Z wudaća: štwórtk, 09 nowembera 2017

štwórtk, 09 nowembera 2017 13:00

Z kolesom do Moskwy

Ćisk. Wo swojich dožiwjenjach na 20dnjowskej jězbje z kolesom do Mo­skwy rozprawja twarski inženjer Mario Vales z Kóšyny při Złokomorowskim jězoru jutře, pjatk, w 19 hodź. na žurli Ćišćanskeje wohnjowoborneje gratownje. Na zarjadowanje we wobłuku Ćišćanskeho wotewrjeneho wokna přeproša tamniše kulturne towarstwo. Zastup płaći 4,50 eurow, w čimž je zapřijaty darmotny napoj.

Nachribjetniki za Tansaniju

Rakecy. Mjeztym hižo dwanatu dohodownu akciju ewangelsko-lutherskeho cyrkwinskeho wobwoda Budyšin-Kamjenc „Nachribjetniki za Tansaniju“ zahaja jutře, pjatk, w 17 hodź. w Rakečanskej cyrkwi. Na farach kaž tež w někotrych šulach a pěstowarnjach móža zajimcy za dźesać eurow módry nachri­bjetnik kupić a jón po připołoženej li­sćinje za šulskeho nowačka spakować. Zaměr je, 4 000 nowačkow w 44 zakładnych šulach partnerskeho cyrkwinskeho wobwoda Meru ze šulskim nachribjetnikom wuhotować. Wotedać hodźa so wone hač do 3. adwenta na farach jednot­liwych wosadow.

Rozprawja wo jězbach

wozjewjene w: Z městow a wsow
štwórtk, 09 nowembera 2017 13:00

Do kina (09.11.17)

9.11.2017 – 15.11.2017 Budyski filmowy palast: Bad Moms 2: wšědnje 16:30, 18:45 a 19:30 (nimo pó) | pó 21:00 | pj a so 23:00 Barbie – Die Magie der Delfine: nj 10:00 | so a nj 15:00 Hexe Lilli rettet Weihnachten: wšědnje 14:15 (nimo pó a srj) a 16:30 | nj 12:15 Justice League w 3 D: srj 20:15 Fack ju Göhte 3: wšědnje 14:15 (nimo pó a srj), 17:00 a 20:00 (nimo srj) | srj 21:00 | pj a so | 22:30 Thor: Tag der Entscheidung w 3 D: wšědnje 14:30 (nimo pó a srj), 17:15 (nimo pó) a 20:00 | pj a so 22:45 Jigsaw: wšědnje 21:00 (nimo pó a srj) ES: pj a so 22:00 Cars 3 – Evolution: nj 12:15 My Little Pony: nj 12.15 | štw a wu 14:30 Emoji: nj 12:15 Lego Ninjago: nj 10:00 Rock My Heart: nj 10:00 Bullyparade: pj 14:30 Ostwind 3 – Aufbruch nach Ora: nj 10:00

Kino-ekstra: Der Wein und der Wind: pó 17:15 a 20:15

Wojerowski CineMotion: Bad Moms 2: wšědnje 18:20 a 20:25 | pj a so 22:40 Jigsaw: wšědnje 20:35 (nimo srj) | pj a so 22:50 Justice League w 3 D: srj 20:00 Hexe Lilli rettet Weihnachten: wšědnje 14:10 a 16:15 Hereinspaziert: srj 17:50 Thor: Tag der Entscheidung w 3 D: wšědnje 14:40, 17:20 a 20:00 | pj a so 22:35 Thor: Tag der Entscheidung: wšědnje 17:50 (nimo srj) Fack ju Göhte 3: wšědnje 14:30, 17:15 a 20:15 | so a nj 12:00 | pj a so 22:45 Der kleine Vampir: wšědnje 14:15 a 16:05 My Little Pony: so a nj 12:10 Cars 3 – Evolution: so a nj 11:45 Rock My Heart: so a nj 12:20

wozjewjene w: Do kina
štwórtk, 09 nowembera 2017 13:00

Něhdy wažne dźěło dale zachowuja

Mjeztym šěsć lět je přaza kruty wobstatk lětneho programa spěchowanskeho towarstwa Rownjanski Njepilic dwór. Tam su minjenu sobotu na pjeć kołwrótach len přadli, słuchajo při tym na serbske a němske ludowe pěsnje, kotrež je skupina Rowniske glosy přednjesła. Něhdy bě přaza w Slepjanskim regionje přewšo wažna, dokelž­ dyrbjachu len předźěłać a z toho zdźěla žiwi być. Z tekstilnej industrializaciju je so tole pozhubiło, čehoždla so na Njepilic statoku prócuja tule tradiciju zachować a přichodnym generacijam dale dać, cyle po wupruwowanym hesle towarstwa „Kak to jo bylo“. Foto: Jost Schmidtchen

wozjewjene w: Towarstwa
štwórtk, 09 nowembera 2017 13:00

Přednošk zbudźa diskusije

Lětuše dalekubłanske zarjadowanje Serbskeho šulskeho towarstwa kónc oktobra w Chróšćanskej „Jednoće“ drje kubłarki a kubłarjo dźěćacych dnjowych zarjadnišćow njezabudu.

