Z wudaća: srjeda, 09 awgusta 2017

Swój złoty kwas woswjećištaj wčera znaty braška Pawoł Kindermann a jeho mandźelska Hana (srjedźa). Po kemšach podaštaj so ze swójbnymi a z brašku Hawštynom Smołu (naprawo) na hosćinu do Lejna. Nestor serbskich braškow, kiž je dohromady na něhdźe 900 kwasach brašćił, je k tomu tohorunja wšitkich tuchwilnych serbskich braškow přeprosył. Foto: SN/Maćij Bulank

wozjewjene w: Łužica
srjeda, 09 awgusta 2017 14:00

Z mało pjenjezami zbožowny być

Kulow (AK/SN). Koncern VW njebudźe Kulowsku załožbu Mrs. Nikovich financnje podpěrać. Tole zdźěli měšćanosta Markus Posch (CDU) radźićelam Kulowa na zašłym posedźenju.

Kaž Posch informowaše, bě na namjet, spěchować załožbu, kotraž so hižo njeličomne lěta na polu dźěćaceho a młodźinskeho dźěła angažuje, ze stron VW jenož powšitkownu a formalnu wotmołwu dóstał. W njej připóznawa koncern skutkowanje załožby a wupraja česćownosć za angažement. VW pak, tak w lisće rěka, wostanje při hižo wobstejacych kooperacijach. Za darowanje dalšim institucijam njewidźi awtotarc žane móžnosće. Markus Posch komentowaše to z jednorym „škoda“ a z posměwkom. „To móhła rjana stawizna być.“

wozjewjene w: Łužica
srjeda, 09 awgusta 2017 14:00

Pokiwy (09.08.17)

Radźićeljo so zetkaja

Hórki. Diskusija wo hłownych wustawkach Chróšćanskeje gmejny budźe jedna z temow posedźenja tamnišeje gmejnskeje rady jutře, štwórtk, we 18.30 hodź. w socialnym domje při Hórčanskej skale. Dale chcedźa radźićeljo wobzamknyć njeplanowane wudawki za nakup komunalneho jězdźidła typa Multicar.

Wotrow. Tohorunja jutře, ale w 19 hodź., zetka so gmejnska rada Pančicy-Kukow, a to we Wotrowskej starej šuli. Nimo twarskich naležnosćow zaběraja so tam znowa ze swojim woponom. W tym zwisku­ je předwidźane, wobzamknjenje z jednoho ze zašłych posedźenjow zběhnyć­ a wopon znowa wobzamknyć. Dale póńdźe wo dróhotwarske dźěła na Kimbarku w Pančicach-Kukowje. Wobě posedźeni radźićelow stej zjawnej a zajimcy tuž přeprošeni.

Přednošuje wo romantice

Budyšin. Wuměłstwowa historikarka Ophelia Rehor přednošuje jutře, štwórtk, w Budyskim muzeju na temu „Romantika – Dohlad do molerstwa“. Předewšěm póńdźe wo to, kak molerjo z přirodu swoje začuća wotbłyšćowachu.

Wustajitaj w galeriji

wozjewjene w: Pokiwy
srjeda, 09 awgusta 2017 14:00

Policija (09.08.17)

Awto manipulowali

Wulke Ždźary. Štož su njeznaći minjeny kónc tydźenja we Wulkich Ždźarach skućili, by w najhóršim padźe złe sćěhi měć móhło. Při wosobowym awće typa VW běchu woni šruby kolesow trochu wot­šrubowali. Jako 54lětna wobsedźerka k swojemu awtej přińdźe, pak tole njepytny a wotjědźe. Při tym so prědnje lěwe koleso z wóski suny. Na zbožo so při tym nichtó njezrani. Policija přepytuje nětko strašneho zasahnjenja do nadróžneho wobchada dla.

wozjewjene w: Policija
srjeda, 09 awgusta 2017 14:00

Spěchowanje načinja tež ćeže

Njeswačanska gmejnska rada wustawki za hospodarski plan schwaliła

Njeswačidło (JK/SN). Přezjednosć na dobro gmejny a jeje wobydlerjow demonstrowachu na wčerawšim posedźenju Njeswačanskeje gmejnskeje rady wšitcy radźićeljo. Jednohłósnje wobzamknychu wustawki za lětuši hospodarski plan. Po tym­ zo bě komornica Liliana Wetzko hišće raz njawažniše pozicije hospodarskeho plana rozjimała, wjesnjanosta Gerd Schuster (CDU) wuzběhny, zo su w gmejnje najebać napjate financne połoženje­ tójšto na dobro wobydlerjow a wjeskow zwoprawdźili. Wosebje w hrodowym parku a wokoło hrodu su w minjenych měsacach pilnje dźěłali a škody wulkeje wody z lěta 2013 wotstronili. Spěchowanske srědki za tele naprawy buchu w minjenym času wospjet zwyšene, tak zo móžeše gmejna z přidatnymi pjenjezami tež tu abo tamnu dalšu naležnosć zrjadować. Spěchowanske srědki wšak žadaja sej wosebje wot přistajenych gmejnskeho zarjada wosebite napinanje, dokelž maja je jara dokładnje planować a wotličić. Byrnjež spěchowanje wězo witane było, mějachu jeho dla ćeže, wurunany etat nastajić.

