Z wudaća: štwórtk, 16 februara 2017

Lubowarjo kompjuterowych hrow sydaja často sami před swojim ličakom, chibazo su internetnje z dalšimi hrajerjemi zwjazani. W Chrósćicach budźe to kónc tydźenja hinak. Tam wotměje so po wjacorych lětach přestawki zaso tak mjenowana Lan-party.

Chrósćicy (SN/MWj). Wjele lět bě Lan-party w Chróšćanskej „Jednoće“ kruty termin w protyčce mnohich serbskich a němskich přiwisnikow kompjuterowych hrow. Poněčim pak zajim za nju woteběraše, doniž tale forma zhromadneje zabawy doskónčnje njewusny. Nětko­ chcedźa ju někotři z wonych „starych zajacow“ hromadźe z Chróšćanski­mi mło­dostnymi­ zaso wožiwić. Zaměr organizaciskeho teama je, zo młodźi ludźo­ doma sami před ličakom njesy­daja, ale swoje wjeselo nad kompjute­rowymi hrami z druhimi dźěla.

16.2.2017–22.2.2017 Budyski filmowy palast: Bob, der Streuner: wšědnje 12:45 (nimo pj a nj) a 17:15 (nimo pó) John Wick – Kapitel 2: wšědnje 19:45 | pj a so 22:15 Bibi & Tina 4: nj 15:00 Fifty Shades of Grey: wšědnje 14:45, 17:00 a 20:00 | pj a so 22:45 The LEGO Batman Movie: wšědnje 14:30 (nimo nj) | nj 15:00 The LEGO Batman Movie w 3 D: wšědnje 17:30 Wendy: wšědnje 15:00 Resident Evil: The Final Chapter: pj a so 22:00 Split: wšědnje 19:30 (nimo pó) | pj a so 22:15 Kundschafter des Friedens: pj, nj a wu 17:15 | štw, so, pó a srj 19:45 Mein Blind Date mit dem Leben: štw, so, pó a srj 17:15 | pj, nj a wu 19:30 Timm Thaler: pj a nj 12:30 Willkommen bei den Hartmanns: pj, nj a wu 12:30 Vaiana: wšědnje 15:00 (nimo nj) | štw, so, pó a srj 12:30 | wu 9:45, 10:00 a 10:15 Sing: wšědnje 12:30 Feuerwehrmann Sam: wšědnje 13:00

Kino-ekstra: Sully:­ pó 17:15 a 20:15

Worklečanska gmejna sej lětsa tójšto předewzała

Worklecy (JK/SN). Byrnjež lěto hišće poměrnje młode było, ma wjetšina gmejnow Budyskeho wokrjesa hižo konkretne předstawy wo lětušim hospodarskim planje. Te wone tež trjebaja, wšako dyrbja, hladajo na dźeń a mjenje přiražkow ze stron wokrjesa a kraja, eficientnje hospodarić. A spěchowanske srědki so jenož w snadnej měrje za wulke přede­wzaća gmejnow wupłaća.

Tež Worklečanska gmejna je sej za lěto 2017 tójšto předewzała. Wo hospodarskim planje radźićeljo drje hakle na přichodnymaj posedźenjomaj wuradźuja. Hižo nětko pak wjesnjanosta Franc Brusk (CDU) wě, što móhło na kóncu lěta na stronje­ ze spjelnjenymi nadawkami stać.

Wobchad z powětra kontrolowali

Budyšin. Rjane wjedro za lětanje wužiwaše zawčerawšim připołdnju wobchadna policajska inspekcija za wobchadnu kontrolu na awtodróze A 4 mjez wotbóčkomaj Hermsdorf a Zhorjelc. „Lětace wóčko“ dokumentowaše pjeć padow, w kotrychž wodźerjo nakładnych awtow minimalny wotstawk 50 metrow k jězdźidłu před nimi njedodźeržachu. Pilot helikoptera zdźěli tele pady wobsadkam policajskich awtow. Wone přewodźachu ­potrjechenych šoferow k přichodnemu parkowanišću, hdźež jim jich zmylk rozłožichu. W štyrjoch padach při tym wosta, zo změja wodźerjo ­pokutu 80 eurow zapłaćić. Při kontroli pjateho nakładneho awta a jeho 62lětneho wodźerja pak zastojnikam napadny, zo muž scyła žanu płaćiwu jězbnu dowolnosć njewobse­dźeše. Zakazachu jemu tuž dalšu jězbu. Spedicija, za kotruž muž dźěła, dyrbješe druheho šofera pósłać, zo bychu nakładowane twory swój cil docpěli. Statne rěčnistwo so nětko z tymle padom dokładnišo zaběra.