Chrósćicy (SN/MiR). Na kóncu wjacehodźinskeho zarjadowanja steješe přeco hišće prašenje, hač a kak kubłanje (Bildung) – nic woćehnjenje (Erziehung) dźěći – w žłobiku, pěstowarni a horće přichodnje rjadować. Tele prašenje a dwěle běchu w běhu přednoška prof. Malty Mienerta nastali. Z přednoškom rozestajeja so nětko w jednotliwych dźěćacych zarjadnišćach – wosebje internje mjez sobudźěłaćerjemi –, kotrež su w nošer­stwje Serbskeho šulskeho towarstwa. Wšako jewješe so hižo na zarjadowanju problem, hač móža docyła hišće po dotalnych pućach dźěći kubłać abo hač maja nošerjo kubłanišćow scyła dosć móžnosćow žadanjam wotpowědować. Malte Mienert poda přitomnym nastorki k rozrisanju.

Rozdźělne nadawki

wozjewjene w: Kubłanje
štwórtk, 09 nowembera 2017 13:00

Jimace dóńty Breslauskich Židow

Projekt „Přećiwo zabyću“ (Wider das Vergessen)“ zaběra so z časom nacionalsocializma. Wojerowscy šulerjo podawaja so na slědy přesćěhaneho ludu Židow do susodneje Pólskeje.

Dirk Szuszies rěči jasne słowa. „Tónle film njeje lochki. Wón apeluje na waše začuća, na waše swědomje“, měni ko-režiser lěta 2016 nastateho 108 minutow dołheho filma „Wir sind Juden aus Breslau“. Na žurli Wojerowskeje Kulturneje fabriki je 55 kedźbliwych šulerjow 9. a 10. lětnika z wokolnych wyšich šulow a gymnazijow. Režiserka Karin Kaper z Berlina je film nawjerćała, kotryž słuša do projekta „Přećiwo zabyću“. Na žurli Kulturneje fabriki hladaja rozmyslowacy, šokowani a nastróženi šulerjo kaž tež wučerjo na sćěnowinu. „Dajće so wot žiwjenskeje wole tychle ludźi wodźić“, podšmórnje Dirk Szuszies. „Pokažće ciwilnu kuražu. A wukńće z toho.“

wozjewjene w: Kubłanje
štwórtk, 09 nowembera 2017 13:00

Zbožowny remis

Wacker Nordhausen

– FC Energija Choćebuz 1:1 (1:1)

Zestawa hosći: Spahić – Starcew, Matuwila, Stein, Schlüter, Kruse, Zimmer (82. Baude), Weidlich, de Freitas (70. Gehrmann), Viteritti, Karbstein (46. Boakye)

FC Energija Choćebuz by so z Nordhausena bjezmała z prěnjej poražku sezony 2017/2018 wróćiła. Načolnik regionalneje ligi-sewjerowuchod bě po dobrym starće a spěšnych wrotach přez Maximiliana Zimmera w 13. min. wotežki pušćił a třećemu tabulki dale a wjace hrajnych podźělow přewostajił. Tež 1:1 přez Nilsa Pichinota (29.) koparjow FCE njewubudźi.

Domjacy mějachu tež w druhim połčasu šansy. W 64. min. bě José Matuwila w šěsnatce wopak do dwuboja šoł a sudnik pokaza na dypk. Młody Choćebuski wrotar Avdo Spahić pak kop Jerome Prophetera wotwobara, z čimž je Choćebužanow před prěnjej poražku hrajneje doby přelutował. Georg Zielonkowski

wozjewjene w: Sport
štwórtk, 09 nowembera 2017 13:00

Dalši dypk sej wubědźili

SJ Chrósćicy

– ST Ćisk 1:1 (1:1)

Zestawa domjacych: Králíček – Pöpel, Hrdlitschka, Sentivan, Teichmann, Henčl (68. Cyž), Zahrodnik, Runt, Młynk (56. Bětnar), Věchet (46. Žur), Němec

wozjewjene w: Sport

Serbska debata

nowostki LND