Z wudaća: wutora, 22 awgusta 2017

Jedyn z wjerškow Kamjenskeje Boršće bě wčera tradicionalny wućah šulerkow a šulerjow z města na Boršć. Nimo njeličomnych kwětkowych wěncow kaž tež měšćanskich a šulskich chorhojow běchu w dołhim ćahu znowa tež serbske chorhoje widźeć. Jutře budźe na Boršći wulki wohnjostroj, štwórtk zaćahnu šulerjo zaso do wupyšeneho města. Foto: Feliks Haza

wozjewjene w: Łužica
wutora, 22 awgusta 2017 14:00

Mjezsobnosć je rozsudny faktor

Partnerstwa mjez komunami maja so z mnohostronskimi poskitkami a wobstajnje pěstować. Łužiskoserbske Njebjelčicy­ a čěske Heřmanice w Liberecskim­ kraju tole pokazuja.

wozjewjene w: Łužica
wutora, 22 awgusta 2017 14:00

Tučel młodych a starych zjednoćiła

Smječkecy (JK/SN). Wosadne žiwjenje we wulkej wosadźe, kotraž ćehnje so wot Halštrowa hač do Njeswačidła, měło pisane być kaž tučel. Tohodla běchu sej wěriwi­ ewangelsko-lutherskeje wosady Halštrow-Protecy-Smječkecy lětuši wosadny swjedźeń stajili pod hesło „tučel“. Zahajili běchu jón zawčerawšim, nje­dźelu, w Smječkečanskej cyrkwi z Božej słužbu, na kotrejž so tež katolscy wěriwi z wokoliny wobdźělichu. Hižo tam bě tučel směrnica, postajaca wobsah prědo­wanja a kěrluše.

Pozdźišo zetkachu so wopytowarjo swjedźenja před Smječkečanskim towarstwowym domom k zhromadnemu kofejpiću. Tykancy a přikuski běchu wěriwi wobdźělenych wosadow sobu přinjesli. Kantor René Jurisch spyta hosći ke kanonej pozbudźić, štož pak so jemu cyle tak njeporadźi. Na kemšach bě wón wjetši wuspěch měł a wosadnych k zhromadnemu spěwej pohnuć zamóhł.

wozjewjene w: Łužica
wutora, 22 awgusta 2017 14:00

Móža jěchanski teren kupić

Wjacore komuny wutworja zhromadne škričkowanišćo

Kubšicy (CS/SN). Bošečanske jěchanske towarstwo móže nětko teren swojeje jěchanskeje připrawy kupić. Móžno je tole z přiražku, kotruž je Kubšiska gmejnska rada na swojim zašłym posedźenju wobzamknyła. Towarstwo bě hakle njedawno přewšo wuspěšny turněr organizowało. Połdra hektara wulki areal, hdźež předewšěm dźěći a młodostni jěchać zwučuja, je towarstwo dotal wotnajało. Nětko maja składnosć, teren kupić. Za to su gmejnu wo přiražku prosyli. Hladajo na nadregionalny wuznam kóždolětneho jěchanskeho turněra gmejnscy radźićeljo njeplanowanu přiražku 15 000 eurow jednohłósnje přizwolichu. Po słowach Kubšiskeho wjesnjanosty Olafa Reicherta (njestronjan) su wudawki z přidatnymi dochodami, kotrež z přemysłoweho dawka wočakuja, zaručene.

wozjewjene w: Łužica
wutora, 22 awgusta 2017 14:00

Poskitkaj ke kóncej wosebiteje wustajeńcy

Budyšin. Krótko do zakónčenja wustajeńcy „Pjeć lětstotkow – Serbja a reformacija“ maja w Budyskim Serbskim muzeju wosebitej poskitkaj. Tak referuje dr. Lubina Malinkowa jutře, srjedu, w 19 hodź. pod hesłom „Ochranow a Serbja“ wo wliwje bratrowskeje wosady na serbsku kulturu. Referentka přednošuje serbsce, runočasnje budźe přednošk do němčiny přełožowany. Hodźinu do toho je wodźenje po wustajeńcy. Njedźelu, 27. awgusta, přehladku z finisažu zakónča. Tón dźeń wodźi Jan Malink w 15 hodź. po wustajeńcy, w 17 hodź. němsce. W 16 hodź. poskića literarnohudźbny program, wuhotowany wot basnicy Měrany Cušcyneje a wot chóra Budyšin.

wozjewjene w: Łužica
wutora, 22 awgusta 2017 14:00

Policija (22.08.17)

Z awta třělał

Wojerecy. W nocy na minjenu sobotu je młody šofer wosoboweho awta nuzowe čisło policije zazwonił, dokelž bě něchtó ze za nim jěduceho BMWja třělał. 21lětny bě z třomi sobujěducymi na Halštrowskej dróze do směra na Narć po puću, jako wjacore wutřěle słyšeše a błyski pistole w špihelu widźeše. Alarmowana wobsadka policajskeho awta při tan­kowni na Grodkowskej šoseji wopisany BMW a jeho 21lětneho wodźerja zadźerža a kontrolowaše. W jězdźidle namaka wona trašawku a wotpowědnu municiju. Dowolnosć, tajku pistolu wobsedźeć, młody muž njeměješe. Tohodla zastoj­nicy pistolu a municiju sćazachu. Kriminalna policija tónle pad nětko nadrobnišo přepytuje.

