Z wudaća: štwórtk, 08 februara 2018

Budyšin. Sakski justicny minister Sebastian Gemkow (CDU) zapokaza jutře, pjatk, Franka Hiekela jako noweho nawodu Budyskeho jastwa. Hiekel, wjelelětny nawoda Zhorjelskeho jastwa, je wot lońšeho 1. decembra jako šef Budyskeho zarjadnišća pomjenowany. Jeho předchadnika Bernharda Beckmanna rozžohnuja na wuměnk. Budyske jastwo ma 422 městnow za jatych a je jeničke Sakskeje, hdźež móža potrjechenych tež po skónčenju jatby we wěstotnej jatbje zaměstnić. Za to maja 40 městnow.

Wosebitu prózdninsku dźěłarničku poskićuje Kamjenski Lessingowy muzej 22. februara. W tamnišim Röhrmeisterowym domje móža dźěći w starobje wosom do 13 lět nawuknyć, kak maja so siluetowe wutřihanki prawje zhotowić. Tale technika bě we 18. lětstotku jara rozšěrjena, jako hišće nichtó na fotografowanje myslił njeje, njerěčo wo handyjach. Pod nawodom Christiany Latendorf z Drježdźan mali wobdźělnicy z ćmoweje a běłeje papjery swoje najlubše zwěrjo wutřihaja a je zaramikuja. Dźěłarnička wotměje so w času wot 9 do 15 hodź. a płaći na wobdźělnika wosom eurow. Praktikantka muzeja Elisabeth Goncharov při přihotach prózdninskeho zarjadowanja­ pomha. Foto: Elke Handrick

Pytany Audi na awće ADAC

Słona Boršć. Na awtodróhowym wotpočnišću při A 4 do směra na Zhorjelc napadny policiji wčera transporter ADAC, na kotrymž bě Audi A4 cabriolet nakładowany. Kontrolujo čisło Audija so zastojnicy njemało dźiwachu, zo so za awtom pyta. Sobudźěłaćer ADAC pak móžeše njewšědne wobstejnosće spěšnje rozrisać. Awto bu w Němskej pokradnjene a w Pólskej zaso namakane. W nadawku pólskeho statneho rěčnistwa měješe ADAC nadawk, jězdźidło wobsedźerjej wróćić. Dokelž měješe sobudźěłaćer we wuchodnej Sakskej dalše nadawki spjelnić, bě tež wuslědźene, čehodla jeho jězba znowa do směra na Pólsku wjedźeše. Ručež wobsedźer swój Audi zaso změje, so awto z pytanskich lisćinow policije šmórnje.

Paduch nětko w jastwje

Kamjenc. 36lětneho muža je kupnicowy detektiw zawčerawšim w Kamjencu lepił. Přiwołana policija zwěsći, zo njeje wón prěni raz kradnył a zo přećiwo njemu přikaz zajeća předleži. Tuž dowjezechu jeho do jastwa.

Wječorny program SLA lětsa pisana lišča hóńtwa po cyłym swěće

Lětuši wječorny ptačokwasny program Serbskeho ludoweho ansambla z titulom „Po serbskich slědach“ je dotal jara dobry wothłós žnjał, žurle w Delnjej a Hornjej Łužicy běchu zwjetša kopate połne. Awtorej Witej Bejmakej, režiserej Marianej Bulankej, komponistej (a hudźbnemu nawodźe) Andreasej Pabstej kaž tež choreografomaj Miji Facchinelli a Kornelej Kolembusej je so pisana a zabawna spěwohra poradźiła, kotruž hrajerjo, spě­warjo, rejwarjo a hudźbnicy přeswěd­čiwje předstajeja.

Wosebje wuzběhnyć ma so nimale minimalistiske wuhotowanje. Mirosław Nowotny wuńdźe bjezmała bjez rekwizitow, a jeho jewišćowy wobraz zepěra so na tři, přez abstrahěrowane animěrowane projekcije wobswětlene płoniny.

