Z wudaća: srjeda, 11 oktobera 2017

Kamjenc (SN). Zamołwići z přećahowanskimi dźěłami ambulantneje hladanskeje słužby maltezow z Worklec do Kamjenca zaměrnje pokročuja. Kaž wjednica hladanskeje słužby Marika Nowakowa informuje, pacienća tónle přećah njepytnu. Wona potwjerdźi, zo so wšitcy na městnje a po zwučenym wašnju dale zastaruja. Po přećahu maltezojo přidatne poradźowanske posłužby poskićeja.

Lětnu kartu dobyli

Wojerecy (SN). We Wojerowskim zwěrjencu wotmě so dźensa tróšku hinaši prózdninsi dźeń za dźěći. Ze slědźenskim čuchom, wćipnotu a wulkim wjeselom móžachu wone na wosom stacijach dypki hromadźić. Najlěpšim kiwaše lětny zastupny lisćik do woblubowaneje coologiskeje zahrody jako wosebite myto.

Slepo (AK/SN). W Slepom su tele dny z twarom noweho němsko-serbskeho šulskeho centruma započeli. „4. oktobra bě zahajenje hrubeho twara. Tuchwilu wukonjeja twarscy dźěłaćerjo hłuboko­twarske naprawy za fundamenty“, Steffen Seidlich, nawoda zarjada za planowanje, twar, hórnistwo a Slepjanskeho zarjadniskeho zhromadźenstwa, wčera na posedźenju gmejnskeje rady w Slepom podšmórny. Dalše wupisanja tam tučasnje přihotuja.

Mjez druhim dźe wo róštytwar a wo wotwodźenje dešća. Aktualny staw je planowanski běrow 25. septembra předstajił. W jednotliwym nastupa to tepjenje, přewětrjenje, sanitarny wobłuk, sylno- a słaboprud kaž tež elektriku.

Z prěnimi sylnymi wichorami, dešćom a spadowacymi temperaturami so nětko w oktobrje lěto kćěwa a rósta w zahrodce kónči. Pola nas doma to rěka, zo poslednje tomaty wotžnějemy a tomatowe rostliny zwućahamy. Naše paprikowe rostliny hišće někotre skromne płody njesu, tola při prěnim zmjerzku budu tež tu žně doskónčnje nimo. Łopješka kuchinskich zelow kaž lubčika (Liebstöckel) a citronoweje melisy nětko wšitke zešćipam, je w ćopłej stwě na blachu sušu a do škleńcow pjelnju. Z lubčikom w zymje rady poliwki a mjasowe pojědźe posłodźu a z citronoweje melisy warju słódny čaj.

Strowota lěsow wažny nadawk za lěsnistwo a wobswětoškit

Kóžde lěto w juliju zahaja statny lěsniski zawod Sachsenforst wosebitu kontrolu lěsow. Tež lětsa přepytowachu fachowcy­ wot 27. julija hač do srjedź awgusta 6 800 štomow po cyłej Sakskej a posudźowachu jich strowotniski staw. Wažne jim při tym bě, zhonić, kak strowe naše lěsy su.

Podhladne běchu přewažnje rědke wjerški jehlinowcow abo zežołtnjena jehlina­ a łopjena. Ale tež škody, zawinjene wot wichorow, suchoty abo krupow, su kóždolětnje tema přepytowanja fachowcow. Tež wšelake překasancy a hriby maja móc, štomam w lěsach zeškodźeć. Hromadźe z datami europskeho wobswětoweho lěsniskeho monitoringa a wobstajnje dźěłacymi 18 sakskimi lěsnoklimatiskimi stacijemi hodźa so staw, stres a scyła strowotniski staw lěsow na wěste wašnje posudźować.

Podhladne štomy su móžny wopor dalšich škodowanjow

Z Němcow pola Kulowa pochadźaca 44lětna Serbowka Beata Čórlichec, kotraž w Kölnje nad Rynom bydli a dźěła, je so spočatk julija w Awstriskej, w korutanskim měsće Celovecu, třeći króć za najćeše wubědźowanje swěta w triatlonje kwalifikowała. Tute přewjedźe so stajnje na kupje Hawaii w Kona, lětsa 14. oktobra. Beata Čórlichec je so hižo štwórtk, 4. oktobra, na kupu podała, zo by so tam zažiwiła, aklimatizowała a wězo tež hišće trenowała. Pod tamnišimi tropiskimi temperaturami a cyłkownymi dalšimi wuměnjenjemi budźe to za nju znowa hoberske wužadanje fyziskich a psy­chiskich mocow. W lěće 2014 a 2016 wšak je so wona tam hižo jako amaterka jara wuspěšnje wubědźowała. Přejemy jej tež lětsa zaso, zo by so jej na tutym jednym dnju při 3,8 km płuwanju, 180 km kolesowanju a 42,2 km marathonowym běhu wšitko derje radźiło. Jurij Nuk

