Praha (ČŽ/K/SN). Wjace hač 80 romaskich absolwentow wyšich a fachowych šulow je w Praze stipendij organizacije Romea.cz dóstało. Ze stipendijom ma so tym pomhać, kotrychž starši su w špatnej pjenježnej situaciji. Mjez podpěranymi su šulerjo gymnazijow kaž tež studenća fachowych šulow za strowotnistwo, techniku a pedagogiku.
Próstwu wo stipendij móžachu tež dorosćeni Romojo stajić, kotřiž chcyli maturu nachwatać. „Loni, w prěnim lěće našeho stipendijoweho programa, móžachmy 60 romaskim studentam pomhać. Lětsa podpěrujemy jich hižo 85, a zajim wo stipendij je dale a wjetši“, zwuraznja Jitka Votavová, managerka stipendijoweho projekta w organizaciji Romea.
Wob šulske lěto wučinja stipendij romaskich gymnaziastow 14 000 krónow a studentow 21 000 krónow.
Praha (ČŽ/K/SN). Dobry tydźeń je mjeztym zašoł, zo je prezident Čěskeje Miloš Zeman wulkemu dobyćerjej parlamentnych wólbow w oktobru, předsydźe strony ANO Andrejej Babišej, nadawk dowěrił zestajeć nowe knježerstwo. W zašłych dnjach njejstaj wobaj, ani šef hibanja njespokojnych wobydlerjow ani hłowa stata, prócy a potu lutowałoj, zo byštaj knježerstwowu karu zaćišćałoj. Babiš je ze wšěmi móžnymi partnerami za koaliciju z ANO rěčał a jich za podpěru zdobyć chcył, přilubjejo jim samo, přiwzać do programa knježerstwa jich wolerjam přilubjene „dobroty“. A prezident Zeman je w swojim sydle w Lánach přijał – jednoho po druhim – šefow ODS, Piratow a KDU-ČSL. Tam spyta jim słódkeje huby načinić znajmjeńša za to, tolerować mjeńšinowe knježerstwo. Piratam je wón samo přećelnje doporučił, do njeho sobu zastupić.
Neustadt (Łu/SN). Tele dny je kniha „Krabat abo kuzłarska šula“ wučerja a spisowaćela Kurta Gerlacha z lěta 1925 w małym nakładnistwje Edition CL w sakskim Neustadće znowa wušła. Před 92 lětami bě Drježdźanske nakładnistwo w Serbach lědma znatu prěnju beletristisku knihu wo žiwjenju a skutkowanju Krabata wudało, to rěka 25 lět po prěnim wudaću Jurja Pilka a nimale 30 lět do knihi Měrćina Nowaka-Njechorńskeho.
Kóžde lěto wuznamjenjeja kameradow za 25-, 50- abo 60lětne spomóžne skutkowanje w dobrowólnej wohnjowej woborje. W Ralbicach su zawčerawšim jednoho wobornika wosebje počesćili.
Ralbicy (aha/SN). Jako je wutoru w Ralbicach Teodor Lepiorc 86. narodniny swjećił, běchu mjez gratulantami tež wjesnjanosta gmejny Ralbicy-Róžant Hubertus Ryćer (CDU), bywši hašenski mišter Kamjenskeho wokrjesa Helmut Libs a nawoda woborow delanskeje gmejny Achim Měrćink. Wupřawši narodninarjej zbožo přepodachu jemu čestnu taflu wohnjowych wobornikow za 70lětne spomóžne skutkowanje we wohnjowej woborje.
Pytaja wobškodźene awto
Kamjenc. Nic skućićela, ale škodowaneho pyta policija w Kamjencu. Na tamnišim parkowanišću při Lessingowym parku bě 67lětna žona ze swojim Seatom do cuzeho awta prasnyła. Rentnarka městno njezboža skrótka wopušći, ale so bórze na to nawróći, zo by škodu zrjadowała. Cuze awto pak bě mjeztym wotjěło, na čož 67lětna policiju informowaše. Ta pyta nětko na prawym boku wobškodźene wosobowe awto. Pokiwy přijimuje Kamjenski policajski rewěr pod telefonowym čisłom 03578/ 35 20.
Slepo (AK/SN). Twar Slepjanskeho němsko-serbskeho šulskeho centruma leži w předwidźanym časowym planje. Tole zdźěli nawoda twarskeho wotrjada tamnišeho zarjadniskeho zjednoćenstwa Steffen Seidlich zawčerawšim na posedźenju gmejnskeje rady. „Fundamenty za zakładnu a wyšu šulu kaž tež za sportownju su wubagrować započeli“, wón radźićelam zdźěli. Přidatnje běchu někotre přepytowanja zemskich worštow trěbne. We wobłuku zakładneje šule su mjeztym prěnje wopłóčkowe roły za kuchnju a nuzniki składźene. Wot 26. oktobra je dalše pjeć losow po wšej Europje wupisanych, mjez druhim za wokna a za izolaciju třěchi. Zapodate poskitki předewzaćow chcedźa sej 4. decembra na gmejnskim zarjedźe bliže wobhladać.
Budyšin (CK/SN). Mjez McDonaldsom a listy rozdźělowanskim centrumom Němskeho pósta při Krakečanskej dróze w Budyšinje chce inwestor nowy meblowy dom natwarić. Za to je wón ležownosć sewjernje Krakečanskeje dróhi na přemysłownišću Budyšin-wuchod kupił. Dotal tule płoninu ratarsce wužiwaja. Tohodla dyrbi so wobtwarjenski plan z lěta 1997 změnić, zo móhli do njeho wosebitu štwórć „wikowanje z meblemi“ zapisać. Jednohłósnje je Budyska měšćanska rada na swojim zašłym posedźenju za to zelenu swěcu dała. Předwidźana je cyłkowna wikowanska płonina 10 000 kwadratnych metrow, z toho 9 200 kwadratnych metrow za předań meblow a dalšich 800 kwadratnych metrow za wudospołnjacy sortiment, kaž na přikład domjace tekstilije, škleńcu a pórclin.