Serbska odyseja

Prěnja wustajeńca lětsa w Choćebuskim Serbskim domje pokazuje mólby a grafiki wuměłče Marion Kwicojc. Na wernisaži­ překwapi wona k tomu jako­ spěwarka a multiinstrumen­ta­listka.

„Reja do raja“ je hesło prěnjeje lětušeje wustajeńcy w Choćebuskim Serbskim domje, kotruž je kaž přeco Serbska kulturna informacija Lodka organizowała. Něhdźe połsta hosći móžachu na jeje wotewrjenju 25. januara witać.

Tónraz ma serbska molerka, ilustratorka a grafikarka, wot lěta 1997 jako swobodna wuměłča skutkowaca Marion Kwicojc z Lipska móžnosć, swoje wobrazy w Delnjej Łužicy wustajeć. Mjez dwaceći wuměłskimi twórbami – po połojcy mólby a tušowe grafiki – stej dwě hakle njedawno nastatej, kotrejž pokazujetej zapust młodźiny w Běłej Górje.

ST Marijina hwězda – Natwar Něm­ske Pazlicy 1:1 (1:0)

Zestawa domjacych: O. Schmidt – Wróbl, Škoda, Rab, K. Pakoßnick (78. Czapik), P. Schmidt, Kuring, Hawš, Peschmann, El­dor (65. Čornak), J. Pakoßnick (86. Prasse)

Dokelž dyrbjachu zamołwići loni w de­cembru poslednju hru prěnjeje połserije wotprajić, nachwatachu koparjo ST Marijineje hwězdy a Natwara Němske Pazlicy derby nětko tydźeń do zazběha druheje poł­serije.

Kopańca, wokrjesna liga, stafla II

Rakecy II – Nadrózna Hrabowka 2 :0  (1:0)

ST Marijina hwězda – Natwar Němske Pazlicy  1 :1  (1:0)

1. Natw. Němske Pazlicy 15 51 : 13 35

2. ST Lubuš 15 37 : 19 34

3. SV Haselbachtal 15 49 : 23 31

4. ST Marijina hwězda 15 36 : 17 29

5. HZ Łaz/Běły Chołmc 15 35 : 20 29

6. ST Wulka Dubrawa 15 35 : 36 23

7. SJ Njebjelčicy 15 24 : 26 23

8. FSV Łuty 15 29 : 34 23

9. Nowe Město II 15 28 : 32 21

10. Wojerowski FC II 15 28 : 28 20

11. Rakečanske ST II 15 23 : 29 20

12. ST Ćisk II 15 25 : 32 16

13. HZ Wulke Ždźary 15 16 : 30 12

14. ST Nadr. Hrabowka 15 26 : 42 10

15. SJ Chrósćicy II 15 20 : 55 8

16. Zeleno-běli Sepicy 15 12 : 38 7

wokrjesna klasa, stafla I

ST Wjelećin II – HZ Minakał/Wulka Dubrawa/Radwor  3 :4   (2:0)

čoło tabulki

1. ST Budyšin II 11 42 : 15 27

2. ST Mały Wosyk 11 32 : 17 25

3. ST Bart 11 29 : 16 22

4. Módro-běli Njeswačidło 11 28 : 17 20

5. ST Mały Wjelkow 11 25 : 29 20

6. ST Wjelećin II 11 22 : 22 18

Regionalny koparski ligist Budissa Budyšin je z dalšim koparjom zrěčenje podlěšił. Z Pavelom Patku wostanje nošacy stołp mustwa za dalše dwě lěće w Budyšinje. Patka bě spočatk sezony 2013/2014 z Čěskeje Lipy do sprjewineho města přišoł. Po nětko hižo pjeć hrajnych časach je sympatiski Čech swoje zrěčenje wo dalšej dwě lěće hač do kónca sezony 2019/2020 podlěšił.

Pavel Patka je po słužbnych lětach najstarši hrajer w teamje Budissy Budyšin. Jurij Bjeńš