Z wudaća: póndźela, 12 februara 2018

póndźela, 12 februara 2018 13:00

Krótkopowěsće (12.02.18)

Ze židowskimi wosadami rěčał

Drježdźany. Sakski ministerski prezident Michael Kretschmer (CDU) zetka so dźensa ze zastupjerjemi židowskich wosadow w Drježdźanach, Kamjenicy a Lipsku we wosadnym centrumje Noweje synagogi w krajnej stolicy. Štyri njedźele po rozmołwje z ewangelskimi a katolskimi biskopami je sej Kretsch­mer nastupajo wšelake aktualne temy ze židowskimi zastupjerjemi mysle wuměnjał.

Wjace personala w kubłanišćach

Drježdźany. 37 729 sobudźěłaćerjow je loni 1. měrca w sakskich dźěćacych dnjowych přebywanišćach skutkowało. Tole zdźěla dźensa Sakski krajny zarjad za statistiku. 33 409 ludźi dźěłaše tam jako­ pedagogiski, personal w nawod­nistwje a zarjadnistwje, 4 320 we wobłuku domjacnosć a technika.

Pjatnaće projektow zapodatych

wozjewjene w: Krótkopowěsće
Z wjace hač 90 wobrazami ćehnješe sobotu popołdnju póstniski ćah žonow po Kulowje. Pod hesłom „Swět je cirkus“ bě sej tež wjele serbskich žonow pisane kostimy zešiło a prezentowaše je wulkej ličbje přihladowarjow. Žony su so tohorunja na dźens­nišim róžowopóndźelnym ćahu w Kulowje wobdźělili (hlej tež 4. stronu). Foto: Gernot Menzel

wozjewjene w: Łužica
póndźela, 12 februara 2018 13:00

Ptačokwasnej programaj SLA wulki wuspěch

Budyšin (SN/bn). Lětuši wječorny ptačokwasny program Serbskeho ludoweho ansambla „Po serbskich slědach“ je so wčera na wospjet wupředatej žurli SLA z wuspěšnym poslednim předstajenjom skónčił. Wulkeho naprašowanja dla běchu zarjadowarjo krótkodobnje přidatne předstajenje organizowali, tak zo su inscenaciju cyłkownje 13 město spočatnje planowanych dwanaće króć pokazali.

wozjewjene w: Kultura
póndźela, 12 februara 2018 13:00

Ideje bjez wobmjezowanja

Projekty 48hodźinskeje akcije maja kreatiwitu młodostnych budźić

Budyšin (SN/MiR). Lětuša 48hodźinska akcija, kotraž wotměje so wot 8. do 10. junija, wabi młodźinu wospjet do kreatiwity. Wšako je tajka we wšěch socialno-kulturnych wobłukach móžna. Projekty maja zaměr, wšědne a wólnočasne poskitki na wsach wobohaćić a polěpšić. Hač do 15. apryla móža so zajimcy pod www.48h-bautzen.de přizjewić. W cyłku je jich sydom socialnych akterow akcije w Budyskim wokrjesu. Jako zamołwita za serbski sydlenski rum je mjez nimi socialna dźěłaćerka serbskeho młodźinskeho socialneho teama w Rěčnym centrumje WITAJ Marija Koklina. Za město Budyšin a region sewjerowuchodnje města je to Sofija Delanec z Budyskeho Kamjentneho domu.

wozjewjene w: Kubłanje
póndźela, 12 februara 2018 13:00

Njeznatemu awtorej so wěnowali

Jurij Winger (1872–1918) je w Serbach skerje njeznaty. Tak wěnowaše jemu Towarstwo přećelow Smolerjec kniharnje zańdźeny štwórtk wosebity literarny wječork w kniharni Ludoweho nakładnistwa Domowina.

Budyšin (SN/MiR). „Jurij Winger je krasnu serbšćinu wužiwał“, wuzběhny předsyda towarstwa dr. Franc Šěn nimale na kóncu wosebiteho wječorka. „To pak njeje dźensa hižo wulkej ličbje ludźi znate.“ Dr. Šěn bě so nadrobnje z pismowstwom serbskeho fararja, spisowaćela a přełožowarja zaběrał a za jeho spisami slědźił, štož njebě runjewon lochko. Wšako bě Jurij Winger swoje teksty často jeno z „JW“ signował abo scyła nic. Tak njehodźa so husto jasnje jako Wingerowe identifikować. Skerje namakaja so jeho teksty po analyzy wašnja pisanja. Tež listowanje z rowjenkami Jurja Wingera to a tamne přeradźa.

