Z wudaća: štwórtk, 11 januara 2018

štwórtk, 11 januara 2018 13:00

Premierka znjezbožiła

Saarbrücken/Berlin (dpa/SN). Posaarska ministerska prezidentka Annegret Kramp-Karrenbauer je so dźensa rano při wobchadnym njezbožu zraniła. Słužbny wóz politikarki CDU bě wokoło 4.30 hodź. na awtodróze A 10 njedaloko Podstupimskeho awtodróhoweho třiróžka do nakładneho awta zrazył, kaž rěčnica policajskeho prezidija zdźěli. Politikarku su na to zhromadnje z třomi sobujěducymi zranjenu do Podstupimskeje chornje dowjezli. Kramp-Karrenbauer bě po puću do Berlina na sonděrowanske rozmołwy z SPD wo wutworjenju knježerstwa. Po informacijach jeje rěčnicy je premierka snadnje zranjena. Přičinu njezboža hišće přepytuja. Wčera wječor bě 55lětna w Saarbrückenje hosćićelka nowolětneho přijeća z 1 800 hosćimi.

wozjewjene w: Kraj a swět
štwórtk, 11 januara 2018 13:00

Rozsudny dźeń sonděrowanja wo koaliciji

Berlin (dpa/SN). Pjeć dnjow po zahajenju chcychu CDU, CSU a SPD dźensa sonděrowanske rozmołwy wo dalewjedźenju wulkeje koalicije wotzamknyć. Plano­wane běchu posedźenja centralnych dźěłowych­ skupin runje tak kaž zeńdźenja stronskich a frakciskich předsydow w małym kole a posedźenja jednaćelow we wulkim kole. Najwjetše problemy drje wobjednawaja hač do pózdnjeje nocy. Hač doposledka běchu zasadne prašenja dawkoweje a financneje politiki kaž tež wažne rozsudy we wobłuku migracije, dźěłowych wikow, strowotnistwa, hladanja, rentow a Europy hišće wotewrjene.

Na kóncu chcedźa wobdźělnicy jednanskich skupin wokoło zwjazkoweje kanclerki a předsydki CDU Angele Merkel, šefa SPD Martina Schulza a předsydy CSU Horsta Seehofera lisćinu z wuslědkami předpołožić. Rozsudne pak budźe, hač maja socialdemokraća wuslědki jednanjow při z jeje wida wažnych temach za dosahace, na přikład w prašenju sprawnišeho rozdźělenja zamóženja.

wozjewjene w: Kraj a swět
štwórtk, 11 januara 2018 13:00

W Berlinje na Łužicu njezabyć

Klimowa a strukturna změna dwě stronje samsneje medalje

Choćebuz (SN/at). „Łužica njeje a njebě ženje skiwlacy region, ale hordy.“ Słowa braniborskeho ministerskeho prezidenta Dietmara Woidki (SPD) wčera na nowolětnym přijeću města Choćebuza rěčachu mnohim přitomnym z wutroby. A premier bě sej wěsty, zo „dyrbi tele město region zaso bóle nawjedować“. A to wosebje pod njelochkimi wužadanjemi předstejaceje strukturneje změny. Dietmar Woidke žada sej tohodla wotnožku zwjazkoweje towaršnosće za planowanje a twar dalnodróhow njezasydlić w Bayerskej, ale we Łužicy. To wotpowěduje žadanju noweje hospodarskeje towaršnosće Łužica za zwjazkowymi zarjadami a wědomostnymi zarjadnišćemi, kotrež přinjesu na přichod orientowane a derje zapłaćene dźěłowe městna do regiona. Zdobom wobkrući Woidke wusku zhromadnosć nastupajo přichodne wuwiće Delnjeje a Hornjeje Łužicy tež z nowym sakskim ministerskim prezidentom Michaeolom Kretschmerom (CDU).

wozjewjene w: Kraj a swět
štwórtk, 11 januara 2018 13:00

Začuwana wěstota

Wobdźělnicy nowolětneho přijeća města Choćebuza so wčera wječor njemało dźiwachu, jako słyšachu přez wótřerěčaki na wulkej žurli měšćanskeje hale naraz alarmowy signal z namołwu, rumnosć a twarjenje wopušćić. Přičina ewakuacije njebě jasna, a ludźo myslachu skerje na hłupy žort hač na woprawdźite wohroženje. Wotpowědnje so tuž hibachu, a mnozy sej hišće swój płašć z garderoby wotewzachu. Bórze wšak jich wróćo wołachu. Wobdźělnicy so znowa na swoje městna zesydachu a zhonichu, zo bě warjak cateringoweje firmy alarm zbudźił. Nastroj bu na to wotpinjeny. Zhladujo na tónle podawk so wězo prašeš, hač bychu ludźo runje tak reagowali, by-li přičina alarma jich žiwjenje chutnje wohrozyła. A kak by so kóždy/kóžda z nas w tajkim połoženju zadźeržał/a? W teoriji su trěbne jednanja zwjetša­ jasne. Ale damy so w rozsudnym wokomiku druhdy mylnje wot wopak začuwaneje­ wěstoty wobwliwować? Axel Arlt

wozjewjene w: Kraj a swět

Berlin (AW/SN). Swoju diplomatisku misiju­ w Zwjazkowej republice Němskej zakónči po sydom lětach skutkowanja wulkopósłanc Ruskeje federacije Wladimir Michajlowič Grinin. Wčera popoł­dnju přeprosy wón do domu ruskeho wulkopósłanstwa w Berlinje Pod lipami na rozžohnowanske přijeće. Na nim wobdźělichu so wysocy politikarjo zwjaz­koweje republiki, w Berlinje akre­ditowani diplomaća druhich krajow, předewzaćeljo,­ kulturnicy a zastupjerjo towaršnostnych organizacijow. Woni wupřachu wysokemu diplomatej, kiž bě w nowembru 70. narodniny woswjećił, do dalšeho skutkowanja wšo najlěpše.

