Z wudaća: pjatk, 10 nowembera 2017

Volleyballowe dypkowe hry

Prěnje volleyballowe mustwo Marijinych hwězdźičkow dyrbi jutře k MSV Budyšinej 04. Wot 14 hodź. nastupja Pančičanki w sportowni wyšeje šule Gottlieba Daimlera. Wot 16 hodź. wojuja volley­ballisća Viktorije Worklecy w Zhorjelcu. Dalše­ hry:

15.11. 20:30  ST Chróstawa

  – ST Marijina hwězda

15.11. 21:30  TSV Wóspork

  – ST Marijina hwězda

16.11. 19:30 VV Biskopicy

  – Sokoł Budyšin

16.11. 20:30  Sokoł Budyšin

  – ST Budyšin-sewjer

Kónctydźenska kopańca

11.11. 12:00 Módro-běli Kulow II

  – LSV Hory II

11.11. 14:00 Motor Kumwałd

  – Módro-běli Kulow

11.11. 14:00 SC Großröhrsdorf

  – Rakečanske ST

12.11. 10:30 ST Ćisk II

  – SJ Chrósćicy II

12.11. 12:00 Natw. Němske Pazlicy II

  – SJ Njebjelčicy II

12.11. 13:00 FSV Łuty

  – ST Marijina hwězda

12.11. 14:00 SJ Njebjelčicy

  – Rakečanske ST II

12.11. 14:00 Sokoł Ralbicy/Hórki

  – Wojerowski FC

12.11. 14:00 ST Kinspork/Łužnica

  – ST Radwor

Blidotenisowe duele

W prěnjej wokrjesnej lize je dźensa w Njeswačidle blidotenisowy derby mjez prěnim a druhim tabulki. Módro-běli z Njeswačidła wočakuja mustwo DJK Konjecy, a to wot 19 hodź. Póndźelu pojědźe ST Radwor na partiju do Wósporka. Tam hraje wone wot 19 hodź. přećiwo TSV Wósporkej/Hrodźišću IV.

Dalše hry:

17.11. 19:00 DJK TTV Konjecy

  – TTC Wojerecy III

Na najnišim dypku Chrósćic při mosće nad Satkulu maja při sylnych zliwkach nastajnosći starosće z wulkej wodu. Zo móhła wona­ lěpje wotběžeć, su tam tele dny tołstu dešćowu rołu do zemje składli. Při dźěle wobkedźbowachmy wodźerja bagra Benedikta­ Wjenka a Konrada Vcelicha. Foto: Feliks Haza

7. nowembra 1967 spominachu w tehdyšej NDR na 50. róčnicu Oktoberskeje rewolucije.­ Mjeztym je poł lětstotka zašło a lědma štó je minjenu wutoru na stotu róčnicu tohole historiskeho po­dawka zhladował. Ćim bóle so Jakub Šołta­ a mandźelska Lejna w Konjecach derje na dźeń před 50 lětami dopomi­nataj. Tehdy bě jeju w Ralbičanskej wosadnej cyrkwi farar Jurij Šołta zwěrował.

Ze złotym wěnčkom pyšena mandźelska Lejna je so 12. oktobra 1946 do Šewcec swójby we Łazku narodźiła. Wuchodźiwši šulu w Ralbicach złoži po 10. lětniku pruwowanje srjedźneje zrałosće w Budyšinje. Na to dźěłaše 16 lět w Kamjen- skim tekstilnym zawodźe Stange, po tym wjacore lěta w Bóščanskej firmje za plastowe wudźěłki Zeibina a hač do rentnarskeje staroby na polach a w prodrustwowej hródźi w Hrańcy.

Wuměnjenja za kameradow w Kašecach přewšo špatne – a wuhlady tež

Kašecy (SN/MWj). Dobrowólne wohnjowe wobory trjebaja runje we wjesnej kónčinje dobre wuměnjenja, zo móhli spěšnje pomhać. Wot tajkich dobrych wuměnjenjow su wobornicy w Kašecach daloko zdaleni. Nimo toho maja tam problem, zo pobrachuje dorost, z čimž steji cyła wobora na hračkach. Tohodla je so gmejnska rada Pančicy-Kukow na swojim wčerawšim posedźenju w Kašecach z tuchwilnym połoženjom wobory we wsy zaběrała.

Chrósćicy. Na přednošk wo afriskim Malawiju přeproša Chróšćanske serbske wjesne towarstwo Domizna wutoru, 14. nowembra, w 19.30 hodź. do „Jednoty“. Wo swojim přebywanju w Malawiju přednošuje Christina Smolina ze Swinjarnje. Tež w blogu pod adresu http://christinainmalawi.blogspot.de/ wona wo swojich dožiwjenjach a nazhonjenjach rozprawja. Štóž chce jeje dźěło z pjenježnym darom podpěrać, změje k tomu składnosć. Wšitcy zajimcy su wutrobnje přeprošeni.

