Z wudaća: srjeda, 10 januara 2018

Droho telefonowałoj

Budyšin. Zastojnicy Budyskeho awtodróhoweho policajskeho rewěra su zawčerawšim na awtodróze A 4 mjez Zhorjelcom a Drježdźanami 46lětneho wodźerja Škody a 36lětneho šofera nakładneho awta lepili, jako staj jěducy handy wu­žiwałoj. Za to změjetaj wonaj kóždy sto eurow­ pokuty płaćić a dóstanjetaj dypk w Flensburgu. Wot awgusta minjeneho lěta policija přeńdźenja přećiwo tak mjenowanemu zakazej handyja při jězdźenju sylnišo chłosta. A to ma swoju při­činu, přetož změna zakonja wopřijima posłužowanje wšitkich elektroniskich nastrojow za čas jězby, kotrež słuža ko­muni­kaciji, informaciji a organizaciji. Město předwidźaneje pokuty sto eurow dóstanu potrjecheni we wobchodźe hižo dosć dobru rěčensku připrawu.

Róžant (jh/SN). Pjaty nakład nowolětneho pućowanja k Staremu hatej pola Smjerdźaceje su Róžeńčanske swójby minjenu njedźelu přewjedli. Wjace hač dźesać swójbow z Róžanta poda so po dopołdnišej Božej mši pěši na něhdźe tři kilometry dołhu čaru přez lěs k hatej, hdźež běchu Róžeńčanscy hońtwjerjo dźeń do toho nowolětnu hońtwu přewjedli. Stan, kotryž běchu hajnicy tam stajili, móžachu dźěći a starši tuž hnydom wužiwać. Přidawki za obligatorisku gulašowu poliwku pak maćerje z dźěćimi mjeztym druhe lěto sobotu w priwatnej kuchni přihotuja, dokelž běchu sej na premjerje kaž tež tež druhi a třeći raz nimale porsty wotmjerznyli. Nadawk kucharja dósta lětsa René Handrik. Diplomowy inženjer za metalotwar nawari zhromadnje z Pětrom Hrjehorjom, tepjerjom a zamołwitym za woheń, wuběrnu poliwku, kotraž wšitkim jara derje słodźeše. Najwažniši dypk dnja bě so tuž wulce poradźił.

Zaměrowy zwjazk přinošuje k wuwiću turizma na sewjeru Łužicy

Minjene lěta zličichu we łužiskej jězorinje stajnje něhdźe 600 000 přenocowanjow. „Wulka wizija wostawa dale milion přeno­cowanjow wob lěto. Na tym chce jězorinowy zwjazk kruće dźeržeć, a to je docpějomne“, podšmórny nawoda předsydstwa zaměroweho zwjazka Łu­žiska jězorina Braniborskeje Volker Mielchen na njedawnej regionalnej konferency w Hórnikečanskej Energijowej fabrice.

Zaměrowy zwjazk k wuwiću turizma w jězorinje we wulkej měrje přinošuje, Mielchen rjekny. Zaměr je, hač do lěta 2036 jedyn procent wjac přenocowanjow lětnje docpěć. Potenciale widźa zamołwići hłownje we wuwiću turizma za Złokomorowski, Sedlišćanski a Rański jězor. Dołhodobnje je při Złoko­morowskim jězoru (Senftenberger See) 400 000 přenocowanjow na lěto móžnych, je sej nawoda předsydstwa zaměroweho zwjazka wěsty. Při Sedlišćanskim jězoru (Seedlitzer See) móhło jich lětnje 50 000 a při Lejnjanskim (Geiers­walder See) respektiwnje Parcowskim (Partwitzer See) 100 000 być.

Twarska naprawa k rozšěrjenju studnjow­ wot dotal štyrjoch na šěsć a rjedźernja dnowneje wody z brunicowych jamow pola Čorneje Pumpy je wotzamknjena. Kóšty a časowy plan su wšitke wobdźělene předewzaća dodźerž­eli.

