Lětuše, mjeztym hižo 41. Biskopičanske běhi na dlěše distancy běchu sobotu do jutrow při chětro zymnym wjedrje. Cyłkownje wubědźowaše so nimale 450 běharjow a běharkow kaž tež lubowarjow walkinga ze Sakskeje, z Braniborskeje, Berlina, Nürnberga, Bochuma a z Čěskeje.
Na štyrjoch čarach wojowachu tež jednotliwi serbscy starterojo, a to dosć wuspěšnje. Cyłkownaj dobyćerjej na 2,5 km (43 w cilu, z nich 20 šulerkow) běštaj Budyskaj šulerjej Vincent Schröter (10:25 min) a Maris Rentsch (11:25 min). Z Budyskeje Serbskeje zakładneje šule běštej wosebje wuspěšnej Schadec Jitka a jeje bratr Jarek w starobnej skupinje U 10. Jarek běše dobyćer (10:34 min) a Jitka wobsadźi 2. městno (12:20 min). Walentin Brězan docpě w skupinje 9. městno (12:52 min).
Cyłkownaj dobyćerjej na 5,1 km (106 w cilu, z nich 55 žónskich) rěkaštaj Georg Bär z Drježdźan (16:55 min) a Marlene Golbs z Weinböhla (21:59 min). Budyski młodostny Leo Čórlich wobsadźi 7. městno w sk U 18 (24:52 min) a 83lětny, najstarši wot wšitkich w Biskopicach so wubědźowacy, Jurij Nuk z Budyšina, wobsadźi 4. městno (41:59 min).
SV Babelsberg 03
– FC Energija Choćebuz 0:1 (0:1)
Zestawa hosći: Spahić – Starcew, Stein, Matuwila, Schlüter, Gehrmann, de Freitas (62. Scheidhauer), Weidlich, Zimmer (85. Siebeck), Viteritti, Mamba (75. Geisler)
Podawkow w aprylu 2017 na samsnym městnje dla bě přiwisk FC Energije na braniborskim derbyju 2018 wuzamknjeny. Fanojo hosćićela pak pokazachu so solidariscy a zwuraznichu swoju njespokojnosć napřećo zamołwitym Němskeho koparskeho zwjazka z plakatami.
Hra sama bě na přerěznym niwowje. Marcelo de Freitas wuži we 18. min. kapitalny zmylk domjaceho cyłka k wrotam dnja. Po poł hodźinje bu wrotar hosćićela z čerwjenej kartu pochłostany, dokelž bě před šěsnatku hrajerja Energije foulował. Načolnik regionalneje ligi, sewjerowuchod pak njemóžeše lěpšinu wužić. Njerjana powěsć je ćežke zranjenje třělca wrotow Marcela de Freitasa. Jeho su po 60 hratych mjeńšinach z kopanišća njesli. Georg Zielonkowski
ST Traktor Malešecy
– TSV Połčnica 2:0 (1:0)
Zestawa domjacych: Riedesel – Bolz, Meier (46. Seiler), Meier, Krüger (83. Rott), Koksch, Stewig, Handrick, Benad, Hoferichter (88. Ludwig), Unger
Minjeny kónc tydźenja dóńdźe we wokrjesnej koparskej lize, stafli I k načolnemu zetkanju mjez třećim a prěnim tabulki. Kaž hižo w prěnjej hrě nazymu dobychu Malešenjo nětko ze samsnym wuslědkom 2:0. W zašłych dypkowych hrach druheje połserije njeběchu woni runje najlěpše wuslědki docpěli.