Z wudaća: srjeda, 10 januara 2018

Rózbork (SN). Wulka bě loni zahoritosć, zo chce chinski inwestor na arealu lětanišća w Rózborku zawod za elektrowozydła twarić. Nětko zdźěli Zhorjelski krajnoradny zarjad, zo njejsu měsacy trajace jednanja wuspěšne byli. Chinski awtomobilowy dodawar Beijing WKW Automotive wzda so zasydlenja a miliardoweje inwesticije. Kaž ze zdźělenki krajnoradneho zarjada wuchadźa, předewzaće předwidźanu ležownosć njekupi, dokelž je jemu 250 hektarow přemało.

Dokelž mějachu na přestrjeni lětanišća instalowane woltaikowe připrawy wostać, bě wokrjes poskićił płoniny za dalši wutwar a za potencielne doda­wanske zawody powjetšić. Loni 13. decembra su chinskemu inwestorej móžne rozšěrjenje dalši raz w Drježdźanach rozłožili. Ke konkretnemu připrajenju nastupajo kupny wotpohlad inwestora pak njeje bohužel wjace dóšło, wokrjesne zarjadnistwo wobžaruje.

Nowotwar šule w Gołkojcach so dliji, snano pak jenož wo lěto

Choćebuz (SN/MiR). Braniborske kubłanske ministerstwo za kubłanje, młodźinu a sport (MBJS) je nachwilnje wotpokazało, twarić nowu cyłotnu šulu z gymnazialnym wyšim schodźenkom w Gołkojcach (Kolkwitz). Tak je wobzamknjenje wo­krjesneho sejmika Sprjewja-Nysa z 13. decembra 2017 dotal njezwoprawdźomne. „Sym jara zludany a šokowany z hiobskeje powěsće z Podstupima. Wosebje za mnohe wot rozsuda potrjechene dźěći a staršich, w dołhim časowym ramiku wob­dźělene staršiske iniciatiwy kaž tež za sobudźě­łaćerki a sobudźěłaćerjow wo­krjesneho zarjada­ je to hórki dźeń“, rjekny krajny rada Harald Altekrüger (CDU).

Sprawnje prajene, sym sej pod zapřijećom „domjace a zahrodowe čaporowe wiki“, kotrež Krollecy sobotu we Wudworju wotměja, něšto cyle hinašeho předstajił. Wo rostliny w najšěršim zmysle mjenujcy scyła njepóńdźe, kaž dyrbjach tam na wopyće tele dny zwěsćić, wothladajo wot zahrodoweju mašinow. Ćim bóle běch překwapjeny, zo bě Renéjej Krollej prosće přeškoda, zawostajenstwo swojeje njeboh maćerje do črjopjenca ćisnyć. Snano móže něchtó to abo tamne hišće trjebać a změje swoje wjeselo z toho, je zakładna ideja Krollec mandźelskeju. Derje, zo tajke nastajenje w našej wjesnej kónčinje hišće mamy. Přehusto dźě dźensniši dźeń stary čapor na črjopjencu wotbywamy, njehladajo na ideelnu hódnotu, kotruž je bywši wobsedźer w nim widźał. A budźe-li na kóncu­ połojca za dobry zaměr, to čaporowe wiki we Wu­dworju na kóždy pad skulojći. Marian Wjeńka

W Čornym Hodlerju zasydlene přede- wzaće Ratarska zarjadniska a wikowanska tzwr – znate pod němskej skrótšenku LVH – je swojim sobudźěłaćerjam a přećelam tež za lěto 2018 nasćěnowu protyku přepodało. Je to mjeztym hižo pjatnaty lětnik. A wudaće je woprawdźe spo­dobne.

Kaž dotal stajnje bě so zaso Christian Schulze ze Zajdowa wo fotografije po­starał. Wón jako něhdyši předsyda Ho­dlerskeho prodrustwa a znaty domi­znowědnik wubra hłownje ratarske dźěła w blišej wokolinje w běhu lěta. Na wonkownym łopjenu je pohlad na Budyšin, na oktoberskim je Radwor z lětadła zapopadnjeny.

Derje hodźi so tež wobraz Baćońskeho křižerskeho procesiona. Zwje­selace je, zo su teksty k fotam, mjena dnjow a měsacow tež serbsce podate. Wo přełožk bě so tohorunja Zajdowčan Měrćin Kerk po­starał. W impresumje je wupokazane, zo bu protyka w Budyskej firmje Schleppers ćišćana, a to na wysokobłyšćacej papjerje. Wšěm na wudaću wobdźělenym připóznaće za rjanu protyku! Mikławš Krawc

Oświęcim (PŽ/K/SN). 2,1 milion ludźi z mnohich krajow swěta je sej loni ně­hdyše koncentraciske a zaničowanske lěhwo hitlerskeje Němskeje Auschwitz a Auschwitz II-Birkenau wobhladało. Tale ličba je nowy wopytowarski rekord. Přišło bě nimale 50 000 zajimcow wjace hač lěto do toho. Po zdźělenju tamnišeho statneho wopomnišća je najwjace ludźi z Pólskeje sameje było, mjenujcy wjace hač poł miliona. Sćěhuja wopytowarjo z Wulkeje Britaniskeje, USA, Italskeje, Španiskeje, Němskeje, Israela, Francoskeje a Čěskeje.

