We wobłuku XII. mjezynarodneho folklorneho festiwala we Łužicy wotmě so sobotu, 24. junija, kolokwij „Integracija mjeńšin w polu napjatosćow wuchowanja kulturneje identity“ w Chróšćanskej „Jednoće“. Přeprošeni běchu zastupjerjo na festiwalu wustupowacych skupin kaž tež kulturni wědomostnicy, studenća a žurnalisća.
Tež delanscy Sokoljo su lětsa zaso swoju sportowu wuměnu z wukrajnymi sportowčemi a sportowcami přewjedli. Bě to mjeztym 52. serbsko-čěska wuměna mjez Sokołom Ralbicy/Hórki a TJ Sokolom Spálené Poříčí.
Nimale połsta hosći móžachu w Ralbicach witać. Čěscy a serbscy sportowcy wobhladachu sej nazajtra zhromadnje Budyšin, hdźež mějachu hosćo wodźenje w čěskej rěči, štož so jara lubješe.
Obligatoriska kopańca wězo tež zaso bě, a to na wulkim polu, byrnjež hosćićelske mustwo ćeže ze zestawu měło. Samo Enrico Krawc (něhdyši hrajer Sokoła Ralbicy/Hórki a Budissy Budyšin) z Eisenberga dyrbješe kopački šnórować, zo by dźesać Ralbičanow přećiwo jědnaće koparjam ze Spáleneho Poříčí nastupić móhło. Prěnje a druhe mustwo Sokoła dyrbještej mjenujcy hišće winowatostnej hrě přewjesć. Hosćo, kotřiž běchu wo klasu lěpši, partiju z 1:0 dobychu.
Wosebje rjenje lětsa bě, zo móžachu so słowjanscy susodźa prěni raz na folklornym festiwalu w Chrósćicach wobdźělić. Tam zetkachu tež zastupjerjow čěskeje narodneje mjeńšiny z Chorwatskeje.
W swojej lětušej dowolowej seriji předstajamy wosoby, kotrež na někajkežkuli wašnje stawizny zachowuja, zo starožitnosće zběraja a je zdźěla zjawnosći spřistupnjeja.
Wojerecy (AK/SN). Pacientam z kóžnym rakom chce Wojerowski jězorinowy klinikum přichodnje hišće wobšěrniši poskitk hojenja a hladanja poskićeć. „Chcemy swój dermatologiski a alergologiski wotrjad dale wuwić a so na tymle polu z ćežišćowym zastaraćelom stać“, potwjerdźi jednaćel klinikuma Jörg Scharfenberg na njedawnej nowinarskej rozmołwje. Dobre sto dnjow nowy šeflěkar dr. Kim Christian Heronimus wobłuk dermatologije a alergologije nawjeduje. 39lětny rodźeny Berlinjan bě hač do lěta 2006 fachowy lěkar w stolicy a hač do 2014 zastupowacy šeflěkar w Zwickauwje. „We Wojerecach mam dobry team, dobre dźěłowe wuměnjenja a prawu wokolinu“, wón rozłoži. Jeho mandźelska móže jako neurologowka tohorunja w klinikumje dźěłać.
Kulow (AK/SN). Pomnik za padłych Prěnjeje swětoweje wójny w Kulowje měło město přichodne měsacy ponowić dać, namołwješe měšćanosta Markus Posch (CDU) na zašłym posedźenju měšćanskeje rady. „Loni je so poradźiło, ze srědkami hladaćelstwa němskich wójnskich rowow wopomnišćo za padłych sowjetskich wojakow Druheje swětoweje wójny při Kamjenskej dróze saněrować. To nas jara zwjesela.