FC Energija Choćebuz

– Hertha BSC Berlin II 2:0 (1:0)

Zestawa domjacych: Spahić – Starcew, Stein, Karbstein, Schlüter, Kruse (46. Boakye), Weidlich, Viteritti, Zimmer (78. Matuwila), Marcelo, Ziegenbein (86. Schneider)

To jeničke, štož měło so při suwerenym dobyću FC Energije kritizować, je wužitk šansow. Dalše tři dypki přećiwo U 23 zwjazkoweho koparskeho ligista běchu na kóždy pad zasłužene, dokež mějachu hosćo před 5 218 přihladowarjemi jenož jeničku móžnosć wrota třělić (71. min, Shawn Kauter). Avdo Spahić we wrotach FCE bě na tutym dnju nimale kompletnje bjezdźěłny. Energija postajowaše duel wot prěnjeje hač do posledneje sekundy, tež hdyž je trenar Pele Wollitz najprjedy raz bjez praweho nadběhowarja započał. Björn Ziegenbein, kotrehož pósła Wollitz doprědka, pak swoju wěc derje zmištrowa. Kevin Weidlich trjechi k 1:0 (8.) a Ziegenbein potom 2:0 (50.).

Koparjo Energije prezentowachu swojim přihladowarjam sep hrajnych kombinacijow, za kotrež dóstachu hrajerjo wjacore razy aplaws. Hišće ženje njeje mustwo w regionalnych ligach z dźewjeć dobyćemi do sezony startowało. Georg Zielonkowski

Regionalna koparska liga žonow

RB Lipsk – Steglitzski FC Stern 2:1 (1:1)

Rostock – Fortuna Drježdźany 2:3 (0:1)

1. FC Viktoria Berlin 5 29  :  1 15

2. Magdeburgski FFC 4 21  :  2 12

3. BSC Marzahn 4 18  :  5 10

4. 1. FC Union Berlin 4 14  :  4 10

5. RB Lipsk 5 9  :  9 10

6. FC Rudne horiny Aue 5 6  :  10 5

7. Steglitzski FC Stern  5 8  :  10 4

8. 1. FFC Fortuna Drježdź. 5 7  :  16 4

9. Biskopičanske KT 08 4 4  :  12 2

SJ Njebjelčicy

– ST Lubuš 2:2 (1:2)

Zestawa domjacych: Hahn – Hölzel, Hanuza, Deleńk, Hrjehor, Pawlik, Kral, Lejnart, Domš (62. Haška), Schulze, Korjeńk

Dołho bě partija přećiwo načolnemu cyłkej z Lubuša wurunana. Njebjelčenjo džěchu­ ze wšeho spočatka bojownisce a koncentrowani do hry. Na zbožo nic tak łahodnje kaž před tydźenjom přećiwo ST Marijinej hwězdźe. Prěnju dobru šansu měješe Handrij Korjeńk po wólnym kopje Ronija Hanuzy w 27. min. Njebjelčan pak zhłójčkowa snadnje nimo. Na to nawjedowachu hosćo z 0:1. Mócna třělwa zadyri pod łatu Nica Hahnoweje klětki. Mjeńšinje po tym poradźi so hosćom z Lubuša po róžku z praweje strony 2:0. Njebjelčenjo pak njeběchu šokowani. Přez spěšnu kombinaciju Floriana Domša a Roberta Lejnarta zniži Korjeńk na 1:2 (34.). Strašnje wysoko třěleny bul Pawla Hrjehorja storči hóstny wrotar runje hišće tak přez łatu – bjezmała by tak k wurunanju přišło.

Ze zastatkom dźěše do přestawki. Po njej bě hra dale wurunana. Po róžku zhłójčkowa Hrjehor swobodnje stejo přez wrota. Tři mjeńšiny po tym pak poradźi so jemu z niskej třělwu po strašnje třělenym róžku Lejnarta wurunanje (88.).