We wopomnišću płaća wot 2. januara 2018 nowe prawidła. Jako nowosć wu­staja tam zastupjenku­ z mjenom indiwidualneho wopytowarja. Zaměr toho je, spochi přiběraceho wopytowarstwa dla „polěpšić wěstotu na terenje awtentiskeho a ški­taneho městna“, rjekny direktor muzeja Andrzej Kacorzyk. W zašłosći bě k na­kupowanju zastupjenkow ze spe­kulatiwnych motiwow dochadźało, štož poće­žowaše předewšěm wopyty indi­widualnych turistow. Zawjedźenje za­stupnych lisćikow z mjenom ma tomu za­dźěwać.

Toni Ryćer ze Šunowa radźi, hladajo na problemy našeje towaršnosće, tež raz k čěskim susodam pohladać:

Spočatk kóždeho noweho lěta bědźimy so přeco zaso z předewzaćemi, kotrež smy sej z dobrym wotmysłom a hustodosć jara optimistisce nabrěmjenili. We wokomikach suroweje přemocy ćěła nad rozumom wudani so pohlad k susodej, a hižo su indiwidualne njedostatki jako powšitkowne problemy towaršnosće spóznajomne, štož naše poćežene swědomje zaso do pozitiwneho směra diriguje.

Zajimawa nowosć we Wudworskim Krollec zahrodnistwje

Wudwor (SN/MWj). Čaporowych wikow je w běhu lěta wjele a na najwšelakorišich městnach. Zo pak přeprošeja na tajke do zahrodnistwa, je zawěrno wosebitosć a najskerje tež hornjołužiska premjera. Ideju za to měještaj Krollec mandźelskaj Kerstin a René we Wudworju. Mać Renéja Krolla je loni zemrěła a zawostaji wjele domjaceje nadoby, kotraž bě synej a jeho mandźelskej přeškoda, ju prosće preč ćisnyć.

Wohnjowoborne naležnosće su winowatostny nadawk gmejny. Wo njón so dotal kóžda komuna sama za sebje stara. We wobłuku zarjadniskeho zwjazka Při Klóšterskej wodźe pak móhli nětko po nowym puću kročić.

Pančicy-Kukow (SN/MWj). Štož kóžda z pjeć gmejnow zarjadniskeho zwjazka Při Klóšterskej wodźe tuchwilu sama za sebje čini – mjenujcy, zo nastaja wohnjowoborny plan –, dyrbjało so z njewotwisnym posudkom za wšitke pjeć gmejnow zhromadnje zdźěłać. „Jako wjesnjanosća smy sej přezjedni, zo je to zmysłapołne“, rjekny Chróšćanski wjesnjanosta Marko Kliman (CDU) na wčerawšim posedźenju zhromadźizny zarjadniskeho zwjazka. Zwonka dnjoweho porjada nastorčištaj wón a předsyda zwjazka Měrko Domaška zajimawu diskusiju.

Z tajkim njewotwisnym posudkom móhli zwěsćić, kak su wobory zarjadniskeho zwjazka nastajene a kak móhli so cyłkownje widźane dale wuwić. Posudk hodźał so po 75 procentach spěchować. Zbytk by zarjadniski zwjazk přewzał, dokelž dźě bychu wšitke gmejny z toho profitowali, praji Domaška.

Po wšěm Budyskim wokrjesu nastajeja tele dny nowe kontejnery za stare bleše. Dokelž­ je na někotrych městnach tak, zo tam jedyn abo dwaj dnjej scyła žadyn kontejner nimaja, nastawa tu a tam tajki wobraz kaž tule w Spalach, hdźež ludźo swoje stare bleše prosće wotstajeja. Tu pak hišće dlěje traje nowy kontejner nastajić, dokelž­ dyrbja sobudźěłaćerjo bleše najprjedy zrumować. We Wojerecach su nimo toho­ wopačne nalěpki na kontejnery zlěpili, po kotrychž směš bleše hač do 20 hodź. do nich mjetać. Po policajskim porjedźe pak je to jenož hač do 19 hodź. dowolene. Tohodla dyrbja nětko nalěpki wuměnić, štož k přidatnemu časowemu zastatkej wjedźe. Foto: Silke Richter

Kulow. Towarstwa, kluby, dobrowólne wohnjowe wobory kaž tež katolska a ewangelska­ wosada města Kulowa su namołwjene, swoje planowane zjawne zarjadowanja měšćanskemu zarjadnistwu přizjewić, dalokož to hišće činili njejsu. Tak ma so zadźěwać, zo so terminy kopja. Wotpowědne formulary su na internetnej stronje města wozjewjene.

Chór Lipa spěwa w stolicy

Drježdźany. Koncert k rusko-ukrainskemu hodownemu a nowolětnemu swjedźenjej wotměje so njedźelu, 14. januara, w 17 hodź. w Drježdźanskej cyrkwi Třoch kralow. Wosmy koncert tohole razu prezentuje chór Slavica. Nimo ruskeho dźěćaceho chóra Libela su sej tónraz přeprosyli Lipjanow z Pančic-Kukowa. Zastupne lisćiki za dwanaće do 18 eurow dóstanu zajimcy w předpředawanišćach kaž tež internetnje pod www.mzdw.de.

176. serbske blido