Z wudaća: póndźela, 14 meje 2018

póndźela, 14 meje 2018 14:00

Próstwu wotpokazać dyrbjeli

Što ma so w Chróšćanskej gmejnje a druhdźe při twarjenju wobkedźbować

Chrósćicy (JK/SN). Zo so na hornjołužiskich wsach wjele twari a modernizuje, je wuraz toho, zo so wobydlerjo tu derje čuja a zo chcedźa měć rjane a porjadne domy. Za nowotwar abo přetwar pak trjebaja twarsku dowolnosć a stejišćo přisłušneje gmejny.

Wo tajke stejišćo k přetwarej kólnje ­je tež swójba z Hórkow Chróšćansku gmejnsku radu prosyła. Na minjenym posedźenju so radźićeljo temje tuž něšto wobšěrnišo wěnowachu. Naležnosć nje­zda so tak lochka kaž mnohe hižo bjez problemow wobzamknjene a dowolene twarske naprawy wobydlerjow gmejny. Předewzaće swójby, přetwarić kólnju na carport, mjenujcy poćahuje so na twarjenje w tak mjenowanym wonkownym wobtwarjenskim pasmje a žada sej tuž wosebitu dowolnosć. Za to trěbne su wustawki, kotrež ma gmejnska rada schwalić. Při tym jedna so wo dołhodobny proces, za kotryž ma so tójšto wobkedźbować, mjez druhim stejišća najwšelakorišich nošerjow zjawnych zajimow.

wozjewjene w: Łužica
póndźela, 14 meje 2018 14:00

Policija (14.05.18)

Paduch sej lochko měł

Wóslink. Hnydom cyły slěd padustwow poradźi so njeznatemu minjeny pjatk we Wóslinku. Jeho „dźěło“ pak su jemu wobydlerjo chětro wolóžili. Přez njezamknjene pódlanske twarjenje dósta so cuzy dopołdnja do hłowneho domu a spakosći tam wjacore móšnje. Nimo toho pokradny koleso. Hnydom wokoło róžka zadoby so do zamknjeneje garaže, z kotrejež hrabny sej paduch moped typa Simson. Do toho pokradnjene koleso dyrbješe wón nětko wězo stejo wostajić. Policija pad přepytuje.

wozjewjene w: Policija
póndźela, 14 meje 2018 14:00

Do stawiznow města počuchali

Štóž so za stawizny zajimuje, bě kónc tydźenja na Wojerowskim hrodźe a w susodnym zwěrjencu runje na prawym městnje. Pod hesłom „Srjedźowěk zetka barok“ wjerćeše so tam wšitko wokoło zašłosće. Tak móžachu sej wopytowarjo stare rjemjesła zbližić, słuchachu na srjedźowěkowsku hudźbu a wobhladachu sej barokne reje. Zarjadowanje wotmě so we wobłuku 750. róčnicy prěnjeho pisomneho naspomnjenja města. Tež Smollerec swójba ze Židźinoho so po hrodźe rozhladowaše a zetka mjez druhim wjerchowku Katharinu Lubomirskej von Teschen, kotruž předstaji Cornelia Schnippa (nalěwo). Foto: Ulrike Herzger

wozjewjene w: Łužica
póndźela, 14 meje 2018 14:00

Porěči wo dołho zamjelčanej temje

Budyšin (SN). Na zajimawy wječor přeproša jutře, wutoru, w 19 hodź. Budyska měšćanska biblioteka na Hrodowskej. Tam čita Christopher Spatz ze swojeje knihi, kotraž jedna wo wjele lětdźesatkow zamjelčanej humanitarnej katastrofje po Druhej swětowej wójnje. Na sewjeru Wuchodneje Pruskeje zemrě tehdy 100 000 ludźi na sćěhi mrětwow a pobrachowaceho zežiwjenja. Syroty dyrbjachu so nadobo same starać, dóstachu so do sowjetskich dźěsćownjow abo ćeknychu do Litawskeje a stachu so z tak mjeno­wanymi „wjelčimi dźěćimi“. Wjacore tysacy z nich dowjezechu pozdźišo do Sakskeje a dachu je tu k hladanju abo ­k adopciji do swójbow. Wjele lět so wo tym rěčało njeje. Hakle w 1990tych lětach bu zjawnosć na wosud dźěći skedźbnjena. W swojej knize Christopher Spatz jich žiwjenje rekonstruuje a da potrjechenych samych rěčeć. Po studiju stawi­znow a germanistiki je Spatz lěta 2015 wo identiće wuchodopruskich wjelčich dźěći promowował. Zastup za jutřiši přednošk płaći štyri eura.

wozjewjene w: Serwis

Wjedro je zdźěla hižo lěćne, a to je stajnje­ znamjo wšitkim wolejbulistam, swójsku halu zawrěć a so won do pěska podać. 2015 přewjedźechu serbscy bičwo­lejbulisća prěni raz swójsku ligu a přihoty za mjeztym 4. bičwolejbulowu ligu běža hižo wot spočatka apryla. Kilian Hrjehor je Jurjej Bjeńšej, kiž změje­ tež lětsa zaso wotežki bičligi w rukomaj, někotre prašenja stajił.

Wjedro bě nimale cyły apryl wulkotne, w Róžeńće pak hišće nikoho widźał njejsym, kiž při wysokim saku wo dypki wo­ju­je. Bičwolejbulowa liga so potajkim hišće zahajiła njeje?

