Z wudaća: pjatk, 10 nowembera 2017

Bój dale traje

Choćebuz. Braniborska ministerka za kubłanje, młodźinu a sport Britta Ernst (SPD) je so dźensa wo serbskim šulstwje w Delnjej Łužicy informowała. Přeprosyła bě ju staršiska iniciatiwa. Ta so boji, zo njezměje přichodnje hižo 77 procentow šulerjow, kotřiž chcedźa serbšćinu wuknyć, noweho šulskeho postajenja dla k tomu wotpowědny poskitk.

Znowa přestorčene

Kulow. Saněrowanje mosta nad Čornym Halštrowom w Hózku je Kulowska měšćanska rada znowa přestorčiła. Přičina su wažniše a nuznje trěbne porjedźenske dźěła w komunje, hdźež su wobjězdki trěbne, rěkaše z Kulowskeje radnicy. Nowy termin zwottorhanja a nowotawra mosta je februar 2019. Dźěła chcedźa w nowembru zakónčić.

Dźěła zakónčene

Na dnju swjateho Měrćina, 11. nowembra, zahaji so tradicionalna husycowa jědź a z njej rězanje ptakow. Mnohe hosćency su tuž na jutřiši nawal hosći přihotwane. Kóžde lěto zaso je wulke gagotanje tež pola Vcelichec w Hórkach słyšeć. Konrad Vcelich něhdźe 20 husow nakormi, zo bychu k hodam porjadnu wahu měli. Foto: Feliks Haza

Milenka Rječcyna

Kak wšelako wustupuja ministrojo, zaběrace so z kubłanskimi naležnosćemi w zjawnosći, je so tele dny pokazało. W Serbach so mnozy dźiwachu a wjeselachu, zo bě sakski statny minister za kultus Frank Haubitz (njestronjan) hižo tydźeń po swojim zwołanju do zamołwitosće jako minister Serbskim Nowinam na někotre prašenja wotmołwił. Čehodla pak so wjeselić? Cyle jednorje: dźensniši dźeń ma kóždy, kiž tajke zastojnstwo nastupi sto dnjow chwile, so z nowym wobłukom zeznajomić. Hakle potom so rozestajenja w zjawnosći zahaja. Minister Haubitz njeje na to tłóčił, ale na prašenja wo swojim poměrje k serbskej Łužicy wotmołwił a jemu znate problemy při zwoprawdźenju a zachowanju serbskich kubłanskich narokow – tež hdyž z kritiskim wóčkom – rysował. Wuprajenja wo tym, hač a hdy chce so minister na městnje, to rěka w Serbach, wšojedne hač w Budyšinje, Slepom, Wojerecach abo druhdźe wosobinsce informować, wón dotal porno tomu zwuraznił njeje. Nó haj, konkretnje prašeli so za tym njejsmy. Wšako jemu mjenowane sto dnjow za tónle rozsud popřejemy.

Za lětušu schadźowanku wjele studentskich přizjewjenjow

Budyšin (SN/CoR). W ćmowym nowembrje a prjedy hač so adwentny čas započnje, čaka na Serbow hišće jedyn swětły wjeršk: Studenća přeprošeja zhromadnje ze Załožbu za serbski lud na 143. schadźowanku, wotměwacu so sobotu, 25. nowembra w Budyskej měšćanskej hali „Króna“.

Koncepty sydom młodych předewzaćow je jury za lětušej Myto a Wosebite myto łužiskich załožerjow eksistency (LEX) nominowała. Mjez nimi stej Běłowodźanski a Slepjanski zawod. Łužiska hospodarska iniciatiwa (WiL) je nominowanych srjedu w Choćebuzu předstajiła. Štó z nich móže so na tajke myto wjeselić, wozjewi WiL 30. nowembra.

Choćebuz (SN/at). André Böhme chce dźěći bóle za sportowanje we wodźe zahorić. Tohodla rozšěri wón swoju wot lěta 2014 wobstejacu wodoskijowu připrawu „Wake and Beach“ na Brězowskim jězoru wo tak mjenowany akwapark. Hižo klětu ma rozšěrjeny poskitk zajimcow a wosebje tež nowy publikum přiwabić. „Akwapark wopřijima nadute elementy, kaž stej to trampolin abo suwadło, zo bychu wosebje dźěći a njepłuwarjo so we wodźe hibali“, rjekny Serbskim Nowinam w Krušwicy bydlacy předewzaćel. Z konceptom, rozšěrić dotalnu wodoskijowu připrawu, požada so Böhme we wubědźowanju wo najlěpši předewzaćelski koncept 2017 a je nětko jedyn z nominowanych.

