Z wudaća: srjeda, 16 awgusta 2017

Chróšćanska Hórnikowa je tuchwilu zawrjena. Přičina su twarske dźěła na městnje, kotrež bě so minjene dny poměrnje spěšnje wužłobiło. Při přepytowanju zwěsćichu, zo bě kanal za dešćikowu wodu skóncowany, tak zo bu zemja kołowokoło njeho wupłokana­. Nětko tam skóncowane městno porjedźeja. Dróha wostanje hač do 23. awgusta zawrjena. Foto: Feliks Haza

wozjewjene w: Łužica
srjeda, 16 awgusta 2017 14:00

Wo puće so zhromadnje starać

Njeswačidło (JK/SN). Na zašłym posedźenju Njeswačanskeje gmejnskeje rady skedźbni radźićel Frank Haidan na dezolatny staw puća, wjeduceho z Króńcy do směra na Bóščansku deponiju. Mjenowany puć wužiwa mjez druhim tež Zarěčanske agrarne drustwo. Z ćežkimi mašinami dyrbja ratarjo wězo tež někak na pola přińć. Za to wužiwaja zjawne dróhi a puće. Často njemóža traktory a druhe ratarske mašiny srjedź puća jěć a wužiwaja kromy pućow. Zo te to dołho njewudźerža, je jasne, wšako njejsu tež za tony ćežke mašiny twarjene. Na te wašnje so přirowy podłu dróhi počasu pomjeńšeja a skónčnje dospołnje zhubja. Tak hižo njeje móžno, zo při sylnych dešćach woda z pućow a polow po hrjebi wotběži. Přepławjene dróhi, womazane z pjeršću z polow, su sćěh toho.

Njeswačanscy gmejnscy radźićeljo su sej tuž přezjedni, wobroćić so na wjednistwo ratarskeho zawoda a sej dorěčeć, w kotrej měrje móhli nazymsku ratarsku přestawku za to wužić znajmjeńša přirowy zaso do tajkeho stawa přinjesć, zo wodu wot polow a pućow wotwjedu. Tak mjenowane bankety (kromy) dróhow skrućić by dalši wažny krok był.

wozjewjene w: Łužica
srjeda, 16 awgusta 2017 14:00

Paliatiwna stacija nastawa

Za 1,3 miliony eurow ma we Wojerowskim jězorinowym klinikumje stacija za paliatiwnu medicinu nastać. Spěchowansku zdźělenku we wobjimje 1,4 milionow­ eurow je sakska socialna ministerka­ Barbara Klepsch (CDU) tele dny přepodała.

Wojerecy (AK/SN). Nowu staciju za paliatiwnu medicinu wutworja w poslednim hišće njesaněrowanym, 400 kwadratnych metrow wulkim wobłuku jězorinoweho klinikuma. K tomu słušeć maja meblěrowane stwy, terapijowe rumnosće, dźěłowy wobłuk za lěkarjow a přebywanišćo za pacientow a přiwuznych, rozłoži jednaćel klinikuma Jörg Scharfenberg. Wot lěta 2013 paliatiwna stacija eksistuje, je pak prowizorisce zaměstnjena, praji šeflěkarka Michaela Stöckel.

wozjewjene w: Socialne
srjeda, 16 awgusta 2017 14:00

Zbrunjenju wody zadźěwać

LMBV saněruje wjacore jězory we Łazowskej gmejnje

Łaz (AK/SN). Južny přibrjóh Třižonjanskeho jězora blisko tamnišeje škleńčaneje pyramidy ma so klětu za kupanje wužiwać hodźeć. Tole wobkrući nawoda projektoweho managementa Łužiskeje a srjedźoněmskeje towaršnosće hórnistwoweho zarjadnistwa (LMBV) Gerd Richter na wčerawšim posedźenju Łazowskeje gmejnskeje rady. Nimo toho chcedźa tři naprawy přećiwo zbrunjenju wody nałožić. Tak instaluja drenažowy system, połoža wosebitu planu do zemje a nasypaja na přibrjohu wapnowy šoter.

Dalša naprawa je, při sewjernym při- brjohu 200 metrow dołhu nahłu skalnu sćěnu zawěsćić. To ma so po móžnosći lětsa w oktobru stać, paralelnje k naprawam na južnym přibrjohu. Za to zniža pegel wody Třižonjanskeho jězora, zo móhli bjez zadźěwkow dźěłać.

wozjewjene w: Łužica
srjeda, 16 awgusta 2017 14:00

Pomhaja na diabetes schorjenym

Kamjenc (BG/SN). Na dźeń wotewrjenych duri běchu minjenu njedźelu čłonojo Iniciatiwy dźěći z Černobyla do swojeho domicila na Kamjenskej Fichtowej přeprosyli. Wot lěta 1990 přeproša Kamjenske towarstwo běłoruske dźěći z Budy Košeljowa na wočerstwjenski přebytk do Lessingoweho města. Nimo toho organizuja wottam kóžde lěto pomocne transporty do wuchoda. W Kamjenskim towarstwje je so nětko generacija pomocnikow změniła. A Černobylske dźěći prěnich lět su mjeztym sami dorosćeni a starši.

wozjewjene w: Socialne
srjeda, 16 awgusta 2017 14:00

Pokiwy (16.08.17)

Městna swobodne

Ralbicy. Drastu sej šić nawuknyć móža zajimowane holcy we wobłuku dźěłarnički ze Steffi Hanušowej pjatk a sobotu na Ralbičanskej starej šuli. Za to su hišće někotre městna swobodne. Zajimče njech­ přizjewja so pola kubłanskeje referentki Domowiny Rejzki Krügeroweje pod telefonowym čisłom 0152/ 3624 1635 abo e-mailnje pod adresu ­t.krüger @sorben.com. Wobdźělniče zetkaja so pjatk, 18. awgusta, w 16 hodź.