J. Bjeńš: Ně, kaž loni a předloni chcemy tež tónraz zaso w meji prěnje hry přewjesć. Tučasnje čakam hišće na wotmołwu toho abo tamneho hrajerja, kiž bě hižo w minjenymaj lětomaj pódla. Myslu sej a nadźijam so, zo so te abo tamne mustwo hišće přizjewi.

Nochce lětsa telko dwójkow sobu hrać?

wozjewjene w: Sport
póndźela, 14 meje 2018 14:00

Skónčnje zaso wuspěšni byli

SJ Chrósćicy

– SC Borea Drježdźany 4:1 (2:0)

Zestawa domjacych: Králíček – Cyž, Sentivan, Hrdlitschka, L. Zahrodnik, M. Zahrodnik, Henčl, Runt (84. Mark), Němec, Młynk (71. Dehn), Bogusz

Zo maja koparjo Chróšćanskeje SJ přeco zaso zranjenych hrajerjow, njeje žana nowosć. Při treningu zrani so nětko hišće Gabriel Zahrodnik. Tak sedźachu w partiji přećiwo Boreji Drježdźany tež hrajerjo z druheho mustwa na ławce, kaž na přikład Klemens Mark.

Wot započatka domjacy na trawniku dominowachu a bul w swójskich rjadach dźeržachu. Tak poradźi so po nadběhu 1:0 přez Miroslava Sentivana. A krótko do połčasa trjechi Bosćij Cyž 2:0.

wozjewjene w: Sport
póndźela, 14 meje 2018 14:00

Widźał, słyšał, napisał (14.05.18)

Awtor dźensa

Michał Nuk

Hižo dołho je w Budyskej měšćanskej radźe rěč wo zdźerženju Króny. Při wšěch diskusijach wo předani abo wottorhanju zarjadowanišća su wše­lake skupiny, kotrež maja wosebite zajimy­ na městnosći. Jedna z nich su čłonojo billardoweje sekcije „BiGa Budyšin“ sportoweho towarstwa MSV 04. Hrajerjo a hrajerki zetkawaja so štyri króć wob tydźeń­ w Billardowej garaži k zhromadnemu treningej a wotměwaja tu turněry kaž tež domjace hry we wobłuku krajneje ligi pool-billarda. Po wuprajenju nawody sekcije Steffena Hohlfelda by tuchwilu jara­ ćežko było podobnje wulku rumnosć namakać, hdźež móhli trening a wubědźowanja na aktualnym stawje zaručić.

Hišće w NDRskim času bě kehelowy billard­ w Sakskej a Braniborskej popu­larny – mjez Serbami so wosebje Beno Pětška z błótowskich Bórkowow za sport z kijom a kulemi horješe a je hišće dźensa za tamniše 5. mustwo aktiwny.

HZ Hórnikečanski jězor

– ST Marijina hwězda 2:1 (1:0)

Zestawa hosći: Schmidt – Czapik, Jurš, Bělk, Wróbl (83. Hübner), Čornak (63. Prasse), Winkler, Hawš, Pakoßnick, Eldor

Po jednym lěće přestawki witachu koparjo ST Marijineje hwězdy we Wulkich Ždźarach zaso raz Křesćana Bělka. Jich něhdyši kapitan steješe samo w startowej zestawje. Hnydom z prěnjej móžnosću pak domjacy nawjedowachu. Po róžku padny bul před noze Stevena Gahna, kiž njeda so dwójce prosyć a třěli jón do wrotow (6.). Slědowachu wjacore dobre a jara dobre móžnosće za Pančičanow. Matijas Wróbl (17.), Jakob Pakoßnick (25.), Ali Eldor (27.) a Oskar Hawš (36.) pak njemóžachu wurunać.

Po 65 hratych mjeńšinach ležeše bul skónčnje tež we wrotach Hórnikečanow. Paul Schmidt bě preciznje do šěsnatki flankował a Sebastian Prasse hrajny nastroj do wrotow stłóčił. W kónčnej fazy njemóžeše zadnje mustwo hosći situaciju porjadnje wujasnić a Tobias Wersch třěli 2:1 (84.). A wulku šansu Pakoßnicka wrotar Sven Dankhoff z wuběrnej paradu znješkódni (89.).

wozjewjene w: Sport
póndźela, 14 meje 2018 14:00

Bamž a patriarch chcetaj měr

Moskwa/Rom (B/SN). Rusko-ortodokski patriarch Kyril I. chce z bamžom Fran­ci­skom w Syriskej za měr wabić. Moskowski nawoda cyrkwje je z bamžom tele­fonował, zo by wo iniciatiwach z nim rěčał­. Wón wjedźe „měrwuskutkowacy dialog“ bjez politiskich zajimow, rjekny Kyril. Z konsultacijemi chcetaj bamž a patriarch pokročować, zo by so połoženje wobwliwowało.

Přećiwo testej samodruhich

Berlin (B/SN). Wjacore katolske zwjazki – mjez nimi Socialna słužba katolskich žonow a Němski zwjazk Carity – su pla­no­wa­ne rozšěrjenje profylaktiskeho přepytowanja samo­druhich krejneho testa dla kritizowali. Po jich měnjenju je tajka kročel pokiw na to, „zo njejsu zbrašene dźěći w našej towaršnosći přiběrajcy wita­ne“. Z krejnym testom hodźa so gene­tiske defekty hižo wot 9. tydźenja samo­druhosće zwěsćić.

Podpěra ewangelskej cyrkwi

wozjewjene w: Cyrkej a swět

Serbska debata

nowostki LND