wozjewjene w: Kraj a swět
štwórtk, 11 januara 2018 13:00

Přestawka za Babiša

Praha (ČŽ/K/SN). Premier mjeńšinoweho knježerstwa ANO Andrej Babiš drje w sejmje wčera nazhoni, zo wón dowěru njedóstanje, wothłosowanje wo tym bu pak na 16. januar přestorčene. ANO a ODS chcetej, zo wuswětla so nowe spóznaća w kawsy Baćonjaceho hnězda, do kotrejež je Babiš pječa zaplećeny. Prezident Miloš Zeman w debaće poruči, knježerstwu dowěru wuprajić. Zdobom wón zdźěli, zo powoła šefa ANO znowa za premiera, ale jenož potom, hdyž předpołoži jemu pisomne a podpisane při­lubjenja znajmjeńša 101 zapósłanca, zo wupraja Babišej dowěru. Zawodnje wabješe Babiš ze swojim knježerstwowym programom wo připóznaće. Preambla naspomnja priority, na přikład změnu rentoweho systema, europsku agendu, digitalizaciju stata, strategiski inwesticiski program, zesylnjenje wěstoty a reformu stata. Senioram a studentam přilubja wona darmotne jězby z ćahom. Wotmysleny je wustawowy zakoń wo powšitkownym referendumje, štož je jedyn z klučowych dypkow programa hibanja SPD. Dokument naspomnja tež přihoty zakonja wo socialnych bydlenjach.

wozjewjene w: Słowjanski wukraj
Transportej wojerskich tankow na awtodróze A 4 je policija zawčerawšim dalšu jězbu zakazała. Pólska spediciska firma měješe w nadawku wójska USA šěsć ameriskich tankow typa M 109 do Němskeje dowjezć. Při kontroli pola Słoneje Boršće so wukopa, zo pobrachowachu transportne dokumenty, wuwzaćne dowolnosće a přewodźenske jězdźidła. Nimo toho běchu tanki za nakładne awta hač do 16 tonow přećežke a přešěroke. Foto: Christian Essler

wozjewjene w: Łužica
štwórtk, 11 januara 2018 13:00

Organizuje, za čož so sam zahorja

Zo je minjenu njedźelu na Horje w Bóščanskej gmejnje zymske zetkanje přećelow oldtimerow mjez něhdźe tysac ­wopytowarjemi přewšo wulke připóznaće žnjało, je w prěnim rjedźe­ zasłužba Marija Ryćerja. Štwórte tajke zetkanje bě tamniši klub přećelow wlečakow mjeztym organizował. Wot časa załoženja je 47lětny Horjan předsyda 45 čłonow wopřijaceho cyłka.

W žiwjenjoběhu Marija Ryćerja ničo njewšědneho na to njepokazuje, hdźe a na kotre wašnje je sej přiswojił wob­dźiwanja­hódne organizatoriske kmanosće. 1970 w Nowej Jaseńcy rodźeny chodźeše prěnje lěta w Bóšicach a hač do 8. lětnika w Njeswačidle do šule. W Budyšinje nawukny powołanje rěznika. Jako tajki dźěłaše hač do oktobra minjeneho lěta w Budyskim Wjenkec rěznistwje, kotrež wudźeržuje na Horje swójsku rězarnju. Mjeztym dźěła Ryćer we Wětrowskim zawodźe Mammut.

wozjewjene w: Towarstwa
štwórtk, 11 januara 2018 13:00

Spěšny internet za wšěch

Gmejna Trjebin nadźija so stoprocentneho spěchowanja

Trjebin (AK/SN). Wutwar spěšneho in­terneta za cyłu komunu je dale wulki zaměr gmejny Trjebin. Cyłkownje płaći projekt něhdźe 386 000 eurow. Gmejnscy radźićeljo su na swojim wčerawšim po­sedźenju jednohłósnje wobzamkli, za to 38 000 eurow swójskich srědkow do hospodarskeho plana zapisać. Financować móža to dźakowano přidatnym do­chodam z přemysłoweho dawka 2017. „Běchmy ze 175 000 eurami dochodow planowali, dóstali smy hač do kónca lěta 315 000 eurow“, rozłoži komornica Carmen­ Petrick zwjeselace wuwiće srjedźołužiskeje komuny.­

wozjewjene w: Łužica
štwórtk, 11 januara 2018 13:00

Policija (11.01.18)

Wobšudźić spytali

Běła Woda. Dohromady dźewjeć razow su njeznaći w Běłej Wodźe a we wokolinje spytali, wobydlerjam z trikom nahladne sumy pjenjez wulišćić. Tak prošachu woni na přikład jako „wnučkojo“ telefonisce wo 15 000 eurow. Na zbožo so trik w žanym padźe šlachćił njeje.

Młodostny so wobarał

Wojerecy. Jako policija zawčerawšim wječor na Wojerowskim Łužiskim naměsće skupinu ludźi kontrolowaše, bě tam tohorunja 15lětny młodostny, za kotrymž hižo pytachu, dokelž bě doma ćeknył. Tón pak so tak mócnje wobaraše, a dyrbjachu jemu ruce sputać, zo móhli jeho staršimaj přepodać. Kajke tele zasowidźenje skónčnje bě, bohužel znate njeje.

wozjewjene w: Policija

Serbska debata

nowostki LND