Smochćicy (CRM/SN). „Hižo 1988 běchmy sej we wodźacych kruhach Drježdźansko-Mišnjanskeho biskopstwa přezjedni, zo je načasu cyrkej dale wotewrěć.“ Tole rjekny emeritowany biskop Joachim Reinelt njedźelu w Smochćicach. Tak nasta 1992 na terenje něhdyšeho ryćerkubła a pozdźišeho měšniskeho seminara Dom biskopa Bena, kotryž su w naslědnych lětach dale wutwarili. Swójbny swjedźeń składnostnje jeho 25lětneho wobstaća běše wuraz dźaka a zdobom wjesela nad zdokonjanym.
Swjedźeń zahaji so z kemšemi z biskopom Reineltom jako zmužitym iniciatorom zwažliweho projekta w přewrótowym času. Wotewrjenosć za to časej přiměrjene w domje wopokaza so na Božej mši w kopatej połnej cyrkwi. Moderne hudźbne wuhotowanje běše Budyska band pod nawodom Clemensa Kowollika přewzała. Mjez hosćimi zbliska a zdaloka witaše rektor domu dr. Peter-Paul Straube tež serbskeju zapósłancow Němskeho zwjazkoweho sejma a Sakskeho krajneho sejma Marju Michałkowu a Marka Šimana (wobaj CDU).
W Hamorskim šulskim twarjenju wutworić zetkawanišćo za wšitke generacije je tuchwilu najwažniše předewzaće tamnišeje gmejny za přichod. Za to su gmejnscy radźićeljo wčera tójšto twarskich nadawkow přepodali.
Hamor (AK/SN). Bjezbarjerne zetkawanišćo za wšitke generacije nastawa w Hamorskim šulskim twarjenju. Hižo srjedź awgusta započachu tam tule wulkonaprawu přihotować, informowaše wjesnjanosta Achim Junker (CDU) na wčerawšim posedźenju gmejnskeje rady. „Tež z prěnimi wottorhanskimi dźěłami su započeli. Sobudźěłaćerjo twarskeho zawoda gmejny nětko druhi horni poschod dospołnje wurumuja runje tak kaž dźěle zakładneje šule“, praji wjesnjanosta.
Njeswačidło (LR/SN) Prjedy hač přewjedźechu minjenu sobotu wječor třeći a posledni koncert w rjedźe lětušich Njeswačanskich hrodowych koncertow, bě hižo popołdnju składnosć k wulkemu wjeselu we wsy. Wjesnjanosta Gerd Schuster (CDU) přepoda saněrowane studnje w hrodowym parku, kotrež běchu přez wulku wodu w lětomaj 2010 a 2013 škodu poćerpjeli. Wobrubjena bě swjatočnosć mjez druhim z krótkim programom zakładneje šule. Tři poriki pěstowarskich dźěći domu „Maks a Moric“ z Njeswačidła wustupichu w katolskej swjedźenskej drasće a zanjesechu serbske a němske spěwčki. Hosćo, mjez nimi zapósłanča zwjazkoweho sejma Marja Michałkowa (CDU), so wulce radowachu.
Wječor wotmě so gospelowy koncert na łuce při hrodźe. Drježdźanski chór The Gospel Passengers přednjese z krasnymi a přeswědčiwymi hłosami swój repertoire. Ze sylnym aplawsom so publikum dźakowaše. Po koncerće wobswětlichu park z něhdźe 3 000 swěčkami a mnohimi smólnicami. Napohlad bě přemóžacy. Tež wohnjowa show dweju Choćebužanow a mjeńši wohnjostroj so k wječorej derje hodźeštej.
Worklecy (rk/SN). Na dnju wotewrjeneho pomnika móžachu zawčerawšim we Worklečanskej kapałce Marije maćerje Božeje něhdźe 200 wopytowarjow witać. Na cyłkownje pjeć wodźenjach rozłožowaštaj jim wjesny chronist dr. Beno Wałda a Klawdija Čornakowa stawizny kapałki a jeje wosebitosće. Je to jedna z mało cyrkwjow Němskeje, w kotrejž su mólby w formje Beuronskeho stila hač do dźensnišeho zdźeržane. Při kofeju a tykancu dopominachu so hosćo na čas, jako bě we Worklecach hišće chorownja zaměstnjena. Popołdnjo organizowało je Towarstwo Worklečanskeje kapałki.
Zražka na křižowanišću
Bošecy. Wobchadne njezbožo stało je so wčera popołdnju na statnej dróze S 111 při wotbóčce do Bošec. Nakładne awto chcyše tam hłownu dróhu přeprěčić, šofer pak njewobkedźbowaše předjězbu wosoboweho awta typa Fiat. Jeho wodźerka njemóžeše hižo sčasom borzdźić a zrazy do nakładneho awta. Žonu dyrbjachu z wuchowanskim awtom do chorownje dowjezć.
Wojerecy. „Serbske cyrkwje mjez Lubijom a Luborazom“ rěka hesło wustajeńcy, kotraž je hišće hač do kónca septembra we Wojerowskej Janskej cyrkwi widźeć. Kaž Ursula Philipp z tamnišeje wosady zdźěla, so zadani sej impozantne a stawiznisce hódnotne twarjenja w regionje wobhladać. We wustajeńcy nazhoni wopytowar zajimawe nadrobnosće a njewšědne widy na serbske ewangelske žiwjenje zašłych lětstotkow. Wojerowska Janska cyrkej je wšědnje wot 10 do 17 hodź. wočinjena. Zastup je darmotny.
Casting w dźiwadle
Budyšin. Němsko-Serbske ludowe dźiwadło pyta młodostnych, kotřiž maja lóšt na njewšědny dźiwadłowy eksperiment. Performancowa skupina friendly fire z Lipska dźěła zhromadnje ze serbskimi a němskimi dźiwadźelnikami NSLDź na projekće „Wustajeńca Němcow – Das Museum der Deutschen“ a pyta zesylnjenje. Štóž chce sobu hrać, spěwać abo rejwać, njech přińdźe na casting štwórtk, 14. septembra, w 17 hodź. do Dźiwadła na hrodźe. Přeprošeni su młodostni wot 16 lět. Premjera budźe 3. oktobra. Nadrobniše informacije dóstanu zajimcy pod telefonowym čisłom 03591/ 584 237.