Z wudaća: štwórtk, 15 junija 2017

Prěnje koparske mustwo Jednoty Kamjenc je ze swojim trenarjom Frankom Ričlom (naprawo) po hrajnej dobje 2016/2017 w najwyšej lize Sakskeje wicemišter a smě­ so přiwšěm hišće­ postupa do wyšeje ligi nadźijeć. Poslednju dypkowu hru nětčišeje se­zony dobychu koparjo z Lessingoweho města pola FC Grimmy 4:2. W mustwje Jednoty hrajetaj tež koparjej Serbskeje koparskeje wubranki Feliks Hrjehor ze Serbskich Pazlic a Patrick Woko ze Šunowa. Foto: Frank Terks

Minority SafePack online

Flensburg. Iniciatiwa Federalistiskeje unije europskich narodnych mjeńšin (FUEN) Minority SafePack zběra wotnětka tež online podpisma. Pod www.minority-safepack.eu su lisćiny za 40 krajow podate. Informacije dyrbja we wulkich pismikach a w žadanej rěči zapisane być. FUEN trjeba milion podpismow, zo by iniciatiwa wo škit mjeńšin před EU wuspěšna była.

Čestne čłonstwo spožčene

Budyšin. Serbski ludowy ansambl ma třoch nowych čestnych čłonow. Su to wjelelětna spěwarka a moderatorka SLA Lenka Winarjec-Šołćina, bywša baletna mišterka ansambla Isolde Weiden kaž tež wjelelětny a znaty bywši spěwar ćělesa Pawoł Šołta. Jim su dźensa na zarjadowanju bywšich ansamblowcow na žurli SLA čestne wopismo přepodali.

Mjeno za jězor wobzamknjene

Katolscy wěriwi swjeća dźensa swjaty dźeń Božeho ćěła. Po dopołdnišich kemšach a na nyšporje ćehnjechu woni w procesionach a pod přewodom dujerjow k wonkownym wołtarkam. Na čole kročachu po zwučenym wašnju družki, kaž tule w Chrósćicach. Wjele dalšich holcow a žonow je so serbsku swjedźensku drastu ­woblekło. (Hlej tež na 4. stronu.) Foto: SN/Maćij Bulank

LEAG: Zakonske postajenja přiwšěm dodźeržene

Trjebin (AK/SN). Brunicowa jama Wochozy I je so Trjebinej a Miłorazej hač na 2,1 kilometer bližiła. Po wšěm zdaću w lěće 2020 wona Trjebin docpěje. Hač do lěta 2030 budźe poćeženje přez haru a proch tak sylne kaž w Běłej Wodźe. Tole rjekny zamołwity za škit před imisiju pola LEAG Jens Höhna na wčerawšej woby­dlerskej zhromadźiznje w Trjebinje. „Dodźeržimy předpisane hranicy“, rozłoži wón wuslědki lońšich měrjenjow. Berlinska firma je w Trjebinje lětny přerězk 38,2 decibelow naměriła, w Miłorazu 32,2 decibelow. Po słowach Jensa Höhny spyta LEAG harje zadźěwać. Při wuwo­z­nych mostach su róle pasow wuměnili, dalše dźěle při bagrach. W času wot 21 do 6 hodź. wěste připrawy scyła njedźěłaja, Höhna podšmórny.

Budyšin (SN/at). Planowana idejowa konferenca Budyskeje měšćanskeje rady wo němsko-serbskej zhromadnosći nabywa wobsahowych konturow. Wo tym je dr. Susanne Hozyna, předsydka dźěłoweho kruha za serbske naležnosće města Budyšina, wčera na druhim lětušim posedźenju gremija informowała.

Zarjadowanje w prěnim kwartalu 2018 wopřijima impulsowy referat a na njón zepěracu so idejowu konferencu. Za to je dr. Hozyna na mjeńšinowym polu dosć nazhoniteho referenta zdobyła: Thede Boysena, nawodu projektoweje skupiny zapadny přibrjóh w ministerstwje za hospodarstwo, dźěło, wobchad a technologiju Schleswigsko-Holsteinskeje. Boysen je w Serbach znaty jako prěni nawoda mjeńšinoweho sekretariata w zwjazkowym ministerstwje nutřkowneho a takrjec předchadnik Judith Wałdźic.

