Z wudaća: wutora, 09 januara 2018

Wot drogow zamućeny je 21lětny w badensko-württembergskim Haslachu policiju wołał, dokelž bě so pječa něchtó do jeho bydlenja zadobył. Zastojnicy wšak wčera rano žanoho paducha njenańdźechu, za to pak titku marihuany. Muž bě tak jara wot drogow wopojeny, zo zastojnikam přeradźi, zo ma tošku z dalšimi drogami pod łožom. „To bě jeho doskónčna zahuba“, policija piše.

Jenož w spanskim wobleku je so dwulětny pjerach w Bayerskej na rańše přechodźowanje podał. Při runje šěsć stopnjach bě hólčk w Landshuće jenož w nohajcach po puću a hižo wjetšu dróhu přeprěčił. Skónčnje wón pěškej napadny, kiž policiju alarmowaše. Ta podarmo za staršimaj hólca pytaše. Jako jeho do chorownje dowjezechu,­ dóńdźe informacija staršeju wo zhubjenym synku. Swójba bě w Landshuće na wopyće. Pjerach bě skradźu z by­dlenja twochnył.

Witam rozsud Sakskeho koparskeho zwjazka, trikoty dwělomneho sponsora zakazać. W tym zwisku sej wysoko wažu, zo je brizancu pada spóznał a prawe konsekwency sćahnył. Jenož tak móžeš fairnosć a tolerancu w sporće wěrjomnje zastupować. Sport wotměwa so we wobłuku swobodneje towaršnosće. Naša towaršnosć jón trjeba a wotpowědnje spěchuje. Štóž tónle wobłuk wopušći, dyrbi tež wo konsekwencach rozmyslować. Planowany sponsoring přez neonacistiski wobchod we Wjelećinje nimam za misnjenje abo jónkrótny podawk, ale za zaměrnu strategiju prawicarjow, kopańcu překisać. Tajkim prócowanjam dyrbimy so ze wšej mocu spřećiwjeć. Zdobom je wažne, zo komuny sportowe towarstwa kaž ST Budyšin při pytanju za kmanymi sponsorami skutkownje podpěraja, zo njeby k tajkim dwělomnym „partnerstwam“ scyła hakle dóšło. Hajko Kozel

... wobkedźbuje wobydlerska iniciatiwa Minority SafePack organizacije FUEN cyły­ rjad konkretnych naprawow za škit narodnych mjeńšin w Europje, kotrež sahaja­ wot regionalneho spěchowanja a podpěry škita rěče a kultury hač k naprawam woprawdźiteho samopostajowanja ludowych sku­pin a mjeńšin přez po­litiske zastupnistwo.

Z připóznaćom tejele iniciatiwy na europskej runinje mamy tež my Serbja jako indigeny lud w Europje móžnosć, sej swoje prawa hišće doraznišo wužadać.

Namołwjam tohodla kóždeho, so na mjenowanej solidariskej akciji Federalistiskeje unije narodnych mjeńšin w Europje wobdźělić.

Podpisajće tež Wy na internetnej platformje pod www.minority-safepack.eu, pósćelće nam wobraz wo was a přidajće cyle skrótka w dwěmaj sadomaj, što je was pohnuło, wobydlersku iniciatiwu Fede­ralistiskeje unije europskich narodnych mjeńšin (FUEN) Minority SafePack za škit narodnych mjeńšin w Europje podpěrać. Waš wobraz a tekst pósćelće k wozjewjenju redakciji Serbskich Nowin najlěpje na e-mai­lowu adresu: .

Spočatk lěta su składnostnje 25. róčnicy rozdźělenja Čěskosłowakskeje federacije a slěborneho jubileja zrodźenja dweju samostatneju republikow jeju nawodni statnicy historiski podawk hódnoćili a so słowa jimali.

Nowy čěski ministerski prezident Andrej Babiš, rodźeny Słowak, je ze swojim słowakskim kolegu Robertom Ficom telefonował. Wobaj staj sej přezjednaj, zo stej jeju krajej nětkole z nadstandardnymi poćahami na wšěch runinach zwjazanej. W přećelskej a wotewrjenej rozmołwje diskutowaštaj wonaj tež wo dalšim zhromadnym dźěle Visegrádskeje štyrki a wo mjezynarodnych institucijach. Babiša je prěni wukrajny wopyt minjeny pjatk tradicionalnje do słowakskeje stolicy Bratislavy wjedł.

Po zwučenym wašnju stej hońtwjerskej drustwje Róžant a Pěskecy prěnju sobotu lěta swoju nowolětnu hońtwu pře­wjedłoj. 42 hońtwjerjow a něhdźe runje telko honjerjow dožiwi w lěsach mjez Róžantom a Pěskecami při wuběrnym słónčnym wjedrje zazběh do lěta 2018. Dohromady su hońtwjerjo dwaj dańkaj a tři sorny třělili. Foto: Tomaš Šołta

Hižo wot časa załoženja Bratrowstwa 1898 je z tradiciju, zo so čłonojo spočatk lěta po „lantagu“, hdyž tehdy čeledź słužbne městno měnješe, k zabawnemu zarjadowanju zetkawaja. Po znowazałoženju towarstwa su 1994 na staru tradiciju nawjazali a ju hač do dźensnišeho pěstuja.

