Z wudaća: póndźela, 04 decembera 2017

Skutkowanje mytowane

Drježdźany. Prezident Sakskeho krajneho sejma dr. Matthias Rößler a sakska ministerka za socialne Barbara Klepsch (SPD) staj sobotu 55 čestnohamtsce skutkowacych ze swobodneho stata wuznamjeniłoj. Mjez nimi běchu wjacori z Hornjeje Łužicy. Charlottu Helas z Bóšic počesćichu za angažement w tamnišej starowni a za hajenje serbskich nałožkow. Hagena Austa z Łaza wuznamjenichu za skutkowanje při wuchowanju z wody.

Město rěčam přichilene

Lubin. Wokrjesne město Lubin wobdźěli so na braniborskim wubědźowanju „Rěčam přichilena komuna – serbska rěč je žiwa“. To je měšćanosta Lars Kolan (SPD) připowědźił. Lubin přisłuša serbskemu sydlenskemu rumej w Braniborskej. Lars Kolan tuž šule, towarstwa a iniciatiwy namołwja, wobdźělenje z idejemi a namjetami podpěrać. Prěni raz zetkać chcedźa so 18. decembra.

Twornja hišće pjeć lět wobsteji

Dźěćetko su tradicionalnje 1. adwentnu njedźelu w Slepjanskej cyrkwi wužohnowali, zdobom su jemu módru šnórku jako znamjo Slepjanskeho dźěćetka přityknyli. Fararka Jadwiga Malinkowa wupraji žohnowanje. Před 99 lětami tehdyši farar Handrik prěni­ raz tamniše dźěćetko wužohnował. Jeho lětušej pomocnicy stej Johanna Klawkojc a Pawlina Gärtnerojc. Foto: Joachim Rjela

Lětuša 44. Choćebuska hudźbna nazyma bě po dźesać lětnej intendancy Bernda Weinreicha prěni festiwal jeho naslědnika prof. dr.-ing. Martina Neumanna. Cordula Ratajczakowa zhladuje z předsydu festiwal wuhotowaceho towarstwa Weinreicha wróćo a do přichoda.

Intendancu festiwala sće wotedał, kak wupada z nawodom towarstwa?

B. Weinreich: Jako běch před dwanaće lětami intendancu přewzał, připowědźich, zo wuhotuju dźesać króć Choćebusku hudźbnu nazymu, do čehož tehdy nichtó njewěrješe. Lětsa sym hišće 50 procentow festiwala sobu organizował, klětu přewozmje prof. Martin Neumann, kiž je mjeztym zapósłanc zwjazkoweho sejma za FDP, 90 procentow organizacije. Budu klětu 70 lět a chcu, zo přechod na čole festiwala měrnje a harmonisce wotběži. To je so mi hižo nastupajo předsydstwo Němskeje Chopinoweje towaršnosće poradźiło, kotrež sym jako 65lětny wotedał, a klětu chcu tež nawod Choćebuski hudźbny festiwal wuhotowaceho towarstwa přepodać.

Lětsa bě intendanta dla hižo nowe hrajnišćo. Što so hišće změni?

Maja so dale z prašenjemi młodostnych rozestajeć a jich podpěrać

Jaseńca (MDź/SN). Kubłanska referentka Domowiny Rejzka Krügerjowa je přewšo spokojom z wuwićom na serbskim młodźinskim polu. To wuzběhny wona minjeny pjatk na mjeztym hižo třećim młodźinskim forumje, na kotryž bě wona młodostnych do Jasčanskeje „Bjesady“ prosyła. Dohromady dwaceći młodostnych bě přichwatało, hłownje čłonojo nowowutworjeneje młodźinskeje přirady, kotraž bě z dotalneju forumow we Worklecach a Wotrowje wurostła.

Wuběrnu kopańcu dožiwichu wčera mnoholičbnje přichwatani přiwisnicy łužiskeje kopańcy w Ralbičanskim Stadionje přećelstwa. Prěni raz scyła w stawiznach stejachu sej we wokrjesnej wyšej lize koparjo Sokoła Ralbicy/Hórki a ST Radwor napřećo a přeswědčichu z dobrym wukonom. Na kóncu pak wopušćichu domjacy jako dobyćerjo z kónčnym 2:1 trawnik. Přez cyłu hru knježeše wulka napjatosć a fairnosć. Mnozy koparjo so dosć derje znaja, dokelž su na př. kaž Měrćin Kurjat (2. wotpr.) abo Křesćan Bejmak (wobaj ST Ra­dwor) w Ralbicach kopali, abo hraja zhromadnje w Serbskej koparskej wubrance. Wjace čitajće na 3. stronje. Foto: Werner Müller

„Zymski čas“ rěka scenisko-koncertantny program Serbskeho ludoweho ansambla w dohodownym času. Pjatk wječor bu na žurli na Wonkownej Lawskej w Budyšinje w druhim dźělu programa twórba znowa předstajena.