Namjety zapodać

Wojerecy. Za wosebity čestnohamtski angažement spožča město Wojerecy kóždej­ dwě lěće Čestnu jehłu Güntera Petersa. Wobydlerjo kaž tež towarstwa móža­ namjetować, kotra wosobina abo kotre towarstwo měło wuznamjenjenje lětsa dóstać. Namjety z krótkim wo­podstatnjenjom přijimuja hač do kónca awgusta w běrowje wyšeho měšćanosty na Frentzelowej 1.

Płody a symjo měnjeć

wozjewjene w: Pokiwy
srjeda, 16 awgusta 2017 14:00

Policija (16.08.17)

Jězbu droho zapłaćił

Budyšin. Dokelž so póndźelu wječor młody muž w Budyšinje alkohola wzdać nochcyše, dyrbi nětko jězbu ze swojim BMWjom droho zapłaćić. 24lětneho běchu policisća na Wósporskej dróze zadźerželi, zo bychu jeho kontrolowali. A jim napadny „chorhojčka“ šofera. Na to přewjedźeny test wunjese, zo měješe 24lětny 0,78 promilow alkohola w kreji. Za tónle delikt změje wón nětko 500 eurow pokuty płaćić, dyrbi měsac bjez jězbneje dowolnosće wuńć a dóstanje nimo toho dwaj dypkaj w Flensburgu. Wot­powědnu zdźělenku jemu krajnoradny zarjad přichodne dny připósćele.

wozjewjene w: Policija
srjeda, 16 awgusta 2017 14:00

Ludźom njeje jasne, što z AfD wola

Rozmołwa ze zwjazkowej rěčnicu a sakskej načolnej kandidatku strony AfD dr. Frauke Petry

Strony hotuja so na wólby 19. němskeho zwjazkoweho sejma. Alternatiwa za Němsku (AfD) chce tam přichodnje prěni raz zastupjena być. Z jeje zwjazkowej rěčnicu a načolnej kandidatku na sakskej krajnej lisćinje dr. Frauke Petry je so Axel Arlt rozmołwjał.

Staćanstwo němske, narodnosć serbska, danska, friziska abo Sintow a Romow – je Wam to přećiwk?

F. Petry: Přećiwka při tym njeje. Smy jara za to, zo kulturna identita dale rólu hraje. Runje, hdyž rěčiš wo zachowanju kulturnych kubłow, da rěč, tež serbska tu w Sakskej a w Braniborskej, samozrozumliwje k tomu słuša. Wona ma so zachować, přetož domizniske začuće ludźi skónčnje wučinja.

Podpěruje AfD mjeńšinowopolitiske žadanja swojich čłonow, kotřiž sami tajkim mjeńšinam přisłušeja?

wozjewjene w: Kraj a swět
srjeda, 16 awgusta 2017 14:00

Njetrjebawša domjaca poražka

ST Marijina hwězda – ST Lubuš 1:3 (0:2)

Zestawa domjacych: O. Schmidt – Rab, Škoda (50. Lipič), K. Pakoßnick (89. Hübner), Hawš, Jurš, Kuring, Eldor, P. Schmidt, Prasse (78. Winkler), J. Pakoßnick

K prěnjej winowatostnej hrě noweje sezony wočakowachu koparjo ST Marijineje hwězdy mustwo z Lubuša. Wobě zastupnistwje běštej naposledk před dźesać lětami we wobwodnej klasy přećiwo sebi nastupiłoj.

wozjewjene w: Sport
srjeda, 16 awgusta 2017 14:00

Tabulka (16.08.17)

Wokrjesna koparska liga, stafla I

čoło tabulki

1. ST Traktor Malešecy  1 8 : 0 3

2. ST Porchow  1 5 : 1 3

3. SG Frankenthal  1 3 : 0 3

3. TSV Połčnica  1 3 : 0 3

3. TSV Wachau  1 3 : 0 3

6. Arnsdorfske KT   1 4 : 3 3

7. TSV Wjernarjecy  1 2 : 1 3

wokrjesna liga, stafla II

Łaz/Běły Chołmc – Wojerecy II2:2 (2:1)

ST Ćisk II – SJ Njebjelčicy 4:1 (1:0)

Łuty – Nowe Město II njepřizjewjene

ST Marijina hwězda – ST Lubuš 1:3 (0:2)

Němske Pazlicy – Zel.-běli Sepicy 6:0 (3:0)

SV Haselbachtal – SJ Chrósćicy II 3:0 (0:0)

Na. Hrabowka – Wulka Dubrawa 3:2 (2:1)

1. Natwar Němske Pazlicy   1  6:0 3

2. ST Ćisk II  1   4:1 3

3. SV Haselbachtal  1   3:0 3

4. ST Lubuš  1   3:1 3

5. ST Nadrózna Hrabowka  1   3:2 3

6. Wojerowski FC II  1   2:2 1

6. HZ Łaz/Běły Chołmc  1   2:2 1

8. FSV Łuty  0   0:0 0

8. Rakečanske ST II  0   0:0 0

8. LSV Nowe Město II  0    0:0 0

8. HZ Wulke Ždźary  0    0:0 0

12. ST 1896 Wulka Dubrawa  1   2:3 0

13. ST Marijina hwězda  1   1:3 0

14. SJ Njebjelčicy  1   1:4 0

15. SJ Chrósćicy II  1   0:3 0

16. ST Zeleno-běli Sepicy  1   0:6 0

wozjewjene w: Sport

Serbska debata

nowostki LND