Sulšecy (aha/SN). Městopředsyda towarstwa Handrij Rab witaše hosći minjenu sobotu na mjeztym 24. raz přewjedźeny woblubowany lětny swjedźeń na žurlu Sulšečanskeho kulturneho domu. Kaž kóžde lěto je so předsydstwo Bratrowstwa wo přewšo poradźeny program a wo dobru naladu starało.

Budyšin. Dwaj tydźenjej po hodźoch nětko w mnohich domjacnosćach hodowny štomik z bydlenja rumuja. Při tej składnosći město Budyšin na to skedźbnja, zo móžeš w januaru tón dźeń, hdyž čorne abo zelene wotpadkowe sudobjo wotwožuja, tež štomik darmotnje wotbyć. Tón pak dyrbi na kóždy pad pódla tajkeho wotpadkoweho sudobja stać a na nim nima hižo žana pycha być. Hač do 1,5 metrow wulke štomy w cyłym sobu bjeru, wjetše eksemplary měli so rozrězać. Wot februara dyrbja ludźo štomiki do zelenych wotpadkowych sudobjow rozkuskować.

Pola policije so informować

Rózbork. We wobłuku cyłoněmskeho dnja wysokich šulow informuje zajutřišim, štwórtk, tež wysoka šula sakskeje policije w Rózborku wo swojim dźěle. Wot 10 do 15 hodź. móža so tam zajimcy wo wukubłanskich a powołanskich móžnosćach wobhonić a sej nimo dalšich fachowych­ kabinetow tež kriminalnotechniski kabinet wobhladać.

Při jězoru twarske dźěła planowane

Hamor (AK/SN). Nowu wodosportowu a kupansku sezonu při Bjerwałdskim jězoru Hamorska gmejna tuchwilu zaměrnje přihotuje. Tole rjekny wjesnjanosta Achim Junker (CDU) na wčerawšim posedźenju gmejnskeje rady. Hižo loni w awgusće běchu w Klětnjanskim přistawje přidatne městna za płachtaki a moto­rowe čołmiki přepodali. Tuchwilu pla­nuje tam Łužiska a srjedźoněmska towaršnosć hórnistwoweho zarjadnistwa (LMBV) twarjenje za sanitarne připrawy, kotrež ma po móžnosći hač do kónca lěta hotowe być. Za stanowanišćo na Klětnjanskim přibrjohu pytaja noweho wobhospodarjerja. Hač do 22. decembra móžachu so zajimcy přizjewić. 29. měrca zahaji na Hamorskim boku stanowanišćo „Hwězdny camp“ lětušu sezonu. Wodosportowa sezona na Bjerwałdskim jězoru započnje so 1. apryla a kupanska sezona 15. meje.

Njebjelčicy (JK/SN). Zo so Njebjelčanska gmejna stajnje prócuje přirodnje a regionalnje hospodarić a sej wobswět dołhodobnje čisty zachować, je dawno znate. Wosebite zarjadowanja a aktiwity w minjenych lětach su to nazornje pokazali. Nětko su tam nowu ideju zrodźili. Před pozadkom dźeń a wjetšeho zajima wobydlerjow za regionalne a přirodnje produkowane žiwidła a wudźěłki ratarstwa chce gmejna zhromadnje z akterami zjawneho a politiskeho žiwjenja Sakskeje rjad zarjadowanjow wuhotować, kotrež maja so wěnować biologiskemu a přirodnemu ratarjenju. Nimo toho chcedźa aktiwisća, ke kotrymž słušatej nimo zastupjerjow Njebjelčanskeje gmejny tež Budyska ludowa uniwersita a sakska krajna centrala za politiske kubłanje, za žiwjenje na wsy wabić.

Z busom dale sobu jěć njesměł

Słona Boršć. Dokelž w nocy na póńdźelu wopity a renitentny sobujěducy z busa wulězć nochcyše, zasta šofer krótko po połnocy na Słonoboršćanskim wotpočnišću při awtodróze A 4 a zazwoni poli­ciju. Jako zastojnicy přijědźechu, 25lětny tež jim napřećo agresiwnje wustupowaše, tak zo dyrbjachu młodeho muža sputać, zo bychu jeho změrowali. Alkoholowy test wunjese pola njeho pozdźišo 2,72 promilow. Tole so tež při lěkarskim přepytowanju wobkrući, tak zo sej muža hnydom w chorowni wobchowachu. Bus je do směra na Ingolstadt bjez wopiteho harowaka dale jěł.