Grodk/Sprjejcy (JoS/SN). W Sprjejcach (Spreewitz) maja nětko nowe studnje, kotrež maja do Sprjewicy běžacu zerzawu wodu zběrać­ a filtrować. Twar bě wšitkim zamołwitym wulke wužadanje. Dyrbjachu za to nowe trěbne roły kłasć, štož su wot lěta 2015 činili. Štyri króć prěkowachu dróhu, hdźež su wotpowědne sylne železne roły do zemje kładli. Nowe roły zwjazachu z hižo wobstejacymi pře­dewzaća Łužiska energija a milinarnje (LEAG). Wone transportuja dnownu wodu 4,5 kilometrow hač na industrijnišćo w Čornej Pumpje. Tam ju rjedźa, za čož je LEAG hłownje zamołwita.

W małej sportowej hali Šula „Korla Awgust Kocor“ w Kulowje zetka so spočatk lěta dźewjeć ludosportowych cyłkow, zo by­chu prěni ludosportowy blidote­nisowy turněr 2018 přewjedli. Přepro­šeni běchu w prěnim rjedźe entuziasća z městačka nad Čornym Halštrowom a wokolnych wsow. Organizatoraj běštej TTV Hózk/Kulow 1974 a wotrjad blido­tenis sportoweho towarstwa Módro-běli Kulow.

Po wjacorych hodźinach wubědźowanja za zelenym blidom bě kónčna tabul­ka tajka: 1. DJK Módro-běli Kulow, 2. DJK Módro-běli Kulow II, 3. HZ Kulowc/Róžant, 4. Spale, 5. DJK Módro-běli Kulow III, 6. Dubrjenk, 7. Kulowc II, 8. Židźino, 9. Spale II Werner Müller

Hdyž Franz Korn po Budyšinje čampa, da mnozy pasanća něhdyšeho koparja spó­znaja a z nim pobjesaduja. Korn je mjenujcy za Motor Budyšin w lize NDR hrał a Hornju Łužicu tehdom hódnje zastu­pował. Jeho wosebita sylnosć bě hłójčkowanje. W kruhu sobuhrajerjow (Heldner, Böhme, Köhler, Kraut, Stark a tak dale) staraše so wón wo dobru nala­du. Tež zwonka hrajnišća bě přikład młodźinje a lubušk publikuma. Tak sta so Młynkec łuka jeho druha domizna.

W rentnarskej starobje je wokoło Franza Korna měr zaćahnył. Z mandźelskej Ingrid bydli wón w domje blisko Budyskeho Třělnišća.

Korn njeměješe žane lochke dźěćatstwo, dokelž přisłušeše narodnej mjeńšinje Němskich Madźarow, kotrychž běchu po sćěhach Druheje swětoweje wójny hač do lěta 1948 z domizny, małeje wsy Deutschhütten (Németbánya) w horinach Bakony wuhnali. Z něhdźe 180 madźarskoněmskimi swójbami běchu tež Kornecy do wokrjesa Budyšin přišli.

Prěnje volleyballowe mustwo muži Sporto­­weho towarstwa Marijina hwězda, třeći wokrjesneje klasy-stafla wuchod, hraje jutře w swójskej hali přećiwo Sokolni­kej Wjazońca (druhi tabulki, w 19 hodź.) a ST Budyšin sewjer (načolnik, w 20 hodź). Z wuspěchomaj přećiwo načolnymaj cył­ko­maj móhli Pančičenjo wotstawk štyrjoch dypkow pomjeńšić.

Natwar Němske Pazlicy přeproša na bulowu nóc, kotruž přewjedu koparjo, starši hač 35 lět, 19. januara wot 18.45 hodź. w sportowni při Kamjenskim lětanišću. Mjez dźesać cyłkami budźe lětsa prěni raz mustwo z Barta. Dale hraja Statistika Němske Pazlicy, Natwar Němske Pazlicy I a II, Přećelski kruh Natwar Němske Paz­licy, Lok Kamjenc/Natwar Němske Pazlicy, ST Marijina hwězda, SJ Njebjelčicy, Jed­nota Kamjenc, ST Běła/Cunnersdorf.

Zakitowar titula je prěnje zastupnistwo Natwar Němske Pazlicy. Kónčnu hru změja w Kamjencu zaso wokoło połnocy Kilian Hrjehor