Na wjacorych městnach we Łužicy su wčera składnostnje 79. róčnicy pogromoweje nocy wopory nacionalsocializma wopominali. Něhdźe 20 Budyšanow spominaše při kopolakach před Serbskim domom na zamordowanu židowsku swójbu Sabat, kotraž běše w domje na róžku k Arnošta Mukowej hasy bydliła. Jich běchu nacio­nalsocialisća w Auschwitzu zamordowali. 9. nowembra před 79 lětami běchu tež w Budyšinje židowskich sobuwobydlerjow po měsće honili a je hanjeli. Přitomni połožichu kwětki a modlachu so z fararjom Christianom Tiedu. W Hórkach su wčera na zamordowanu židowku Hanku Šěrcec spominali. Foto: Carmen Schumann

Ralbicy (SN/MiR). Skutkowanje za škit přirody a šěrjenje wědy wo ekologiskim a konwencionalnym ratarjenju je tuchwilny wobsah skutkowanja šulerskeje UNESCO-skupiny na Ralbičanskej wyšej suli. Wčera nawróćištej so čłonce skupiny z Wolfsburga, hdźež běštej w běhu dźěłarnički pola Němsko-Afriskeje młodźinskeje akademije w „Autostadt Wolfsburg“ wo swojim projekće „Jědź za bow“ rozprawjałoj. Přichodny tydźeń poda so dalša skupina šulerjow, kotřiž su čłonojo UNESCO-skupiny, runje tam na dźě­łarničku k temje „Climate-Active-Projekt“. Zhromadnje ze šulerjemi z Lipska a Drježdźan rozjimaja potom swoje dopó­znaća wo ratarjenju. Jich dźěło je wobsah projekta „Wohnišća přichoda – AGENDA 2030“. Te ma być tema klětušeho mjezynarodneho projektoweho dnja UNESCO-projektowych šulow. Ralbičanske kubłanišćo je we Wolfsburgu jedna z 25 wobdźělnych z cyłkownje 200 němskich UNESCO-projektnych šulow. Nowa tema slědźerjow z 5. do 10. lětnika je „Wliw ratarstwa na klimu – mamy swobodu jednanja?“ Podać chcedźa mjez druhim informacije wo energijowej bilancy zawodow.

Hamburg (dpa/SN). Konflikt na Ukrainje a aneksija połkupy Krim stej poměr mjez Ruskej a Europu masiwnje pohubjeńšiłoj. Po reprezentatiwnym naprašowanju w nadawku Kölnskeje Körber-załožby je 44 procentow Rusow, 41 procentow Němcow a 38 procentow Polakow měnjenja, zo njesłuša Ruska do Europy. Jenož 49 procentow z naprašowanych Rusow měnjachu, zo Ruska do Europy słuša. Tež 56 procentow Němcow a 57 procentow Polakow widźa Rusku w Europje.

Zetkanje so njewotměje

Da Nang (dpa/SN). Na tuchwilu so wotměwacym Azisko-Pacifiskim-wjeršku we Vietnamje nima porno dotalnym wočakowanjam k zetkanju mjez ameriskim prezidentom Donaldom Trumpom a jeho kolegu, ruskim prezidentom Wladimirom Putinom dóńć. Rěčnica Donalda Trumpa Sarah Sanders wobkrući to dźensa z terminowymi problemami. Prezidentaj zetkataj so na kromje zeńdźenja při witanju k wšelkim rozmołwam.

Za pjenjezy na swobodu

Nimale 2 000 ludźi, mjez nimi sakski hospdarski minister Martin Dulig (SPD), je wčera přećiwo lutowanskim planam koncerna Siemens w Zhorjelcu demonstrowało. Nimo sobudźěłaćerjow twornje za turbiny sćěhowachu mnozy měšćenjo, šulerjo, studenća wysokeje šule, ale tež kolegojo ze zawoda Bombardier, namołwu DGB wuchodneje Sakskeje a zawodneje rady. „Ludźo su rozumili, zo dyrbja hromadźe za industrijne stejnišćo wojować“, rjekny prěni społnomócnjeny IG metal wuchodneje Sakskeje Jan Otto. W Mnichowje je šef Siemensa Joe Kaeser wčera wo „bolostnych zarězkach“ za koncern rěčał. Foto: Christian Essler

We wosebitym, z tryskowym ćěrjenjom wuhotowanym wobleku je Richard Browning z 41,53 kilometrami na ho­dźinu po jězorje wuchodnje Londona smalił. Tak je wón najspěšniši čłowjek swěta, kiž je spěšnosć z wosebitym woblekom docpěł. Browning bě z wu­slědkom přewšo spokojom, je pak hnydom připowědźił, zo chce spěšnosć hišće raz pře­trjechić.

80lětny Sewjerorynsko-Westfalčan je so wjac hač 30 króć do chorownje zadobył a tam w stwach pacientow drohoćinki kradnył. Wuměnkar je za swoju starobu chětro sportowski. Wšako je prawidłownje přez wonkownu fasadu na balkony zalězł. Wottam bě jemu­ lochko so do jstwow dóstać. Nětko je jeho policija tola lepiła. Poslednje zadobywanje wšak dyrbješe 80lětny při­znać, k tamnym wón mjelči.