Z wudaća: štwórtk, 08 februara 2018

Berlin (dpa/SN). Přichodna předsydka SPD Andrea Nahles je přeswědčena, zo čłonojo strony wčera wujednanemu koaliciskemu zrěčenju z CDU a CSU přihłosuja. Zawěsće „njebudźe to lochko“, rjekny wona w Berlinje. Přiwšěm wona z toho wuchadźa, zo wjetšina wšěch 460 000 čłonow strony z „haj“ hłosuje, rjekny 47lětna Nahles wčera w sćelaku ZDF. Dojednanje ma socialdemokratiski charakter, frakciska předsydka wuzběhny. Wona chcyła z dotalnym předsydu Martinom Schulzom po Němskej jězdźić a za přihłosowanje bazy wabić. To je jej „samo­zrozumliwe“. Schulz bě do toho připo­wědźił, zo chce so z wonkownym mi­nistrom stać a zastojnstwo stronskeho předsydy złožić. Andrea Nahles měła předsydstwo strony přewzać.

Mjeztym je zwjazkowa kanclerka Angela Merkel (CDU) mjez čłonami frakcije unije w zwjazkowym sejmje wo zrozumjenje za to prosyła, zo budźe financne ministerstwo přichodnje wot SPD nawjedowane. Wona rěčeše w tym zwisku wo „bolostnym ale trěbnym kompromisu“.

Sakski ministerski prezident Kretschmer strukturnu změnu přewodźa

Hamor (AK/SN). Sakski ministerski prezident Michael Kretschmer (CDU) nima kruty, zawjazowacy termin zakónčenja wudobywanja brunicy tuchwilu za realistiski. „Z mojeho wida je přirodny datum docpěty, hdyž je brunica we wuhlowych jamach přetrjebana“ rjekny wón wčera při swojim wopyće we Wochožanskej brunicowej jamje zastupnikam energijoweho zastaraćela LEAG. „Trjebamy brunicu dale jako zapłaćomneho nošerja energije. Wona­ zaruča nam spušćomne zastaranje z milinu.“ Z tutym wuprajenjom ministerski prezident zdobom rewěrowy koncept LEAG podpěrowaše, kotryž běchu ­loni w měrcu předstajili. Po nim chcedźa Miłoraz wotbagrować a 220 wobydlerjow přesydlić.

Hoberska dźěra na awtodróze A20 njedaloko mecklenburgsko-předpomorskeho Tribsesa je dźeń a wjetša. Mjeztym je so­ wona wot spočatnje 40 na 95 metrow rozšěriła, wobchadne ministerstwo w Schwerinje zdźěli. Jězdnja bě so kónc septembra na wjacorych metrach sypnyła. Něšto tydźenjow pozdźišo dyrbjachu awtodróhu dospołnje zawrěć. Hłowna přičina je poch (Torf) pod awtodróhu, kotryz njeběchu drje při twarje dosć wobkedźbowali. W nalěću chcedźa twarske dźěła k wuporjedźenju zahajić.

Dypkownje w 11.11 hodź. je so dźensa we wjacorych městach póstniski čas zahajił. W Düsseldorfje wobsadźichu předrasćene žony radnicu. Tež w Kölnje a Mainzu so póstniske nory zhromadźichu. Přiwótřenych wěstotnych naprawow dla dyrbja karnewalowe kluby lětsa wjace pjenjez nałožić hač hewak.

Powěsć wčerawšeho dnja njebě dojednanje CDU, SPD a CSU na koaliciske zrěčenje za nowe knježerstwo, ale připowědź Martina Schulza, zo chce zastojnstwo předsydy SPD złožić a do rukow Andreje Nahles połožić. Dalši raz Schulz swojich stronjanow zamyli. Lěto je wón socialdemokratam předsydarił. Symptomatiske za njeho su njejapke přewróty we wažnych pozicijach. Chcyše stronu do opozicije wjezć, steji pak nětko krótko do třećeje wulkeje koalicije. Chcyše so ministerskeho zastojnstwa wzdać, ma pak nětko wšě wuhlady stać so z wonkownym ministrom. Připowědźeny wotstup jako stronski předsyda trjechi SPD znowa we wopačnym wokomiku. Wězo je prawje tajke zastojnstwo młódšim dowěrić. Wšitko pak za swój čas. Rozsudne za Schulza a jeho nawodne mustwo dyrbjało być, stronsku bazu wo prawosći wujednaneho koaliciskeho zrěčenja přeswědčić. Nětk hrozy personalna debata wažnišu temu pokłasć. Što to dyrbi? Axel Arlt

Grodk (JoS/SN). W radnicy města Grodka předstajichu zjawnosći spočatk měsaca­ archiwalije, kotrež bě Braniborski krajny hłowny archiw w Lubinje Grodkowskemu měšćanskemu archiwej wróćił. Tak su so historiske akty po wjace hač 30 lětach nawróćili. Móžno bě to dźakowano lońšemu dojednanju wo přewzaću aktow mjez fachowym wobłukom „nutřkowny serwis“ a Grodkowskej radnicu. Zo móhli historiski wobstatk aktow we wobydlerskim domje wotpowědnje składować, su na přikład rumnosće klima­tizowali. Loni 10. oktobra bě transport z wjace hač 3 000 aktami z Lubina do Grodka dojěł.

