Brüssel (dpa/SN). Předań a konsum ilegalneje drogi kokaina w Europje přiběratej. Tole wuchadźa z najnowšeje kóždolětneje rozprawy wobkedźbowarnje Europskeje unije za drogi a drogowu chcyćiwosć. Rozprawu staj nawoda zarjad- nišća Alexis Goosdeel a nutřkowny komisar EU Dimitris Avramopoulos wčera w Brüsselu předstajiłoj. Po jeju słowach je čistota drogi přerěznje přiběrała. W mnohich městach su naposledk wjace powostankow kokaina we wopłóčkach zwěsćili hač lěta do toho. Tež ličba drogowych namakankow je přiběrała.
Najnowše daty złožuja so na lěto 2016. To su w Europskej uniji něhdźe 98 000 króć kokain namakali, štož wotpowěduje 70,9 tonam. „Přirunujo z lětom 2015 su zamołwići něšto wjace kokaina sćazali, ličba namakankow pak je jasnje rozrostła.“ Starosće načinjeja nowe syntetiske opioidy, kotrež su w USA za ćežku drogowu krizu zamołwite. Nimo toho maja pokazki na to, zo w Europje dźeń a wjace drogow produkuja. Wobkedźbowarnja drogow z hłownym sydłom w Lissabonje daty jenož podawa. Bój přećiwo drogam je wěc jednotliwych čłonow EU.
Pančicy-Kukow (SN/MWj). Po wšěm zdaću poł měsaca prjedy hač planowane chcedźa w Pančicach-Kukowje nowy móst nad Klóšterskej wodu přepodać. Na wčerawšim posedźenju tamnišeje gmejnskeje rady mjenowaše wjesnjanosta Markus Kreuz (CDU) jako termin swjatočneho akta pjatk, 13. julija, w 17 hodź. Při planowanju wobšěrneho twarskeho projekta běchu dotal z toho wuchadźeli, zo budźe to kónc julija.
Hač k terminej přepodaća ma mały móst nad Klóšterskej wodu spotorhany być. Tohodla budu pěšcy nowy móst hižo do toho wužiwać móc, a to po chódniku, kotryž powjedźe při Hawšec kowarni zdźěla po nimale hotowym twarnišću. Posledni wotrězk statneje dróhi S 100 wot twarnišća do směra na Budyšin chcedźa hakle po klóšterskim swjedźenju ponowić. Tam ma so stara asfaltowa woršta wotškrabać a nowa poćahnyć.
Konjecy (SN/JaW). Přichodne wužiwanje towarstwoweho domu Delany w Konjecach steješe wčera w srjedźišću njezjawneho wuradźowanja zastupjerjow towarstwow, Konječanskeje wjesneje rady a gmejny Ralbicy-Róžant. Přičina zetkanja bě próstwa, směć wužiwać rumnosće bywšeho konsuma w towarstwowym domje za schadźowanja staršich a dźěći we wsy. Gmejna to dotal wotpokaza, dokelž njejsu rumnosće za tajke plany wužiwajomne, za saněrowanje pak njeje pjenjez.
Budyšin (CRM/SN). Drježdźanscy kapałnicy, jenički katolski hólči chór w našim regionje z lětstotki trajacej tradiciju jako něhdyši sakski dwórski chór, su minjenu njedźelu w rjedźe duchowneje hudźby w konkatedrali biskopstwa Drježdźany-Mišno hudźbny nyšpor wuhotowali. Zajim za wustup pod nawodom tachantskeho kapałneho mištra Matthiasa Liebicha w Budyskej tachantskej cyrkwi wopokaza so zaso raz jako wulki. Běše dźě tež někotryžkuli hólčec z našich kónčin něhdy čłon spěwneho ćělesa w sakskej stolicy.
Njeswačidło (Łu/SN). Z wjacorymi swjedźenskimi zarjadowanjemi swjeći Njeswačidło lětsa 750. narodniny. Do wobšěrneho jubilejneho programa słušeja tež wustajeńcy, kaž nowa wo wuměłcomaj, kotrajž staj w regionje skutkowałoj.
Mało znata profesionalna molerka Paula Lauenstein je wjele lět we Wětrowje bydliła a tu tworiła. Składnostnje jeje 120. narodnin předstaja nětko na Njeswačanskim hrodźe prěni raz wobšěrna galerija rysowankow a mólbow wuměłče. Při tym prěni raz zjawnje pokazaja originalny wobraz młodeje Serbowki Hańže z Nowoslic (rysowanka z tušu 1915), kotryž je serbski zběraćel w interneće namakał. Dalše wobrazy su wot tworjaceho wuměłca dr. Wolfganga Lehmanna, kiž bě za čas NDR jako dźěćacy lěkar tu dźěłał a je pozdźišo pseudonym „Dottore“ přiwzał. Wobaj wuměłcaj staj tež motiwy serbskich wsow a tam bydlacych ludźi zapopadnyłoj.
Wotewrjenje wustajeńcy je njedźelu, 10. junija, w 15 hodź. na žurli Njeswačanskeho barokneho hrodu. Přehladka wostanje hač do 19. awgusta přistupna.
Wochłódźenje pytali
Kubšicy. Wobstajnje horce wjedro bě snano přičina padustwa w Kubšicach. Kaž Zhorjelska policajska direkcija zdźěla, běchu so njeznaći w času wot minjeneje póndźele do srjedy dopołdnja do firmy na Lubijskej dróze zadobyli. Tam měrjachu so na sudobja z chłódźenskim srědkom. 14 wjetšich blešow, dohromady 100 kilogramow ćežkich, su pokradnyli. Předewzaćel trochuje škodu na něhdźe 6 000 eurow. Za čo móhli paduši chłódźensku maćiznu wužiwać, bohužel znate njeje.
Zaktiwnymaj młodźencomaj dojědźech sej spočatk meje do krosnowanskeho parka při Budyskim spjatym jězorje. Sportowcaj z Hórkow – 16lětny Julian Šołta a 17lětny Elija Žur – so prawidłownje zetkawataj, zo byštaj zhromadnje wonka na hrajkanišćach, sportnišćach, trampolinje – wšudźe, hdźež mataj móžnosć – zwučowałoj a nowe tak mjenowane triki wuspytałoj. Jeju konik stej sportowej družinje freerunning a parkour. Pohibujetaj so cyle lochko po městnosćach, přewinjetaj zadźěwki a zwjazujetaj při tym wšelke elementy, kaž na přikład salta do wšěch móžnych směrow, kreatiwnje do pohiba. Za mnohe tajke triki trjebataj wšak wěstu wysokosć. Hustohdy sej tuž Elija a Julian na třěchu abo wysoku žerdź na hrajkanišću zalězetaj a wottam na wosebje sportowske wašnje dele skočitaj.
Zo byštaj tróšku wotměny k swojemu hobbyjej měłoj, staj so nětko raz hinak wucychnowałoj a wupruwowaštaj krosnowanski park njedaloko sprjewineho města Budyšina.
Wěstosć najbytostniša