Porno tomu pak je pomnik za padłych Prěnjeje swětoweje wójny hnydom napřećo w jara špatnym stawje. Jako město dyrbimy tole po móžnosći bórze změnić“, Posch podšmórny. Klětu budźe tomu sto lět, zo je so Prěnja swětowa wójna skónčiła. „Smy hižo wo darowanskej akciji rozmyslowali“, rozłoži měšćanosta. Snano móhli pomnik z pomocu spěchowanja Europskeje unije přez program Leader ponowić. Za to chcedźa nětko bórze wotpowědnu próstwu zapodać, na kotruž dóstanu nadźijomnje pozitiwnu wotmołwu. Jeli nic, chcedźa naprawu potom tola z darami financować.
Paduši pola frizera
Budyšin. Po wšěm zdaću měrja so paduši w Budyšinje přiběrajcy na frizerske wobchody. W juniju a juliju dóńdźe dotal k šěsć tajkim zadobywanjam, při kotrychž je zdźěla tójšto wěcneje škody nastało. Najbóle drastiski pad sta so minjeny kónc tydźenja při tachantskej cyrkwi. Z tamnišeho frizerskeho wobchoda pokradnychu njeznaći wjacore nožicy, tabletowy kompjuter marki Asus kaž tež pjenjezy z kasy. Mějićelka wobliči škodu na 2 500 eurow. Nimo toho nasta wěcna škoda na durjach a woknach.
13.7.2017–19.7.2017 Budyski filmowy palast: Spider-Man: Homecoming: wšědnje 14:15 Spider-Man: Homecoming w 3 D: wšědnje 17:00 a 19:30 | pj a so 22:30 Transformers: The Last Night: pj, so, nj a srj19:30 | so 22:30 Das Pubertier: wšědnje 15:00 (nimo pó), 18:30 a 20:30 (nimo nj) Ich – Einfach unverbesserlich: wšědnje 14:00 a 16:15 Ich – Einfach unverbesserlich w 3 D: wšědnje 15:00, 17:15 a 20:00 | nj, wu a srj 12:45 | pj a so 22:15 Baywatch: nj, wu a srj 12:30 | pj 22:30 The Boss Baby: wu a srj 10:30 | nj, wu a srj 12:15 Gregs Tagebuch – Böse Falle: wu a srj 10:15 | pj, so, nj a wu 17:15 Bob der Baumeister – Das Mega Team: nj, wu a srj 12:15 Girls’ Night Out: štw a srj 17:15 | pj 22:30 Pirates of the Caribbean: Salazars Rache: štw a wu 19:30 | nj 20:30 | so 22:30 Überflieger – Kleine Vögel, großes Geklapper: wu a srj 10:00 Hanni&Nanni – Mehr als beste Freunde: wu a srj 10:15
Kino-ekstra: A United Kingdom: pó 14:30, 17:15 a 20:15
Přednošk ministra přepołožić
Drježdźany. TU w Drježdźanach chce wustup zwjazkoweho justicneho ministra Heika Maasa (SPD) přichodnu póndźelu přepołožić. Poprawom chcyše Maas w słyšenskim šulskim centrumje wo šćuwańcy w interneće přednošować. Před Drježdźanskej uniwersitu pak chcetej AfD a Pegida přećiwo Maasej demonstrować. Runočasnje wotměja so na TU pruwowanja.
Za wyšu mzdu stawkowali
Lipsk. Sobudźěłaćerjo drobneho wikowanja Sakskeje a Durinskeje su dźensa znowa stawkowali. W Drježdźanach złožichu přistajeni předewzaćow Obi, H&M, Esprit, Kaufland a Ikea dźěło, zo bychu swoje žadanje za šěsćprocentowskim zwyšenjom mzdow potwjerdźili. Dźěłodawarjo poskićeja dotal 2,5 procentow.
Kóždy štwórty jaty wuknje
Drježdźany. Kóždy štwórty zasudźeny skućićel wužiwa čas w jastwje za kubłanje a kwalifikowanje. Po informacijach sakskeho justicneho ministerstwa bě w juniju 782 z cyłkownje 2 919 jatych w šulskim abo powołanskim wukubłanju. Tendenca pak woteběra. Kaž minister Sebastian Gemko (CDU) zdźěli, je kubłanski niwow jatych dźeń a snadniši.