź. ­Telewizija RBB pokaza magacin sobotu, 12. nowembra, w 13.30 hodź. W media­tece MDR je wusyłanje wot jutřišeho cyłe lěto kóždy čas přistupne.

„Wysoki wopyt“

pjatk, 30. septembera 2022 spisane wot:

Oktoberske wusyłanje hornjoserbskeho telewizijneho magacina Wuhladko rozprawja wobšěrnje wo „wysokim wopyće“ sakskeho krajneho knježerstwa w Serbach. Prěni króć zetkachu so politikarjo mjenujcy k wonkownemu kabinetnemu posedźenju w Serbskim domje w Budyšinje. Při tym njehladaja „jenož na wuslědki koła, ale tež za kulisy“.

Dalšej přinoškaj magacina stej kulturneho razu. Tak wobswětluja „gigantiski open-air-spektakl ‚Mór a lubosć‘“, kiž dožiwi w septembru swoju prapremjeru w Chrósćicach. Nimo toho wěnuja so njedawno zakónčenej turneji „Serbsko-Waliziskeho přećelstwa“ po Łužicy.

Telewizija MDR wusyła Wuhladko jutře, sobotu, w 11.45 hodź. Wospjetowanje na samsnym sćelaku slěduje póndźelu, 10. oktobra, w 6.45 hodź. Telewizija RBB pokaza magacin sobotu, 8. oktobra, w 13.30 hodź. W mediatece MDR je wusyłanje wot jutřišeho cyłolětne kóždy čas přistupne.

Depsk swjeći

pjatk, 16. septembera 2022 spisane wot:

Septemberske wudaće telewizijneho magacina Łužyca wěnuje so předewšěm domchowance a łapanju kokota w Depsku. Moderator Christian Mathée rozprawja wo tradicionalnym wubědźowanju z dohromady „dźewjeć jěcharjemi a 17 potencielnymi kralownami“ a rozmołwja so z wjesnjanami a wobdźělnikami swjedźenskeho ćaha. Nimo toho wobswětluja nětko tež delnjoserbšćinu wopřijimacy přełožowanski program „Sotra“ a portretuja Choćebuski Kolektiw Wakuum jako zastupjer „feministiskeje a přiwšěm inkluziwneje subkultury w Delnjej Łužicy“. Z wosebitym přinoškom gratuluja Witaj-pěstowarni „Wila Kunterbunt“ w Choćebuzu, kotraž bu před 20 lětami załožena. Jako kulturnu chłóšćenku pokazaja nowe hudźbne widejo „Co by nadejšła“ delnjoserbskeje šansonety Leny Hauptmann, nahrawane a produkowane wot Erika a Clemenca Syškojc.

Telewizija RBB wusyła „Łužycu“ sobotu, 17. septembra, w 13.30 hodź. Wospjetowanje na samsnym sćelaku slěduje srjedu, 21. septembra, w 3.30 hodź. W mediatece RBB je magacin wot jutřišeho cyłe lěto kóždy čas přistupny.

Wjac městnow hač ludźi

pjatk, 02. septembera 2022 spisane wot:

„Swobodne městna! Serbske institucije nuznje nowych ludźi pytaja“, rěka nadpismo septemberskeho wusyłanja telewizijneho magacina Wuhladko. Tak pytaja projektnych nawodow, redaktorow, wobdźěłarjow spěchowanskich próstwow abo tak mjenowanych motiwatorow. Ženje hišće njebě potrjeba w serbskich institucijach tak wulka kaž tuchwilu. To zaleži na jednym boku na změnje generacijow. Na druhim boku nastawaja přidatne městna, na přikład w zwisku ze strukturnej změnu. Při tym maja wupisanja zhromadne wuměnjenje: wobknježenje serbskeje rěče. Wuhladko połoženje wobšěrnje wobswětluje.

Dalšej ćežišći magacina budźetej reportaža wo boju přećiwo afriskej swinjacej mrětwje we wokrjesomaj Budyšin a Zhorjelc z pomocu trutow kaž tež přinošk „Idole z interneta“ wo wuspěšnymaj serbskimaj influenceromaj.

Telewizija MDR wusyła Wuhladko jutře, sobotu, w 11.45 hodź. Wospjetowanje w samsnym sćelaku slěduje póndźelu, 5. septembra, w 6.45 hodź. Telewizija RBB pokaza magacin sobotu, 10. septembra, w 13.30 hodź. W mediatece MDR je Wuhladko wot jutřišeho cyłe lěto kóždy čas přistupne.

Łužyca pola Frizow

pjatk, 19. awgusta 2022 spisane wot:

Třeći dźěl lětnjeje serije telewizijneho magacina Łužyca „Wulěty k narodnym mjeńšinam Němskeje“ wěnuje so Frizam. Moderator Christian Matthée zahaji swoju reportažu z wopytom Nordfriisk Instituuta (Sewjerofriziski institut) w Bredstedće, centralneje wědomostneje institucije za hajenje rěče a kultury mjeńšiny, hdźež podawaja jemu dohlad do stawiznow ludu wot 7. lětstotka. Nimo toho rozprawja Mathée z kupow Föhr a Hamburger Hallig, wo šulskim ­systemje a wuwučowanju frizišćiny w Schleswigsko-Holsteinskej a wo tamnišim radijowym programje w mjeńšinowej rěči. Wusyłanje wopřijima dale rozmołwy ze zastupnikami Rady Frizow.