Přednošuje wo stawiznopisu

Budyšin. Stawizniska sekcija Maćicy Serbskeje přeprosy štwórtk, 16. nowembra, w 19.30 hodź. na dalše zarjadowanje do Budyskeho hosćenca „Wjelbik“. Tam přednošuje Alexander Pólk na temu „Wuwiće serbskeho stawiznopisa w NDR-skim času“. Młody serbski stawiznar, bydlacy w Budyšinje, předstaji wuslědki swojeho masterskeho dźěła, kotrež je lětsa­ na Techniskej uniwersiće Drježdźany wotzamknył. Přednošk budźe w serbskej rěči, zastup darmotny.

Předstaja nowu antologiju

Trjebin (AK/SN). Wo móžnym přistupje k turistiskemu zwjazkej Nysowy kraj chce Trjebinska gmejna rozmyslować. Kaž so gmejnscy radźićeljo na swojim posedźenju zawčerawšim dojednachu, chcedźa spočatk decembra wo tym rozsudźić. „Naš hłowny nadawk je turizm spěchować a wuwiwać“, rjekny sobudźěłaćerka turistiskeho zwjazka Maja Rublack-Daniel. Zwjazk wudawa turistiske brošurki a stara so wo zwoprawdźenje projektow. Jemu přisłuša 26 čłonow, mjez druhim Slepjanski Serbski kulturny centrum. Runje to pohnu předsydu Trjebinskeho wjesneho kluba Wolfganga Zecha k prašenju, hač dyrbi tež hišće gmejna přistupić. Nimo toho maja w Slepjanskim zarjadniskim­ zjednoćenstwje turistiske stajne blido, kotrehož čłonojo derje hromadźe dźěłaja, Zech argumentowaše.

Seminarnej rjadaj „Zetkanišćo strowe zežiwjenje“ a „Klewernje a kreatiwnje warić“, kotrejž Křesćansko-socialny kubłanski skutk dorosćenym poskića, stej stajnje derje wopytanej. Tež zawčerawšim wječor bě Michael Schenker na Wojerowskej dźěćacej a młodźinskej farmje hosćićel za něhdźe dwaceći hobbyjowych kucharjow. Jim wón demonstrowaše, kak móžeš ze zbytkow třidźělny meni zwarić a napjec. Tónraz stejachu­ běrny a sezonalna zelenina w srjedźišću. Mjez druhim je wón běr­njacy tykanc­ napjekł. Lětsa bě to poslednje zarjadowanje, 31. januara 2018 započnje so w 19 hodź. nowe koło zhromadneho warjenja. Foto: Ulrike Herzger

Budyšin. Šulerjow 2. hač do 4. lětnika, kotřiž nimaja składnosć so na wučbje serbšćiny wobdźělić, přeproša Rěčny centrum WITAJ w klětušich jutrownych prózdninach – wot 3. do 6. apryla 2018 – na kurs serbšćiny. Šulerjo zeznajomja so tam ze serbskim alfabetom a zwučuja serbsce čitać a pisać. Po wučbje dožiwja zajimawe serbskorěčne poskitki. Přizjewjenja přijimuja hač do 15. decembra pod telefonowym čisłom 03591/550 414.

Njeprošeny wopyt w kinje

Budyšin. Nad wjele ludźimi w Budyskim kinje so hewak wjesela, w nocy na minjenu srjedu pak nic. Njeznaći běchu so tam zadobyli a wšitke rumnosće přepytali. Trezor wšak namakali njejsu. Kelko wěcneje škody je při tym nastało, njeje hišće dokładnje znate.

Modowa přehladka „Són z lódki“ wosebity zajim zbudźiła

Kónčny wohnjostroj Budyskeje nakupowanskeje nocy RomanticaFabienne Wjacławkec w narodnej drasće Budyskich ewangelskich Serbow

Wulkotne dožiwjenje wopytowarjam zbliska a zdaloka bě minjenu sobotu Budyska nakupowanska nóc Romantica. Wjac hač 80 wikowarjow Budyskeho nutřkowneho města kaž tež 70 w Centeru­ na Žitnych wikach so na njej wobdźěli. Kaž Budyska citymanagerka Gunhild Mimuß zdźěli, su něhdźe 50 000 hosći tón wječor w sprjewinym měsće zličili. Woni dožiwichu swjedźensce wupyšene město, hdźež běchu cyłe dróhi kaž tež jednotliwe domy wosebje wobswětlene. Na Bohatu wěžu bu imageowy film města projicěrowany, zajimcam poskićachu rejwanske a wohnjowe pokazki a laserowu show pólskich specialistow při sportowym domje Timm, w kotrejž akterojo woheń, wodu, powětr a zemju kombinowachu. A wulkotny kónčny wohnjostroj postara so wo dospołnje přepjelnjeny Móst měra.