Z wudaća: štwórtk, 15 měrca 2018

Ministerka podpisała

Drježdźany. Sakska statna ministerka za wědomosć a wuměłstwo dr. Eva-Maria Stange (SPD) je europsku wobydlersku iniciatiwy Minority SafePack podpisała. „Přisłušnicy narodnych mjeńšin su runočasnje wobydlerjo swojich komunow a krajow a tohorunja Europskeje unije. Polěpšenje mjeńšinowych prawow ma za wšitkich wobydlerjow EU wulku hódnotu“, wona rjekny.

Towaršnosć z nowym předsydu

Choćebuz. Nawoda decernata wokrjesneho zarjadnistwa Dubja-Błóta Heiko Jahn je nowy předsyda dohladowanskeje rady hospodarskeho regiona Łužica. Gremij je jeho jednohłósnje wuzwolił, towaršnosć wčera zdźěli. Zhorjelski krajny rada Bernd Lange (CDU) je nowy rěčnik gremija. Towaršnosć zwjazuje łužiske braniborske a sakske wokrjesy kaž tež měsće Choćebuz a Zhorjelc.

Nowa wěža wobchad polěpši

Z nalěćom a jutrami zaběraja so tele dny chowancy Dźěwinskeje pěstowarnje „Wroblace hnězdo“. Zhromadnje ze Jeaninu Schönl spaslichu sej Tabea, Jill, Finn-Luca, Felix, Ravael a Carlo korbik, do kotrehož pjelnjachu pjeršć a wusychu trawu. Hišće do jutrow ­wona zeschadźa. Hač do toho debja jutrowne jejko, kotrež potom do korbika połoža, a hotowy je jutrowny dar. Foto: Joachim Rjela

Zajutřišim, sobotu, wotměje Maćica Serbska swoju hłownu zhromadźiznu. Bosćan Nawka je so z předsydu serbskeho wědomostneho towarstwa Jurjom Łušćanskim rozmołwjał.

Knježe Łušćanski, kajke su ćežišća hłowneje zhromadźizny Maćicy Serbskeje?

J. Łušćanski: Po zwučenym wašnju najprjedy předsydstwo, potom pokładnik a skónčnje nawody jednotliwych sekcijow, rěčneju komisijow a pomnikoweho wuběrka swoje rozprawy přednjesu. Kaž dnjowy porjad dale předwidźi, budźemy so wo přichodnym dźěle našeho towarstwa rozmołwjeć. Někotre lěta hižo spožči Maćica tři připóznawanske myta, a to Hórnikowe, Mukowe a Šwjelowe. Wjeselimy so, zo móžemy lětsa Hórnikowe a Šwjelowe Myto přepodać.

Na dnjowym porjedźe zhromadźizny stej přednoškaj připowědźenej. Kotre temy ­referentaj wobjednawataj?

Skupiny a swójby móža ekskursije na Wotrowske hrodźišćo knihować

Kamjenc (SN/mwe). Ze zajimawymi a wotměnjawymi poskitkami Kamjenski Muzej zapadneje Łužicy wosebje swójby do swojeho domu wabi. „To su wospjet a znowa njedawne zymske prózdniny pokazali. Swójby z dźěćimi rady naše akciske dny a prózdninske poskitki wužiwaja. To nastupa tež dźěćace narodniny. Wone su połne dožiwjenjow a wobsahuja přeco tež praktiski dźěl“, rozłožuje Ines Müller-Spindler, zamołwita za zjawnostne dźěło. „Ze swójbnymi kaž tež přećelemi móža holcy a hólcy na narodninach w muzeju rjane hodźinki dožiwić.“

Zašłe tydźenje přihotowachu w Kamjencu wustajeńcu z wobrazami Wojerowčanki Gudrun Otto a ze skulpturami Cvetanki Kiriloweje-Schnorrbusch z Połč­nicy. Minjenu sobotu su přehladku wotewrěli. Wobě wuměłči čerpatej swoje inspiracije z přirody kaž tež z dožiwjenjow z ludźimi. A zhromadnje wonej nětko swoje twórby w elementariju wustajatej.

Dźěłowy kruh za serbske naležnosće Budyskeje měšćanskeje rady wotpokazuje, přewjesć jutry njedźelu namjetowanu swětłowu show. Za přičinu maja čłonojo cyłka nabožny wobsah jutrow.

Budyšin (CK/SN). Planowany móst z parkowanišća při Schliebenowej na Budyski hród měł so přichodnje k jutram wobswětlić. To pak je dźěłowy kruh na swojim wčerawšim posedźenju raznje wotpokazał. W nocy na jutrownu njedźelu swjeći so zrowastanjenje Jězusa jako najwyši swjedźeń křesćanskeho cyrkwin­skeho lěta. To njeda so ze spektaklom za turistow zjednoćić, gremij wuzběhny. Swětłowa show hodźi so runje tak derje k druhim składnosćam wuhotować.

