Z wudaća: pjatk, 16 junija 2017

Wot připołdnišich zliwkow njejstaj so Tomaš Matka a Chrystof Bjarš (wotlěwa) wobwliwować dałoj, jako natwarještaj zwukowu techniku za Smochčanski hudźbny swjedźeń na arealu Doma biskopa Bena. Tam su dźensa a jutře wječor „Berlinske nocy“ dožiwić, kotrež wuhotuja orchester, balet a chór Serbskeho ludoweho ansambla a Jelenjogórska filharmonija. Foto: SN/Maćij Bulank

Janek Wowčer

Hižo často słyšach, zo měli we Łužicy k tomu dóńć, serbšćinu samozrozumliwje wužiwać. Mnozy žadanje tež w zjawnosći zastupuja, ličba konkretnych skutkow pak wosta stajnje skerje přewidna.

Serbski institut kruće do wukubłanja nowowučerjow zapřijaty

Budyšin (SN/CoR). Serbski institut je kruće zapřijaty do koncepta za jednolětne wuwučowanje serbšćiny we wobłuku projekta noweje serbskeje rěčneje šule. Prěni intensiwny kurs ma so po słowach zapósłanca Sakskeho krajneho sejma Marka Šimana (CDU) wot 1. awgusta 2017 sem přewjesć (SN rozprawjachu). Koncepcija, kotruž ma Sakski kubłanski institut (SBI) w nadawku Sakskeho statneho ministerstwa za kultus (SMK) na starosći, měri so na dostudowanych wučerjow z wukraja, kotřiž chcedźa přichodnje na dwurěčnych šulach Hornjeje Łužicy serbšćinu wuwučować. Zamołwići su rozsudźili, zo kompetenca, wotpowědne intensiwne kubłanje přewjesć, njeleži pola Lipšćanskeho instituta za sorabistiku, ale pola Serbskeho instituta (SI) w Budyšinje. Naćisk intensiwneho kursa bazuje na dotalnych nazhonjenjach SI we wobłuku lětnjeho kursa za serbsku rěč a kulturu (ferialneho kursa), w kotrymž su wot 1990tych lět předewšěm studentow a akademikarjow z wukraja w běhu někotrych (mjeztym dweju) tydźenjow w serbšćinje dalekubłali.

Budyšin (SN/JaW). Zapósłanc Sakskeho krajneho sejma Marko Šiman (CDU) je składnostnje 25. róčnicy schwalenja wustawy Sakskeje brošurku wudał. W njej dopominaja so bywši a tuchwilni zapósłancy a dalše wuznamne wosobiny na wutworjenje wustawy w swobodnym staće, mjez nimi Benedikt Dyrlich a Stanisław Tilich. Wosebitosć stostronskeje knižki, kotruž je Šiman bjez spěchowanja wudał, je historiska hymna Sakskeje a jeje serbski wotpowědnik, Handrija Zejlerjowy „Wótčinski spěw“.

Kolegojo pózdnjeje słužby Budyskeho stejnišća koncerna Bombardier dožiwichu wčera w přitomnosći zwjazkoweje a sakskeje politiskeje prominency połoženje zakładneho kamjenja.

Budyšin (CS/SN). Zwjazkowa hospodarska ministerka Brigitte Zypries, sakski hospodarski minister Martin Dulig (wobaj SPD), serbska zapósłanča zwjazkoweho sejma Marja Michałkowa (CDU), Budyski wyši měšćanosta Alexander Ahrens (SPD) a serbski zapósłanc Sakskeho krajneho sejma Marko Šiman (CDU) su wčera zhomadnje symboliski akt – połoženje zakładneho kamjenja noweje produkciskeje hale w Budyskim stejnišću Bombardier – přewjedli. Wosom milionow eurow inwestuje kanadiske předewzaće do nowotwara, kotrež budźe na městnje bywšeje hale O z 1930tych lět stać. Stary fundament, kotryž běchu rozbili, twori nětko zakładnu worštu noweje 8 100 kwadratnych metrow wulkeje produkciskeje hale. Dźěry za stołpy su hižo při­hotowane.

Budyšin (SN/at). Łužiska ćišćernja w Budyšinje je insolwencu přizjewiła, dokelž hrožeše njekmanosć płaćenja. Drježdźanske hamtske sudnistwo je wutoru, 13. junija, próstwje předewzaća wo samozarjadowane insolwencne jednanje wotpowědowało a zdobom wupruwowaneho fachowca za saněrowanje firmow, prawiznika dr. Martina Dietricha, za społnomócnjeneho powołało. Jednaćelstwo je sobudźěłaćerjow wčera wo połoženju informowało. Produkcija běži dale. Tež Serbske Nowiny dale tam ćišća. Mzdu płaća přistajenym a sobudźěłarjam přichodne tři měsacy z insolwencnych pjenjez Zwjazkoweje agentury za dźěło.

Wobstejacych nadkapacitow dla je so Łužiska ćišćernja krótkodobnje do financnych ćežow dóstała. Za zwoprawdźenje saněrowanskeje koncepcije pak trjebaja wjace časa, rjekny jednaćel Robert Czyzowski. Tohodla je jednaćelstwo minjene tydźenje intensiwnje z wěrićelemi a wulkokupcami rěčało. Tući pak mějachu rozdźělne měnjenja, tak zo hrožeše njekmanosć płaćenja. Wupuć bě, po konsultaciji fachowcow zapodać próstwu, saněrowanje w swójskej režiji přewjesć.