Kaž druhe města steješe tež Grodk wot spočatka 1970tych lět pod wulkim ćišćom nastupajo rjadowane a zawěsćene składowanje historiskeho archiwoweho wobstatka. Hač do lěta 1972 ležachu dokumenty­ na hornjej łubi radnicy. Hač do junija 1982 składowachu je w starym fabrikskim twarjenju a po tym we wili něhdyšeho fabrikanta, kotraž pak bě wobydlena­. Lěta 1986 wotzamknychu Grodkowčenjo zrěčenje z Podstupimskim statnym archiwom, štož bě zakład składowanja aktow w Lubinje.

Suche a słónčne zymske wjedro wužiwa tele dny něchtóžkuli za to, w swojim lěsu za prawym hladać a škody njedawneho orkana „Friederike“ wotstronić. W lěsu mjez Smjerdźacej a Bušenku, kotryž słuša klóštrej Marijinej hwězdźe, dźěłaše wčera Konrad Žurk z Bjaršec lěsniskeho zawoda z ćežkej techniku. Foto: Feliks Haza

W Barće prócuje so spěchowanske towarstwo wo nowe zwony za tamnišu cyrkej. Za to wuwiwaja najwšelakoriše ideje, kotrež běchu loni dosć wuspěšne, kaž wčera bilancowachu.

Bart (CS/SN). Lětsa nazymu maja so twarske dźěła na zwóńcy Bartskeje cyrk­winskeje wěže zahajić. Ale hdy dokładnje wotwisuje wo toho, hdy tam njetopyrje wućahnu. Tole rjekny předsyda zwony spěchowaceho towarstwa Bernd Lorenz na wčerawšej sobustawskej zhromadźi­znje. Wón pak je optimistiski, zo móža so potom wšitke trěbne dźěła po planje přewjesć­ a zo nowej zwonaj w lěće 2019 po­swjeća. Loni je towarstwo wjace hač 11 000 eurow nazběrało. Wosebje wuspěšne běchu akcije kołowokoło Bartskich adwentnych wikow, jako mějachu nimale 1 500 eurow dochodow. Mjez druhim běchu 15 swěčkowych wobłukow z motiwom Barta zhotowili. Te pak běchu nablaku wupředate, tak zo dyrbjachu přidatne skazanki přijimać. Samo swójba von Lippe Weißenfels z Düsseldorfa je tajki wobłuk skazała. Wjace hač 8 000 eurow je towarstwo darjene dó­stało, beneficny gospelowy koncert je nimale­ tysac eurow wunjesł.

Gmejna Hamor inwestuje do wěstoty při Bjerwałdskim jězoru

Hamor (AK/SN). Žołmy łamace připrawy při Hamorskim, Klětnjanskim a Delnjowujězdźanskim přibrjohu Bjerwałdskeho jězora chce Hamorska gmejna tak wu­hotować, zo wone tež w padźe wulkich wichorow funguja. Čłonojo tamnišeje gmejnskeje rady na swojim zašłym po­sedźenju wobzamknychu, najprjedy připrawy na Klětnjanskim boku sporjedźeć. Wotpowědny nadawk we wobjimje 22 000 eurow dósta předewzaće z Rib­nitza-Damgartena. Za tydźeń maja so dźěła zahajić a spočatk wodosportoweje sezony 1. apryla hotowe być.

8.2.2018 – 14.02.2018 Budyski fil­mowy palast: Fifty Shades of Grey – Befreite Lust: wšědnje 13:45, 17:00, 19:45 a 20:30 (nimo pó) | pj a so 22:45 Die kleine Hexe: wšědnje 14:45 a 16:00 (nimo pó) | wu a srj 9:30 | nj, wu a srj 12:30 | pó 16:45 Hilfe, ich hab meine Eltern geschrumpft: wšědnje 16:15 | wu a srj 9:30 Paddington 2: wu a srj 10:00 Ferdinand – Geht ­STIERisch ab!: wšědnje 14:30 | wu a srj 9:30 Wunder: wšědnje 14:00 a 20:30 Hot Dog: wšědnje 18:15 (nimo nj a pó) Insidious – The Last Key: pj a so 23:00 Coco – Lebendiger als das Leben: nj, wu a srj 11:30 Dieses bescheuerte Herz: wšědnje 18:15 Greatest Showman: pj a so 23:00 Star Wars: Die letzten Jedi: nj, wu a srj 11:30 Jumanji – Willkommen im Dschungel: nj, wu a srj 11:45 Maze Runner: wšědnje 16:45 (nimo pó) Maze Runner w 3 D: wšědnje 19:30 | pj a so 22:30

Kino-ekstra: Aus dem Nichts: pó 17:15 a 20:15 | nj 18:15

Pančicy-Kukow (SN/MWj). Dźěłowa skupina za přihoty lětušeho klóšterskeho a swójbneho swjedźenja w Pančicach-Kukowje je so na to dojednała, termin přizjewjenja za kulturne skupiny a towarstwa wot kónca februara na kónc měrca podlěšić. Kaž w nowinskej zdźělence Křesćansko-socialneho kubłanskeho skutka rěka, ma to předewšěm na dobro tych skupin być, kotrež hakle nětko swoje lětuše zhromadne terminy koordinuja. Nowy termin płaći za wšitke towarstwa, spěwne cyłki, rejwanske skupiny, kapały a za solistow.­ Za rjemjeslnikow a přemysłownikow, kotřiž chcedźa so na klóšterskich a přirodowych wikach wobdźělić, płaći dotalny přizjewjenski termin kónc februara.