Miłoćicy (SN/CoR). Po wutornym posedźenju towarstwa Kamjenjak so kontury lětušeje 11. mjezynarodneje wuměłskeje dźěłarnički w Miłočanskej skale pomału pokazuja. Wona wotměje so w kooperaciji z Njebjelčanskej gmejnu wot 21. awgusta do 3. septembra. Dwaceći požadanjow su dóstali, sydom wuměłcow su dotal wu­zwolili: Italčanku, Ukrainjana a pjeć Čechow. „Tři městna su hišće wotewrjene, a wočakujemy tež wobdźělnikow z našeho regiona“, praji zastupowacy předsyda towarstwa Tomaš Nowak z Njebjelčic. „Změjemy hižo znatych rězbarjow a kamjenjećesarjow kaž tež nowych. Wjeselimy so, zo tež twórc Njebjelčanskeho pomnika ‚Płomjo a sylzy, nadźija a ćerpjenje – Nadja‘ Robert Alger zaso pódla budźe.“

Z wulkimi kročelemi bliža so na terenje Čornochołmčanskeho Čorneho młyna prěnjemu předstajenju lětušich Krabatowych swjedźenskich hrow 21. junija, kotrež so mjeztym w šestym nakładźe wotměja.

Wojerecy/Čorny Chołmc (UH/SN). „Wot 29. meje naši profesionalni dźiwadźelnicy, lajkojo a statisća zwučuja. Tež technikarjo su hižo na městnje, zo bychu mikrofony, zwuk a swěcu rjadowali. Pilna při dźěle je tež zaso Heidemarja Listowa, naša swěrna duša a fachowča za serbsku narodnu drastu. Na jeje pilnosć móžemy so hižo wot spočatka spušćeć kaž tež na njesprócniwosć mnohich wjesnjanow za kulisami“, chwaleše intendant swjedźenskich dnjow Peter Siebecke na nowinarskej konferency.

Na barokowej žurli statneje kenclije w Erfurće je durinski ministerski prezident Bodo Ramelow (Lěwica; srjedźa) wčera wšitkich 102 lětušeju durinskeju lawretow zwjazkoweho wubědźowanja „Młodźina hudźi“ witał. Mjez nimi bě tež Matteo Hórnik z Měrkowa (2. wotprawa), kiž je sej w finalu w Paderbornje na klasiskej gitarje 1. městno wubědźił. Wot lońšeho septembra je 13lětny Serb šuler Weimarskeho hudźbneho gymnazija Belvedere a je tak Durinsku zastupował. Foto: Jan Hórnik

Berlin (SN). Po kritice ze stron serbskich cyłkow (SN rozprawjachu) na plakat AfD za wólbny bój zwjazkoweho sejma, hdźež je žona w delnjoserbskej drasće widźeć, je strona nětko ze stejišćom na zjawnu diskusiju reagowała. Wona wotpokazuje wumjetowanje syće młodych sorabistow, zo instrumentalizuje narodnu drastu. „Plakat tež pawšalnje přećiwo zapućowarjam njepolemizuje, kaž so twjerdźi“, komentuje zwjazkowa rěčnica AfD Frauke Petry wuprajenje předsydy Domowiny Dawida Statnika we wčerawšim wudaću nowiny SZ. „Cyle hinak, tón skedźbni na to, kak sej swójske tradicije a mnohotnosć w našim kraju wažimy. (...) Chcemy pak na strach pokazać, zo so někajka nabožna kultura pod płašćikom ‚pisanosće‘ rozšěrja, ale pódla sebje žanu ‚pisanu mnohotnosć njeakceptuje‘“, Petry wuwjedźe. Dale w zdźělence rěka, zo je AfD „za přeća runje serbskeje mjeńšiny přeco wotewrjene wucho měła“. Strona skedźbnja na to, zo su­ lěta 2014 samo wólbne plakaty w serbskej rěči měli, dokelž rozumja, „kak ma mjeńšina wojować. Tohodla so za to zasadźamy, zo nadobo sami mjeńšina w swójskim kraju njebudźemy.“

Bonn (dpa/SN). Nowa doba za wužiwarjow mobilneho telefona: Wot dźensnišeho po wšej Europskej uniji hižo žane přidatne kóšty při telefonowanju do druhich krajow EU njenastanu. Dotal běchu sej we wukraju zdźěla chětro wysoke popłatki za daleposrědkowanje telefonatow žadali. Ze šmórnjenjom dwělomnych popłatkow so lěta trajacy bój přećiwo přewysokim kóštam skónči.

Na prašenja wotmołwjał

Moskwa (dpa/SN). Ruski prezident Wladimir Putin je dźensa na prašenja ludźi wotmołwjał. W kóždolětnje wotměwacej so originalnej telewizijnej show „Direktny zwisk“ wěnowaše so šef Krjemla prašenjam wobydlerjow k hospodarskim problemam runje tak kaž poměrej Ruskeje k zapadej abo prezidentskim wólbam 2018. Ludźo móžachu minjeny čas swoje prašenja telefonisce abo internetnje zapodać. Tajke zarjadowanje wotměwaja w Ruskej wot lěta 2001.

USA předadźa Katarej brónje