wozjewjene w: Łužica
srjeda, 09 awgusta 2017 14:00

Wosrjedź wsy awto znak ležało

Njeměrne popołdnjo mějachu wčera w Pěskecach. Krótko po 17 hodź. je so tam na křižowanišću wosrjedź wsy wobchadne njezbožo stało, kotrež skićeše wobydlerjam runjewon spektakularny napohlad. Njewobkedźbowanja předjězby dla stej tam wosobowej awće do so zrazyłoj, při čimž jedne z njeju na boku ležo wosta. Jedna wosoba so zrani, wo nju staraše so wuchowanska słužba. Tež Pěskečanskich wohnjowych wobornikow k njezbožu wołachu, zo bychu wuběžane ćěriło wotstronili a puć połojčnje zaraćili. Kameradojo wšak mějachu krótki puć, wšako je jich gratownja hnydom wokoło róžka. Foto: Jonny Linke

wozjewjene w: Łužica
srjeda, 09 awgusta 2017 14:00

Słowakska serbskich fanow folklory witała

Skupina 38 ludźi wokoło organizatorow Volkmara a Britty Šołćic poda so minjeny pjatk rano zahe do směra na Słowaksku. Tam wopytachu folklorny festiwal „Jánošíkove dni“ w Terchovej. Hižo při přijězdźe pokaza so krajina w cyłej swojej rjanosći. Podarmo njerěka, zo su gmejna Terchová w sewjerozapadnym dźělu Słowakskeje zastupne wrota k najkrasnišim blečkam narodneho parka Malá Fatra. Na woběmaj bokomaj puća wuhladachmy wulkotnu krajinu. Prjedy pak hač hotel w Žilinje docpěchmy, wobhladachmy sej hród Orava. Srjedźowěkowski hród steji na nahłej skaliznje 112 metrow nad rěku Orava. Krasny bě wottam wuhlad a wodźenje po nim zajimawe.

wozjewjene w: Serbski powěstnik
srjeda, 09 awgusta 2017 14:00

Tež w Nowej Wjesce rejwansku skupinu měli

Nimale před 60 lětami bu w Nowej Wjesce­ serbska rejwanska skupina załožena.­ Wo njej pak dźensa jenož mało­ ludźi wě. Składnostnje 400. róčnicy wobstaća wsy je sobuzałožer a bywši rejwar skupiny Měrćin Wagner z Radwo­rja swoje dopomnjenki na 15 stronach znosył a je tež w swojej ródnej wsy Nowej Wjesce na njedawnym swjedźenju­ předstajił. Rady přiwozmje Radworčan dalše wudospołnjenja. Serbske Nowiny dokumentuja tule někotre­ dopomnjenki Wagnera na Nowowješćansku rejwansku skupinu.

1956 wotmě so w Budyšinje Druhi zjězd Serbow, na kotrymž bu tež nowy Serbski dom na Budyskim Póstowym naměsće poswjećeny. Za swjedźeń běchu masowe sceny nazwučowali, kotrež po přikładźe Praskich spartakiadow na Młynkec łuce z wjele stami wobdźělnikami předstajichu. Mjez nimi bě scena šulerjow, na kotrejž sym so jako šuler 7. lětnika Worklečanskeje šule wobdźělił. Na dalšej scenje wšeje serbskeje młodźiny wobdźělichu so tež młodostni z Noweje Wjeski.

Wot myslički k woprawdźitosći

wozjewjene w: Towarstwa
srjeda, 09 awgusta 2017 14:00

Snadna poražka

ST 1910 Drohotka Ramnow – ST Marijina hwězda 2:1 (1:0)

Zestawa hosći: O. Schmidt (46. Matik) – Wróbl, Škoda, K. Pakoßnick, Hawš, Pesch­mann (46. P. Schmidt), Eldor, Šołta, Hübner, J. Pakoßnick, Čornak

Při poslednim tesće w přihotach na nowu hrajnu dobu je koparske mustwo sportoweho towarstwa Marijina hwězda najebać mało hrajerjow jenož snadnje pola klasu wyše hrajaceje Drohotki Ramnow z 1:2 přěhrała. Wobě mustwje prócowaštej so wot wšeho spočatka wo wysoke tempo. Přez sylny pressing wudobychu sej Ramnowscy koparjo w centrumje bul a šaltowachu chětro spěšnje. Z wobhladanjahódnej třělwu ze zdalenosće 14 metrow poradźi so Friedrich-Philippej Wazinskemu 1:0. W druhim połčasu nastachu potom wo wjele wjace šansow na woběmaj stronomaj. Wo 2:0 postara so Tobias Berthold, kotryž dwubój w po­wětře doby a hrajny nastroj do wrotow zhłójčkowa. 2:1 (75.) nasta po stacijach Falko Peschmann – Richard Hawš – Jakob Pakoßnick – Falko Peschmann.

Tobias Nowak

wozjewjene w: Sport
srjeda, 09 awgusta 2017 14:00

Wuslědki (09.08.17)

Kopańca – krajne pokalne koło

Hartmannsdorfske ST – Trjebin 2:0 (1:0)

Freiberg – N. M. nad Sprjewju 3:2 (1:0)

Horni kraj-Sprjewja – Weinböhla 1:3 (1:1) po. pod.

wozjewjene w: Wuslědki

Serbska debata

nowostki LND