Budyšin (CRM/SN). Hudźbu spisaštaj za swój čas Jan Bulank a Detlef Kobjela na tekst Kita Lorenca. Třidźělna twórba zdawa so z dźensnišeje perspektiwy jara awtentiska być. Štó z nas drje hišće wě, zo wotměwaše so 30. nazymnika, na dnju swjateho Handrija, woprašowanje lubosćinskeho orakla? Skerje je znate, kotre nałožki haja so na wopominanje swjateju Borbory a Mikławša. Nimo Kornela Kolembusa měješe tohorunja Jan Domaška režiju. Wón dźě znaje materiju ze swojich młódšich lět. Do scenow je rjad ludowych spěwow zapřijatych, kotrež njejsu hižo znate. Z pěsnjemi kaž „Spěwajće dźens wjesele ...“ so prawe serbske hody něhdy zakónčichu.

Mnichow (dpa/SN). Hódanje je nimo: Bayerski financny minister Markus Söder ma Horsta Seehofera w zastojnstwje ministerskeho prezidenta naslědować. Frakcija CSU w Bayerskim krajnym sejmje je 50lětneho dźensa w Mnichowje jednohłósnje za najbóle požadaneho naslědnika wuzwoliła, kaž zhoni powěsćernja dpa z kruha wobdźělnikow. Seehofer chcyše so dźensa připołdnju nastupajo swoje naslědnistwo zjawnje wuprajić.

Z Meuthenom a Gaulandom

Hannover (dpa/SN). AfD je europskeho zapósłanca Jörga Meuthena a předsydu frakcije w zwjazkowym sejmje Alexandera Gaulanda za swojeju předsydow wu­zwoliła. Na swojim zjězdźe kónc tydźenja w Hannoverje je so strona z tym dalši čwak doprawa sunyła. Předsydaj škitataj eksponenta prawicarskeho křidła Björna Höcku z Durinskeje. Jako čłonka předsydstwa wobkrućena Beatrix von Storch mjenowaše kanclerku Angelu Merkel (CDU) „najwjetšu łamarku prawa němskich powójnskich stawiznow“.

Přećiwo wulkej koaliciji

Z wernisažu su pjatk wječor w Domje při tachantskej cyrkwi, Katolskej akademiji w Frankfurće nad Mohanom, wustajeńcu fotografa Andreasa Varnhorna „Domizna 1992/2017“ wuspěšnje wotewrěli. Něhdźe 70 jara zajimowanych ludźi je přichwatało. Varnhorn bě 1992 skerje připadnje katolskich Serbow w Hornjej Łužicy fotografował. Nětko bě tam znowa po puću, zo by dokumentował, što je so z tehdy fotografowanych ludźi stało. Titulny foto pokazuje Matijasa Šnajdera jako ministranta a dźensa. Wustajeńca­ budźe klětu wot 21. februara w Budyskim Serbskim domje widźeć. Foto: Nike Alina Varnhorn

Dokelž je swědk naheho muža w kapałce widźał, je policija natutkany porik při jeho zetkanju myliła. Přichwatana patrulja zwěsći na chórje cyrkwički we Waldshuće-Tiengenje porik w starobje 29 a 27 lět, při čimž bě muž woprawdźe nahi. Kaž so pozdźišo wukopa, bu porik hižo krótko do toho ­ při seksualnych jednanjach w kapałce tamnišeje chorownje lepjeny.­ Wězo dyrbještaj muž a žona cyrkej­ hnydom wopušćić a mataj nětko z pjenježnej pokutu ličić.

Američan Mike Hughes njespušći w žanym padźe swój plan, ze samotwarjenej raketu do swětnišća lećeć. Kaž tamniša telewizija Fox 5 rozprawja, móhł wón swój eksperiment snano dźensa wotměć. 61lětny wunamakar a stuntman je swoju samospaslenu raketu na priwatnej ležownosći w małym Amboyju w kaliforniskej pusćinje Mojave natwarił.

Podstupim (dpa/SN). Kak z wjelkami wobchadźeć? Braniborske ministerstwo za wjesne wuwiće, wobswět a ratarstwo je tele dny we wobswětowym wuběrku krajneho sejma nowe postajenje nastupajo tak mjenowane problemowe wjelki předstajiło. Tež w Braniborskej boja so ratarjo wo swój skót na pastwje, naje­bać to su wjelki kruće škitane. Zadobywa-li pak so wjelk přichodnje wospjet na škitanu pastwu, abo su-li samo ludźo wohroženi, móhli jeho zatřělić.

W Braniborskej měli přichodnje hońtwjerscy wotnajerjo w najhóršim padźe na problemowe wjelki třěleć směć. Wjelče postajenje rjaduje, zo w ekstremnym padźe najprjedy městny hońtwjer tónle nadawk dóstanje, rjekny braniborski wobswětowy minister Jörg Vogelsänger (SPD) we wuběrku. Hdyž njeje zaručene, zo je wón docpějomny, kmany abo zwólniwy, měł krajny zarjad za wobswětoškit wosobu/wosoby za třělenje we wuwzaćnym padźe postajić.