Łaz (MFü/SN). Hodźinu wobydlerskich naprašowanjow na zašłym posedźenju Łazowskeje gmejnskeje rady wužiwaše tamniši předewzaćel Andreas Mühle za próstwu, zo měli gmejna a gmejnscy radźićeljo regionalnych turistiskich poskićerjow bóle podpěrać. „Dyrbjeli rozmyslować, kak móhli turizm wuwiwać“, napominaše Mühle, kiž při Třižonjanskim jězoru elektriske třikolesa trikke wupožčuje a tam nimo toho motorski parcours wobhospodarja. Byrnjež Łaz při zwjazkowej a dalšej statnej dróze ležał, wjele ludźi přez gmejnu jězdźi, bjez toho zo bychu wědźeli abo zhonili, kak atraktiwna kónčina je. Jeho swójske wabjenje w radiju bě lědma wuspěšne. Informaciska tafla na přikład při parkowanišću kupnicy, móhła z derje přemyslenymi wobsahami ludźi pohnuć, so po wokolinje bliže rozhladować.

Marijanske spěwy zaklinča

Chrósćicy. „Ave virgo“ rěka hesło přichodneho zarjadowanja w Chróšćanskej putniskej hospodźe sobotu, 18. februara, w 19.45 hodź. Z hosćom budźe tam spěwarka Tatjana Kuzina-Bogomolowa z ruskeho Pětrohroda. Ćežišćo jeje koncerta su marijanske spěwy. Wječor je specielnje wěnowany swjatej Mariji w srjedźowěkowskej europskej hudźbje. Tak zaklinča předewšěm španiske a katalanske hymny a kancony 12. do 14. lětstotka, ale tež pozdźiše ruske twórby a ludowe spěwy. Spěwarka chce tež zajimawostki wo hudźbje tohole časa a konkretnych štučkach powědać.

Zymske njebjo wobkedźbować

Budyšin. Přichodne prózdninske zarjadowanje w Budyskej hwězdarni je jutře, pjatk, we 18 hodź. Wobdźělnicy budu při jasnym wjedrje hwězdy a hwězdna zymskeho njebja wobkedźbować. Zastup płaći tři eura, potuńšene dwaj euraj. Swójby płaća pjeć eurow.

Prěni Hornjołužiski festiwal dźěćaceje hudźby wulki wuspěch žnjał

3 000 wopytowarjow ze 27 wuměłcami a 400 sobu skutkowacymi dźěćimi na dohromady 30 zarjadowanjach w Budyšinje, Lubiju, Wojerecach, Smochćicach, Zhorjelcu, Mittelherwigsdorfje a Běłej Wodźe – a to wšo w běhu třoch dnjow. Hižo ryzy bilanca ličbow prěnjeho Hornjołužiskeho festiwala dźěćaceje hudźby, wotměteho wot 2. do 4. februara, móže so widźeć dać.

Rezerwy hišće su

Spěwytwórc Unmada Manfred Kindel wuhotowa koncert „Dźěći spěwaja w třoch rěčach“ w Budyskim Serbskim šulskim a zetkawanskim centrumje tež hromadźe z chórom Serbskeje zakładneje šule Budyšin. Cordula Ratajczakowa je so wuměłcom a diplomowym pedagogu­ z Hannovera rozmołwjała, kiž po cyłej Němskej seminary dawa.

Kak so Wam Hornjołužiski festiwal dźěćaceje hudźby lubi?

Unmada: Je wulkotne widźeć, kelko kolegow so w tajkej wšelakorosći a w telko rozdźělnych žanrach dźěćom wěnuje a jim wotrosć pomha.

Wužiwaće w spěwach gestikulacisku rěč – čehodla?

Unmada: Skutkuju tež jako dirigent chóra spěchowanskeje šule za duchownje zbrašenych. Dźěći su spočatnje na mnje swarjeli, dokelž wužiwach gestiku, kotruž běch sej sam wumyslił. Sym tuž prawu gestikulacisku rěč nawuknył, hódnoćejo tak zdobom te dźěći, kotrež su na nju pokazane. Nimo toho stej pohibowanje a rěč w mozach zwjazanej, a tak móža sej dźěći teksty spěwow lěpje spomjatkować – gestikulaciska rěč spěchuje tuž rěčnu kmanosć runje tak kaž dwurěčnosć.

Sabine Gräfe z Porchowa: Běch z dźowku a wnučku na swójbnym koncerće w Budyskim SLA. A wopyt je so na kóždy pad wudanił. Dźěći su so jara prócowali, a program bě cyle pisany. Bych sej tajke něšto časćišo přała. Mam za spomóžne, zo wuměłcy dźěćom hudźbu zbližeja; a naš dorost pytnje, kak lóštna móže wona być. Dorosćeni maja so wězo tróšku ćešo sobu spěwać a rejwać. Hudźba a reje pak móža telko žiwjenskeje radosće šěrić, to je wulkotne.

Steffi Vogt z Budyšina: Naša dźowka je na programje swójbneho koncerta aktiwnje sobu skutkowała, a to jako čłonka chóra Serbskeje zakładneje šule Budyšin. Mi so Hornjołužiski festiwal dźěćaceje hudźby jara spodoba, dokelž je wulkotna wěc. Mojedla móhli tajku akciju kóžde lěto­ abo samo dwójce wob lěto přewjesć. Pytnješ, kak to dźěćom tyje a kak je spěchuje. Rjenje tohorunja je, zo hudźba wšelakore generacije zwjazuje – hudźba prosće wožiwja!