wozjewjene w: Policija
wutora, 22 awgusta 2017 14:00

Pokiwy (22.08.17)

Na Maćičnu akademiju

Budyšin. Stawizniska sekcija Maćicy Serbskeje přeproša na dalše zarjadowanje, kotrež wotměje so štwórtk, 24. awgusta, w 19.30 hodź. w Budyskim „Wjelbiku“, na Žitnej 7. Tam přednošuje dr. Alexander Maxwell, stawiznar a docent Victoria-uniwersity­ w nowoseelandskim Wellingtonje, na temu „Serbšćina w słowjanskim swěće: taksonomija a napo- dobnjenje“. Přednošk budźe w němskej rěči, zastup je darmotny. Wšitcy zajimcy su wutrobnje witani.

Piknik a bjesada

Budyšin. Młodźinska idejowa konferenca Budyšina přeproša wšitkich zajimcow zajutřišim, štwórtk, wot 14 hodź. na Porschec łuki Při Bělenišćach (Bleichenstraße). Tam chcedźa zhromadnje sportować, grilować a na hudźbu słuchać. Při tej­ składnosći móže kóždy swoje ideje wo wuhotowanju sprjewineho města předstajić.

Přesadźuja howjada

wozjewjene w: Pokiwy
wutora, 22 awgusta 2017 14:00

Z wulkim planom lěpši přehlad

Zo njetrjebali so wopytowarjo Budyšina jeno ze smartphonom po měsće orientować, su nětko při Bohatej wěži nowy naddimensionalny měšćanski plan připrawili. Na nim wuhladaš nimale 50 zajimawostkow stareho města, kotrež su wobhladanjahódne. Pomjenowanja su němsce a serbsce podate. Na te wašnje móža turisća trochu zaměrnišo po měsće dundać. Zo bychu taflu před wjedrom škitali, natwarichu nad njej mału blachowu třěšku. Nimo toho stara so wosebita folija wo to, zo by wulki­ měšćanski plan před njeluboznymi grafitijemi škitany był. Foto: Laura Ziegler

wozjewjene w: Łužica
wutora, 22 awgusta 2017 14:00

33. měrowy běh přewjedli

W Běłej Wodźe so rady wubědźuja

Lochkoatletiska sekcija sportoweho zjednoćenstwa TSG Hamor/Běła Woda je na swój­ mjeztym 33. měrowy běh přeprosyła. Při přijomnym wjedrje pósła organizator tohole wurisanja Wolfgang Petsch na 160 běharkow a běharjow wšěch starobnych klasow na zwjetša płony­ pjeć kilometrow dołhi kołokurs w lěsnym pasmje na zapadnej kromje Běłeje Wody po lěsnych a pěskojtych pućikach.

Běhaj na 5 a 10 km hódnoćitej so za rjadnej lisćinje­ Delnjołužiski cup a za Wjercha Pücklerowy pokal. Starterojo na 10 km dyrbjachu kołokurs dwójce zmištrować. Sportowcy běchu z 50 zjednoćenstwow z cyłeje Braniborskeje kaž tež Sakskeje.­ Cyłkownaj dobyćerjej na 10 km běštaj Daniel­ Seher z Běłeje Wody (35:06 min) a Jasmin Beer z Komptendorfa (38:44 min). Roman Měrćink z Baćonja doby w starobnej skupinje 30 (41:40 min) a cyłkownje wobsadźi wón 11. městno.

wozjewjene w: Sport
wutora, 22 awgusta 2017 14:00

Znowa njezbožownje podleželi

SJ Chrósćicy

– FSV Wódrjeńca 02 2:3 (0:1)

Zestawa domjacych: Králíček – Dórnik (72. D. Bogusz), Bětnar, Hrdlitschka, Sentivan, Runt (46. Młynk), M. Zahrodnik, Henčel, F. Zahrodnik (56. Teichmann), J. Bogusz, Němec

Při rjanym słónčnym wjedrje dožiwi 110 přihladowarjow w Chrósćicach napjatu dypkowu hru krajneje koparskeje klasy. Partija bě so za domjacych porjadnje započała. Woni derje kombinowachu a běchu hru postajacy. Tola bytostne móžnosće njemóžachu sej wuhrać. Přećiwnik sadźeše akcenty ze spěšnymi konterami. Te pak móžeše Chróšćanska defensiwa z nowopřichadom Marcom Hrdlitschku wotwobarać. Přiwšěm hosćićel kontrolu nad hru poněčim zhubi. Tak docpě Wódrjeńca we 38. min. přez wólny kop 0:1. Z něhdźe 30 metrow smokny nadběhowar bul do praweho kuta. Nje­zbožowny wrotar Petr Králíček so bula hišće dótkny, njemóžeše pak jón wokoło žerdźe zwjertnyć. Tak běchu Chróšćenjo k połčasej zaso jónu w zastatku.

wozjewjene w: Sport

Serbska debata

nowostki LND