W zornowcowej wsy Zemicy-Tumicy hotuja so z połnej paru na nowu turistisku sezonu. Zahajić chcedźa ju jutry njedźelu, 1. apryla, z předstajenjom klankodźiwadła. Wot meje hač do septembra budźe potom kóždu prěnju njedźelu měsaca w času wot 10 do 17 hodź. tež wulka piła za kamjenje widźeć. Z njej su kamjenjeće­sarjo w Zemicach-Tumicach hišće hač do 1990tych lět wšědnje dźěłali, wě wodźer hosći Martin Grohmann (na wobrazu) rozprawjeć. Dalši kruće zaplanowany termin wot meje ­do septembra je wodźenje po granitowej wsy, tohorunja stajnje prěnju njedźelu ­měsaca. Zajimcy zetkaja so potom při šuli na nawsy. Foto: Steffen Unger

Drježdźany (SN/MiR). Aktualna hodźina Sakskeho krajneho sejma wěnowaše so wčera nachwatanskemu procesej wuchodnych zwjazkowych krajow. Zapósłanc a čłon Europskeho wuběrka Marko Šiman (CDU) rozłoži próstwu knježerstwoweju frakcijow CDU a SPD pod hesłom „Europska unija dyrbi tež po lěće 2020 regionalnopolitiske wuwiće w Sakskej čujomnje podpěrać“. Za wosebje trěbne ma Šiman spěchowanje pomjeznych a wjesnych kónčin. „Chcemy w tych regionach měr docpěć“, skedźbni zapósłanc na njewurunane žiwjenske poměry na wsach a podłu mjezy porno žiwjenju w městach. „Trjebamy małe projekty, w kotrychž móža so wobydlerjo jako susodźa zetkawać.“

Marko Šiman pokaza na wosebitosć pomjeznych regionow, w kotrychž bydla husto narodne mjeńšiny a małe ludy. Wón napominaše, tež Serbow dale podpěrać. „Škit mjeńšin w EU njeje wšudźe dosć rjadowany. Tohodla wobsteji europska wobydlerska iniciatiwa Minority ­SafePack, kotraž małe ludy a mjeńšiny zwjazuje. Jako parlament ju podpěru­jemy a zdobom postupowanje sakskeho ministerskeho prezidenta Michaela Kretsch­mera, kiž je ju podpisał.“

Moskwa (dpa/SN). Ruska zdźěłuje tuchwilu reakciju na wupokazanje ruskich diplomatow z Wulkeje Britaniskeje zwady atentata z jědom na bywšeho ruskeho agenta Sergeja Skripala dla. To je rěčnica ruskeho wonkowneho ministerstwa Marija Sacharowa dźensa w Moskwje připowědźiła. Britiske knježerstwo bě wčera wukazało, zo ma 23 ruskich diplomatow w běhu tydźenja kraj wopušćić. Sacharowa kritizowaše, zo njeje Wulka Britaniska dotal Ruskej žanežkuli konkretne informacije posrědkowała. Ruska splećenje do nadpada raznje wotpokazuje.

Maas za nowu dynamiku

Sobudźěłaćerjo Berlinskich wólnočasnych kupjelow su dźensa warnowanski stawk zahajili. Z akciju chcedźa w tuchwilnych ­tarifowych jednanjach ćišć na dźěłodawarjow zesylnić. Do stawka namołwjało bě dźěłarnistwo ver.di. Te žada sej za přistajenych wo šěsć procentow wyšu mzdu, znajmjeńša pak 200 eurow wjace wob měsac. Foto: dpa/Paul Zinken

Kompjuterowy program je muža w Badensko-Württembergskej tak roznjem­drił, zo dyrbješe jeho mandźelska policiju wołać. Muž w Neuriedźe bě so powołanskeho překubłanja dla z programom za tabulkowu kalkulaciju bětlował. Při tym pak zadwělowaše a započa cychnować. Žona so naboja a wołaše zastojnikow wo pomoc. Jako woni přijědźechu, sedźeše muž kurjo před durjemi. Wón bě so sam změrował. Hač je digitalny problem rozrisać móhł, njeje jasne.

Dźiwje swinjo je so do chorownje w Aalenje zabłudźiło. Wone bě přez hłowny zachod do chorownje přišło a so ludźi njeboješe. Personal měješe swoju lubu nuzu, je z twarjenja wuhnać. Tež po tym dźiwje swinjo na to njemysleše so zaso do lěsa zminyć. Dokelž pak ludźi a wobchad wohrožeše, dyrbješe je policist po dorěči z hajnikom zatřělić.