wozjewjene w: Towarstwa
póndźela, 12 februara 2018 13:00

Peiffer před Krčmářom dobył

Jeho trenar bě wo wuspěchu Arnda Peiffera přeswědčeny, sportowcej samej poradźi so njesměrnje wulki wukon wčera na Olympiskich zymskich hrach w južnokorejskim Pyeongchangu. Zakład jeho wuspěcha na 10kilometrowskim wubědźowanju biatletow bě bjezporočny wuslědk při třělenju. Olympiske złoto zaruči sej tuž Arnd Peiffer (srjedźa), slěbro Čech Michal Krčmář a bronzu Italčan Dominik Windisch (naprawo­). Foto: pa/MAXPPP

wozjewjene w: Sport
póndźela, 12 februara 2018 13:00

Poradźuja firmy wo inkluziji

Drježdźany (SN/at). Temje inkluzije chce Drježdźanska rjemjeslniska komora wjetšu kedźbnosć wěnować. Tohodla z poradźowanjom k inkluziji sobustawskim zawodam nowu posłužbu poskića, kaž z nowinskeje zdźělenki wuchadźa. Zo by nowy serwis zeskutkowniła, bě komora loni w decembrje zhromadne dźěło z Komunalnym socialnym zwjazkom Sakskeje dojednała. Partnerka jako poradźowarka za inkluziju je rjemjeslniskim zawodam połnojuristka Nora Tinter. Wona informuje tež nastupajo dźěłowe prawo. Zaměr je, zawody jako rjemjeslnistwu bliskich partnerow přewodźeć.

Poradźować budźe Nora Tinter nastupajo inkluziju mjez druhim wo móžnosćach spěchowanja a podpěry kaž tež wo zakonskich žadanjach. „Myslu sej, hdyž zawody wšelake móžnosće podpěry a jich lěpšiny lěpje znaja, su wone tež wotewrjeniše ludźi ze zbrašenjemi přistajić“, rjekny Tinter. Wona chce na to pokazać, zo je zbrašenemu dźěło dać jednorišo, hač sej to firmownicy husto předstajeja. Poradźowarka je zdobom partnerka zbrašenych, kotřiž chcedźa w rjemjesle dźěłać.

wozjewjene w: Hospodarstwo
póndźela, 12 februara 2018 13:00

Zapisnikaj lětadła namakali

Moskwa (dpa/SN). Po znjezboženju ruskeho lětadła z 71 pasažěrami su pomocnicy awtomatiskej zapisnikaj mašiny namakali. Byrnjež jedyn z nastrojow wobškodźeny był, móža fachowcy daty wuhódnoćić, kaž powěsćernja Interfax zdźěla. Lětadło typa An-148 ruskeho předewzaća Saratow-airline bě wčera mjeńšiny po wotlěće z Moskowskeho lětanišća Domodjedowo znjezbožiło. Nichtó ze sobu lećacych njeje njezbožo přežiwił. Přičiny njezboža móhli čłowjeske zaprajenje abo špatne wjedro być.

Napjatosće dale přiběraja

Tel Aviv/Damaskus (dpa/SN). Napjatosće na Bliskim wuchodźe dale strašnje přiběraja, po tym zo běchu sobotu israelske wojerske lětadło w israelsko-syriskej pomjeznej kónčinje wottřělili. Israelski ministerski prezident Benjamin Netanjahu je na to Syrisku a jeje zwjazkarjow před nowej strašnej konfrontaciju warnował. Mjeztym tež mjezynarodna starosć přiběra, zo móhło k direktnej konfrontaciji mjez Israelom a Iranom dóńć. Generalny sekretar UNO António Guterres je wšěch wobdźělenych k „hnydomnej deeskala­ciji“ namołwjał.

Prezidenta wotsadźić?

wozjewjene w: Kraj a swět
Mjeztym 27. póstniski „Ćah wjesołych ludźi“ su wčera popołdnju w Choćebuzu přewjedli. Na hodźiny trajacym ćahu wobdźěli so něhdźe 3 500 karnewalistow w cyłkownje 200 wobrazach. Po informacijach zamołwitych dožiwi jón něhdźe 80 000 ludźi. Za hodźacymi­ so temami wšak njetrjebachu nory lětsa dołho pytać: Ćahańca wokoło noweje wulkeje koalicije w Berlinje bě jedna z hłownych ćežišćow wusměšowanja. Foto: Michael Helbig

wozjewjene w: Łužica
póndźela, 12 februara 2018 13:00

To a tamne (12.02.18)

W kerčinje tčacy wostał je paduch w badensko-württembergskim Riedlingenje, po tym zo bě so podarmo do hrajneje hale zadobyć spytał. Wohnjowi wobornicy dyrbjachu 31lětneho z motorskej piłu wuswobodźić. Wón bě so do kazina zadobył, při čimž so alarmowa připrawa zapiny. Bjez rubizny muž na to ćekny, daloko pak njepřińdźe: Policisća jeho poł hodźiny pozdźišo w kerčinje metry dale namakachu a zajachu.

Kaž ručna granata wupadacy młynčk korjeninow je w Frankfurće nad Mohanom zasadźenje policije zawinował. Swědcy běchu podhladny nastroj při zachodźe garažoweho kompleksa namakali a zastojnikow wołali. Fachowcy hessenskeho kriminalneho zarjada pak móžachu jich změrować: Jednaše so wo korjeninowy młynčk, z kotrymž móžeš mjez druhim marihuanu rozmlěć.

wozjewjene w: To a tamne

Serbska debata

nowostki LND