Telewizija RBB wusyła magacin sobotu, 20. awgusta, w 13.30 hodź. Wospjetowanje w samsnym sćelaku slěduje srjedu, 24. awgusta, w 2.45 hodź. W mediatece RBB je Łužyca wot zajutřišeho cyłe lěto kóždy čas přistupne.

Wšědna serbska drasta

pjatk, 05. awgusta 2022 spisane wot:

Hišće před někotrymi lětami postajowachu wone wobraz Łužicy: serbske žony w swojej narodnej drasće. Hač na dźěle, při nakupowanju abo njedźelu na kemšach – wone słušachu samozrozumliwje k wšědnemu dnjej na wsach dwurěčneje Łužicy. Tola dźensa je lědma hišće wuhladaš. Tak je w katolskich wosadach jenož hišće něhdźe 20 žonow, kiž wšědnje serbske chodźa a kotrež su zwjetša w starobje daloko nad 80 lětami, zhladujo na dołhe, častodosć tradanja połne žiwjenje.

Njenapadnje a ćicho dožiwjamy runje kónc lětstotki dołheje doby w serbskich stawiznach. Filmowcaj Pětr a Stefan Symank staj za telewizijny magacin Wuhladko rěčałoj z někotrymi z tutych žonow.

Telewizija MDR wusyła Wuhladko sobotu, 6. awgusta, w 11.45 hodź. Wospjetowanje na samsnym sćelaku slěduje póndźelu, 8. awgusta, w 6.45 hodź. a w telewiziji RBB 13. awgusta w 13.30 hodź. W mediatece MDR je magacin wot jutřišeho cyłe lěto kóždy čas přistupny.

Koparjo a koparka

pjatk, 08. julija 2022 spisane wot:

Julijske wudaće telewizijneho magacina Wuhladko wěnuje so jeničkej temje, kotruž njemało ludźi „najrjeńšu pódlansku wěc“ mjenuja, mjenujcy kopańcy. Přičina je za serbske mustwo „dotal najwuspěšniša europeada. Hišće ženje njeběchu Serbja při koparskich europskich mišterstwach narodnych mjeńšin połfinale docpěli. Njeporaženi zakónčichu předkoło a startowachu jako dobyćerjo skupiny do finalneho koła. Po dobyću štwórćfinala přećiwo Južnym Serbam z Chorwatskeje zdaše so wšitko móžne być. Tola hru přećiwo hosćićelam, Korutanskim Słowjencam, su přěhrali. Na kóncu docpěchu serbscy koparjo 3. městno. Z tym drje bě we Łužicy lědma štó ličił“, kaž MDR informuje. Filmowcy a reporterojo magacina su sportowcow na swojim puću do połfinala přewodźeli, za kulisy pokuknyli a euforiju w Korutanskej runje tak kaž we Łužicy zapopadnyli.

Jězba k mjeńšinam

pjatk, 17. junija 2022 spisane wot:

Junijske wudaće telewizijneho magacina Łužyca wotbłyšćuje prěnju etapu ak­tualneje jězby moderatora Christiana Mathéeja po Němskej k tu připóznatym narodnym mjeńšinam. W schleswigsko-holsteinskej stolicy Kielu bydli tuchwilnu něhdźe 6 000 přisłušnikow Sintow a Romow. Mjez druhim je Mathée předsydu krajneho zwjazka ludoweje skupiny Mattäusa Weißa wopytał a so z nim wo „na přesćěhanje, wuzamkowanje a potłóčowanje bohatych“, mjeztym wjace hač 600 lět trajacych stawiznach, ale tež wo wjelorakej kulturje Sintow a Romow rozmołwjał.

Nimo toho portretuja wosebity, na „specielnu kulturu a potrjeby“ mjeńšiny wusměrjeny bydlenski projekt „Maro Temm“ w Kielu, hdźež je so moderator mjez druhim mjez młodostnymi wo kubłanskich šansach a wosobinskich anticyganistiskich nazhonjenjach wobhonił. Hudźbny přinošk skupiny Django Forever, kotraž swoje spěwy pod hesłom „gipsy music“ zjima, magacin skulojća.

Kulojta koža

pjatk, 03. junija 2022 spisane wot:
Junijske wusyłanje telewizijneho magacina „Wuhladko“ je cyle na wulki sportowy wjeršk wusměrjene. W srjedźišću stejitej bližaca so europeada a njedawno w Slepom předstajena serbska wubranka, kotraž Hornju a Delnju Łužicu na koparskim turněrje mjeńšinow zastupuje. Telewizija MDR wusyła „Wuhladko“ jutře, sobotu, w 11.45 hodź. Wospjetowanje tam slěduje póndźelu, 6. junija, w 6.45 hodź.; sobotu, 18. junija pokazaja magacin w 13.30 hodź. w telewiziji RBB. W mediatece MDR je „Wuhladko“ wot jutřišeho cyłe lěto kóždy čas přistupne.

Serbska debata

nowostki LND